Rkaa̱ 18 - Xo̱jo̱n eén Néná

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín xota̱chjo̱on kꞌaán

¹ Kjisoo̱ íni̱jmi̱ì kui énkjiín xotaa̱, kjo̱a̱a̱ nga chjiéngá ku̱i̱chji̱a̱a̱ Néná ngatsjéni̱xtjin, kó nga ko̱yayàjín,

² bi̱ katsoó: –Ngo na̱xi̱ńdáꞌniú kisꞌijña ngo nendiꞌamasien xi katsakjónjín Néná, kó kamábendikónjín xotaa̱.

³ Kó ngo xota̱chjo̱on kꞌán xi je kꞌien xi̱ꞌii̱n, kisꞌijña ti̱ kui na̱xi̱ńdáꞌniuú, kui xota̱chjo̱on ngotjón ngotjón kijíkoón kui nendiꞌamasiee̱n, nga bi̱ katsoó: “Kixi̱ ti̱ꞌinsénní kjo̱a̱a̱ kjo̱a̱xti xi tjínna án ko̱jo kondra̱na.”

⁴ Kó kjín ni̱xtjin nga kamámejénjiín kui nendiꞌamasiee̱n nga katsꞌénseén, ta̱nga ti̱chaa̱n, bi̱ tsꞌén yíjin kon: “Ndatsi tsakjonjín an Néná, kó ti̱ bendikónjín an xotaa̱,

⁵ ta̱nga, kui xota̱chjo̱on tjítsꞌénxtína, ta̱sá kixi̱ sa̱ꞌinsée̱n, ngatꞌa̱ tsi ngotjón ngotjón kji̱ndi̱bákónna, ti̱chaa̱n sa̱ꞌínxtindana.”

⁶ Kó bi̱ katsó Ndi̱a̱a̱: –Ndaꞌyájnú ni xi katsó nendiꞌamasiee̱n xi kixi̱jiín.

⁷ Kó Néná a kixi̱jín tsꞌén sa̱ꞌínseén xota̱ xi je jaꞌájin xi nga jñó ko̱jo nga ni̱xtji̱e̱n ndyi̱chji̱a̱a̱ kui. A sa̱ꞌínkꞌandíyárií nga ko̱síko̱jo kui xotaa̱.

⁸ Xiyàjnúꞌun nga Néná tsá ko̱jo kixi̱ tsꞌén sa̱ꞌínseén xotaa̱. Ta̱nga nga kjo̱e̱ꞌe nginí ndií nda̱ xi̱ꞌii̱n, a sa̱kórií kjo̱a̱sꞌijin kꞌi̱e̱ tꞌanangii̱.

Bi̱ tsꞌén íjñá chi̱bo̱a̱ Kjisoo̱ énkjiín nda̱ fariseoo̱ ko̱jo nda̱ xi foaꞌáchjí to̱n xi machjítjé nii̱

⁹ Ngo ndi̱yà, Kjisoo̱ tsíchji̱a̱jo kui énkjiín xota̱ xi sꞌijii̱n nga ta̱kuítsí xi kixi̱ síndo ngindyi̱ko̱n Néná, kó tsꞌenchꞌó xota̱ xi ngasee̱, kó bi̱ katsó nga tsíchji̱a̱jo kui énkjiín:

¹⁰ –Jó já kijí na̱ngo̱xi̱i̱ nga tsíchji̱a̱a̱ Néná, ngo xi nda̱ fariseo̱, kó ngo xi nda̱ xi foaꞌáꞌyá to̱n xi machjítjé ni.

¹¹ Nda̱ fariseoo̱, kasasienkixi̱, kó bi̱ katsó nga tsíchji̱a̱a̱ Néná: “Na̱ꞌmi, tsjàa̱ ndokꞌóchjì ngatꞌa̱ an, jmí tsi bo̱a̱ kon an xikoó xota̱ xi ngasee̱ nga chejé, ko̱jo nga kixi̱jín, ko̱jo nga ndyi̱tsꞌèntꞌaa̱ kjo̱a̱ xkjín, ti̱nde bo̱a̱jín kón an xikoó kui nda̱ xi foaꞌáꞌyá to̱n xi machjítjé nii̱,

¹² jó ndi̱yà tsꞌenkjaꞌa an kjindiá yojona nga ngo xomana̱, kó tsja an tie nga úchán to̱n xi tsꞌen an.”

¹³ Ta̱nga nda̱ xi foaꞌáꞌyá to̱n xi machjítjé nii̱, kjin kisꞌijña, nde kamámejénjiín askotsijen ndiꞌakꞌajmi jàn, kó ta̱soboá tji̱ngo̱ yeꞌeé ni̱se̱e̱n, nga bi̱ katsoó Néná: “Na̱ꞌmi, ngatamani̱ma̱a̱ an, ngatꞌa̱ xota̱ jé án.”

¹⁴ Xiyàjnúꞌun nga kjiꞌanga jachó ndiꞌaa̱ kui nda̱ xi foaꞌáꞌyá to̱n xi machjítjé nii̱, jè kixi̱ tikón ngindyi̱ko̱n Néná, ta̱bo̱a̱jiín nda̱ xi ingoo̱, ngatꞌa̱ ta̱ꞌyaní xi je kꞌo̱xié yojoo̱, ni̱ma̱kjo̱a̱ si̱ꞌanjo̱, kó xi ni̱ma̱kjo̱a̱ kꞌo̱xié yojoo̱, kuí xí je ko̱ꞌna̱xié.

Kjisoo̱ bi̱ tsꞌén katsꞌénchikonñé jákjíndí xi̱xi̱i̱

¹⁵ Jachóchinií Kjisoo̱ jákjíndí xi̱xi̱, tsi̱ꞌe̱ nga sa̱ꞌínjo̱, ta̱nga xota̱ tsi̱ꞌe̱, katsꞌénxchánjo̱ xota̱ xi jachójo̱ kui jákjíndií.

¹⁶ Kó Kjisoo̱ tsíchji̱a̱a̱ xota̱a̱, kó bi̱ katsoó: –Te̱ꞌéndièjnúu̱ kui jákjíndií nga kjo̱e̱ꞌe̱kónna, kó ngata̱ ꞌbíchjájínjnúu̱, ngatꞌa̱ nínga botíxomaa̱ Néná, kuí xí ka̱ma kꞌo̱sꞌien kui xi xikoó kui jákjíndií.

¹⁷ Ja̱koxi̱ ni xi xiánjnúꞌun, nga xi kꞌo̱sꞌienjín nínga botixómá Néná xikoó ngo nda̱chí, ka̱májín kꞌo̱sꞌien.

Bi̱ tsꞌén tsíchji̱a̱ni̱jmìjo Kjisoo̱ ngo nda̱ cho̱n xo̱ngò

¹⁸ Kó ngo nda̱ ngito̱ko̱, bi̱ katsó nga asíyaá Kjisoo̱: –Ji Mostro̱ nda, mí ni xi sa̱ꞌin an tsi̱ꞌe̱ nga sa̱kóna kjo̱a̱mindyion ngatsjéni̱xtjii̱n.

¹⁹ Kó Kjisoo̱, bi̱ katsoó: –Míkjo̱a̱a̱ nga nda sení. Ta̱ꞌyajín xi nda, ta̱ ngototo Néná.

²⁰ Jè yé ji kjo̱a̱botíxomaa̱ Néná xi bi̱ tsoó: “Ka̱májín si̱ꞌintꞌée̱ kjo̱a̱ chjóo̱n, ka̱májín si̱ꞌinkꞌin ji xota̱, ka̱májín si̱ꞌinchejé, ka̱májín kꞌuindísétaꞌin ji ngo xota̱, che̱ndikín jí na̱ꞌmíi̱ ko̱jo na̱áa̱n.”

²¹ Sꞌe̱ bi̱ katsó kui nda̱a̱: –Ngayeje kui nii̱ je katsꞌenkjatjosón an ndeskande koó nga nda̱chí an.

²² Nga tsintꞌié Kjisoo̱ kui nii̱, bi̱ katsó: –Ingo ni chaja ngasee̱: Tatíñí ngayeje ni xi tjiín, kó to̱o̱n kui nii̱ xota̱ ni̱ma̱a̱ te̱ꞌée̱, kó bo̱a̱ tsí tsꞌén nga kꞌuieé ngo kjo̱a̱cho̱n ndiꞌakꞌajmi jàn, sꞌe̱ ndibétji̱ngíní ngijee̱.

²³ Kósꞌe̱ kui nda̱a̱ nga tsintꞌié kuí nii̱, achichí ndasen kamaá, ngatꞌa̱ achichí cho̱n kamá.

²⁴ Nga kamábe Kjisoo̱ nga ndasen kisꞌijña kui nda̱a̱, bi̱ katsó: –¡Achichí niꞌin kjiꞌi nga xota̱ xi tsie kjo̱a̱cho̱n tjiín nga kꞌo̱sꞌien nínga botíxomaa̱ Néná!

²⁵ Ngatꞌa̱ ta̱sá niꞌínjín kjiꞌi nga ngo cho̱toꞌoyitsꞌe̱n kjo̱a̱ꞌaya ti̱xa̱a̱ ngo ńdo, ta̱bo̱a̱jiín nga ngo nda̱ cho̱n kꞌo̱sꞌien nínga botíxomaa̱ Néná.

²⁶ Kó xota̱ xi tsintꞌié kuí nii̱, bi̱ katsó: –Ja̱ ꞌyání xi kjo̱tjoꞌa tsobo̱a̱.

²⁷ Sꞌe̱ Kjisoo̱, bi̱ katsó: –Ni xi ka̱májiín sa̱ꞌín ngo xota̱, ka̱márií sa̱ꞌín Néná.

²⁸ Kósꞌe̱ bi̱ katsó Peé: –Ja̱ jè yé ji, nga ji̱n ngayeje ni xi tjínjne̱ ikꞌíjñámasienjne̱, kó kꞌi̱e̱ timatji̱ngijne̱ ji.

²⁹ Kósꞌe̱ Kjisoo̱, bi̱ katsó: –Ja̱koxi̱ ni xi xiánjnúꞌun nga jmíjín ngo xota̱ xi íjñá ndiꞌaa̱, ko̱jo xi xchaá, ko̱jo ntsꞌi̱e̱, ko̱jo chjo̱ón, ko̱jo ndií, ta̱ngatꞌanii̱ nínga botixómá Néná,

³⁰ xi sa̱kójiín tsie ngase ni kui nga̱sondie xi̱ꞌbi̱, kó nga nga̱sondie xi sꞌe̱ ndibaá sa̱ko̱ó kjo̱a̱mindyion ngatsjéni̱xtjii̱n.

Kjisoo̱ bi̱ tsꞌén katsóyà nginí xi ma jaán ndi̱yà nga ko̱yà

³¹ Sꞌe̱ Kjisoo̱ tsíchji̱a̱jotꞌaxín já xí tiejoó, kó bi̱ katsoó: –Tsitsíjenjnúu̱ nga kꞌi̱e̱ ndyi̱mongínnijíngí xtji̱e̱e̱n na̱xi̱ńdáꞌniú Jerusale̱n, kó kjo̱tjosón ngayeje ni xi je katsꞌénꞌindó já chji̱ni̱e̱ꞌe̱én Néná kjo̱a̱a̱ ndií nda̱ xi̱ꞌii̱n.

³² Ngatꞌa̱ si̱ꞌankꞌasꞌien ngi̱ya tsja xota̱ xi jundío̱jín, kó ko̱jno̱cha, ko̱jo chꞌo kꞌuiín, ko̱jo ko̱ti̱tiajón.

³³ Kó ngije kjoaá, si̱ꞌankꞌien, ta̱nga xi ma ján ni̱xtjin kjo̱a̱ꞌáꞌyaá.

³⁴ Kó kui jaá, nde chií kamákjínjiín kui nii̱. Akjaꞌmaa̱ kui eén, kó kamákjínjiín ni xi kiꞌmií.

Bi̱ tsꞌén katsꞌéndaya Kjisoo̱ ngo nda̱ xi ti̱ka̱

³⁵ Ngije ma kjachó má Kjisoo̱ na̱xi̱ńdáꞌniú Jeriko̱, ngo nda̱ ti̱ka̱ tikónndo tꞌa ndi̱ya̱à nga tsꞌénmíꞌá to̱nchji̱e̱.

³⁶ Kó nga tsintꞌié nga xota̱ kjiín xi ndyi̱foaꞌa, asíyá mí ni xi kjima.

³⁷ Kó kiꞌmíyaà nga Kjisoo̱ nda̱ Nasaree̱t xí kjoaꞌaa̱.

³⁸ Kósꞌe̱ nda̱ ti̱ka̱a̱, bi̱ katsó nga askjandáyà: –¡Kjiso̱, ji xi xota̱ tji̱e̱e̱ Ndabii̱ ji, ngatamani̱ma̱a̱ an!

³⁹ Kó xota̱ xi tjimátjoón Kjisoo̱, katsꞌénxchánjo̱ tsi̱ꞌe̱ nga ngiti̱ skja̱ndáyàjín, ta̱nga kui nda̱ ti̱ka̱a̱, ta̱sá má ꞌniú askjandáyà ngase, nga bi̱ katsó nginí: –¡Xota̱ tji̱e̱e̱ Ndabi̱, ngatamani̱ma̱a̱ an!

⁴⁰ Kósꞌe̱ Kjisoo̱ kasasien, kó tsíꞌá tsi̱ꞌe̱ nga kjo̱chóchinií nda̱ ti̱ka̱a̱, kó ngije jachó, bi̱ katsoó Kjisoo̱:

⁴¹ –Mí ni xi mejeén nga sa̱ꞌiin. Kó nda̱ ti̱ka̱a̱, bi̱ katsó: –Ndi̱a̱, mejénna nga ka̱matsijenna.

⁴² Kó Kjisoo̱, bi̱ katsoó: –Ngatamatsijeen. Kjo̱a̱sꞌijìi̱n xí je tsꞌaxiéꞌaá ji.

⁴³ Ti̱ kjiꞌa kamátsijen nginií nda̱ ti̱ka̱a̱, kó kijítji̱ngii̱ nga katsjaá kjo̱a̱je Néná, kó ngayeje xota̱ na̱xi̱ńdá xí kamábe kui nii̱, katsꞌéntsjaà Néná.