Rkaa̱ 16 - Xo̱jo̱n eén Néná

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín moso̱ xi májín ꞌniátakoón

¹ Kjisoo̱, bi̱ katsoó xota̱ tsi̱ꞌe̱: –Ngo ndi̱yà kisꞌijña ngo nda̱ cho̱n xi kisꞌiee̱ ngo moso̱ xi askoo̱n ngayeje nii̱, ko̱jo xi katsꞌénxájo̱ to̱o̱n, kó kui nda̱ cho̱o̱n tsintꞌié nga mosoo̱ katsꞌénkjién to̱o̱n.

² Kó kui nda̱ cho̱o̱n tsíchji̱a̱a̱, kó bi̱ katsoó: “Míkjo̱a̱a̱ nga bi̱ kjiꞌi ni xi tsꞌéntꞌie an kjo̱a̱a̱ ji. Ti̱ꞌinkꞌasꞌinní xki̱ kjo̱a̱a̱ ngayeje ni, ko̱jo to̱n xi tjínna, ngatꞌa̱ jè ngiti̱ ka̱májín nga moso̱na ka̱ma ngase ji.”

³ Kósꞌe̱ nda̱ mosoo̱, bi̱ tsꞌén katsꞌénkjó: “Mí xí sa̱ꞌin an. Ngatꞌa̱ ngije ngiti̱ tsja̱axájínna ndi̱a̱na, ka̱májínna tsi tꞌanangi kokjan an, kó achichí soboána nga to̱nchji̱e̱ kuíꞌá an.

⁴ Áa̱n, jè be an mí ni xi sa̱ꞌin an tsi̱ꞌe̱ nga ngije ko̱ngatji̱ngina ndi̱a̱na kjo̱a̱a̱ xá moso̱ xi tjítsꞌen an, ngayeje xotaa̱ skjíxꞌána nga̱ntjo̱a̱ ndiꞌaa̱.”

⁵ Kó tsíchji̱a̱a̱ ngayeje xota̱ xi tjitjieén to̱o̱n ndi̱a̱a̱, kó bi̱ katsoó xi tjoón: “Kótjín tjitjiée̱n tsi̱ꞌe̱ ndi̱a̱na.”

⁶ Bi̱ katsó kui nda̱a̱: “Úchán barri̱ isti̱.” Sꞌe̱ bi̱ katsó mosoo̱: “Jiꞌín chjábé jí xo̱jo̱n nínga kjitꞌa xki̱i̱, kó ichítié tsí tꞌíjñíi̱.”

⁷ Sꞌe̱ bi̱ katsoó kje̱ꞌe xí tjitjiée̱n nga: “Kó jí, kótjín tjitjiée̱n.” Sꞌe̱ bi̱ katsó kui nda̱a̱: “Tie mi̱ koxta̱ to ndso̱ko̱a̱n ṉño̱pan.” Kó bi̱ katsó mosoo̱: “Jiꞌín chjábé jí xo̱jo̱n nínga kjitꞌa xki̱i̱, kó jin mi̱ koxta̱ tꞌíjñíi̱.”

⁸ Nga kamábe kui nii̱ nda̱ xi tsi̱ꞌe̱ xaá, achichí katsꞌéntsjajo̱ kui moso̱ xi ndajiín, ngatꞌa̱ ta̱nisién kjínkón kamá nga katsꞌén kui nii̱. Ngatꞌa̱ xota̱ xi tjín kuí nga̱sondiee̱, maña̱ ngase tsꞌénjo̱ xota̱ xkjín, ta̱bo̱a̱jiín ni xi tsꞌén xota̱ xi chji̱a̱ni Néná.

⁹ Kó an bi̱ xiánjnúꞌun jún: Ti̱ꞌankjiénjnú kjo̱a̱cho̱n xi tjín kuí nga̱sondiee̱ nga ko̱si̱ko̱jójnú xotaa̱, tsi̱ꞌe̱ nga kjín ngase amingo̱ kꞌuiéjnú, ki̱a̱ ka̱maa̱ nga kju̱i̱e̱ kui kjo̱a̱cho̱o̱n, Néná tsja̱ajnú ngi̱ndie xi tikón ngatsjéni̱xtjii̱n.

¹⁰ Xota̱ xi nda maꞌniátakón nga skoón ni xi chiboa, ti̱ ka̱maꞌniátakón nga skoón ni xi tsie, kó xota̱ xi kixi̱jín tsꞌénkjátjosón ni xi chiboaa̱, ti̱ bo̱a̱ ti̱ tsꞌén ni xi tsiee̱ kixi̱jín ka̱ma nga.

¹¹ Ja̱ tsi kamáꞌniátakónjínjnú nga kichonjnúu̱ kjo̱a̱cho̱o̱n kui nga̱sondie jeé, ꞌyá xí tsja̱ajnú nga xchindàjnú kjo̱a̱cho̱n xi ndaa̱.

¹² Kó tsi ni xi tsi̱ꞌe̱ kje̱ꞌe xota̱ kamáꞌniátakónjínjnú nga kamájínjnú kichonjnúu̱, ꞌyá xí tsja̱ajnú ni xi tsa̱jún.

¹³ Nde ngojín moso̱ xi jó ndi̱a̱ sa̱ꞌínseén, ngatꞌa̱ ngo chꞌo ka̱maa̱, kó xi ingoo̱ tjó ka̱maa̱, ko̱jo tsi ngo ndasen ka̱maa̱, kó xi ingoo̱ ndasénjín ka̱maa̱. Ka̱májín mosoo̱ Néná ko̱jo mosoo̱ kjo̱a̱cho̱o̱n ka̱majnú.

¹⁴ Kó tsintꞌié kuí nii̱ já fariseoo̱, kui xota̱ xi achichí tsjá kamaá to̱o̱n, kó tsajnókie Kjisoo̱.

¹⁵ Kó Kjisoo̱, bi̱ katsoó kui jaá: –Jún ngindyi̱ko̱n xotaa̱ kixi̱ májnú yojojnú, ta̱nga Néná be kókjiꞌi ini̱ma̱jnú. Ngatamakjínjnú nga ni xi achichí bendikón xotaa̱, ngindyi̱ko̱n Néná ni xi ta̱nisién ꞌniú chꞌokjiꞌi boá.

Bi̱ tsꞌén akóyá Kjisoo̱ kjo̱a̱a̱ kjo̱a̱kitii̱ ko̱jo nínga botixómá Néná

¹⁶ Kjo̱a̱kitii̱ ko̱jo ni xi katsꞌénꞌindó já chji̱ni̱e̱ꞌe̱én Néná jetꞌani ngaskande nga kisꞌijña Jua̱ xi botíndaá, kó ndeskande koó kjiꞌa tjíꞌbíni̱jmì éntjatsi̱e̱e̱ nínga botixómá Néná, kó ngayeje xotaa̱ xi tsꞌén ngo kjo̱a̱ꞌniú, tsi̱ꞌe̱ nga kꞌo̱sꞌien kui ngi̱ndiee̱.

¹⁷ Ta̱nga nde chií niꞌínjín tsi kju̱i̱e̱ ndiꞌakꞌajmii̱ ko̱jo tꞌanangii̱, ta̱bo̱a̱jiín nga xcha̱jatꞌa chií ni xi kjitꞌa xo̱jo̱n kjo̱a̱kitii̱ Néná.

Bi̱ tsꞌén akóyá Kjisoo̱ kjo̱a̱a̱ xota̱ xi je ixán kó ꞌbíndo xkjín

¹⁸ Ta̱ ꞌyání xi ku̱i̱ꞌíjñá chjo̱ón, kó tsi kje̱ꞌe chjo̱on ku̱i̱xanjo̱, tsꞌén bendikónjín kjo̱a̱bixaa̱n, kó xi ku̱i̱xanjo̱ chjo̱on xí je ikꞌíjñaá, ti̱ tsꞌén bendikónjín kjo̱a̱bixaa̱n kui nga.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ nda̱ cho̱o̱n ko̱jo Laá

¹⁹ Ngo nda̱ cho̱n kisꞌijña, xi achichí tsjakon ńjño tsajá, kó ndyiojón ndyiojón katsꞌén sꞌué, nga katsjá nichinie xi chjí.

²⁰ Nga̱ntjo̱a̱ ndiꞌaa̱ kui nda̱ cho̱o̱n, kisꞌijña ngo nda̱ ni̱ma̱ xi tsíꞌá chji̱e̱ xi ꞌmí Lá, xi tsajaá ṉdo,

²¹ kó achichí bojó kamaá kui nda̱a̱, kó kamámején maá iskjinie ni xi ixóngií yámíxa̱a̱ nda̱ cho̱o̱n, kó ngaskande ńñaá katomájón má ṉdoo̱ Laá.

²² Ti̱chaa̱n jachó ni̱xtjin nga kꞌien Laá, kó ndítsjiee̱ Néná kijíjo̱ ngi̱ndie nínga tikón Abraa̱n, kó ti̱ kꞌien nda̱ cho̱o̱n nga, kó akjanijín kuí.

²³ Kó nda̱ cho̱o̱n ndo̱bo̱a̱ṉkꞌi̱e̱e̱n kiniꞌánkjí, kó achichí kjo̱a̱ni̱ma̱ kiniꞌánkjaꞌa ki̱a̱a̱, sꞌe̱ ti̱chaa̱n kamábe nínga tikón Abraa̱n, kó nga Laá ki̱a̱ tikóntꞌaa̱.

²⁴ Kósꞌe̱ nda̱ cho̱o̱n tsíchji̱a̱a̱ Abraa̱n, nga bi̱ katsoó: “Na̱ꞌmi Abraa̱n, ngatamani̱ma̱a̱ an, kó nangíyé ji Laá tsi̱ꞌe̱ nga ku̱i̱ꞌíngandá ndáfoa to̱ko̱tsja kósꞌe̱ ngatsꞌénkꞌándyi̱ chií najén án, ngatꞌa̱ achichí kjo̱a̱ni̱ma̱ tsꞌénfoaꞌatio an ngi̱jin kui ndiꞌií.”

²⁵ Ta̱nga Abraa̱n, bi̱ katsoó: “Ji ndí, ngatjaꞌátsjiee̱n nga kjiꞌanga kixindyin ji nga̱sondie achichí ni katseꞌeé, kó Laá achichí ni xi ndajín xi katseꞌeé kui, ta̱nga ngotꞌe̱ ꞌne̱ Laá achichí tjíniꞌándajoo̱n kꞌi̱e̱e̱, kó ji achichí tsie kjo̱a̱ni̱ma̱ tibitjatí.

²⁶ Kó kjo̱a̱a̱ ngayeje kui nii̱, ngo ti̱xa̱na̱nga̱ tikón ngamasienná, kó achichí kjin tindyionñáa xingi̱, kó májín tsi ngo xi kꞌi̱e̱ ko̱e̱je̱ni jàn jàn, ko̱jo tsi ngo xi jàn jàn kji̱ndi̱báni nga kji̱ndi̱bá kꞌi̱e̱e̱.”

²⁷ Sꞌe̱ bi̱ katsó kui nda̱ cho̱o̱n: “ꞌNiú míꞌaá na̱ꞌmi, tsi̱ꞌe̱ nga ko̱na̱ngíyé ji Laá ndiꞌaa̱ na̱ꞌmina,

²⁸ ngatꞌa̱ ún má ntsꞌié án xi ka̱tso̱yaa̱, tsi̱ꞌe̱ nga ti̱ kꞌi̱e̱jín kji̱ndi̱bá kꞌi̱e̱ kui ngi̱ndie nínga tsie kjo̱a̱ni̱ma̱ bitjatioó.”

²⁹ Sꞌe̱ Abraa̱n, bi̱ katsoó: “Jè tikoón kjo̱a̱kitii̱ Moisee̱, ko̱jo ni xi katsꞌénꞌindó já chji̱ni̱e̱ꞌe̱én Néná, ¡Ngatintꞌièꞌeén ni xi ítꞌa kui jaá!”

³⁰ Sꞌe̱ bi̱ katsó nginí kui nda̱ cho̱o̱n: “Jmí na̱ꞌmi Abraa̱n, ta̱nga tsi tjín xota̱ xi je kꞌien xi ko̱e̱je̱koo̱n kui jaá, sa̱ꞌínkꞌoyà yojoo̱ kjo̱a̱a̱ ni xi ndajínkjiꞌi xi ndyi̱tsꞌèn.”

³¹ Ta̱nga bi̱ katsó Abraa̱n: “Tsi ntꞌiéjiín kjo̱a̱kiti xi ítꞌa Moisee̱, ko̱jo ni xi katsꞌénꞌindó já chji̱ni̱e̱ꞌe̱én Néná, ti̱ bo̱a̱ ti̱ tsꞌén nde sꞌi̱jinjiín nga tjín xota̱ xi je kꞌien xi kjo̱a̱ꞌáꞌyaá.”