Rkaa̱ 14 - Xo̱jo̱n eén Néná

Bi̱ tsꞌén katsꞌéndaya Kjisoo̱ ngo nda̱ xi ma ske yojoo̱

¹ Kó ngo ni̱xtjin ndikón, Kjisoo̱ kijíkjinie ṉño̱ ndiꞌaa̱ ngo nda̱ xi tjiín xá, xí nda̱ fariseo̱, kó já fariseo̱ xi ngasee̱ askotsijen ndá ndaá ni xi tjítsꞌén Kjisoo̱.

² Kó ngo nda̱ xi ske yojoo̱ kisꞌijña ngindyi̱ko̱n kui.

³ Kó Kjisoo̱, bi̱ katsoó já chji̱ni̱e̱kjo̱a̱kitii̱ ko̱jo já fariseoo̱: A tsjandiè kjo̱a̱kitii̱ nga ka̱ma, axa̱ nga ka̱májín si̱ꞌandayà ngo xi oo̱n nga ni̱xtjin ndikón.

⁴ Xió kisꞌińdo kui jaá, kó Kjisoo̱ katsꞌéndaya nda̱ xi oo̱n, sꞌe̱ katsꞌénkjí.

⁵ Kó Kjisoo̱, bi̱ katsoó kui jaá: –Tsi ngo ndíjnú ko̱jo tsi cho̱yojojnú kꞌo̱kayà ngo ndáńchꞌi̱, a mí tsí ti̱ kjiꞌa ko̱ꞌna̱xiéjnú ndatsi ni̱xtjin ndikón.

⁶ Kó nde jmíjín xi kamákón nga tsíchji̱a̱.

Bi̱ tsꞌén tsíchji̱a̱ Kjisoo̱ kjo̱a̱a̱ xota̱ xi fí ngo ndiꞌibixan

⁷ Kjisoo̱ kamábe kótsꞌèn xotaa̱ foaꞌájin yáxíríe̱ xi tjón síndotꞌa yámíxa̱a̱, kó bi̱ katsoó nga íni̱jmi̱ì kui énkjiín:

⁸ –Kjiꞌanga tjín káꞌá xota̱ xi ka̱tso̱yaa̱ tsi̱ꞌe̱ nga kꞌuin jí ngo ndiꞌibixan, ngata̱ jijín tjón mindyin ji ngi̱ndie xi tjoón, ngatꞌa̱ tsi kjo̱chó ngo xi ndikón ngase ta̱bo̱a̱jiín jí,

⁹ kó tsi kjo̱chó xi katsóyaà kui sꞌueé, kó bi̱ ka̱tso̱o̱: “Te̱ꞌéndièe̱ nga kꞌuijñá kui ngi̱ndiee̱ kui xi̱ꞌbi̱”, kó achichí soboá ka̱maa̱ nga ku̱i̱ndyin ji ngi̱ndie xi fetꞌaa̱.

¹⁰ Ta̱sá kjiꞌanga tjín xí ka̱tso̱yaa̱ tsi̱ꞌe̱ nga kꞌuin jí ngo ndiꞌibixan, tꞌen ji, kó ngaskande ngi̱ndie nínga fetꞌanii̱ tindyin ji, tsi̱ꞌe̱ nga, nga sku̱i̱e̱e̱ xi tsi̱ꞌe̱ sꞌueé, bi̱ ka̱tso̱o̱: “Nda̱ amingo̱, ja̱bíꞌi̱n, ta̱sá kꞌi̱e̱ tindyin ji nínga tikón kui ngi̱ndie xi tjón xi̱ꞌbi̱”, kó kjiꞌá boá nga kꞌuieé kjo̱a̱je ngindyi̱ko̱n xota̱ xi nijan síndojoo̱ tꞌa yámíxa̱a̱.

¹¹ Ngatꞌa̱ ta̱ꞌyaní xi je kꞌo̱xié yojoo̱, ni̱ma̱kjo̱a̱ si̱ꞌanjo̱, kó xi ni̱ma̱kjo̱a̱ kꞌo̱xié yojoo̱, kuí xí je ko̱ꞌna̱xié.

¹² Kjisoo̱ ti̱ bi̱ ti̱ katsoó nda̱ xi katsóyaà sꞌué xí katsꞌén: –Kjiꞌanga si̱ꞌin ji ngo sꞌué, ko̱jo tsi nichinie ko̱e̱ꞌée̱ xotaa̱, ngata̱ ꞌmíyejíi̱n já amingoo̱, ko̱jo já ntsꞌie, ko̱jo xingi̱, ko̱jo xota̱ tꞌa ndiꞌàa̱ xi cho̱o̱n, ngatꞌa̱ kui xotaa̱, ka̱tso̱yà nginií ni xi sa̱ꞌín, kó tsja̱ꞌóyá nginií ni xi tiboeꞌée̱.

¹³ Ta̱sá kjiꞌanga ngo sꞌué si̱ꞌin, tꞌíyée̱ xota̱ ni̱ma̱a̱, ko̱jo xota̱ xi ni̱ma̱ tsja, ko̱jo xota̱ xi májín fí, ko̱jo xota̱ xi ti̱ka̱,

¹⁴ kó achichí tsjangatamaa̱, ngatꞌa̱ kui xotaa̱ ka̱májiín ku̱i̱ꞌíchjií, ta̱nga kjiꞌá boá nga ka̱machjií, kjiꞌanga kjo̱a̱ꞌáꞌyaá xota̱ xi kixi̱i̱.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín nga chinie ṉño̱ nga jñoó

¹⁵ Nga tsintꞌié kuí nii̱, ngo nda̱ xi tikóntꞌajo̱ yámíxa̱ Kjisoo̱, bi̱ katsó: –Achichíra̱tsjaa̱ xi skji̱ni̱e̱ nichinie nga ko̱tíxoma Néná.

¹⁶ Sꞌe̱ Kjisoo̱, bi̱ katsoó kui nda̱a̱: –Ngo nda̱ katsꞌénda nichinie nga jñoó, kó achichí xota̱ katsóyaà.

¹⁷ Kó nga jachó chi̱bo̱a̱ nga xi̱ni̱e̱ kui nii̱, katsangiya nda̱ mosoo̱, nga bi̱ ka̱tso̱o̱ xota̱ xi katsóyaà: “Ndibájnú ꞌne̱ ngatꞌa̱ jè tikónnda ngayeje nii̱.”

¹⁸ Kó ngayeje xotaa̱ ítsꞌi̱yanii̱ nga tsíꞌá ngo kjo̱a̱niꞌánjetakón, ngatꞌa̱ kijíjín, kó xi tjoón, bi̱ katsó: “Kjo̱a̱a̱ nga ngo nangi tsꞌatsie an, kó chjiéngá kui kjuínkátsijée̱n, ti̱ꞌinjetakínní.”

¹⁹ Ingo xi bi̱ katsó: “Kjo̱a̱a̱ nga ún ꞌniú cho̱yojo xi̱ꞌin xi niꞌánxájo̱ tsꞌatsie an, kó kui tsꞌénfíkjitꞌayájo̱ an, ti̱ꞌinjetakínní.”

²⁰ Kó ingo xi bi̱ katsó: “Kjo̱a̱a̱ nga ngotꞌe̱ maá ixán an, kuíni nga ka̱májín kjuín án.”

²¹ Nga jachó nginí kui mosoo̱, katsóyaà ndi̱a̱ xi tjítsꞌén sꞌueé, kó achichí katsꞌénxchán kuí nda̱a̱, sꞌe̱ bi̱ katsoó mosoo̱: “Tꞌen ji ngayeje nínga síndo ndi̱tse̱n, ko̱jo ndi̱yàtié, kó ndibéje̱ ngayeje xota̱ ni̱ma̱, ko̱jo xota̱ xi ni̱ma̱ tsja, ko̱jo xota̱ xi ni̱ma̱ se, ko̱jo xota̱ xi ti̱ka̱.”

²² Kó nda̱ mosoo̱, bi̱ katsó: “Ndi̱a̱, jè katsꞌen an ngayeje ni xi kasení, kó ta̱kó síndo ngase ngi̱ndie.”

²³ Kó ndi̱a̱ xi tsi̱ꞌe̱ sꞌueé, bi̱ katsoó mosoo̱: “Tꞌen ji ngayeje ndi̱yàngí, ko̱jo ndi̱yà kꞌijñá, kó ndibéje̱ kjo̱a̱ꞌniú ngayeje xotaa̱, tsi̱ꞌe̱ nga stsi̱e̱ ndiꞌana.”

²⁴ Ngatꞌa̱ xiyaá nga nde ngojín xota̱ xi xá katsóyàñáa xi skótꞌa nichinie xi kachján ndiꞌana.

Bi̱ tsꞌén tsíchji̱a̱ Kjisoo̱ kjo̱a̱a̱ nga xotaa̱ chjí sꞌi̱ngii̱ nga ko̱e̱je̱tji̱ngii̱ Kristoo̱

²⁵ Ngo ndi̱yà nga achichí xota̱ xi tjimájo̱ Kjisoo̱, ta̱tra kasasien, kó bi̱ katsoó ngayeje xotaa̱:

²⁶ –Tsi tjín káꞌá xota̱ xi mejeén ko̱e̱je̱tji̱ngina, kó tsi ꞌniú tjó ngasee̱ na̱ꞌmii̱, ko̱jo na̱aa̱n, ko̱jo chjo̱ón, ko̱jo ndií, ko̱jo ntsꞌi̱e̱, ko̱jo ndichja, ko̱jo ngaskande yojoo̱, ka̱májín xota̱na ka̱ma.

²⁷ Kó xi mejénjiín nga ko̱a̱ꞌa̱ kroo̱, sꞌe̱ ko̱e̱je̱tji̱ngina, ka̱májín xota̱ tsa̱ꞌa̱n ka̱ma.

²⁸ ꞌYá jún xi tsi ngo tarié si̱ꞌandajnú, nga tjónjín xchísónjnúu̱ kótjín to̱n kjo̱jo, tsi̱ꞌe̱ nga xcha̱jnú tsi kjo̱chóꞌá ko̱jo tsi jmí.

²⁹ Tsi̱ꞌe̱ nga tsi ta̱ ngije ítsꞌi̱yanii̱ xoó, kó tsi ka̱mando̱jojiín, ngayeje xotaa̱ ko̱jno̱kiejnú,

³⁰ nga bi̱ ka̱tso̱: “Kui nda̱a̱ ítsꞌi̱yanii̱ nga katsꞌénda ngo tarié, kó kamándo̱jojiín.”

³¹ Axa̱ ꞌyá nda̱ re xi ko̱e̱je̱kjánjo̱ kje̱ꞌe nda̱ ree̱, kó tjónjín mára skósoón tsi sa̱ꞌín, nga tie mi̱ ma jájuún kui, kó kan mi̱ ma jájuún nda̱ re xi kondraa̱.

³² Kó tsi ka̱májiín, nga sꞌe̱ kjin tsꞌéndibá nda̱ re xi kondraa̱, ta̱sá nga tsangiyaa̱ xota̱ tsi̱ꞌe̱ nga ko̱e̱je̱kíꞌá kjo̱a̱xió.

³³ Bo̱a̱ tsꞌén, ta̱ꞌyaní jún xi tjónjín kꞌuijñámasienjnú ngayeje ni xi tjínjnú, ka̱májín xota̱na ka̱majnú.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ na̱xa̱a̱

³⁴ Nda na̱xa̱a̱, ta̱nga tsi ngiti̱ ndiajín ka̱ma, kótsꞌèn ka̱mandia nginí.

³⁵ Ta̱sá ku̱i̱chíjmi ngatꞌa̱ ngiti̱ ka̱machjiénjín tsi̱ꞌe̱ orjnoo̱, ti̱nde tsi̱ꞌe̱ nga ka̱ma kꞌuití yeꞌee̱ cho̱o̱. Xi tjín tji̱bo̱a̱nijon nga ku̱i̱ntꞌiè, ngatasiénníjón kui eén.