Ni xi kamá 9 - Xo̱jo̱n eén Néná

Bi̱ tsꞌén kisꞌijii̱n eén Néná nda̱ xi ꞌmí Sauloo̱

¹ Ta̱nga kui nda̱ xi ꞌmí Sauloo̱ nga ta̱kó tsꞌénmindyiándíkoón nga sa̱ꞌínkꞌién ngayeje xota̱ xi sꞌijii̱n Ndi̱a̱ná, jachó ngindyi̱ko̱n ngito̱ko̱o̱ chináꞌmi xi ꞌniú nkꞌa xaá,

² kó jachókíꞌá ngo xo̱jo̱n tsi̱ꞌe̱ nga ko̱e̱ꞌéndieè nga ko̱e̱je̱ ki̱a̱ ndiꞌa nínga ndokjo̱a̱ eén Néná xi tjín na̱xi̱ńdáꞌniú Ndamasko̱, kó nga ko̱ngase xi chjo̱on xí xi̱ꞌin xi tjimátji̱ngi ndi̱yà tja̱tsi̱e̱e̱ Néná, tsi̱ꞌe̱ nga ko̱e̱je̱jo ndo̱bo̱a̱yà ki̱a̱ na̱xi̱ńdáꞌniú Jerusale̱n.

³ Ta̱nga ngije kamátiñaa̱ Sauloo̱ nga ma kjachó má na̱xi̱ńdáꞌniú Ndamasko̱, ta̱niján má kjindibáni ndiꞌakꞌajmi jàn ngo ndiꞌí xí kitínié,

⁴ kó Sauloo̱ tsꞌáka tꞌanangii̱, kósꞌe̱ tsintꞌieé ngo nda̱ xi bi̱ katsoó: –Saulo̱, Saulo̱, míkjo̱a̱a̱ nga an timiyitji̱nginí.

⁵ Sꞌe̱ bi̱ katsó Sauloo̱: –ꞌYá jií bo̱a̱, Ndi̱a̱. Kó bi̱ katsó kui nda̱ xi tsíchji̱a̱a̱: –Án boá xi Kjisoo̱, kó ti̱ án boá xi timiyitji̱nginí.

⁶ Ta̱nga ti̱sítji̱n, kó ti̱tjásꞌi̱n ngi̱jin na̱xi̱ńdáꞌniuú, kó ki̱a̱ kꞌuiyaá ni xi chjiéngá si̱ꞌin ji.

⁷ Kó já xí nijan tjimájo̱ Sauloo̱ achichí katsakjónní, ngatꞌa̱ ja̱koxi̱ nga ti̱ tsintꞌieé kui nda̱ xi tsintꞌieé Sauloo̱ nga, ta̱nga kamábejín ꞌyání bo̱a̱ xi tsíchji̱a̱a̱.

⁸ Kósꞌe̱ ngije jastjíe̱n Sauloo̱ nga kjiꞌijñatójó tꞌanangii̱, iskjíxꞌá ndyi̱ko̱n ta̱nga ngiti̱ ka̱májín kamábe, kó kuíni nga kachjábéngí tsi̱ꞌe̱ nga tsangínjo̱ Ndamasko̱.

⁹ Kó ki̱a̱ kisꞌijña ján ni̱xtjin nga kamájín kamábe, kó jmí ni iskjiniejín, ti̱nde jmí ni xi katsꞌejín.

¹⁰ Kó ki̱a̱ na̱xi̱ńdáꞌniú Ndamasko̱ kisꞌijña ngo nda̱ xi sꞌijii̱n Kristoo̱ xi ꞌmí Ananiya̱, kó kui nda̱a̱ Ndi̱a̱ná akoó yojoo̱ nga bi̱ katsoó: –¡Ananiya̱! Kó bi̱ katsó kui nda̱a̱: –Kꞌi̱e̱ tikòn an Ndi̱a̱.

¹¹ Kó Ndi̱a̱a̱, bi̱ katsoó: –Ti̱sítji̱n ji, kó tꞌen ji kui ndi̱yàtié xi ꞌmí Ndi̱yà Kixi̱i̱, kó ki̱a̱ ndiꞌaa̱ Jundaa̱ tasíyé ji nda̱ xi ꞌmí Sauloo̱ xi kjindibáni na̱xi̱ńdáꞌniú Tarso̱, ngatꞌa̱ kui nda̱a̱ Néná tsꞌénchji̱a̱a̱ ki̱a̱a̱,

¹² kó je akakoo̱ nga ngo nda̱ xi ꞌmí Ananiya̱ kjo̱chókoón, kó kuí ku̱i̱ꞌíjñasoón tsja, tsi̱ꞌe̱ nga ka̱matsijen nginií.

¹³ Kó Ananiyaa̱ bi̱ katsoó Ndi̱a̱ná: –Ji Ndi̱a̱, jè kjín má xi katsóyàna kjo̱a̱a̱ kui nda̱a̱, ko̱jo kjo̱a̱a̱ ngayeje ni xi ndajín xi katsꞌénjo̱ xota̱ na̱xi̱ńdá tsjièe̱ ki̱a̱ na̱xi̱ńdáꞌniú Jerusale̱n,

¹⁴ kó kꞌi̱e̱e̱ já ngito̱ko̱o̱ chináꞌmii̱ je katsjaákjo̱a̱, tsi̱ꞌe̱ nga kjo̱jo ndo̱bo̱a̱yà ngayeje xota̱ xi tsꞌénkáxoma jaꞌée̱n.

¹⁵ Ta̱nga Ndi̱a̱ná, bi̱ katsoó: –¡Tꞌenchíi̱n! Ngatꞌa̱ nga kuí nda̱a̱ xi je jaꞌajin an tsi̱ꞌe̱ nga ku̱i̱chji̱a̱jo kjo̱a̱a̱ an xota̱ xi Israee̱ljín, ko̱jo re, ko̱jo ngayeje xota̱ xi chji̱a̱ni Israee̱l,

¹⁶ ngatꞌa̱ án xí kokòo̱ kókjiꞌi tsie kjo̱a̱ni̱ma̱ kjo̱a̱ꞌatio ta̱ngatꞌanii̱ jaꞌénna.

¹⁷ Kósꞌe̱ kijí Ananiyaa̱, kó tsꞌasꞌien ki̱a̱ ndiꞌa nínga tikón Sauloo̱, kó íjñasoón tsja Sauloo̱, kósꞌe̱ bi̱ katsoó: –Nda̱ ntsꞌie Saulo̱, Ndi̱a̱ Kjisoo̱ kui xi akoó yojoo̱ ngi̱ya ndi̱yà nínga kjindibé ji, kuí xí katsangiyana tsi̱ꞌe̱ nga ka̱matsijen nginií, kó kꞌuijñájii̱n A̱si̱énni̱xtjii̱n Néná.

¹⁸ Kó ti̱ kjiꞌa ja̱ kon tji̱bo̱a̱tsjiee̱ tji̱o̱ kon ni xi jatjoo̱ ndyi̱ko̱n Sauloo̱, kósꞌe̱ kamátsijee̱n, jastjíe̱n, kó tji̱e̱nmá kastindá,

¹⁹ kó ngije iskjinie nichinie, kasakongaꞌniú nginií. Kó kjín ni̱xtjin kamaá nga kisꞌijñajii̱n xota̱ xi sꞌijii̱n Kristoo̱ xi síndo na̱xi̱ńdáꞌniú Ndamasko̱.

Sauloo̱ bi̱ tsꞌén íni̱jmì eén Néná Ndamasko̱

²⁰ Kó Sauloo̱ ti̱ kjiꞌa íni̱jmì ki̱a̱ ndiꞌa nínga ndokjo̱a̱ eén Néná nga Kjisoo̱ xi ndií Néná.

²¹ Kó ngayeje xota̱ xi tsintꞌieé, kijíndikoón, kó bi̱ katsó: –A kuijín xi̱ꞌbi̱ xi tsangatji̱ngii̱ xota̱ xi sꞌijii̱n Kjisoo̱ ki̱a̱ na̱xi̱ńdáꞌniú Jerusale̱n. Kó a ti̱ kuijínní xi̱ꞌbi̱ xi jeꞌe kꞌi̱e̱e̱, tsi̱ꞌe̱ nga stso̱ba̱ ngase xota̱, kó sa̱ꞌínkꞌasꞌiee̱n já ngito̱ko̱o̱ chináꞌmii̱.

²² Ta̱nga Sauloo̱ kisꞌie ngasee̱ ngaꞌniú nga tsíchji̱a̱ nga akoó nga kui Kjisoo̱ xi Kristoo̱. Kó katsꞌéntsobéjii̱n xota̱ jundío̱ xi síndo na̱xi̱ńdáꞌniú Ndamasko̱.

Bi̱ tsꞌén jatjoꞌmaa̱ yojoo̱ Sauloo̱ ngi̱ya tsja já jundíoo̱

²³ Kó jaskan ngije jaꞌa kjín ni̱xtjin, já jundíoo̱ índa xtín tsi̱ꞌe̱ nga sa̱ꞌínkꞌién Sauloo̱,

²⁴ ta̱nga tjín xí katsóyaà Sauloo̱ kui nii̱. Kó kui jaá nga ni̱xtjin ko̱jo nga ni̱xtji̱e̱n askondá nga̱ntjo̱a̱ xi tjíchjáꞌyáni kui na̱xi̱ńdaá tsi̱ꞌe̱ nga si̱ꞌankꞌien,

²⁵ ta̱nga xota̱ tsi̱ꞌe̱ Kjisoo̱ ngo ni̱se̱nyá íyá Sauloo̱, kó ngije jñoó katsꞌénkjatjajen nga̱xto̱n xó xí tjíchjáꞌyáni na̱xi̱ńdáꞌniú Ndamasko̱.

Bi̱ tsꞌén jachó Sauloo̱ na̱xi̱ńdáꞌniú Jerusale̱n

²⁶ Kó nga jachó Sauloo̱ na̱xi̱ńdáꞌniú Jerusale̱n, kamámejeén kamátikójo̱ xota̱ xi je kisꞌijii̱n Kjisoo̱, ta̱nga ngayeje kui xotaa̱ katsakjónní, ngatꞌa̱ kisꞌijinjiín nga ko̱jo kui, je xota̱ tsi̱ꞌe̱ Kjisoo̱.

²⁷ Ta̱nga kui nda̱ xi ꞌmí Bernabee̱ kijíjo̱ Sauloo̱ nga jachókakoó já apostroo̱, kó íni̱jmi̱ì kótsꞌèn Sauloo̱ kamábe Ndi̱a̱ná ngi̱ya ndi̱yà nínga kjindibáni, kó nga Néná tsíchji̱a̱jo, ko̱jo nga ki̱a̱ Ndamasko̱, Sauloo̱ chiíjín katsakjónní nga tsíchji̱a̱ kjo̱a̱a̱ Kjisoo̱.

²⁸ Kó Sauloo̱ ki̱a̱ kisꞌijñajo̱ kui jaá ki̱a̱ na̱xi̱ńdáꞌniú Jerusale̱n nga kijí ko̱jo nga kjindibá, kó katsakjónjín nga tsíchji̱a̱ eén Néná,

²⁹ kó tsíchji̱a̱jo ko̱jo askjoyáni nga katsꞌénkjién jaꞌeén Ndi̱a̱ná nga ísejo̱ já jundío̱ xi chji̱a̱ én ngriengoo̱, ta̱nga kui jaá katsꞌénkjó nga sa̱ꞌínkꞌién Sauloo̱.

³⁰ Kó ngije tsintꞌié kuí eén já ntsꞌiee̱, kijíjo̱ Sauloo̱ na̱xi̱ńdáꞌniú Sesarea̱, sꞌe̱ ngije jachó kui ngi̱ndiee̱ katsangiya na̱xi̱ńdáꞌniú Tarso̱.

³¹ Tji̱e̱nga ngayeje xota̱ na̱ngo̱xi̱ xi chji̱a̱ni nangi Jundea̱, ko̱jo nangi Ngalilea̱, ko̱jo nangi Samaria̱ kisꞌiee̱ kjo̱a̱xió, ko̱jo kasakongaꞌniuú, kó kamándikoón Néná nga kisꞌińdo, kó A̱si̱énni̱xtjii̱n Néná katsjángaꞌniuú kui xotaa̱.

Bi̱ tsꞌén katsꞌéndaya Peé nda̱ xi ꞌmí Eneaa̱

³² Kó Peé kijíkatsijee̱n xota̱ xi sꞌijii̱n Kjisoo̱ xi síndo xki̱ nangi, kó ti̱ bo̱a̱ tsꞌén kijíkatsijee̱n kui xota̱ tsjie xi síndo na̱xi̱ńdáꞌniú xí ꞌmí Linda̱.

³³ Kó ki̱a̱ kasakoo̱ ngo nda̱ xi ꞌmí Enea̱ xi je tsꞌényaꞌa jin nó nga kjiꞌijña nga kamájín kijí.

³⁴ Kó Peé, bi̱ katsoó: –Enea̱, Jesukristoo̱ xí tjítsꞌéndáyaá, ti̱sítji̱n ji, kó chja̱ꞌáꞌyé ji ṉcháa̱n. Kó Eneaa̱ tji̱e̱nmá jastjíe̱n.

³⁵ Kó ngayeje xota̱ xi síndo na̱xi̱ńdáꞌniú Linda̱ ko̱jo na̱xi̱ńdáꞌniú Saro̱n kamábe nga kamándaya Eneaa̱, kó kisꞌijii̱n Ndi̱a̱ná.

Bi̱ tsꞌén katsꞌénkjaꞌáꞌyaá Peé na̱ Ndorkaa̱

³⁶ Kui ni̱xtjin jàn na̱xi̱ńdá Jope̱ kisꞌijña ngo na̱ xi xota̱ tsi̱ꞌe̱ Kjisoo̱ xi ꞌmí Tabita̱ (na̱ Ndorka̱, tsó kui eén nga én ngriengo̱). Kó kui xota̱chjo̱on ngatsjéni̱xtjin katsꞌén ni xi nda, kó asíko̱jo xota̱ ni̱ma̱ xi jmí to̱njiín.

³⁷ Kui ni̱xtjin jàn, kui naa̱ kamáꞌoón, kó kꞌien. Sꞌe̱ ngije kiniꞌángóyá ikꞌíjñá yojoo̱ ki̱a̱ ngo ndí ngi̱yaꞌma xi tikón nkꞌaa̱ ngo ndiꞌa.

³⁸ Kó na̱xi̱ńdáꞌniú Jope̱ tiña manii̱ na̱xi̱ńdáꞌniú Linda̱ nínga tikón Peé, kó kui xota̱ xi sꞌijii̱n nga tsintꞌié nga ki̱a̱ tikón, katsangiya jó já xí bi̱ katsoó Peé: –Ti̱ꞌin ngo kjo̱a̱nda tsá tꞌenje̱jne̱ na̱xi̱ńdáꞌniú Jope̱.

³⁹ Kó Peé tji̱e̱nmá kijíjo̱ kui jaá, kó ngije jachó, tsangínjo̱ ki̱a̱ ndí ngi̱yaꞌma nínga kjiꞌijñakꞌien na̱ Ndorkaa̱, kó ngayeje ínchjín kꞌán xi je kꞌien xi̱ꞌii̱n askjandá nga jaꞌatjiyajoo̱n Peé, kó akoó ngayeje xtjí ko̱jo ńjñondio xi katsꞌénda na̱ Ndorkaa̱ nga kisꞌijña nga̱sondie.

⁴⁰ Kó Peé tsꞌaxié ndi̱tsén jàn ngayeje xota̱ xi síndo kui ngi̱ndiee̱, kó asiéntikoó, kó tsíchji̱a̱a̱ Néná, sꞌe̱ jaskan askotsijee̱n nínga kjiꞌijña ini̱ma̱a̱, sꞌe̱ bi̱ katsó: –Na̱ Ndorka̱, ¡Ti̱sítji̱n! Kó kui naa̱ ja̱kó iskjíxꞌá ndyi̱ko̱n, kó nga kamábe Peé, kisꞌijñando.

⁴¹ Kó Peé tji̱e̱nmá iskjíbé tsja na̱ Ndorkaa̱ nga katsꞌénkjastjíe̱n, sꞌe̱ tsíchji̱a̱a̱ xota̱ xi sꞌijii̱n Kjisoo̱, ko̱jo ínchjín kꞌaán, kó akó na̱ Ndorkaa̱ nga je jaꞌáꞌyaá.

⁴² Kui kjo̱a̱ndikón xí kamá kꞌi̱e̱e̱ tsintꞌié ngayeje xota̱ na̱xi̱ńdá xí síndo Jope̱, kó achichí xota̱ xi kisꞌijii̱n Ndi̱a̱ná.

⁴³ Kó Peé kjín ni̱xtjin kisꞌijña kui na̱xi̱ńdaá, ki̱a̱ ndiꞌaa̱ nda̱ xi ꞌmí Ximoo̱, nda̱ xi tsꞌéntie tji̱xi̱ín cho̱o̱.