Ni xi kamá 8 - Xo̱jo̱n eén Néná

Sauloo̱ bi̱ tsꞌén tsangatji̱ngii̱ xota̱ na̱ngo̱xi̱i̱

¹ Kó ki̱a̱ tikón Sauloo̱ nga kiniꞌánkꞌién Ixtibaa̱, kó nda kasasiee̱n kui nii̱. Kui ni̱xtjii̱n ítsꞌi̱yanii̱ nga ꞌniú ikiyotji̱ngii̱ xota̱ na̱ngo̱xi̱ xi chji̱a̱ni na̱xi̱ńdáꞌniú Jerusale̱n, kó ngayeje xota̱ na̱ngo̱xi̱i̱ kastsojoboa nga kijí nangi xi chji̱a̱ni Jundea̱ ko̱jo Samaria̱, ta̱kuítsí já apostroo̱ xi kastsojoboajín.

² Kó tjín xota̱ xi bendikón Néná kui ngi̱ndiee̱ xi kijíkanijín Ixtibaa̱, kó ꞌniú askjandátjé.

³ Kó nda̱ xi ꞌmí Sauloo̱ tjítsꞌénkjié xota̱ na̱ngo̱xi̱i̱, kó xki̱ ndiꞌa tsꞌasꞌiennié nga tsꞌaxié nga ífé kjo̱a̱ꞌniú xi chjo̱on xí xi̱ꞌin nga katsangisꞌien ndo̱bo̱a̱yà.

Bi̱ tsꞌén ikꞌíni̱jmì éntjatsi̱e̱e̱ Néná nangi Samaria̱

⁴ Ta̱nga kui xota̱ na̱ngo̱xi̱ xi kastsojoboaa̱ katsóyà éntjatsi̱e̱e̱ Néná nínga jachó ko̱jo nínga kisꞌiṉtso̱ma.

⁵ Kó Ngiripee̱ kijí xtji̱e̱e̱n na̱xi̱ńdá Samaria̱, kó ki̱a̱ íni̱jmì kjo̱a̱a̱ Kristoo̱.

⁶ Kó ngayeje xota̱ na̱xi̱ńdaá kamátikó nga asiénnijoo̱n én xí tsíchji̱a̱, kó kamábe ngayeje kjo̱a̱ndikón xí katsꞌén.

⁷ Ngatꞌa̱ achichí kjín xota̱ xi síndojii̱n a̱siénni̱xtjin xi ndajín, xi askjandáyà má nga jatjojii̱n, kó ti̱ bo̱a̱ ti̱ tsꞌén kamándayaa̱ kjín xota̱ xi ni̱ma̱, xi májín fostjíe̱n ko̱jo xi májín fí,

⁸ kó achichí kjo̱a̱tsja kisꞌiee̱ kui xota̱ na̱xi̱ńdáꞌniú jàn.

⁹ Ta̱nga kui ngi̱ndiee̱ ki̱a̱ kisꞌijña ngo nda̱ xi ꞌmí Ximo̱, nda̱ xi tjiꞌe kamá ngasꞌe̱, kó kjín xota̱ xi chji̱a̱ni nangi Samaria̱ xi tsꞌenṉcha̱jo nga ꞌniú nda kamaá yojoo̱,

¹⁰ kui nda̱a̱ ngayeje xota̱ xi xchá xí kjindí xi asiénnijoo̱n én xí tsíchji̱a̱, kó bi̱ katsó: –Kuí xi̱ꞌbi̱ ngaꞌniú xi jee̱ Néná.

¹¹ Kó xotaa̱ ꞌniú asiénnijoo̱n, ngatꞌa̱ je kjín nónií nga tsꞌenṉcha̱jo xotaa̱ kjo̱a̱a̱ kjo̱a̱tjiꞌe xi kamaá.

¹² Ta̱nga nga kisꞌijii̱n éntjatsi̱e̱ xi tsíchji̱a̱ Ngiripee̱ nga katsóyà kjo̱a̱a̱ nga ko̱tíxoma Néná, ko̱jo kjo̱a̱a̱ jaꞌeén Jesukristoo̱, xi xi̱ꞌin ko̱jo xi ínchjín atíndá yojoo̱.

¹³ Ndeskande ti̱ kui Ximo̱ tjiꞌee̱ kisꞌijii̱n, kó atíndá yojoo̱ nga, kó kui Ximoo̱ ngatsjéni̱xtjin kistsoꞌbájo̱ Ngiripee̱ nga índikón nga kamábe chi̱bo̱a̱ ko̱jo kjo̱a̱ndikón xí katsꞌén Ngiripee̱.

¹⁴ Kjiꞌanga je tsintꞌié já apostro̱ xi síndo na̱xi̱ńdáꞌniú Jerusalee̱n nga xota̱ xi chji̱a̱ni nangi Samaria̱ je katsꞌénjo̱ꞌo nga iskjíbé eén Néná, kanangiya Peé ko̱jo Juaa̱ kui nangii̱,

¹⁵ kó ngije jachó kui já apostroo̱, tji̱e̱nmá tsíchji̱a̱tjé kui xota̱ xi je kisꞌijii̱n eén Néná, tsi̱ꞌe̱ nga sa̱ko̱ó A̱si̱énni̱xtjii̱n Néná,

¹⁶ ngatꞌa̱ nde kji̱e̱ ngojín kui jaá xi je jeꞌenié A̱si̱énni̱xtjii̱n Néná, ta̱ sꞌe̱ tsí kastindání jaꞌeén Kjisoo̱.

¹⁷ Kósꞌe̱ Peé ko̱jo Juaa̱ íjñasoón tsja kui jaá, kósꞌe̱ bo̱a̱ tsꞌén ngayejee̱ nga kasakoo̱ A̱si̱énni̱xtjii̱n Néná.

¹⁸ Kó nga kamábe Ximoo̱ nga já apostro̱ Peé ko̱jo Juaa̱ ta̱ íjñasónrií tsja xotaa̱ nga katsjaá A̱si̱énni̱xtjii̱n Néná, kamámejeén nga to̱n tsja̱á,

¹⁹ kó Ximoo̱, bi̱ katsó: –Te̱ꞌéjnúꞌun kui ngaꞌniú xí tjínjnú, tsi̱ꞌe̱ nga ko̱jo an ka̱mana tsjàa̱ A̱si̱énni̱xtjii̱n Néná xota̱ xi kꞌuijñásóo̱n ndsa̱ án.

²⁰ Ta̱nga Peé, bi̱ katsoó: –¡Ngachaja ji ko̱jo tòo̱n, ngatꞌa̱ tiniꞌínkjé jí nga stiñá kjo̱a̱ndaa̱ Néná!

²¹ Jmí ni yejín ji kjo̱a̱a̱ ni xi kjima kꞌi̱e̱e̱, ngatꞌa̱ kixi̱jín tikón ini̱màa̱ ngindyi̱ko̱n Néná.

²² Ti̱ꞌinkꞌoyé ji ni chꞌokjiꞌi tse̱, kó ꞌniú chji̱e̱ꞌèe̱ Néná, tsi ta̱ꞌa nga sa̱ꞌínjetakoón ni xi bo̱a̱ tsꞌén ikꞌíjin ini̱màa̱,

²³ ngatꞌa̱ tsꞌénbéñaá ji nga tsie kjo̱a̱ndasen ko̱jo tsie kjo̱a̱chꞌokjiꞌi tińtjejin ji.

²⁴ Sꞌe̱ bi̱ katsó Ximoo̱: –ꞌNiú ndókjo̱a̱jnúu̱ Ndi̱a̱ná kjo̱a̱a̱ an, tsi̱ꞌe̱ nga bo̱a̱jín ka̱mana kui ni xi kiꞌmíjnúꞌun.

²⁵ Kó kui jaá jaskan ngije tsíchji̱a̱jo xota̱ na̱xi̱ńdaá kjo̱a̱a̱ ꞌyání xi Kjisoo̱, ko̱jo kjo̱a̱a̱ eén Néná, kijíꞌoyá nginí na̱xi̱ńdáꞌniú Jerusale̱n, kó kui já apostroo̱ íni̱jmì éntjatsi̱e̱e̱ Néná kjín na̱xi̱ńdá xí chji̱a̱ni nangi Samaria̱.

Ngiripee̱ bi̱ tsꞌén tsíchji̱a̱jo ngo nda̱ xi chji̱a̱ni Etiopía̱

²⁶ Ngo ndítsjiee̱ Néná tsíchji̱a̱jo Ngiripee̱, nga bi̱ katsoó: –Ti̱sítji̱n kó tꞌen ji kui ndi̱yà xí fí xtji̱e̱e̱n na̱ngi, kui ndi̱yà xí ꞌbítsi̱yanii̱ na̱xi̱ńdáꞌniú Jerusale̱n ngaskande nga fochó na̱xi̱ńdáꞌniú Ngasa̱. Kuí ndi̱ya̱à xi foaꞌa xtji̱e̱e̱n nangi kixií.

²⁷ Sꞌe̱ Ngiripee̱ jastjíe̱n, kó kijí kui ndi̱yà xí kiꞌmií, kó ki̱a̱ kasakoo̱ ngo nda̱ xi chji̱a̱ni nangi Etiopía̱ xi ꞌniú nkꞌa xaá xi tsꞌénkoón to̱o̱n na̱ ree̱ nangi xi ꞌmí Kandase̱. Kui nda̱a̱ kijí na̱xi̱ńdáꞌniú Jerusale̱n nga kijítsꞌéndíkón Néná,

²⁸ kó je tsꞌénfíꞌoyá nginí nangii̱ nga tjiyá ngo karro̱ xi tsoꞌbájo̱, kó tjítsꞌényà ngo xo̱jo̱n xi katsꞌénꞌindó nda̱ chji̱ni̱e̱ꞌe̱én Néná xi ꞌmí Isayaa̱.

²⁹ Kó A̱si̱énni̱xtjii̱n Néná, bi̱ katsoó Ngiripee̱: –Tꞌen ji, kó tꞌenchín tiñáa̱ kui karroo̱.

³⁰ Kó ngije jachó tiña Ngiripee̱, tsintꞌié nga kui nda̱ Etiopiyaa̱ tjítsꞌényà xo̱jo̱n xi katsꞌénꞌindó nda̱ chji̱ni̱e̱ꞌe̱én Néná xi ꞌmí Isayaa̱, kósꞌe̱ Ngiripee̱, bi̱ katsó nga asíyaá kui nda̱a̱: –A kjimakjiín ji ni xi tiꞌniꞌínyé.

³¹ Sꞌe̱ bi̱ katsó kui nda̱ Etiopiyaa̱: –Ja̱ kótsꞌèn ka̱makjínna nga jmíjín xi ndyi̱tsáyána kó tsó kui eén. Kó kichjiáꞌaá Ngiripee̱ nga tsꞌasꞌien ngi̱ya karroo̱, kó ki̱a̱ kisꞌijñatꞌaa̱.

³² Kó ki̱a̱ nínga tjítsꞌényà kui nda̱a̱ xo̱jo̱n eén Néná, bi̱ tsó: Tsangínjo̱ xikoó ngo cho̱tsa̱nga̱ xi fí niꞌánkꞌién, ko̱jo xikoó ngo cho̱tsa̱nga̱ xi kjandayàjín ngije sikón ngindyi̱ko̱n xota̱ xi botie tsja̱a̱, kó ti̱nde bo̱a̱ tsꞌén iskjíxꞌájín tsꞌoa.

³³ Chꞌo kamátaꞌin, kó chꞌo kiꞌmií, kó jmíjín xi kixi̱ katsꞌénseén. Jmíjín xi ku̱i̱chji̱a̱ kjo̱a̱a̱ xota̱ tji̱e̱e̱, ngatꞌa̱ kachjeꞌéxiín kjo̱a̱mindyioo̱n kꞌi̱e̱ kui tꞌanangii̱.

³⁴ Kó kui nda̱ xi chji̱a̱ni nangi Etiopiyaa̱, bi̱ katsó nga asíyaá Ngiripee̱: –ꞌNiú míꞌaá tꞌíyéní, ꞌyá xí tjítsó nda̱ chji̱ni̱e̱ꞌe̱én Néná, a ti̱kuíní xi tjítsoó yojoo̱, axa̱ kje̱ꞌe xí tsó.

³⁵ Kósꞌe̱ Ngiripee̱ iskjíbénií nínga tjítsꞌényà xo̱jo̱n eén Néná nga tsíchji̱a̱jo kjo̱a̱a̱ éntjatsi̱e̱ tsi̱ꞌe̱ Kjisoo̱.

³⁶ Kó nga ndyi̱fí ngi̱ya ndi̱ya̱à, jachó ngo ngi̱ndie nínga tjín ndáfoa, kó bi̱ katsó kui nda̱ Etiopiya̱ xi tsoꞌbájo̱ Ngiripee̱: –Tjín ndáfoa kꞌi̱e̱e̱, mí xí ꞌbíchjaá nga ka̱ma sa̱tíndá án.

³⁷ Sꞌe̱ Ngiripee̱, bi̱ katsó: –Tsi ngayeje ini̱màa̱ nga sꞌijii̱n, ka̱ma. Kó kui nda̱a̱, bi̱ katsó: –Sꞌijinna nga Jesukristoo̱ xi ndií Néná.

³⁸ Kósꞌe̱ katsꞌénkasién karroo̱, sꞌe̱ nga joó jatjajen nga tsꞌasꞌienjin ngi̱jin ndáfoaa̱, kósꞌe̱ Ngiripee̱ atíndá kuí nda̱ Etiopiyaa̱.

³⁹ Kó ngije ndyi̱fotjojin ngi̱jin ndáfoaa̱, kjindibá A̱si̱énni̱xtjii̱n Ndi̱a̱ná, kó kijíjo̱tꞌaxín Ngiripee̱, kó kui nda̱ xi chji̱a̱ni nangi Etiopiyaa̱, ngiti̱ kamábejín ngase Ngiripee̱, kó achichí tsja kisꞌiee̱ nga kijíra ndi̱yà xí tsoꞌbá.

⁴⁰ Ta̱nga Ngiripee̱ ki̱a̱ jachó na̱xi̱ńdáꞌniú xí ꞌmí Asoto̱, kó jaꞌa xki̱ nangi nga katsóyà éntjatsi̱e̱e̱ Néná, ngaskande nga jachó na̱xi̱ńdáꞌniú Sesarea̱.