Ni xi kamá 7 - Xo̱jo̱n eén Néná

Bi̱ tsꞌén tsꞌaxiéꞌá yojoo̱, kó bi̱ tsꞌén kiniꞌánkꞌién Ixtibaa̱

¹ Kó chináꞌmi xi ꞌniú nkꞌa xaá, bi̱ katsoó Ixtibaa̱: –A bo̱a̱ kjíꞌí ni xi katsó kui jaá.

² Kó Ixtibaa̱, bi̱ katsó: –Jún ntsꞌie, ko̱jo jún xi na̱ꞌmijnú, ndaꞌyájnúꞌun: Kui Néná xí tjiín kjo̱a̱jee̱, akoó yojoo̱ xota̱ tji̱e̱ xcháná xi ꞌmí Abraa̱n kjiꞌanga kisꞌijña nangi Mesopotamia̱ ngindiee̱ nga ko̱e̱je̱ nangi Ara̱n,

³ kó Néná, bi̱ katsoó: “Tja̱tje ji nangìi̱ ko̱jo nangii̱ xota̱ xingi̱ ji, kó tꞌen ji kui nangi xi kokoo.”

⁴ Kósꞌe̱ Abraa̱n jatjoni nangi xi ꞌmí Kalndea̱, kó ki̱a̱ kisꞌijña nangi Ara̱n, kó ngije kꞌien na̱ꞌmii̱, Néná kjindibájo̱ Abraa̱n kui nangi xi̱ꞌbi̱, nínga tindyiónjnú ngotꞌe̱.

⁵ Kó Néná nde chií nangi katsjájiín, ngaskande nínga ko̱sién ngo se katsjájiín, ta̱nga katsóyàtjoón nga tsja̱á nga tsi̱ꞌe̱ ka̱ma kui nangii̱, ko̱jo nga jaskan tsi̱ꞌe̱ xota̱ tji̱e̱e̱ ka̱ma, ndatsi kui ni̱xtjin jàn Abraa̱n kji̱e̱ jmí ndíjiín.

⁶ Kó Néná bo̱a̱ katsoó, nga xota̱ tji̱e̱e̱ kꞌuíndo xikoó xota̱ xi kje̱ꞌe nangi síndo, ko̱jo nga moso̱ xi stiñá ka̱ma, ko̱jo nga ndajín ka̱mataꞌin nijón úchán nó.

⁷ Kó Néná, bi̱ katsó ngase: “An sa̱ꞌinjée̱ kui na̱xi̱ńdá nínga moso̱ xi stiñá sa̱ꞌín, kó ngije kamá kui nii̱, kjo̱tjo kui ngi̱ndiee̱, kó kꞌi̱e̱ sa̱ꞌíndikónna kui ngi̱ndie xi̱ꞌbi̱.”

⁸ Kó Néná índajo̱ Abraa̱n tsi̱ꞌe̱ nga sa̱ꞌín ni xi ꞌmí sirkunsisioo̱n, kó kuíni nga Abraa̱n, kisꞌiee̱ ngo ndí xi ꞌmí Isaa̱, kó xi ma jin ni̱xtjin nga katsen, katsꞌeén sirkunsisioo̱n, kó Isaa̱ ti̱ bo̱a̱ ti̱ katsꞌénjo̱ ndií, kui xi kiꞌmí Jako̱b nga, kó Jako̱b ti̱ bo̱a̱ ti̱ katsꞌénjo̱ nga tiejó ndií, kui xi xota̱ xi tji̱e̱ xcháná.

⁹ Kó já ntsꞌi̱e̱ Kosiee̱ kamáchi̱ni̱, kó xota̱ xi chji̱a̱ni nangi Ejipto̱ atíñaá. Ta̱nga kui nda̱a̱ Néná kisꞌijñajo̱,

¹⁰ kó kui Néná tsꞌaxiéꞌá ngayeje kjo̱a̱ni̱ma̱ xi jaꞌajin, kó katsjaá kjo̱a̱nda, ko̱jo kjo̱a̱kjínkón ngindyi̱ko̱n nda̱ re xi chji̱a̱ni nangi Ejipto̱, kó kui nda̱ ree̱ katsjaá Kosiee̱ nga kui xi kamá xtitjoón nangi Ejipto̱, ko̱jo nga kui xi ko̱tíxoma ngayeje ndiꞌaa̱.

¹¹ Ta̱nga kjindibá ngo kjindiá ꞌniú ngayeje nangi xi chji̱a̱ni Ejipto̱ ko̱jo nangi Kanaa̱n, kó tsie kjo̱a̱ni̱ma̱ xi jaꞌa xota̱ tji̱e̱ xcháná, ngatꞌa̱ kasakojiín ni xi iskjinie.

¹² Kó nga tsintꞌié Jako̱b nga tjín to ndso̱ko̱a̱n ṉño̱pan ki̱a̱ nangi Ejiptoo̱, katsangiyatjón xota̱ tji̱e̱ xcháná,

¹³ xi ma jó ndi̱yà, Kosiee̱ akoó yojoo̱ já ntsꞌi̱e̱, kó bo̱a̱ tsꞌén kamábe nda̱ ree̱ ñá nangi kjindibáni Kosiee̱.

¹⁴ Kó Kosiee̱ tsíchji̱a̱a̱ Jako̱b xi na̱ꞌmii̱, ko̱jo ngayeje xota̱ xkjín tsi̱ꞌe̱ nga ko̱e̱je̱kꞌíndo nangi Ejipto̱, kó ichítié ko̱jo kan ún kamá kui xotaa̱.

¹⁵ Kó Jako̱b kijí nangi Ejipto̱ nínga kꞌien, kó ti̱ ki̱a̱ jesón xota̱ tji̱e̱ xcháná nga.

¹⁶ Kó tsangínjo̱ ńdaa̱ Jako̱b ki̱a̱ nangi Sikee̱n, kó ki̱a̱ ikꞌíndonijín kui nga̱tsjo̱ó xí Abraa̱n tsꞌatsiee̱ ndií Jamoo̱r ki̱a̱ nangi Sikee̱n.

¹⁷ Kó xikótsꞌèn kjimatiña ni̱xtjin nga kjo̱tjosón ni xi katsoó Néná Abraa̱n, xota̱ xi chji̱a̱ni Israee̱l ta̱sasá kamákjín ki̱a̱ na̱xi̱ńdá Ejipto̱,

¹⁸ ngaskande nga ki̱a̱ Ejipto̱ atíxoma kje̱ꞌe nda̱ re xi kamábejín ꞌyá kuií xi Kosiee̱.

¹⁹ Kui nda̱ ree̱ achichí maña̱ kamá, kó ndajín katsꞌénjo̱ xota̱ tji̱e̱ xcháná, katsꞌeén kjo̱a̱ꞌniú tsi̱ꞌe̱ nga índomasien, tsi̱ꞌe̱ nga ko̱yà ndí xi̱xi̱i̱ xi sꞌe̱ katsee̱n, kó nga ngiti̱ ka̱makjínjín ngase.

²⁰ Kó kui ni̱xtjin jàn katsen nda̱ xi ꞌmí Moisee̱, ngo ndí xí achichí tsja kamaá Néná, kó xi xchaá, ján sá katsꞌénxchá ki̱a̱ ndiꞌaa̱,

²¹ kó nga ikꞌíjñámasien kui ndií, tsa̱kjìn xo̱ngo̱ò nda̱ ree̱ iskjíbé, kó katsꞌénxchá xikoó tsi ndí tsi̱ꞌe̱.

²² Kó bo̱a̱ tsꞌén Moisee̱ akakoyaá ngayeje kjo̱a̱kjínkón xi máa xota̱ xi chji̱a̱ni Ejipto̱, kó ngo nda̱ xi ꞌniú chji̱ni̱e̱ kamá, ngatꞌa̱ kisꞌiee̱ ngaꞌniú én xí tsíchji̱a̱ ko̱jo ni xi katsꞌén.

²³ Kó kjiꞌanga je tsꞌasꞌien yichán nó Moisee̱, katsꞌénkjó ini̱ma̱a̱ nga ko̱e̱je̱katsijee̱n xkjín, kui xi xota̱ Israee̱l.

²⁴ Kó nga kamábe Moisee̱ nga ngo nda̱ xi chji̱a̱ni Ejipto̱ tjítsꞌénꞌoón ngo nda̱ xi ngo nangi mani kui, tsꞌaxiéꞌá, kó katsꞌénkꞌién kui nda̱a̱.

²⁵ Moisee̱ katsꞌénkjó nga xota̱ Israee̱l kamákjiín nga Néná katsjaá ngaꞌniú kuí nga kui xi kꞌo̱xiéꞌá, ta̱nga bo̱a̱jín tsꞌén katsꞌénkjó kuí xotaa̱.

²⁶ Kó nga kamángindyiojón Moisee̱ kamábe nga jó já ndyi̱kjàn, kó tji̱e̱nmá katsꞌénkꞌíxió nga bi̱ katsoó: “Jún bo̱a̱ já, xi ta̱ ngo ntsꞌiejnú, míkjo̱a̱a̱ nga ti̱ juún ndyi̱niꞌánꞌónjnúu̱ xingi̱jnú.”

²⁷ Ta̱nga kui nda̱ xi tsꞌénkjánjo̱ nda̱ xi ingoo̱, katsangińña Moisee̱, kó bi̱ katsoó: “ꞌYá xi katsjaá xá nga ji xi ko̱ti̱xome ko̱jo tsi ji nendiꞌamasien katsꞌeén kjo̱a̱a̱ ji̱n.

²⁸ A mejeénri si̱ꞌinkꞌínní xikótsꞌèn kiniꞌínkꞌín ngojña̱ nda̱ xi chji̱a̱ni nangi Ejiptoo̱.”

²⁹ Ngije tsintꞌié ni xi kiꞌmií Moisee̱, tsanga xtji̱e̱e̱n nangi Mandia̱n, kó ki̱a̱ kisꞌijña xikoó tsi ngo xota̱ xi kje̱ꞌe nangi chji̱a̱ni, kó ki̱a̱ kisꞌiee̱ jó ndí.

³⁰ Ngije jaꞌa yichán nó nga jachókꞌíjñá kui ngi̱ndie kixií, ki̱a̱ tiña tji̱ngi̱ Sinaii̱, ngo ndítsjiee̱ Néná akoó yojoo̱ ngi̱jin ndiꞌií ngo yá sarsa̱ xi tjítí.

³¹ Kó Moisee̱ achichí kijíndikoón ni xi tjibókoo̱, kó kijíkatsijen tiñaa̱ tsi̱ꞌe̱ nga nda sku̱i̱e̱, kó ki̱a̱ tsintꞌieé nda̱a̱ Ndi̱a̱ná, xi bi̱ katsoó:

³² “Án boá xi Nee̱ xota̱ xi xcháa̱, Nee̱ Abraa̱n, ko̱jo Nee̱ Isaa̱, ko̱jo Nee̱ Jako̱b.” Kó Moisee̱ ítsꞌi̱yanii̱ nga jatsiéndíkón, kó nde kamámejénjiín nga askotsijen.

³³ Kó Ndi̱a̱ná, bi̱ katsoó Moisee̱: “Chje̱ꞌéxín ji tji̱xíndié xí kjiꞌiyaa̱ ndsa̱ki, ngatꞌa̱ ngi̱ndie tsjie boá nínga tasín ji.

³⁴ Jè kamábe cha̱n cha̱n an nga ta̱nisién tsie kjo̱a̱ni̱ma̱ ndyi̱foaꞌatio xota̱ na̱xi̱ńdána xi síndo nangi Ejipto̱, kó jè tsintꞌièe̱ nga ndyi̱kjandà nga ndyi̱chji̱a̱, kó kuíni nga kjindibáña an tsi̱ꞌe̱ nga kꞌoxiéꞌá an. Kó ngotꞌe̱ ꞌne̱ ndibé ji, ngatꞌa̱ nangi Ejipto̱ sangiyaa ji.”

³⁵ Ngatꞌa̱ kuí Moise̱ xi̱ꞌbi̱, xi katsꞌénmejénjín kui jaá nga bi̱ katsó: “ꞌYá xí katsjaá xá nga ji xi ko̱ti̱xome ko̱jo tsi ji xi nendiꞌamasien katsꞌeén.” Néná boá xi katsangiya kui nda̱a̱ nga xá, ko̱jo nga kui xi sa̱ꞌíndéjnú xikó katsoó kui ndítsjie xi kamábe ngi̱jii̱n yásarsaa̱.

³⁶ Kó kuí Moisee̱ xi tsꞌaxié kui xotaa̱ ki̱a̱ nangi Ejipto̱, ngije katsꞌén kjo̱a̱ndikón kuí nangi jàn, ki̱a̱ Ndáchíkón Inií, ko̱jo ki̱a̱ nangi kixií yichán nó.

³⁷ Kó ti̱kuíní kui Moisee̱, xi bo̱a̱ katsoó xota̱ Israee̱l: “Néná kui xi Ndi̱a̱ná sa̱ꞌínkjastjíe̱n ngi̱jii̱n ntsꞌiejnú ngo chji̱ni̱e̱ꞌe̱én xikoó an.”

³⁸ Kó kuí bí Moisee̱ xi kamátikójo̱ xotaa̱ ko̱jo xota̱ tji̱e̱ xcháná ki̱a̱ nangi kixií, kó katsóyaà én xí katsó ndítsjiee̱ Néná nga tsíchji̱a̱jo ki̱a̱ ngi̱jii̱n tji̱ngi̱ Sinaii̱. Kó kui én xí tsja̱aná, eén kjo̱a̱mindyioo̱n boá.

³⁹ Kó xota̱ tji̱e̱ xcháná tsintꞌiéꞌénjín, kó katsꞌénchꞌó Moisee̱ nga kui xi tikóntjón, kó ta̱sá kamámejeén nga ko̱e̱je̱ꞌoyá nginí nangi Ejipto̱,

⁴⁰ kó xota̱ Israee̱l, bi̱ katsoó nda̱ xi ꞌmí Aaroo̱n: “Ta̱sá ti̱ꞌindejne̱ ne xi ko̱kójne̱ ndi̱yàjne̱, ngatꞌa̱ yàjínjne̱ mí ni xi kamaá kui Moisee̱ xi tsꞌaxiéjne̱ ki̱a̱ nangi Ejiptoo̱.”

⁴¹ Kó bo̱a̱ tsꞌén katsꞌénda ngo ndií cho̱yojo, kó katsjaá kjo̱a̱tjó kui a̱sie̱én, kó katsꞌéntsjaà ni xi katsꞌénda tsja.

⁴² Kó Néná íjñámasien kui xotaa̱, kó ta̱sá katsjaákjo̱a̱ nga kui ńño xi tjín nkꞌa jàn katsꞌéndikón, xikótsꞌèn kjitꞌa xo̱jo̱n xi katsꞌénda já chji̱ni̱e̱ꞌe̱én Néná, nínga bi̱ tsoó: Xota̱ Israee̱l, A án xí katseꞌéjnúꞌun kjo̱a̱tjó yichán nó ki̱a̱ nangi kixií.

⁴³ Ta̱sá kichínkꞌájnú ngi̱ndie ndikoón ne Moloo̱k, ko̱jo a̱sie̱én ńñoo ne Renfaa̱n, a̱sie̱én ne xi ti̱ juún kiniꞌándajnú tsi̱ꞌe̱ nga kiniꞌándikónjnú. Kó kuíni nga ngotꞌe̱ ꞌne̱, kjin sa̱ꞌinkjíjnúꞌun, kjin ngasenii̱ nangi Babilonia̱.

⁴⁴ Xota̱ tji̱e̱ xcháná kisꞌijñaa̱ ngo ngi̱ndie ndikón, ki̱a̱ nangi kixií xi akó nga Néná índajo̱ xota̱ na̱xi̱ńdaá, xikótsꞌèn Néná katsóyaà Moisee̱ nga sa̱ꞌínda, xikó kjiꞌi xi akakoo̱,

⁴⁵ kui xi xota̱ tji̱e̱ xcháná ta̱ katseꞌérií nga jachójo̱ nda̱ xi ꞌmí Josuee̱, kjiꞌanga iskjíbé tꞌanangii̱ xota̱ xi Israee̱ljín, kui xi Néná tsꞌaxié ngindyi̱ko̱n xota̱ tji̱e̱ xcháná, ngaskande nga kamá re Ndabii̱,

⁴⁶ kui nda̱ xi nda tsꞌákaa̱ Néná nga kamábe kjo̱a̱ndaa̱, kó Ndabii̱ tsíꞌaá Néná nga sa̱ꞌínda ngo ngi̱ndie ndikón tsi̱ꞌe̱ Nee̱ nda̱ xi mí Jako̱b.

⁴⁷ Nda̱ xi ꞌmí Salomoo̱ xí katsꞌéndaa̱ ngo ndiꞌa,

⁴⁸ ta̱nga Néná xi tikón ndiꞌakꞌajmi jàn, ki̱a̱jín tikón ngi̱ya ndiꞌa xi tsꞌénda tsja xotaa̱, xikó tsó nda̱ chji̱ni̱e̱ꞌe̱én Néná:

⁴⁹ Ndiꞌakꞌajmi jàn boá nínga botíxoma an, kó tꞌanangii̱ boá nínga bosien an ndsa̱ko an. Mí ndiꞌa xi si̱ꞌandajnúꞌun. Tsó Ndi̱a̱ná, Kó ñání ngi̱ndie nínga sa̱ꞌinkjaꞌyá an.

⁵⁰ A mí tsi ndsa̱ án boá xi katsꞌénda ngayeje kui nii̱.

⁵¹ Kó bi̱ katsó ngase Ixtibaa̱: Ta̱nga jún tajá tokojnú, ko̱jo ini̱ma̱jnú, ko̱jo tji̱bo̱a̱nijónjnú, ngatsjéni̱xtjin nga ndyi̱mongínjnúu̱ kondra̱ A̱si̱énni̱xtjii̱n Néná, xikó má katsꞌén xota̱ xi xchájnú.

⁵² ꞌYání bo̱a̱ nda̱ chji̱ni̱e̱ꞌe̱én Néná xi chꞌójín katsꞌénjo̱ xota̱ tji̱e̱ xchájnú. Kó katsꞌénkꞌién xota̱ xi katsóyà nga kjo̱e̱ꞌe ngo nda̱ xi kixi̱, xi ti̱ juún ngotꞌe̱ ꞌne̱ kiniꞌánkꞌasꞌienjnú ngi̱ya tsja xota̱ jé, kó kiniꞌánkꞌiénjnú,

⁵³ jún xi ndítsjiee̱ Néná katsjájnú kjo̱a̱kitii̱ Néná, kó kandaꞌyáꞌénjínjnú.

⁵⁴ Kó nga tsintꞌié kuí eén, katsꞌénxchán, kó ngaskande iskjinieya má ńdaṉꞌni̱u̱ ngayeje kui xotaa̱ kondraa̱ Ixtibaa̱.

⁵⁵ Ta̱nga Ixtibaa̱ kisꞌikitsié maá A̱si̱énni̱xtjii̱n Néná, kó askotsijen ndiꞌakꞌajmi jàn, sꞌe̱ kamábe kjo̱a̱jee̱ Néná, kó kamábe Kjisoo̱ nga ki̱a̱ tikóntꞌa tsja fojnií Néná,

⁵⁶ kó bi̱ katsó Ixtibaa̱: –¡Tsitsíjenjnú! Tsꞌénbé an nga tji̱e̱nti̱xa̱ ndiꞌakꞌajmi jàn, kó tsꞌénbe an nga ndií nda̱ xi̱ꞌii̱n tsja fojnií Néná tikón.

⁵⁷ Kósꞌe̱ kui xotaa̱ ta̱ íchjá tsí tji̱bo̱a̱nijon, kó achichí ꞌniú tsíchji̱a̱ nga kjítsꞌuié Ixtibaa̱.

⁵⁸ Kó tsꞌaxié Ixtibaa̱ ngi̱jin na̱xi̱ńdáꞌniuú nga kijíkꞌaya ndi̱jo̱ nga katsꞌénkꞌién, kó chistikoo̱ kijítsjaá ńjñoo̱ ngo nda̱ xo̱ngò xi ꞌmí Saulo̱.

⁵⁹ Kó tji̱e̱nga tjifóyà ndi̱jo̱ Ixtibaa̱, bi̱ katsó nga tsíchji̱a̱a̱ Néná: –Ji Ndi̱a̱ Kjiso̱, chjábé ji a̱si̱énni̱xtjinna.

⁶⁰ Kó asiéntikoó, sꞌe̱ achichí ꞌniú askjandáyà, nga bi̱ katsó: –¡Ji Ndi̱a̱, ngata̱ ki̱a̱jín chꞌiée̱ xki̱ jé xi ndyi̱tsꞌènjo̱na kui xotaa̱! Kó ngije bo̱a̱ katsó, kꞌien ꞌne̱ ngijee̱.