Ni xi kamá 6 - Xo̱jo̱n eén Néná

Bi̱ tsꞌén katseꞌéxaá yito já xí ko̱síko̱jo já apostroo̱

¹ Kui ni̱xtjin jàn, ngije kamákjín xota̱ xi sꞌijii̱n Kjisoo̱, xota̱ ngriengoo̱ atíjétáꞌín xota̱ ebreoo̱, nga bo̱a̱ katsó nga ndajín tsꞌén kjimasee̱n ínchjín kꞌán xi je jesón xi̱ꞌii̱n xi ngriengo̱, nga tjíniꞌánkabisoón ni xi skji̱ni̱e̱ ndyiojón ndyiojón.

² Kósꞌe̱ kui já apostro̱ xi tiejoó ítikó ngayeje xota̱ xi sꞌijii̱n Kjisoo̱, kó bi̱ katsó: –Ndajínkjiꞌi nga kꞌuijñámasien ji̱n eén Néná, tsi̱ꞌe̱ nga si̱ꞌansenjne̱ yámíxa̱a̱.

³ Kó kuíni ntsꞌie, ti̱ndyi̱séjinjnú yito jáxíꞌín ngi̱jinjnú xi nda tsꞌén síndo ngindyi̱ko̱n Néná, ko̱jo xi ꞌniú tjíjii̱n A̱si̱énni̱xtjii̱n Néná, ko̱jo xi tjiín kjo̱a̱kjínkón, tsi̱ꞌe̱ nga kui xi sa̱ꞌín kui xaá.

⁴ Kó ji̱n ta̱kó ko̱ndókjo̱a̱jne̱ Néná, ko̱jo ta̱kó kꞌuiníjmi̱jne̱ eén.

⁵ Tsja kamaá kui nii̱ ngayeje xota̱ xi kamátikoó, kó tsangasejin Ixtibaa̱, nda̱ xi ꞌniú sꞌijii̱n Néná ko̱jo xi ꞌniú tjíjii̱n A̱si̱énni̱xtjii̱n Néná, ko̱jo Ngiripee̱, ko̱jo Prókoroo̱, ko̱jo Nikanoo̱r, ko̱jo Timoo̱n, ko̱jo Parmenaa̱, ko̱jo Ndikoraa̱ ngo nda̱ Antiokiya̱ xi jundío̱jín, ta̱nga katsꞌénjo̱ꞌo kjo̱a̱sꞌijii̱n Néná,

⁶ kui jaá xi tsangínjo̱ nínga síndo já apostroo̱, kó tsíchji̱a̱tjé, ko̱jo yejénnié tsja.

⁷ Kó eén Néná sa kjin sa kjin kandaꞌyá ngase, kó ꞌniú kamákjín ngase xota̱ xi sꞌijii̱n Kjisoo̱ ki̱a̱ na̱xi̱ńdáꞌniú Jerusale̱n, kó ti̱ bo̱a̱ tsꞌén kjín já chináꞌmii̱ xi katsꞌénjo̱ꞌo kjo̱a̱sꞌijii̱n nga.

Bi̱ tsꞌén kandobá Ixtibaa̱

⁸ Kó Ixtibaa̱, ngo nda̱ xi kisꞌiee̱ kjo̱a̱nda ko̱jo ngaꞌniuú Néná, tsie kjo̱a̱ndikón ko̱jo chi̱bo̱a̱ xi katsꞌén ngi̱jii̱n xota̱ na̱xi̱ńdaá.

⁹ Ta̱nga ngo xtín xota̱ xi chji̱a̱ni ndiꞌa nínga ndokjo̱a̱ eén Néná xí tsi̱ꞌe̱ moso̱ xi kastiñá ngasꞌe̱, ta̱nga xi je síndondé ngotꞌe̱, ko̱jo xota̱ xi chji̱a̱ni na̱xi̱ńdáꞌniú Sirene̱, ko̱jo na̱xi̱ńdá Alejandriya̱, ko̱jo nangi Silisia̱, ko̱jo nangi Asia̱, ítsꞌi̱yanii̱ nga askjotíjo̱ Ixtibaa̱,

¹⁰ kó kamájín xi katsꞌeén, ngatꞌa̱ nga tsíchji̱a̱, kisꞌiee̱ kjo̱a̱kjínkón ko̱jo A̱si̱énni̱xtjii̱n Néná.

¹¹ Kósꞌe̱ íchjií já xí bo̱a̱ ka̱tso̱ nga kuí ma xi tsintꞌié nga chꞌo katsoó kjo̱a̱kitii̱ Moisee̱, ko̱jo nga chꞌo katsoó Néná.

¹² Kó bo̱a̱ tsꞌén katsꞌénkjaán xota̱ na̱xi̱ńdaá, ko̱jo já xchá ngito̱ko̱o̱ na̱xi̱ńdaá, ko̱jo já chji̱ni̱e̱kjo̱a̱kitii̱ tsi̱ꞌe̱ nga katsoboá Ixtibaa̱, sꞌe̱ kijíjo̱ nínga síndo jáxaá,

¹³ kó tsangase chistiko̱ ndiso, xi bi̱ katsó: –Kui nda̱a̱ ta̱ngongá chꞌo tjítsoó na̱ngo̱xi̱ tsjiená ko̱jo kjo̱a̱kitii̱.

¹⁴ Ji̱n má xi kandaꞌyájne̱ nga bo̱a̱ katsó nga kui xò Kjiso̱ xi chji̱a̱ni na̱xi̱ńdáꞌniú Nasaree̱t xi sa̱ꞌínkjatsón na̱ngo̱xi̱i̱, kó ko̱síkjo xò kjo̱a̱xchá xi katsjáná Moisee̱.

¹⁵ Kósꞌe̱ ngayeje jáxá xí síndotikó kuí ngi̱ndiee̱, askoꞌá ndá ndá Ixtibaa̱, kó kamábe kje̱n nga ja̱kjiꞌi kje̱n ndítsjie má kjiꞌi.