Ni xi kamá 4 - Xo̱jo̱n eén Néná

Bi̱ tsꞌén tsíchji̱a̱ Peé ko̱jo Juaa̱ ngindyi̱ko̱n jáxaá

¹ Kó tji̱e̱nga Peé ko̱jo Juaa̱ ndyi̱chji̱a̱jo xota̱ na̱xi̱ńdaá, jachó já chináꞌmii̱ ko̱jo ngito̱ko̱o̱ jájún xi konda na̱ngo̱xi̱i̱ ko̱jo já sanduseoo̱,

² achichí kamáxtií kui jaá, ngatꞌa̱ Peé ko̱jo Juaa̱ ndyi̱bokoyaá xota̱ na̱xi̱ńdaá, nga xotaa̱ foaꞌáꞌyá nginií ngije fesón, xikótsꞌèn jaꞌáꞌyaá Kjisoo̱,

³ kó kandobá kui jaá, kó kanangisꞌien ndo̱bo̱a̱yà, ngaskande nga kamángindyiojón, ngatꞌa̱ nga je kamángixón kui ni̱xtjii̱n.

⁴ Ta̱nga kjín má xota̱ xi tsintꞌié kuí eén xi kisꞌijii̱n, kó mara̱ tsi ta̱ ún mi̱ nga ta̱soboá jáxíꞌín.

⁵ Kó nga kamángindyiojón kamátikó ki̱a̱ na̱xi̱ńdáꞌniú Jerusale̱n já xí botixómaá, ko̱jo já xchá ngito̱ko̱o̱ na̱xi̱ńdaá, ko̱jo já chji̱ni̱e̱kjo̱a̱kitii̱,

⁶ ko̱jo ngito̱ko̱o̱ chináꞌmi xi ꞌniú nkꞌa xaá xi ꞌmí Anàa̱, ko̱jo Kaifaa̱, ko̱jo Juaa̱, ko̱jo Rijaá, ko̱jo ngayeje xi xkjín má já ngito̱ko̱o̱ chináꞌmii̱,

⁷ kó ngamasiee̱n kui xotaa̱, índo kui jaá, kó bi̱ katsoó nga asíyaá: –Mí xá xí tjínjnú. Kó, ꞌyá xí katsangiyajnú nga kui nii̱ niꞌánjnú.

⁸ Kósꞌe̱ Peé nga ꞌniú tjíjii̱n A̱si̱énni̱xtjii̱n Néná, bi̱ katsoó kui jaá: –Jún já xí botixómá, ko̱jo xota̱ xi xchá:

⁹ Jún ndyi̱bosíyàjnú kjo̱a̱a̱ kjo̱a̱nda xi kiniꞌaán ngo nda̱ xi oo̱n, tsi̱ꞌe̱ nga xcha̱jnú kótsꞌèn kamándaya,

¹⁰ ngatamayajnú ngayeje jún, ko̱jo ngayeje xota̱ Israee̱l nga ngaꞌniuú Jesukristo̱ xi chji̱a̱ni Nasaree̱t, kui xi akjatꞌajnú kro, ta̱nga Néná katsꞌénkjaꞌáꞌyá nginií ngi̱jii̱n xota̱ xi je jesoón, ta̱ngatꞌanii̱ kuí boá, nga kui nda̱a̱ kamándaya ngindyikónjnú.

¹¹ Kuí bí Kjiso̱ xi̱ꞌbi̱ xi ndi̱jo̱ xi katsꞌénchꞌó já chji̱ni̱e̱xo̱ó, ta̱nga kuí boá xi kamá ndi̱jo̱ ngaꞌniuú ndiꞌaa̱.

¹² Kó jmíjín ingo ngase xi ka̱maa̱ kꞌo̱xiéꞌá xotaa̱, ngatꞌa̱ Néná katsangiyajín kje̱ꞌe ngase kui nga̱sondiee̱ xi ka̱maa̱ kꞌo̱xiéꞌáná.

¹³ Kósꞌe̱ kjiꞌanga kamábe jáxaá nga katsakjónjín nga tsíchji̱a̱ Peé ko̱jo Juaa̱, kamákjiín nga kui já apostroo̱, jmí xo̱jo̱n kamájiín, kó achichí kijíndikoón, kó kamábe nga Kjisoo̱ kisꞌiṉtso̱majo̱.

¹⁴ Kó nga kamábe nga kui nda̱ xi kamándayaa̱ ki̱a̱ nijan tikónjo̱ kui jaá, nde kamájín ngo ni katsó kondraa̱.

¹⁵ Kósꞌe̱ katsjákjo̱a̱ nga kaꞌnaxié Peé ko̱jo Juaa̱ nínga kamátikó kuí xotaa̱, kó ja̱kꞌi̱e̱ ja̱ngaján ndyi̱foyáni,

¹⁶ nga bi̱ katsó: –Mí xí si̱ꞌanjo̱ kuí jaá. Ngatꞌa̱ ja̱koxi̱ nga ngo chi̱bo̱a̱ katsꞌén, kó ngayeje xota̱ xi síndo na̱xi̱ńdáꞌniú Jerusalee̱n xi kamábe, kó ka̱májín bo̱a̱jín kjiꞌi kꞌuin,

¹⁷ ta̱nga ta̱ tsi̱ꞌe̱ nga ngiti̱ ka̱ma tsiejín ngase kui nii̱ ngi̱jii̱n xota̱ na̱xi̱ńdaá, ta̱sá ku̱i̱ndyiandikóo̱n, tsi̱ꞌe̱ nga ngiti̱ ingojín xi ku̱i̱chji̱a̱jo ngase kjo̱a̱a̱ jaꞌeén Kjisoo̱.

¹⁸ Kó kandokjo̱a̱a̱, sꞌe̱ katseꞌeé kjo̱a̱ tsi̱ꞌe̱ nga ngiti̱ chiíjín ku̱i̱chji̱a̱, ko̱jo nga ngiti̱ ko̱kóyájín ngase kjo̱a̱a̱ Kjisoo̱.

¹⁹ Ta̱nga Peé ko̱jo Juaa̱, bi̱ katsó nga tsíchji̱a̱: –Bo̱a̱ tꞌínjnú tsi kixi̱ ngindyi̱ko̱n Néná nga jún xi ko̱nda̱ꞌyáꞌénjne̱, ngindiee̱ nga Néná xí ko̱nda̱ꞌyáꞌénjne̱,

²⁰ ngatꞌa̱ ka̱májín nga ngiti̱ ko̱ndókjo̱a̱jínjne̱ ni xi je kamáyà ji̱n, ko̱jo ni xi je kandaꞌyá ji̱n.

²¹ Sꞌe̱ jáxaá indyiándikoón kui já apostroo̱, sꞌe̱ índondé, kó jmí ni kasakojiín xi sa̱ꞌínjénií, ngatꞌa̱ ngayeje xota̱ na̱xi̱ńdaá katsjaá kjo̱a̱je Néná kjo̱a̱a̱ ni xi katsꞌén Peé ko̱jo Juaa̱,

²² ngatꞌa̱ kui nda̱ xi kamándaya nga kamá kui kjo̱a̱ndikoón, tjínraá tsꞌatio yichán nó.

Ni xi tsíꞌaá Néná já apostroo̱ ko̱jo xota̱ xi ngasee̱

²³ Kó ngije kisꞌiṉtsomandé Peé ko̱jo Juaa̱ kijíkón nginií xkjín, kó katsóyà yejee̱ ni xi katsoó já ngito̱ko̱o̱ chináꞌmii̱, ko̱jo já xchá ngito̱ko̱o̱ na̱xi̱ńdaá.

²⁴ Kó kui jaá ngije tsintꞌieé ni xi katsó, ngayejee̱ nga tsíchji̱a̱ xtiín Néná, nga bi̱ katsó: –Ji Ndi̱a̱, xi botíxome ji, ji xi kiniꞌínde ndiꞌakꞌajmii̱, ko̱jo tꞌanangii̱, ko̱jo ndáchíkoón, ko̱jo ngayeje ni xi tjiín kui nii̱,

²⁵ nga bi̱ kase nga kiniꞌínkíchji̱e̱ mosòo̱ xi ꞌmí Ndabii̱ nga kanangiyèe̱ A̱si̱énni̱xtjìi̱n: Míkjo̱a̱a̱ nga ndyi̱kjandayàxchán xota̱ xi tjín nga̱sondiee̱. Míkjo̱a̱a̱ nga xota̱ na̱xi̱ńdaá, ta̱xkiya ndyi̱tsꞌènkjó ngo ni xi jmí ni chjíjiín.

²⁶ Kamátikó já re ko̱jo xota̱ xi botixómaá tꞌanangii̱, nga ndyi̱tsꞌènxchán kondra̱a̱ Ndi̱a̱a̱, ko̱jo kondra̱a̱ Kristo̱ xi jaꞌájin kui.

²⁷ Ngatꞌa̱ nga ja̱koxi̱ nga ngo tjín katsꞌén yojoo̱ Erondee̱, ko̱jo Ponsio Pilatoo̱, ko̱jo xota̱ xi Israee̱ljín, ko̱jo xota̱ Israee̱l, kꞌi̱e̱ kui na̱xi̱ńdáꞌniuú nga kondra̱ kijií nda̱ tsjie, ko̱jo moso̱ xi ꞌmí Kjisoo̱, kui xi ji kachjeꞌéjin ji nga Kristoo̱ ka̱ma,

²⁸ tsi̱ꞌe̱ nga sa̱ꞌín ni xi ja̱bo̱a̱ je ikꞌínde ji, ko̱jo ja̱bo̱a̱ je bo̱a̱ kase nga bo̱a̱ ka̱ma.

²⁹ Kó ngotꞌe̱ ꞌne̱, Ndi̱a̱, tsitsíjìi̱n nga ndyi̱mindyiándíkón, kó te̱ꞌée̱ ngaꞌniú ngayeje mosòo̱ tsi̱ꞌe̱ nga stsa̱kjonjín nga ku̱i̱chji̱a̱ ée̱n.

³⁰ Tjienníjne̱ ndse̱, tsi̱ꞌe̱ nga ngaꞌniúu̱ ka̱mandayani xota̱ xi oo̱n, kó nga jaꞌeén Kjisoo̱, ndí xi tsjièe̱, ka̱makjién nga ka̱ma chi̱bo̱a̱ ko̱jo kjo̱a̱ndikón.

³¹ Kó ngije kamaá nga tsíchji̱a̱a̱ Néná, ngi̱ndie nínga síndotikó jatsié, kó ngayeje kui xotaa̱ tsꞌasꞌieén A̱si̱énni̱xtjii̱n Néná, kó nde ngiti̱ jmí ndikón kisꞌiejínnii̱ nga tsíchji̱a̱ eén Néná.

Xota̱ xi je kisꞌijii̱n Kjisoo̱, bi̱ tsꞌén akjángaá xkjín ni xi tjiín

³² Kó xota̱ kjín xi kisꞌijii̱n eén Néná, ta̱ ngo ini̱ma̱ ko̱jo ngo kjo̱a̱kjíntakón tsí kamá, kó nde ngojín xi tsi̱ꞌe̱ soboá kamaá ni xi kisꞌiee̱, ngatꞌa̱ ta̱ tsi̱ꞌe̱ yeje kamá ni xi kisꞌiee̱ nga ngo nga ngo.

³³ Kó já apostroo̱ achichí ngaꞌniú kisꞌiee̱ nga katsóyà kótsꞌèn jaꞌáꞌyaá Ndi̱a̱ Kjisoo̱, kó Néná tsie kjo̱a̱nda katsjaá ngayeje kui jaá.

³⁴ Kó bo̱a̱ tsꞌén nga nde ngojín kui jaá xi kamáchjieén ngo ni, ngatꞌa̱ ngayeje xi kisꞌiee̱ kꞌijñá ko̱jo ndiꞌa, atíñá,

³⁵ kó kui to̱o̱n jachókꞌíndo ngindie se já apostroo̱, tsi̱ꞌe̱ nga kui jaá xi katsꞌénkabisoón xotaa̱ xikótsꞌèn kamáchjieén nga ngo nga ngo.

³⁶ Kó Kosiee̱ ngo nda̱ lebita̱ xi chji̱a̱ni tji̱ngi̱ Chipre̱, kui xi Bernabee̱ katsoó já apostroo̱ (ndií xi tsꞌéndájónná, tsó kui jaꞌeén),

³⁷ kui nda̱a̱ ngo nangi kisꞌijñaa̱, kó atíñá, kó kui to̱o̱n já apostroo̱ kijíjoo̱.