Ni xi kamá 3 - Xo̱jo̱n eén Néná

Peé bi̱ tsꞌén katsꞌéndaya ngo nda̱ xi májín fí

¹ Ngo ndi̱yà Peé ko̱jo Juaa̱ kijí na̱ngo̱xi̱ chi̱bo̱a̱ ján nga kamángixón, chi̱bo̱a̱ nga ndokjo̱a̱a̱ Néná.

² Kó ngo nda̱ xi ni̱ma̱ se ngaskande koó nga katsen, ndyiojón ndyiojón tsangínkꞌíjña ngi̱xtio nga̱ntjo̱a̱ na̱ngo̱xi̱ xi ꞌmí Tsjakjiꞌii̱, tsi̱ꞌe̱ nga ku̱i̱ꞌaa̱ to̱nchji̱e̱ xota̱ xi ꞌbosꞌien na̱ngo̱xi̱i̱,

³ kó kui nda̱a̱ nga kamábe nga Peé ko̱jo Juaa̱ je ma kꞌasꞌien na̱ngo̱xi̱i̱, tsíꞌaá to̱nchji̱e̱.

⁴ Kó Peé ko̱jo Juaa̱ askoꞌá ndá ndá kui nda̱a̱, sꞌe̱ bi̱ katsó Peé: –Tsitsíjinjne̱.

⁵ Kó kui nda̱ ni̱ma̱a̱ askoꞌá ndá ndá kui jaá, ngatꞌa̱ askoyá nga to̱n tsja̱á.

⁶ Kó Peé bi̱ katsoó: –Jmí to̱ntiboa, jmí to̱nsiniéjínna xi tsjaa, ta̱nga ni xi tjínna tsjaa: Jaꞌeén Jesukristoo̱ nda̱ xi chji̱a̱ni Nasaree̱t tsꞌenkjién án nga bi̱ tꞌíxiaán, ti̱sítji̱n kó ti̱ńtje̱.

⁷ Kó iskjíbé tsja fojní, kó katsꞌénkjastjíe̱n, kó tji̱e̱nmá kasakongaꞌniuú ngi̱ya se ko̱jo ńdatoꞌoo̱ se,

⁸ kó nda̱ ni̱ma̱ see̱ iskjínkꞌá má nga kasasienkixi̱, kó tji̱e̱nmá kistsoꞌbá, sꞌe̱ tsꞌasꞌienjo̱ Peé ko̱jo Juaa̱ ngi̱ya na̱ngo̱xi̱i̱, kistsoꞌbá kó iskjínkꞌá iskjítsiña nga katsꞌéntsjaà Néná.

⁹ Kó ngayeje xota̱ na̱xi̱ńdaá kamábe nga je kamá kistsoꞌbá, ko̱jo nga katsꞌéntsjaà Néná.

¹⁰ Kó kamáyà nga kui nda̱a̱ xi kisꞌijña nga̱ntjo̱a̱a̱ na̱ngo̱xi̱ xi ꞌmí Tsjakjiꞌii̱ nga tsíꞌá to̱nchji̱e̱, kó xotaa̱ achichí kijíndikoón ko̱jo katsakjónní kjo̱a̱a̱ kui ni xi kamaá.

Peé bi̱ tsꞌén tsíchji̱a̱yajii̱n xotaa̱ ndi̱tsen na̱ngo̱xi̱i̱

¹¹ Nda̱ ni̱ma̱ xi je kamándayaa̱ ta̱ ki̱a̱ kistsoꞌbátji̱ngiꞌniúrií Peé ko̱jo Juaa̱. Ngayeje xota̱ na̱xi̱ńdaá kijíndikoón kui nii̱, kó tsanga má nga kijítji̱ngii̱ nínga tikón ngo ngi̱ndie xi ꞌmí Pórtikoo̱ Salomoo̱, nínga síndo kui jaá.

¹² Nga kamábe Peé kui nii̱, bi̱ katsoó xota̱ na̱xi̱ńdaá: –Jún já xí chji̱a̱ni Israee̱l, ánní nga kjifíndikónkonjnú kui nii̱. Kó míkjo̱a̱a̱ nga jún ndyi̱tsitsijendájne̱ ji̱n, xikoó tsi ngaꞌniú tsa̱ji̱n, ko̱jo tsi ta̱ngatꞌanii̱ nga yandikónjne̱ Néná, tsi kuíni nga kamándaya kui nda̱a̱.

¹³ Néná xí tsi̱ꞌe̱ Abraa̱n, ko̱jo xi tsi̱ꞌe̱ Isaa̱, ko̱jo xi tsi̱ꞌe̱ Jako̱b, Néná xí tsi̱ꞌe̱ xota̱ tji̱e̱ xcháná, kui xi katsjaá kjo̱a̱je Kjisoo̱, kui xi ndií, kui nda̱ xi jún kiniꞌánkꞌasꞌienjnú ko̱jo xi kiniꞌánchꞌójnú ngindyi̱ko̱n xtitjón Pilatoo̱, kjiꞌanga ja̱bo̱a̱ je bo̱a̱ katsó nga ku̱i̱ꞌíjñandé.

¹⁴ Ta̱nga jún ngindiee̱ nga chji̱a̱ꞌajnú nga sꞌi̱jñandé, ngatꞌa̱ nda̱ xi tsjie ko̱jo nda̱ xi kixi̱ kamá, kó ta̱sá jún kichjiáꞌájnú nga ikꞌíjñandé ngo nda̱ xi tsꞌenkꞌién ini̱ma̱.

¹⁵ Kó bo̱a̱ tsꞌén kiniꞌánkꞌiénjnú xi tsjáná kjo̱a̱mindyioo̱n, kui xi Néná katsꞌénkjaꞌáꞌyaá, kó ji̱n xi chistiko̱jne̱.

¹⁶ Kó ta̱ngatꞌanii̱ nga sꞌijinjne̱ Kjisoo̱, nga kui nda̱ xi̱ꞌbi̱, kui xi ndyi̱yajnú, ko̱jo xi ja̱bo̱a̱ je yàjnú, kasakongaꞌniuú, kó ta̱ngatꞌanií nga sꞌijii̱n Kjisoo̱, kuíni nga kamándaya cha̱n cha̱n kui nda̱a̱ ngindyikónjnú.

¹⁷ Kó ngotꞌe̱ ꞌne̱ já ntsꞌie, jè be an nga yàjínjnú ni xi kiniꞌánjnú jún ko̱jo já xí botixómaá.

¹⁸ Ta̱nga Néná, bi̱ tsꞌén katsꞌénkjatjosón ni xi katsóyàtjón nínga katsꞌénkíchji̱a̱ ngayeje já chji̱ni̱e̱ꞌe̱én nga Kristoo̱ chjiéngá tsie kjo̱a̱ni̱ma̱ kjo̱a̱ꞌatio.

¹⁹ Kuíni nga, ti̱ꞌankꞌoyàjnú yojojnú, kó Néná ti̱ꞌansénjnúu̱, tsi̱ꞌe̱ nga kui sa̱ꞌínkjié jéjnú, kó kji̱ndi̱báchonjnú Ndi̱a̱a̱ nga ni̱xtjin xi nda,

²⁰ kó Néná sa̱ngíyájnú Kjisoo̱, kui xi ndeskande koó nga ítjatsꞌennii̱ nii̱ nga jaꞌájin nga Kristo̱jnú ka̱ma,

²¹ kui xi je ta̱xà bo̱a̱ kjiꞌini nga ndiꞌakꞌajmii̱ kꞌuijñá ngaskande ni̱xtjin nga ka̱mandaya ngayeje nii̱, kui ni xi katsó Néná nga katsꞌénkíchji̱a̱ já chji̱ni̱e̱ꞌén tsjiee̱ xi kisꞌińdo ni̱xtjin xcháján.

²² Ngatꞌa̱ Moisee̱ bi̱ katsoó xota̱ xi xcháná: “Kuí Néná xi Ndi̱a̱ná xi kjo̱a̱ꞌájin ngi̱jii̱n ntsꞌiejnú ngo nda̱ chji̱ni̱e̱ꞌe̱én Néná xikoó án, kuí boá xi ndaꞌyájnúu̱ ngayeje ni xi ku̱i̱chji̱a̱.

²³ Kó ngayeje xota̱ xi ku̱i̱ntꞌièjiín ni xi ka̱tso̱ kui nda̱ chji̱ni̱e̱ꞌe̱én Néná, si̱ꞌankjie ngi̱jii̱n xota̱ na̱xi̱ńdaá.”

²⁴ Kó ngayeje já chji̱ni̱e̱ꞌe̱én Néná ndeskande xi yaꞌanii̱ Samuee̱ nga tsíchji̱a̱, kó katsóyà ni xi kjima kui ni̱xtjin xi̱ꞌbi̱.

²⁵ Jún boá xi xikoó tsi ndií já chji̱ni̱e̱ꞌe̱én Néná, ko̱jo ni xi índajo̱ Néná xota̱ tji̱e̱ xcháná, nga bi̱ katsoó Abraa̱n: “Ngayeje xota̱ na̱xi̱ńdá xí tjín nga̱sondiee̱ nda ka̱mataꞌin ngatꞌaa̱ xota̱ tji̱e̱ xi kꞌuieé ji.”

²⁶ Kjiꞌanga Néná katsꞌénkjaꞌáꞌyaá ndií, tjón jún katsangiyajnú, tsi̱ꞌe̱ nga katsꞌénchikonñéjnú, ko̱jo tsi̱ꞌe̱ nga bo̱a̱ tsꞌén nga ngo nga ngojnú ngiti̱ jmí ni xi chꞌokjiꞌi si̱ꞌánjínjnú.