Ni xi kamá 2 - Xo̱jo̱n eén Néná

Bi̱ tsꞌén jeꞌe A̱si̱énni̱xtjii̱n Néná

¹ Kó nga jachó ni̱xtjii̱n sꞌué Pentekostee̱, ngayeje xota̱ xi sꞌijii̱n Kjisoo̱ kisꞌińdotikó xtín,

² kó ta̱niján ma kjindibáni ndiꞌakꞌajmi jàn nga janie xikoó ngo tjo̱ꞌniú xí kandaꞌyá ngayeje ngi̱ya ndiꞌa nínga síndo kui xotaa̱,

³ kó ki̱a̱ kamáyà ni xi ja̱ kon najén má kón, xikoó ndiꞌí, xí kamákabisoón, kó nga̱són to̱ko̱ nga ngo nga ngo kui xotaa̱ kisꞌińdosón kui nii̱,

⁴ kó ngayejee̱ nga tsꞌasꞌieén A̱si̱énni̱xtjii̱n Néná, kó ítsꞌi̱yanii̱ nga tsíchji̱a̱ ja̱ kje̱ꞌe ja̱ kje̱ꞌe én, xikótsꞌèn katsjaá A̱si̱énni̱xtjii̱n Néná nga ku̱i̱chji̱a̱.

⁵ Kó ki̱a̱ na̱xi̱ńdáꞌniú Jerusale̱n kisꞌińdo xota̱ jundío̱ xi bendikón Néná, xi ngayeje són nga̱sondiee̱ kjindibáni.

⁶ Kó nga kandaꞌyá kui nii̱, kamátikó xota̱ kjiín, kó nde bejín mí ni xi sa̱ꞌín, ngatꞌa̱ ńgó ńgó tsíchji̱a̱ én tsi̱ꞌe̱.

⁷ Kó achichí kijíndikoón, kó bi̱ katsó nga asíyaá xkjín: –A xota̱ Ngalilea̱jín ngayeje xota̱ xi ndyi̱chji̱a̱ kui eén.

⁸ Kótsꞌèn nga, nga ngo nga ngo ñá kandaꞌyáa̱ nga tsa̱ñá én xí tsíchji̱a̱.

⁹ Ngatꞌa̱ kꞌi̱e̱ síndojinná xota̱ xi chji̱a̱ni Partia̱, ko̱jo xota̱ xi chji̱a̱ni Mendia̱, ko̱jo xota̱ xi chji̱a̱ni Elaa̱n, ko̱jo xota̱ xi ndokjo̱a̱ ñá Mesopotamia̱, ko̱jo xota̱ xi chji̱a̱ni Jundea̱, ko̱jo xota̱ xi chji̱a̱ni Kapandosia̱, ko̱jo xota̱ xi chji̱a̱ni Ponto̱, ko̱jo xota̱ xi chji̱a̱ni Asia̱,

¹⁰ ko̱jo xota̱ xi chji̱a̱ni Frijia̱, ko̱jo xota̱ xi chji̱a̱ni Panfilia̱, ko̱jo xota̱ xi chji̱a̱ni Ejipto̱, ko̱jo xota̱ xi chji̱a̱ni nangi Libia̱ xi tiña manii̱ na̱xi̱ńdáꞌniú Sirene̱. Ti̱ bo̱a̱ ti̱ tsꞌén tjín xota̱ xi chji̱a̱ni Roma̱, tjín xi xota̱ jundío̱, kó tjín xi xota̱ jundío̱jín ta̱nga sꞌijii̱n Néná,

¹¹ ti̱ bo̱a̱ ti̱ tsꞌén tjín xota̱ xi chji̱a̱ni Kreta̱, ko̱jo xota̱ xi chji̱a̱ni Arabia̱. Ngayejee̱ nga kandaꞌyáa̱ ñá nga ndyi̱chji̱a̱ én tsa̱ñá, kjo̱a̱a̱ kókjiꞌi kjo̱a̱ndikón xí tsꞌén Néná.

¹² Kó ngayejee̱ nga achichí kijíndikoón, kó nde bejín mí ni xi sa̱ꞌínkjó, sꞌe̱ ja̱kꞌi̱e̱ ja̱ngaján bi̱ katsoó xkjín: –Mí xí mejeén tsó kui nii̱.

¹³ Ta̱nga tjín xí ta̱ tsajnókie nga bi̱ katsó: –Chꞌi̱ kui jaá.

Peé bi̱ tsꞌén tsíchji̱a̱yajin tjón tjoón xota̱ kjiín

¹⁴ Ta̱nga Peé ko̱jo já apostro̱ xi ngi tiengoo̱ kixindyia kixi̱, kó Peé ꞌniú tsíchji̱a̱ nga bi̱ katsó: –Jún já jundío̱ ko̱jo ngayeje jún xi tindyiónjnú na̱xi̱ńdáꞌniú Jerusale̱n, ngatamayajnú kui nii̱, kó nda ndaꞌyájnú én xí kuichjiájojnúꞌun.

¹⁵ Ngatꞌa̱ bo̱a̱jín kjiꞌi xikótsꞌèn ndyi̱niꞌánkjójnú, chꞌi̱jín kui jaá, ngatꞌa̱ sꞌe̱ tsí chi̱bo̱a̱ nijan nga ta̱jño̱ó,

¹⁶ ta̱nga kuí nii̱ xi katsó nda̱ chji̱ni̱e̱ꞌe̱én Néná xi ꞌmí Joee̱l nga bi̱ katsó:

¹⁷ Bi̱ ka̱ma nga kju̱i̱e̱tꞌa ni̱xtjii̱n, tsó Néná, skjitjónjón an A̱si̱énni̱xtjinna ngayeje xota̱, ndí xíꞌínjnú ko̱jo ndí ínchjínjnú ku̱i̱chji̱a̱ xikoó chji̱ni̱e̱ꞌénna, jákjíndí xo̱ngòjnú kjín to̱ko̱ya ni ko̱ko̱ó, kó xota̱ xi xchaá ngi̱jin ńjñaá ko̱e̱ꞌéchinii̱.

¹⁸ Kó moso̱na xi xi̱ꞌin ko̱jo xi ínchjiín, skjitjónjón an A̱si̱énni̱xtjinna kui ni̱xtjin jàn, kó ku̱i̱chji̱a̱ xikoó chji̱ni̱e̱ꞌénna.

¹⁹ Kó nkꞌaa̱ ndiꞌakꞌajmii̱ koko an kjo̱a̱ndikón, kó koko an chi̱bo̱a̱ ngindie tꞌanangii̱, kó jín, ko̱jo ndiꞌí, ko̱jo ṉdi̱ kꞌuié.

²⁰ Tsꞌueé sꞌi̱jñó, kó saá xikoó tsi jín ka̱ma, ngindiee̱ ni̱xtjin nga kji̱ndi̱bá Ndi̱a̱ná, ni̱xtjin je, ni̱xtjin tsjakjiꞌi.

²¹ Kó kjo̱tjoꞌa ngayeje xota̱ xi sa̱ꞌínkjién jaꞌeén Ndi̱a̱ná nga ku̱i̱chji̱a̱a̱.

²² Jún bo̱a̱ já xí chji̱a̱ni Israee̱l, ndaꞌyájnú kui én xí xian an: Kjisoo̱ nda̱ xi chji̱a̱ni na̱xi̱ńdáꞌniú Nasaree̱t, ngo nda̱ xi Néná akójnú nga kisꞌiee̱ ngaꞌniú, ko̱jo nga tsie kjo̱a̱ndikón xí katsꞌén ngi̱ya tsja nga kisꞌijñajo̱jnú, xikótsꞌèn ti̱ juún je yàjnú,

²³ kuí nda̱a̱, xi kiniꞌánkꞌasꞌien nga ja̱bo̱a̱ je índa Néná nga bo̱a̱ ka̱maa̱, kui xi ikꞌítꞌaꞌniújnú ko̱jo xi kiniꞌánkꞌiénjnú, nga kiniꞌánkꞌasꞌienjnú ngi̱ya tsja xota̱ xi ndajín nga akjatꞌa kro,

²⁴ kui xi Néná katsꞌénkjaꞌáꞌyaá, nga jaꞌáxiín ngi̱ya tsja kjo̱a̱bo̱yaa̱, ngatꞌa̱ kjo̱a̱bo̱yaa̱ kamájiín nga kui íjñaꞌniú.

²⁵ Ngatꞌa̱ nda̱ re Ndabii̱, bi̱ katsó kjo̱a̱a̱ kui: Ngatsjéni̱xtjin kamábe an nga kje̱n án tikón Ndi̱a̱a̱, ngatꞌa̱ kuí xí tikóntꞌa ndsa̱ fojní án tsi̱ꞌe̱ nga jmíjín xi sa̱ꞌíntíyána.

²⁶ Kuíni nga achichí tsja maa̱ ini̱ma̱na, kó ndso̱ꞌba án tsja kisꞌiee̱. Kó ngaskande kotíjña̱ an nga kꞌuiéna kjo̱a̱chiyá.

²⁷ Ngatꞌa̱ kꞌuijñímasinjínní ki̱a̱ ngi̱ndiee̱ kjo̱a̱bo̱yaa̱, ti̱nde ko̱e̱ꞌéndièjín ji nga kjo̱tsòn yojoo̱ nda̱ xi tsjie ngindyikin ji.

²⁸ Jí xí akakení ndi̱ya̱à kjo̱a̱mindyioo̱n, kó achichí kjo̱a̱tsja tiboeꞌéní nga kje̱n ji tikòn an.

²⁹ Jún ntsꞌie, ka̱ma bi̱ xiánjnúꞌun kjo̱a̱a̱ nda̱ xi tji̱e̱ xcháná xi ꞌmí Ndabii̱ nga jmí tsi ta̱ kꞌien tsí, kisꞌinijín nga, kó nga̱tsjo̱ó kꞌi̱e̱ tikónjinná ngaskande kui ni̱xtjin xi̱ꞌbi̱.

³⁰ Ta̱nga nga nda̱ chji̱ni̱e̱ꞌe̱én Néná kamá Ndabii̱, Néná xí katsóyàtjoón nga ngo nda̱ xi xota̱ tji̱e̱e̱ kui xi ko̱tíxomaa̱ Israee̱l.

³¹ Ndabii̱, ngindiee̱ kamábe nga kjo̱a̱ꞌáꞌyaá Kristoo̱, ko̱jo nga ki̱a̱jín kꞌuijñá yojoo̱ ngi̱ndiee̱ kjo̱a̱bo̱yaa̱, ti̱nde kjo̱tsònjín yojoo̱.

³² Kuí Kjiso̱ xi̱ꞌbi̱ xi Néná katsꞌénkjaꞌáꞌyaá, kó ji̱n xí chistiko̱ ji̱n.

³³ Kuíni nga kiniꞌándikón nga ki̱a̱ tsja fojnií Néná tikón, kó ngije Na̱ꞌmii̱ katsjaá A̱si̱énni̱xtjii̱n Néná xi katsóyàtjón nga tsja̱á, kó kui nii̱ xi ndyi̱yajnú ko̱jo xi ndyi̱ndaꞌyájnú.

³⁴ Ngatꞌa̱ kuijín Ndabii̱ xi kijí ndiꞌakꞌajmi jàn, ta̱nga ti̱kuíní xi bi̱ katsó: Bi̱ katsoó Ndi̱a̱ná, Ndi̱a̱na: “Ti̱ndyintꞌení nga fojnína nínga botixoma an,

³⁵ ngaskande nga kꞌuindo an ngindie ndsa̱ki kondra̱ tse̱.”

³⁶ Ngatamabe cha̱n cha̱n ngayeje xota̱ Israee̱l, nga ti̱kuíní Kjiso̱ xi̱ꞌbi̱ xi jún akjatꞌajnú kro, kó Néná kuí xí katsꞌén nga Ndi̱a̱ná ko̱jo Kristoo̱ kamá.

³⁷ Nga tsintꞌié kuí eén ngayeje xota̱ xi kamátikó ki̱a̱, achichí on kamaá ini̱ma̱a̱, kó bi̱ katsó nga asíyaá Peé ko̱jo já apostro̱ xi ngasee̱: –Jún ntsꞌie, mí xí si̱ꞌán ji̱n ꞌne̱.

³⁸ Kó Peé, bi̱ katsoó kui jaá: –Ti̱ꞌankꞌoyàjnú yojojnú, kó jaꞌeén Jesukristoo̱ nga niꞌánkjién nga satíndájnú nga ngo nga ngojnú, tsi̱ꞌe̱ nga Néná sa̱ꞌínjetakoón jéjnú, kó bo̱a̱ tsꞌén sa̱kójnú A̱siénni̱xtjin xi Néná tsja̱ajnú.

³⁹ Ngatꞌa̱ kuí nii̱ xi katsóyàtjón Néná nga tsja̱ajnú jún ko̱jo ndíjnú, ko̱jo xota̱ xi kjin síndo, ko̱jo ngayeje xota̱ xi Ndi̱a̱ná ku̱i̱chji̱a̱a̱.

⁴⁰ Kó kui eén, ko̱jo kjín to̱ko̱ya én xí katsꞌénkjién Peé nga tsíchji̱a̱jo, ko̱jo nga atíxomaa̱ xotaa̱ nga bi̱ katsoó: ꞌNa̱xiéꞌájnú yojojnú ngi̱jii̱n kui xota̱ xi tsꞌén ni xi ndajiín.

⁴¹ Kó bo̱a̱ tsꞌén, kui xota̱ xi iskjíbé kuí eén, atíndá yojoo̱, kó kamára̱ tsi ta̱ ngi ján mi̱ xota̱ xi kisꞌijii̱n Néná.

⁴² Kó ta̱nisién kamáꞌniátakón ni xi akóyá já apostroo̱, kó ta̱ ngo tsaꞌa xkjín, ko̱jo kamátikó xtín nga iskjinie, ko̱jo nga katsꞌe, ko̱jo nga tsíchji̱a̱a̱ Néná.

Bi̱ tsꞌén kisꞌińdo xota̱ xi tjón kisꞌijii̱n Kjisoo̱

⁴³ Kó ngayeje xotaa̱ kijíndikoón kjo̱a̱a̱ kjo̱a̱ndikón, ko̱jo chi̱bo̱a̱ xi katsꞌén Néná ngi̱ya tsja já apostroo̱.

⁴⁴ Kó ngayeje xota̱ xi kisꞌijii̱n Néná ꞌniú tsaꞌa xtín yojoo̱, kó ngayeje ni xi kisꞌiee̱ ta̱ tsi̱ꞌe̱ yeje kamá,

⁴⁵ kó atíñá ni xi tjiín, sꞌe̱ to̱o̱n katsꞌénkabii̱ xotaa̱ xikótsꞌèn kamáchjieén nga ngo nga ngo.

⁴⁶ Kó ndyiojón ndyiojón kamátikó ki̱a̱ na̱ngo̱xi̱i̱, kó xki̱ ndiꞌa akjángá paa̱n, kó iskjinie xtín nga tsja kamaá, ko̱jo nga nda kamá ini̱ma̱a̱,

⁴⁷ nga katsꞌéntsjaà Néná, kó kisꞌiee̱ kjo̱a̱ndaa̱ ngayeje xota̱ na̱xi̱ńdaá. Kó ndyiojón ndyiojón Ndi̱a̱ná katsꞌénkjín kui xota̱ xi je tsíchji̱a̱a̱ nga tsꞌaxiéꞌá.