Ni xi kamá 12 - Xo̱jo̱n eén Néná

Nga kiniꞌánkꞌién Sandiyaá ko̱jo nga akjaꞌya ndo̱bo̱a̱yà Peé

¹ Kó kui ni̱xtjin jàn nda̱ re Erondee̱ katsoboá chiboa xota̱ na̱ngo̱xi̱i̱ tsi̱ꞌe̱ nga sa̱ꞌínꞌoón.

² Kó ki̱cha̱ katsꞌénkꞌiénni Sandiyaá, ntsꞌi̱e̱ Juaa̱.

³ Kó nga kamábe nga tsja kamaá xota̱ jundíoo̱ kui nii̱, ti̱ bo̱a̱ ti̱ tsꞌén katsoboá Peé. Kuí má ngi̱jii̱n sꞌué nga chinie pan xi jmí nisanjiín.

⁴ Kó ngije katsoboá, katsangisꞌien ndo̱bo̱a̱yà, kó nijón tjín jájún askondá, xi xki̱ nijón ndyi̱yaꞌa yojoo̱ nga ngo tjín, kó katsꞌénkjó kuí nda̱ re Erondee̱ nga ngije jaꞌa sꞌué paskuaa̱ sa̱ꞌínjeé Peé ngindyi̱ko̱n xota̱ na̱xi̱ńdaá.

⁵ Kó kuíni nga Peé ꞌniú kichindá ngi̱ya ndo̱bo̱a̱ya̱à, ta̱nga xota̱ na̱ngo̱xi̱i̱ ꞌniú ton ton tsíchji̱a̱tjé Peé nga tsíchji̱a̱a̱ Néná.

Ngo ndítsjiee̱ Néná bi̱ tsꞌén tsꞌaxié Peé ngi̱ya ndo̱bo̱a̱ya̱à

⁶ Kó ngo ni̱xtji̱e̱n ngindiee̱ nga Erondee̱ sa̱ꞌínjeé Peé ngindyi̱ko̱n xota̱ na̱xi̱ńdaá, Peé kjiꞌifé ngamasiee̱n jó jájún, nga tjitáꞌniú jó ńꞌniúki̱cha̱, tji̱e̱nga jájún xi ngasee̱ ndyi̱konda nga̱ntjo̱a̱ ndo̱bo̱a̱ya̱à.

⁷ Kó ta̱niján má jachókoón ngo ndítsjiee̱ Néná, kó ngi̱ya ndo̱bo̱a̱ya̱à ngo ndiꞌí katsꞌéntsijen yeje, kó kui ndítsjiee̱ katsꞌénjo̱ ngindie ni̱se̱e̱n Peé, katsꞌénkjaꞌaá, sꞌe̱ bi̱ katsoó: –¡Tsá ti̱sítji̱n! Kó tji̱e̱nmá ixóngí ńꞌniúki̱cha̱ xi tjitáꞌniúní tsja Peé.

⁸ Kó kui ndítsjiee̱, bi̱ katsó ngasee̱: –Chi̱e̱je ńjñóo̱, ko̱jo tjaye tji̱xíndiée̱. Kó bo̱a̱ katsꞌén Peé. Kó ti̱ bi̱ ti̱ katsó nginí kui ndítsjiee̱: –Chi̱e̱jekjé ńjño xi fotꞌe nga̱xten, kó ndibétji̱ngíní.

⁹ Kó Peé kijítji̱ngii̱ ndítsjiee̱, kó nde bejín tsi ja̱koxi̱ ko̱jo tsi bo̱a̱jín kjiꞌi ni xi tjítsꞌén ndítsjiee̱. Ta̱ ngo ni xi ta̱ tjibókorií kjimaa̱ Peé.

¹⁰ Ngije jaꞌatꞌaa̱ jájún xi tjoón ko̱jo xi ma jó xi ndyi̱konda ndo̱bo̱a̱ya̱à, jachótꞌaa̱ nga̱ntjo̱a̱ ki̱cha̱ xi tikón kje̱n ndi̱yàtieé, kui nga̱ntjo̱a̱a̱ ta̱ katjoxꞌá soboá, sꞌe̱ jataxie. Jaskan ngije jaꞌa ngo ndi̱yàtié, kui ndítsjiee̱ íjñá soboá.

¹¹ Kósꞌe̱ Peé kamákjiín, kó bi̱ katsó: –Ngotꞌe̱ ꞌne̱ nga ja̱koxi̱ nga be an nga Néná katsangiya ndítsjiee̱, tsi̱ꞌe̱ nga kꞌo̱xiéꞌána ngi̱ya tsja Erondee̱, ko̱jo ngayeje ni xi mejeén sa̱ꞌínjo̱na xota̱ jundíoo̱.

¹² Kó ngije kamákjiín Peé ni xi kamaá, tji̱e̱nmá kijí ndiꞌaa̱ na̱ Riyaa̱, na̱aa̱n nda̱ xi ꞌmí Juaa̱, xi ti̱ Marko̱ kiꞌmií nga, nínga achichí kjín má xota̱ xi je síndotikó nga ndyi̱chji̱a̱a̱ Néná.

¹³ Kó nga jachó Peé tsíchji̱a̱ tꞌa nga̱ntjo̱a̱ xi tikón kje̱n ndi̱yàtieé, kó ngo tsa̱kjìn xo̱ngò xi ꞌmí Ronde̱ xi katsꞌénseén,

¹⁴ kó nga tsintꞌié nga nda̱a̱ Peé xi̱ꞌba̱, achichí tsja kamaá, kó ngindiee̱ nga skjíxꞌá nga̱ntjo̱a̱a̱, ta̱sá tsanga má nga kijíꞌoyá nginí ngi̱ya jàn nga kijítsáyá nga Peé xi sikóntꞌa nga̱ntjo̱a̱a̱.

¹⁵ Ta̱nga kui jaá, bi̱ katsoó kui tsa̱kji̱ín: –¡A tsobeéri! Ta̱nga ja̱koxi̱ nga Peé, katsó. Kó kui jaá bi̱ katsó: –Kuijín bo̱a̱, ta̱ ndítsjiee̱ boá.

¹⁶ Ta̱nga Peé ta̱kó tjítsꞌénkjániéra nga̱ntjo̱a̱a̱, kó ngije kachjáxꞌaá, kó nga kamáyà nga kui, achichí katsakjónní kui jaá.

¹⁷ Ta̱nga Peé, ta̱ tsja tsí akoó nga xió ti̱ndyiónjnú katsoó kui jaá, kósꞌe̱ íni̱jmì kótsꞌèn Ndi̱a̱ná tsꞌaxiéni ngi̱ya ndo̱bo̱a̱ya̱à. Kó bi̱ katsó ngase: –Tꞌíni̱jmìjnúu̱ kui nii̱ Sandiyaá, ko̱jo ntsꞌié xí ngasee̱. Sꞌe̱ jaskan jatjo kui ndiꞌaa̱ kósꞌe̱ kijí kje̱ꞌe ngi̱ndie.

¹⁸ Kó ngije kisisie̱èn, ngo kjo̱a̱xti kisꞌiee̱ jájuún, ngatꞌa̱ kamábejín ni xi kamá kjo̱a̱a̱ Peé.

¹⁹ Ta̱nga Erondee̱ katsjákjo̱a̱ nga ikindyisé nginí Peé, kó nga kasakojín, jájuún ikꞌínieé ni xi kamaá, sꞌe̱ katsjákjo̱a̱ nga kiniꞌánkꞌién jájún xi ndyi̱konda ndo̱bo̱a̱ya̱à. Jaskan ngije jaꞌa kui nii̱, Erondee̱ jatjo nangi Jundea̱ kósꞌe̱ na̱xi̱ńdáꞌniú Sesarea̱ kijíkꞌíjñá.

Bi̱ tsꞌén kꞌien nda̱ re Erondee̱

²⁰ Kó nda̱ re Erondee̱ achichí katsꞌénxchánjo̱ xota̱ xi chji̱a̱ni na̱xi̱ńdáꞌniú Tiroo̱ ko̱jo na̱xi̱ńdáꞌniú Sindo̱n, kó kui xotaa̱ índa nga kijíkoón Erondee̱. Kó kui xota̱ na̱xi̱ńdaá kamá xi katsꞌén nga nda tsaꞌa Blastoo̱, ngo nda̱ xi ꞌniú nkꞌa xaá xi nijanma Erondee̱, kó kui xotaa̱ tsangi kjo̱a̱xió, ngatꞌa̱ na̱xi̱ńdáꞌniú Tiroo̱ ko̱jo na̱xi̱ńdáꞌniú Sindo̱n, ki̱a̱ sakoó ni xi iskjinie xi katsꞌe kui na̱xi̱ńdaá nda̱ ree̱.

²¹ Kó ngo ni̱xtjin kui nda̱ re Erondee̱ tsíchji̱a̱a̱ xotaa̱ nga yajá ńjño ndaa̱, kósꞌe̱ kisꞌijñasón nínga botixómá, sꞌe̱ tsíchji̱a̱yajii̱n,

²² kó ngayeje xotaa̱ askjandáyà má nga bi̱ katsó: –¡Kui xi tsꞌénchji̱a̱a̱, xota̱jín bo̱a̱, Néná boá!

²³ Ti̱ kuii̱ chi̱bo̱a̱ ngo ndítsjiee̱ Néná katsjaá ngo chiꞌin Erondee̱, ngatꞌa̱ katsjájiín kjo̱a̱je Néná, kó chi̱ndo katsꞌénkjié nga kꞌien.

²⁴ Ta̱nga eén Ndi̱a̱ná kjifítsié nga tjíꞌmíyaá xotaa̱ ngayeje són nga̱sondiee̱.

²⁵ Kó Bernabee̱ ko̱jo Sauloo̱ ngije kamá xaá ki̱a̱ na̱xi̱ńdáꞌniú Jerusale̱n, ti̱ kijíꞌoyá nginí nga nijan kijíjo̱ Juaa̱, kui nda̱ xi ti̱ Marko̱ kiꞌmií nga.