Ni xi kamá 10 - Xo̱jo̱n eén Néná

Peé ko̱jo Korniee̱

¹ Ki̱a̱ na̱xi̱ńdáꞌniú Sesarea̱ kisꞌijña ngo nda̱ xi ꞌmí Kornie̱, nda̱ ngito̱ko̱o̱ jájún xi ꞌmí Italianaa̱,

² kui nda̱a̱ ko̱jo xota̱ ndiꞌaa̱ kamábendikón ton ton Néná, kó tsie to̱nchji̱e̱ katsjá nga asíko̱jo xota̱ na̱xi̱ńdaá, kó ngatsjéni̱xtjin tsíchji̱a̱a̱ Néná.

³ Ngo ni̱xtjin nga mara̱ tsi ta̱ chi̱bo̱a̱ ján nga kamángixón akakoo̱ ngo ni: kamábe xikoó tsi ngi̱jin ńjñá jàn nga ngo ndítsjiee̱ Néná tsꞌénꞌbosꞌien nínga tikón, kó bi̱ katsoó: –¡Kornie̱!

⁴ Kó Korniee̱ ta̱ askotsijendárií kui ndítsjiee̱, kó achichí katsakjón nga asíyaá, sꞌe̱ bi̱ katsoó: –Mí xí machjieén Ndi̱a̱. Kósꞌe̱ bi̱ katsó ndítsjiee̱: –Nga tindokjo̱e̱e̱ Néná, ko̱jo nga tibosíke̱je ngayeje xota̱ ni̱ma̱ xi jmí to̱njiín, je jachó kui nii̱ ngindyi̱ko̱n Néná.

⁵ Kó ngotꞌe̱ ꞌne̱ nangíyé ji já ki̱a̱ na̱xi̱ńdáꞌniú Jope̱, tsi̱ꞌe̱ nga kji̱ndi̱bájo̱ ngo nda̱ xi ꞌmí Ximo̱ xi ti̱ Peé ꞌmií nga.

⁶ Ki̱a̱ tikón ndiꞌaa̱ ngo nda̱ xi ti̱ Ximo̱ ꞌmí, xi tsꞌéntie tji̱xi̱ín cho̱, kó ki̱a̱ tꞌa ndáchíkoón tikón ndiꞌaa̱.

⁷ Kó ngije kijí kui ndítsjie xi tsíchji̱a̱jo Korniee̱, tsíchji̱a̱a̱ jó já mosoo̱ tsi̱ꞌe̱ nga sa̱ꞌínseén, ko̱jo ngo nda̱jun xi kamábendikón ton ton Néná,

⁸ kó ngije íni̱jmì yejee̱ kui nii̱, katsangiya tji̱ꞌni̱u̱ na̱xi̱ńdáꞌniú Jope̱.

⁹ Nga kamángindyiojón mején nga ma ndisꞌué, tji̱e̱nga tjimáyà ndi̱yà kuí jaá nga mején ma kjachó na̱xi̱ńdáꞌniú Jope̱, Peé tsíchji̱a̱a̱ Néná nga̱són nkꞌaá ngo ndiꞌa.

¹⁰ Sꞌe̱ ꞌniú kamábojoó, kó kamámejeén iskjinie nichinie, sꞌe̱ tji̱e̱nga tjíniꞌánchján ni xi skji̱ni̱e̱, akakoo̱ ngo ni:

¹¹ Kamábe nga katjoxꞌá ndiꞌakꞌajmi jàn, kó tsꞌéndibájèn tꞌanangii̱ ngo ni xi ja̱kjiꞌi ńjñotjibé je kjiꞌi, xi xikoó tsi tjín xí ndyi̱tsofóꞌniú nga nijón nijon,

¹² kó ki̱a̱ ngi̱yaa̱ kui ńjñoo̱ ndyi̱a̱ ngayeje to̱ko̱ya cho̱ xi nijón se tjín, ko̱jo cho̱ xi ꞌbifé yojoo̱, ko̱jo ngayeje to̱ko̱ya ni̱sie xi tjín nkꞌa jàn.

¹³ Kó Peé tsintꞌieé ngo nda̱ xi bi̱ katsó: –¡Ti̱sítji̱n Pé, ti̱ꞌinkꞌin ji kui cho̱o̱, kó chi̱ni ji!

¹⁴ Ta̱nga Peé, bi̱ katsó: –Jmí Ndi̱a̱, kji̱e̱ ngo ndi̱yà kjíni̱e̱ an ngo ni xi ta̱xkiya ko̱jo ni xi ndándí.

¹⁵ Sꞌe̱ bi̱ katsó nginí kui nda̱a̱ xi ma joó ndi̱yà: –Ni xi Néná je katsꞌéntsjie ngindyi̱ko̱n kui, ngata̱ ni ndándíjín sée̱.

¹⁶ Ján ndi̱yà kamá kui nii̱, kó kui ńjñotjibeé tji̱e̱nmá katjoꞌóꞌyá nginí ndiꞌakꞌajmi jàn.

¹⁷ Kó tji̱e̱nga Peé nde bejín mí xí sa̱ꞌínkjó kjo̱a̱a̱ mí ni xi mejeén tsó kui ni xi akakoo̱, kui já xí katsangiya Korniee̱ kui xi je ndyi̱bosíyà ndiꞌa nínga tikón Ximoo̱, jachó nga̱ntjo̱a̱a̱.

¹⁸ Kó asíyá tsi ki̱a̱ tikón kui nda̱ xi ꞌmí Ximoo̱ kui xi ti̱ Peé kiꞌmií nga.

¹⁹ Kó tji̱e̱nga Peé ta̱kó tjítsꞌénkjó ni xi kamábe, A̱si̱énni̱xtjii̱n Néná, bi̱ katsoó: –Jànꞌa̱n ján má já xí ndyi̱mongasee̱.

²⁰ Ti̱sítji̱n, ti̱tjaje̱n, kó nga jó nga jánjín ꞌbíjñíi̱ ini̱màa̱ nga kꞌuínje̱ kui jaá, ngatꞌa̱ án xí katsangiya an.

²¹ Kósꞌe̱ Peé tji̱e̱nmá jatjajen nínga síndo kui jaá, kó bi̱ katsoó: –Án boá xi ndyi̱mindyiséjnúꞌun, mí xá ndyi̱foéꞌe̱jnú.

²² Kó kui jaá, bi̱ katsoó: –Nda̱jun ngito̱ko̱ xi ꞌmí Korniee̱ xí katsangiyajne̱, ngo nda̱ xi kixi̱ ko̱jo xi bendikón Néná xi nda tjindókjo̱a̱ kjo̱a̱a̱ kui ngayeje na̱xi̱ńdaá xota̱ jundíoo̱, kó ngo ndítsjiee̱ Néná katsóyaà kui nda̱a̱ nga ku̱i̱chji̱a̱a̱ ji, tsi̱ꞌe̱ nga kꞌuin jí ndiꞌaa̱, kó kuí ku̱i̱ntꞌie̱é ni xi ko̱ndókjo̱e̱je.

²³ Kósꞌe̱ Peé katsꞌénkꞌasꞌien ngi̱ya ndiꞌa nínga tikón, kó kui jaá ki̱a̱ kamaá ngo ni̱xtji̱e̱n. Sꞌe̱ nga kamángindyiojón Peé kijíjo̱ kui jaá, kó nijan kijíjo̱ já ntsꞌie xi síndo na̱xi̱ńdáꞌniú Jope̱.

²⁴ Kó nga kamángindyiojón jachó na̱xi̱ńdáꞌniú Sesarea̱ nínga je ndyi̱koyaa̱ Korniee̱, ko̱jo xota̱ tsi̱ꞌe̱, ko̱jo já amingoo̱.

²⁵ Kó ngije tsꞌasꞌien Peé kui ndiꞌaa̱, Korniee̱ tji̱e̱nmá katsꞌénkꞌasꞌien, kó asiéntikoó kje̱n Peé nga katsꞌéndikón.

²⁶ Ta̱nga Peé tji̱e̱nmá katsꞌénkjastjíe̱n Korniee̱, kó bi̱ katsó: –Ta̱si̱nkixi̱ ji, ngatꞌa̱ ti̱ xota̱ án xikoó ji.

²⁷ Kó tji̱e̱nga tsíchji̱a̱jo kui nda̱a̱ tsꞌasꞌienjo̱ ngi̱ya ndiꞌaa̱, kó ki̱a̱ kamábe nga kjín má xota̱ xi je síndotikó.

²⁸ Kó Peé, bi̱ katsoó kui xotaa̱: –Jè yàjnú nga ji̱n xi xota̱ jundío̱ ji̱n, tsjandièjínjne̱ kjo̱a̱kitijne̱ nga si̱ꞌankamajo̱jne̱ xota̱ xi kje̱ꞌe nangi, ta̱nga Néná akóna nga ka̱májín tsi ta̱xkiya ko̱jo tsi tsjiejín xiáa̱n ngo xota̱,

²⁹ kuíni nga ngije kandokjo̱a̱na tji̱e̱nmá kjindibá an, kó mejénna sku̱i̱e̱ an mí kjoaá nga an kandokjo̱a̱jnúꞌun.

³⁰ Kó bi̱ katsó Korniee̱: –Nijón ni̱xtjin tjínnií nga akakona ngo ni, mején ti̱ kuii̱ chi̱bo̱a̱, kꞌi̱e̱ ndiꞌana tikòn an nga tsꞌénchji̱a̱a̱ Néná nga chi̱bo̱a̱ ján nga kamángixoón, nga kamábe an ngo nda̱ xi tsꞌényajá ngo ńjño ꞌna̱,

³¹ kó bi̱ katsóna: “Kornie̱, jè kandaꞌyá nga tindokjo̱e̱e̱ Néná, kó chji̱e̱e̱ jè tjíniꞌánkjaꞌátsjien ngindyi̱ko̱n Néná.

³² Nangíyé ji xota̱a̱ na̱xi̱ńdáꞌniú Jope̱ tsi̱ꞌe̱ nga kji̱ndi̱bájo̱ nda̱ xi ꞌmí Ximoo̱ kui xi ti̱ Pé ꞌmií nga, xi tikón ndiꞌaa̱ nda̱ xi ingo xi ꞌmí Ximoo̱, xi tsꞌéntie tji̱xi̱ín cho̱ kui xi tꞌa ndáchíkoón tikón ndiꞌaa̱.”

³³ Kó kuíni nga tji̱e̱nmá katsangiya an nga kijíndyiseé, kó ji kiniꞌín ji kjo̱a̱nda nga kjindibé ji. Ngotꞌe̱ ꞌne̱ kꞌi̱e̱ tindyión xtín ngayeje ñá ngindyi̱ko̱n Néná, kó mejénjne̱ ko̱nda̱ꞌyájne̱ ngayeje ni xi je katsoó Néná nga kꞌuiyéjne̱.

³⁴ Kó Peé bi̱ katsó nga tsíchji̱a̱: –Ngotꞌe̱ ꞌne̱ makjínna nga ja̱koxi̱ boá nga Néná skjánjín tsꞌénjo̱ xotaa̱,

³⁵ ta̱sá ngayeje na̱xi̱ńdá tsja maá Néná kjo̱a̱a̱ ngayeje xota̱ xi bendikón ko̱jo xi ni xi kixi̱ ndyi̱tsꞌèn.

³⁶ Néná xí katsangiyaa̱ eén xota̱ Israee̱l nga katsóyà éntjatsi̱e̱e̱ kjo̱a̱xioó ngatꞌaa̱ Jesukristoo̱, nga kui xi Ndi̱a̱ xi tsa̱ñá.

³⁷ Jún jè yàjnú ni xi ikꞌíni̱jmi̱ì ngayeje na̱xi̱ńdá xí chji̱a̱ni nangi Jundea̱, nga ítsꞌi̱yanii̱ ngaskande nangi Ngalilea̱, jaskan ngije Juaa̱ katsóyà nga chjiéngá, nga sa̱tíndá,

³⁸ ko̱jo nga Néná katsjaá ngaꞌniú ko̱jo A̱si̱énni̱xtjii̱n Néná kui Kjiso̱ xi chji̱a̱ni Nasaree̱t, kó kuí Kjisoo̱ xi kistsoꞌbá nga katsꞌén ni xi nda, ko̱jo nga katsꞌéndaya ngayeje xota̱ xi tsie kjo̱a̱ni̱ma̱ ndyi̱foaꞌa, xi kjimaniꞌii̱n ta̱ngatꞌanii̱ xindajín ndiabloo̱, ngatꞌa̱ Kjisoo̱ Néná kistsoꞌbájo̱,

³⁹ kó ji̱n xí chistiko̱ ji̱n kjo̱a̱a̱ ngayeje kjo̱a̱nda xi katsꞌén Kjisoo̱ nangi Jundea̱, ko̱jo na̱xi̱ńdáꞌniú Jerusale̱n, kósꞌe̱ jaskan kiniꞌánkꞌién nga akjatꞌa kro.

⁴⁰ Kó kuí Kjisoo̱ xi Néná katsꞌénkjaꞌáꞌyaá xi ma ján ni̱xtjin, kó katsjákjo̱a̱ nga Kjisoo̱ akójne̱ yojoo̱,

⁴¹ jmí tsi ngayeje xota̱ na̱xi̱ńdaá xi akoó yojoo̱, ta̱ ji̱n tsí xi kamáyàjne̱, ji̱n xi ja̱bo̱a̱ je jaꞌájinjne̱ Néná nga chistiko̱ kamájne̱, kó ji̱n kichiniejo̱ ko̱jo kiꞌyójo̱jne̱ jaskan ngije jaꞌáꞌyaá.

⁴² Kó kuí xí atíxomajne̱ tsi̱ꞌe̱ nga kꞌuiníjmi̱jne̱ xota̱ na̱xi̱ńdaá nga kuí Néná xi katsjaá xá Kjisoo̱ nga kui xi nendiꞌamasiee̱n xota̱ xi síndo, ko̱jo xi je jesón ka̱ma.

⁴³ Ngayeje já chji̱ni̱e̱ꞌe̱én Néná ja̱bo̱a̱ jè tsíchji̱a̱ kjo̱a̱a̱ Kjisoo̱, kó bo̱a̱ tsꞌén tsíchji̱a̱ nga ngayeje xota̱ xi sꞌijii̱n kui, sa̱ko̱ó kjo̱a̱jetakoón jeé.

⁴⁴ Ta̱kó tsꞌénchji̱a̱ ngase Peé, nga A̱si̱énni̱xtjii̱n Néná kjindibánié ngayeje xota̱ xi ndyi̱bosiennijón kui eén.

⁴⁵ Kó kui xota̱ jundío̱ xi sꞌijii̱n Néná xi nijan jachójo̱ Peé achichí kijíndikoón nga ko̱jo kui xota̱ xi jundío̱jiín kisꞌijñajii̱n A̱si̱énni̱xtjii̱n Néná nga,

⁴⁶ ngatꞌa̱ nga kje̱ꞌe én ndyi̱chji̱a̱ kui xotaa̱ nga katsꞌéntsjaà Néná.

⁴⁷ Kósꞌe̱ Peé, bi̱ katsoó: –A tjín xí tsja̱ndièjín nga sa̱tíndá kuí xota̱ xi je katseꞌeé A̱si̱énni̱xtjii̱n Néná xikoó ji̱n.

⁴⁸ Kó bo̱a̱ katsoó Peé nga sa̱tíndá xotaa̱ ngatꞌa̱ je kisꞌijii̱n Ndi̱a̱ná Jesukristoo̱. Kósꞌe̱ kichjiáꞌaá Peé tsi̱ꞌe̱ nga kꞌo̱ndíyá ngasee̱ nga kꞌuijñá kui ngi̱ndiee̱.