Ndeuteronomio̱ 9 - Xo̱jo̱n eén Néná

Néná ko̱síko̱jo xota̱ na̱xi̱ńdaá

¹ Kó Moisee̱ bi̱ katsó ngasee̱ xota̱ na̱xi̱ńdaá: «¡Jún xota̱ Israee̱l, tasiénijónjnúꞌun! Jè tsá ku̱i̱tja̱tiójnú xi ingoboaá ndejèꞌ Jorndaa̱n, kó ku̱i̱yotjingíjnúu̱ ngayeje xota̱ na̱xi̱ńdá xi síndo kui tꞌanangii̱. Kui xotaa̱ kjín ngase ma, ko̱jo ꞌniú ngase ta̱bo̱a̱jiín jún, kó na̱xi̱ńdáꞌniuú achichí yiꞌi, kó xó xí ta̱nisién nkꞌa tjíchjáꞌyáni.

² Ngi̱jii̱n kui xotaa̱, ki̱a̱ síndojin xota̱ tji̱e̱e̱ nda̱ xi je ko̱jo xi ꞌniú nkꞌa kamá kui xi kiꞌmí Anaa̱k, kó tsꞌénkjó xotaa̱ nga jmíjín xi sa̱ꞌiín nga skjánjo̱ kui xotaa̱.

³ Ta̱nga jún jè yàjnú nga Néná boá xi tsꞌénfítjónná. Kó ngaꞌniuú, kuí boá xi xikoó ngo ndiꞌí xí tsꞌenkjiéná, kó kuí nii̱ xi sa̱ꞌínkjién ko̱jo nga ni̱ma̱kjo̱a̱ ku̱i̱ꞌíndoni kui xota̱ xi ta̱nisién yiꞌi ko̱jo xi ta̱nisién nkꞌaá. Ta̱ngatꞌanii̱ ngaꞌniuú Néná nga jún, ka̱ma si̱ꞌánjnúu̱ nga ku̱i̱xkánjo̱jnú kui xotaa̱, kó tji̱e̱nmá ku̱i̱yotjingíjnúu̱, xikó má katsó Néná nga katsóyàtjónjnú.

^4-5 »Ngije ikitjasꞌi̱e̱njnú kui tꞌanangii̱, kó ngije Néná tsangatji̱ngii̱ kui xotaa̱, ngata̱ niꞌánkjójínjnú nga Néná katsjájnú kui tꞌanangii̱ ngatꞌa̱ nga ta̱nisién ndajnú xota̱. Néná ko̱ngatji̱ngii̱ kui xotaa̱ ta̱ngatꞌanii̱ nga ndajín. Kó bo̱a̱ tsꞌén nga Néná sa̱ꞌínkjatjosón ni xi katsóyàtjoón Abraa̱n, ko̱jo Isaa̱, ko̱jo Jakoo̱b, kui xi xota̱ xi xchájnú.

⁶ Nda má ngatamakjínjnú kui nii̱, nga tsi Néná tsja̱ajnú kui tꞌanangi xi ta̱nisién ndaa̱, jmí tsi kjo̱a̱a̱ nga ta̱nisién ndajnú xota̱, nga ja̱koxi̱ xota̱ na̱xi̱ńdá xi ta̱nisién kitikjo̱a̱ boá jún.

Nga tsintꞌiéꞌénjín xota̱ Israee̱l

^7-8 »Ngata̱chiíjín niꞌánchíyájnú kui nii̱: Ndeskande ni̱xtjin nga ikitjaxi̱e̱jnú nangi Ejipto̱, kó ngaskande ngotꞌe̱, ngatsjéni̱xtjin nga ndyi̱ndaꞌyáꞌénjínjnúu̱ Néná. Kjiꞌanga kixindyionjnú nangi kixií ko̱jo ki̱a̱ na̱xi̱ Oree̱b kiniꞌánxtíjnúu̱ Néná, kó katsꞌénkjó Néná nga sa̱ꞌínkjiéjnú.

⁹ An ki̱a̱ kijínijíngí an na̱xi̱i̱, tsi̱ꞌe̱ nga si̱ꞌankꞌasꞌienna ndi̱jo̱ tie nínga kjitꞌa kjo̱a̱ꞌbínda xi katsꞌénjo̱jnú Néná. Ki̱a̱ kisꞌijña an yichán ni̱xtjin ko̱jo yichán ni̱xtji̱e̱n nga kisꞌijña kjindiá án, nga jmí ni iskjíni̱e̱jín an ti̱nde jmí ni katsꞌejín an.

^10-11 »Kjiꞌá boá nga Néná katsꞌénkꞌasꞌienna kjo̱a̱botíxomaa̱, kui xi kuí má xi katsꞌénꞌindó nga jó tie ndi̱jo̱o̱. Ja̱ bo̱a̱ jè bo̱a̱ katsójnú nga tsíchji̱a̱jojnú ngi̱jin ndiꞌií, kuí boá xi katsóyàjnú nga tsja̱ajnú kui kjo̱a̱botíxomaa̱.

¹² An bi̱ katsóna: “Ti̱tjaje̱n ji na̱xi̱i̱ ngotꞌe̱ má, ngatꞌa̱ kui xota̱ na̱xi̱ńdá xí kaꞌnaxié ji nangi Ejipto̱, jè ngiti̱ ndyi̱ntꞌièꞌénjínna, ¡achichí je tsá katsꞌénkjatsón yojoo̱! Ngo ni je katsꞌénda xi ne ndyi̱tsoó, kó je ndyi̱tsꞌèntsjaà.

¹³ Jè kamábe an nga achichí je kitikjo̱a̱ kamá kui xota̱ na̱xi̱ńdaá.

¹⁴ ¡Te̱ꞌéndièní nga sa̱ꞌinkjié an, tsi̱ꞌe̱ nga ngiti̱ jmíjín xi kjo̱a̱ꞌátsjien ngasee̱! Kó ji, ngito̱ko̱o̱ ngo na̱xi̱ńdá xí ꞌniú jè ko̱jo xi tjiín ngaꞌniú sa̱ꞌiin ji”.

¹⁵ »Kó an nga jatjaje̱n an ki̱a̱ na̱xi̱i̱ tsꞌényaꞌa an nga jó tie ndi̱jo̱ nínga kjitꞌa kjo̱a̱ꞌbíndaa̱. Nga jatjaje̱n an tjítíngá má kui na̱xi̱i̱.

¹⁶ Nga jachó an nínga tindyiónjnú, kamábe an kótsꞌèn je kiniꞌánjéjnú kondraa̱ Néná, nga je kiniꞌándajnú ngo ni xi ne kiꞌmíjnúu̱ xi ja̱kjiꞌi cho̱yojo toro̱ má kjiꞌi, kó je ndyi̱niꞌántsjájnúu̱. »Achichí tsá ikꞌíjñámasienjnú kjo̱a̱ndaꞌyáꞌeén Néná.

¹⁷ Kó achichí katsꞌenxchán án nga tsꞌatójó an tꞌanangii̱ nga jó tie ndi̱jo̱o̱, kó ngindyi̱ko̱n ngayeje xotaa̱ kamá xi̱ kui ndi̱jo̱o̱.

^18-29 Jaskan iskjíbé án kui ne xi kiniꞌándajnú, kó ití an, kósꞌe̱ ki̱a̱ iskjitjón an ndisoo̱ ki̱a̱ xo̱ngàndántꞌié xi tsꞌéndibájènni na̱xi̱i̱. »Jé xí kiniꞌánjnú achichí on kamána, ko̱jo ndasen kisꞌijña an, ngatꞌa̱ kui nii̱ xi katsꞌénxtií Néná. Kuíni nga ngindyi̱ko̱n Néná asien an tikóna, kó yichán ni̱xtjin ko̱jo yichán ni̱xtji̱e̱n kisꞌijña kjindiá án, jmí ni iskjíni̱e̱jín an kó jmí ni katsꞌejín an. Achichí katsꞌénxchán Néná kjo̱a̱a̱ jún ko̱jo Aaroo̱n, kó je bo̱a̱ katsó katsaki nga sa̱ꞌínkjiéjnú. »Achichí katsakjon an nga tsíchji̱a̱a̱ Néná kó bi̱ kixiáa̱n: “Ji Ne, ngata̱ niꞌínkjiéjín ji kui xota̱ na̱xi̱ńdá xi kaꞌnaxié ji ki̱a̱ nangi Ejipto̱ nga kiniꞌínkjín jí ngaꞌniú jée̱. Xota̱ na̱xi̱ńdáa̱ boá. Ngatjaꞌátsjiee̱n nga Abraa̱n, ko̱jo Isaa̱, ko̱jo Jakoo̱b ngatsjéni̱xtjin nga kamáꞌniátakoón, kó ngayeje ni xi kasée̱ tsintꞌiéꞌeén. Ti̱ꞌinchíyé ji kjo̱a̱kitikjo̱a̱a̱ kui xota̱ na̱xi̱ńdaá, ti̱ꞌinchíyé ji jeé, ti̱ꞌinchíyé ji ni xi ndajín xi katsꞌén. Tsi si̱ꞌinkjie ji, xota̱ na̱xi̱ńdá xí ngasee̱ sa̱ꞌínkjó nga kamájiín kꞌinje̱ ji nínga tikón kui tꞌanangi xi kaseyetjée̱n nga ko̱e̱ꞌée̱. Ti̱ sa̱ꞌínkjó nga tjójiín, kó nga kaꞌnaxié ji nangi Ejipto̱, tsi̱ꞌe̱ nga si̱ꞌinkjie ndo̱jò ndójo̱ jí. Kui xota̱, xota̱ na̱xi̱ńdáa̱ boá, kuí boá kui xota̱ na̱xi̱ńdaá xí kaꞌnaxié ji nangi Ejipto̱ nga kiniꞌínkjín jí ngaꞌniú jée̱”. »Ingo ndi̱yà nginí, Néná tsintꞌié nga tsíchji̱a̱a̱, kó katsꞌénjetakónjnú. Ta̱nga jmí tsi ta̱ kjiꞌá tsí bo̱a̱ nga kiniꞌánxtíjnúu̱. Ti̱ kiniꞌánxtíjnúu̱ ki̱a̱ Taberaa̱, ko̱jo ki̱a̱ Masaa̱, ko̱jo ki̱a̱ Kibroo̱t-Ataabaa̱. Kó kjiꞌanga kixindyionjnú Kandee̱-Barnea̱, Néná atíxomájnú nga kongínkixkántjéjnú nga si̱ꞌánjnú kui tꞌanangi xi katsóyàtjón nga tsja̱ajnú, ta̱nga jún kisꞌijinjínjnú ni xi katsóyàtjón, ti̱nde kandaꞌyáꞌénjínjnúu̱. ¡Ndeskande koó nga kamábejnúꞌun jún, be an nga ngatsjéni̱xtjin nga xota̱ kitikjo̱a̱jnú ko̱jo nga ndaꞌyáꞌénjínjnú!»