Ndeuteronomio̱ 8 - Xo̱jo̱n eén Néná

Néná skoón xota̱ na̱xi̱ńdaá

¹ Kó Moisee̱ bi̱ katsó ngasee̱ xota̱ na̱xi̱ńdaá: «Chónjnú nga si̱ꞌankjatjosónjnú ngayeje kui kjo̱a̱botíxoma xi tsꞌéntsjájnúꞌun kui ni̱xtjii̱n, tsi̱ꞌe̱ nga ka̱ma ku̱i̱ndyionjnú kui tꞌanangi xi Néná katsóyàtjoón xota̱ xi xchájnú nga tsja̱á. Tsi si̱ꞌankjatjosónjnú, jún tsa̱jún ka̱ma kui tꞌanangii̱, kó achichí ndí kꞌuiéjnú.

² »Ngata̱chiíjín niꞌánchíyájnú xikó kamájnú ndeskande nga jatjonijnú nangi Ejipto̱, ngaskande nga jéꞌe̱jnú kui ngi̱ndiee̱. Kui xi yichán noó, Néna boá xi katsꞌén nga ikitjatiójnú kjo̱a̱ni̱ma̱, tsi̱ꞌe̱ nga sku̱i̱e̱ tsi kixi̱jnú ko̱jo tsi mejénjnú ko̱nda̱ꞌyáꞌénjnúu̱.

³ Jè katsꞌénkjaꞌájnú kjindiá, ta̱nga katsjájnú nichinie xi kjindibájénni ndiꞌakꞌajmii̱, ngo nichinie xi ti̱nde jún, ti̱nde xota̱ xi xchájnú kamábejín. Kó kui nii̱ xi katsꞌén Néná nga akóyájnú, tsi̱ꞌe̱ nga ndatsi kꞌuiéjínjnú nichinie, ta̱nga ka̱ma ka̱maꞌniátakónjnú ni xi katsóyàtjón ko̱jo eén, tsi̱ꞌe̱ nga ku̱i̱ndyionjnú nga̱sondie.

⁴ Yichán nó jè kisꞌiṉtja̱ndsa̱kojnú, ta̱nga kamáxchájín ńjñojnú, ti̱nde kamáskejín ndsa̱kojnú.

⁵ »Tsi Néná katsꞌénchji̱ni̱e̱jnú, ngatamakjínjnú nga kui nii̱ xi katsꞌén ngatꞌa̱ tjoó jún, xikó tsꞌénjo̱ ndií ngo na̱ꞌmi.

⁶ Kuíni nga, cha̱ndikónjnú Néná, kó ti̱ꞌankjatjosónjnú ngayeje kjo̱a̱botíxomaa̱.

⁷ »Tsitsíjenjnúu̱ nga Néná ngo tꞌanangi xi ta̱nisién nda tsꞌéntsjájnú, xi tjiín xo̱ngàndántꞌié, ko̱jo ndáfoa xi sijén, ko̱jo ndáńchꞌi̱ xi tjo nínga tjín nangi xi són ko̱jo na̱xi̱i̱.

⁸ Kui tꞌanangii̱ maxchá to ndso̱ko̱a̱n ṉño̱pan, ko̱jo to sebanda̱, ko̱jo toꞌingo̱, ko̱jo tostsi̱jè, ko̱jo to ngrananda̱, ko̱jo toꞌaseituna̱, kó achichí isti̱, ko̱jo ntsjién tjín kuí ngi̱ndiee̱ nga.

⁹ Jmí ni̱xtjin xcha̱jàjnú nichinie ki̱a̱a̱, kó kꞌuiéjnú ngayeje ni xi ka̱machjiénjnú. Ki̱a̱ na̱xi̱i̱ ka̱ma ko̱ꞌna̱xiéjnú ki̱cha̱ kobre̱, kó nínga tjín ndi̱jo̱o̱ ka̱ma ko̱ꞌna̱xiéjnú ki̱cha̱.

¹⁰ Ta̱nga ngije kitsiejnú ko̱jo ngije nda kisꞌiejnú, ngata̱ chíyájínjnú nga ko̱e̱ꞌéjnúu̱ ndokꞌóchjì Néná, kjo̱a̱a̱ kui tꞌanangi nda xi katsjájnú.

Ngata̱ niꞌánchíyájínjnú Nejnú

¹¹ »Ngata̱ niꞌánchíyájínjnú Nejnú. Ti̱ꞌankjatjosónjnú ngayeje kjo̱a̱botíxomaa̱ kui xi tjítsꞌenkꞌasꞌiénjnúꞌun ngotꞌe̱.

^12-14 Nde niꞌínjín niꞌánchíyá Néná kjiꞌanga ngayeje nii̱ xi nda kjimáná, kjiꞌanga kitsiená, kó tjínná nichinie, kjiꞌanga ndakjiꞌi ndiꞌaná, kjiꞌanga kjín cho̱ tjié tjínná, kjiꞌanga tjínná to̱nsinié ko̱jo to̱ntiboa. Kjiꞌanga xotaa̱ sa tsie sa tsie ngase ni tjiín, achichí nkꞌakon má, kósꞌe̱ tsꞌénchíyà Néná. Kuíni nga, ¡chónjnú yojojnú! Ngata̱ niꞌánchíyájínjnú nga Néná boá xi tsꞌaxiéjnú ki̱a̱ nangi Ejipto̱, nínga moso̱ kamájnú,

¹⁵ kó nga Néná boá xi kistsoꞌbátjónjnú nga tsangínjnú ki̱a̱ nangi kixií, ngo ngi̱ndie xi je, ko̱jo xi achichí chꞌochon, nínga tjikítsie má ye̱ xi tsꞌenkꞌiénná, ko̱jo cho̱ndáyá, kó jmí ni kamájínjnú. Ngata̱ chíyájínjnuú kótsꞌèn Néná tsꞌaxiéni ndáfoa ngo ndi̱jo̱, kjiꞌanga kjifesón xíndájnú, kó kisꞌiejínjnú ni xi sꞌi̱o̱jnú.

¹⁶ Ngata̱ chíyájínjnú nga Néná katsjájnú nichinie xi ndibání ndiꞌakꞌajmii̱ ki̱a̱ nangi kixií, ngo nichinie xi jmíni̱xtjin kamábe xota̱ xi xchájnú. »Ngatjaꞌátsjienjnú nga Néná boá xi katsangiyajnú kui kjo̱a̱chjatꞌayákoón nganda tsa̱jún.

¹⁷ Tsi xchi̱yàjnú kui nii̱, si̱ꞌankjóra̱jnú nga ta̱ngatꞌanii̱ ngaꞌniújnú nga tjínjnú ngayeje ni xi tjínjnú, ko̱jo ni xi je kasakojnú.

¹⁸ Ta̱sá ngatjaꞌátsjienjnú nga Néná boá xi katsjájnú ngayeje kui nii̱, kó bo̱a̱ katsꞌén, ngatꞌa̱ katsꞌénkjatjosón ni xi katsóyàtjoón xota̱ xi xcháná nga tsja̱á.

¹⁹ »Kó ja̱koxi̱ ni xi xiánjnúꞌun nga tsi si̱ꞌanchíyájnú Néná, ko̱yàjnú ki.

²⁰ Tsi ko̱nda̱ꞌyáꞌénjínjnúu̱, Néná sa̱ꞌínkjiéjnú, xikótsꞌèn sa̱ꞌínkjié kui xota̱ na̱xi̱ńdá xí ka̱mamejeén skjánjo̱jnú jún».