Ndeuteronomio̱ 6 - Xo̱jo̱n eén Néná

¹ Kuí bí kui kjo̱a̱kitii̱ xi Néná atíxomana nga kokoyájnúꞌun, tsi̱ꞌe̱ nga si̱ꞌankjatjosónjnú ki̱a̱ tꞌanangi nínga ku̱i̱ndyionjnú.

^2-3 Tsi si̱ꞌankjatjosónjnúu̱ Néná, kó tsi si̱ꞌantsjajnúu̱ xikótsꞌèn je akoyájnúꞌun, jún boá xi ngo na̱xi̱ńdá xí ta̱nisién je ka̱majnú. Tsja ka̱majnú nga ku̱i̱ndyionjnú kui tꞌanangii̱, xikó má katsoó Néná nga tsíchji̱a̱jo xota̱ xi xcháná. ¡Achichí nda kui tꞌanangii̱ nga ngatsjéni̱xtjin tsie nichinie tjín!

Kjo̱a̱botíxoma xi ꞌniú chjí ngasee̱

⁴ »¡Ndaꞌyájnú jún xota̱ na̱xi̱ńdá Israee̱l! Kui Néná xí ngototoo̱, kuí boá xi Nee̱ xota̱ Israee̱l.

⁵ Ti̱ꞌintjé ji Nèe̱ ngayeje ini̱ma̱a̱, ngayeje kjo̱a̱mindyiòo̱n, ko̱jo ngayeje ngaꞌniúu̱.

⁶ Tjajintakín ji ngayeje kjo̱a̱bokoyá xi tsꞌéntsjaa ngotꞌe̱,

⁷ kó ta̱jmì chi̱bo̱a̱ní nga ndókjo̱e̱je ndíi̱, ko̱jo ta̱jñà ngi̱ndiení, xikoó: kjiꞌanga tindyin ji ndiꞌàa̱, ko̱jo tsi nga ngi̱ya ndi̱yà tsꞌentje̱, ko̱jo nga ku̱i̱stji̱n, ko̱jo nga tsjajní.

⁸ Tji̱xi̱ín cho̱ tjatꞌe ji, kó ki̱a̱ tꞌíꞌní jí ndse̱ ko̱jo tsi xtjin tjatꞌe kui tji̱xi̱ín.

⁹ Ti̱ꞌinꞌindé ji ki̱a̱ nga̱ntjo̱a̱a̱ ndiꞌàa̱, ko̱jo ki̱a̱ nga̱ntjo̱a̱ nínga bitjasꞌi̱e̱nnii̱ na̱xi̱ńdáa̱.

Nga ꞌniátakón Néná

¹⁰ »Néná katsóyàtjoón Abraa̱n, ko̱jo Isaa̱, ko̱jo Jakoo̱b, nga jún tsja̱ajnú kui tꞌanangii̱, ngatꞌa̱ jún boá xi xota̱ tji̱e̱e̱ kui xotaa̱. Kó kuíni nga jún boá xi ku̱i̱ndyionjnú na̱xi̱ńdáꞌniú xí yiꞌi, ko̱jo xi achichí tsjákón xi júnjín kiniꞌándajnú,

¹¹ ki̱a̱ ku̱i̱ndyionyàjnú ndiꞌa xi tjikítsie maá kjo̱a̱cho̱n, xi júnjín kiniꞌánjnú nga kiniꞌánxájnú, sꞌi̱o̱jnú ndáfoaa̱ ndáńchꞌi̱ xi júnjín kiniꞌándajnú, ko̱jo xi̱ni̱e̱jnú tostsi̱je̱è ko̱jo toꞌaseituna̱ xi júnjín ikꞌítji̱e̱jnú.

¹² Ta̱nga ngata̱ niꞌánchíyájínjnú nga Néná boá xi tsꞌaxiéjnú nangi Ejipto̱, kó nga kuí boá xi katsꞌéndéjnú nínga moso̱ kamájnú.

¹³ Kuíni nga ti̱ꞌantsjàjnúu̱ Néná, kó ta̱kuítsí xi ndaꞌyáꞌénjnúu̱. Tsi ngo ni kꞌuíndajnú xi si̱ꞌankjatjosónjnú, ta̱ jaꞌén tsi̱ꞌe̱ tsí xi ti̱ꞌankjiénjnú.

¹⁴ »Nga jmíni̱xtjin ꞌbíjñámasiénjnú Nejnú, ta̱ngatꞌanii̱ nga si̱ꞌandikónjnú kje̱ꞌe ne xí tjiín na̱xi̱ńdá xí síndotꞌajnú.

^15-16 Néná, kuí boá xi Nee̱ xota̱ Israee̱l, kó ngatsjéni̱xtjin kꞌuijñájo̱jnú. Ta̱nga ngata̱ chjátꞌayákónjínjnú, xikó katsꞌén xotaa̱ ki̱a̱ nangi Masaa̱. Néná achichí chi̱ni̱, kó tsi jún kje̱ꞌe ne si̱ꞌandikónjnú, achichí ꞌniú sa̱ꞌínxchán nga ngaskande sa̱ꞌínkjié ndo̱jò ndójo̱jnú.

¹⁷ »Ngatsjéni̱xtjin ti̱ꞌankjatjosónjnú kui kjo̱a̱botíxoma xi je katsjájnú Néná.

¹⁸ Tsi ni xi nda ko̱jo ni xi kixi̱ si̱ꞌánjnú, achichí tsjá ka̱maa̱ Néná. Kó kuí boá xi sa̱ꞌín nga nda ku̱i̱ndyionjnú ki̱a̱ tꞌanangi nda xi katsóyàtjoón xota̱ xi xchájnú nga tsja̱á.

¹⁹ Kó ti̱ Néná boá xi sa̱ꞌín nga kui xota̱ xi kondra̱jnú ko̱nga ngindyikónjnú, ngatꞌa̱ ti̱ bo̱a̱ katsó nga katsóyàtjón nga.

²⁰ »Nga kjo̱chó ni̱xtjin kjiꞌanga ko̱síyájnú ndíjnú mí ni xi mejeén tsó ngayeje kui kjo̱a̱bokoyá xi katsjáná Néná,

²¹ jún bi̱ kꞌuínjnúu̱: “Mosoo̱ nda ree̱ nangi Ejipto̱ mára kamájne̱ kjín nó, ta̱nga Néná katsꞌénkjién ngaꞌniú jee̱, kó tsꞌaxiéjne̱ kui ngindiee̱.

²² Ji̱n kamáyàjne̱ ngayeje ni xi ndajín xi Néná katsangiyaa̱ nda̱ ree̱ nangi Ejiptoo̱ ko̱jo xota̱ ndiꞌaa̱.

²³ Ta̱nga ji̱n tsꞌaxiéjne̱ kui na̱xi̱ńdaá, kó kꞌi̱e̱ kjindibájo̱jne̱ kui tꞌanangi xi ja̱bo̱a̱ je katsóyàtjoón xota̱ xi xchájne̱ nga tsja̱ajne̱.

^24-25 Kósꞌe̱ atíxomajne̱ nga chjiéngá xcha̱ndikónjne̱ kui ngatsjéni̱xtjin, ko̱jo nga ko̱nda̱ꞌyáꞌénjne̱ kjo̱a̱botíxomaa̱. Kó tsi ko̱nda̱ꞌyáꞌénjne̱ Néná ko̱jo kjo̱a̱botíxomaa̱, kuí boá xi sa̱ꞌín nga nda ku̱i̱ndyionjne̱, kó nga ku̱i̱ndyionrajne̱ nga̱sondie, xikó kjimajne̱ ngaskande ngotꞌe̱”».