Ndeuteronomio̱ 4 - Xo̱jo̱n eén Néná

Ni xi atíxomaa̱ Moisee̱ xota̱ na̱xi̱ńdaá

¹ Bi̱ katsó ngase Moisee̱: «Jún xota̱ Israee̱l tangíntji̱ngíjnú kui kjo̱a̱bokoyá xi je katsjajnúꞌun, tsi̱ꞌe̱ nga ki̱a̱ ku̱i̱ndyionjnú, kó ti̱ꞌankjiénjnú kui nangi xi tsja̱ajnú kui Ne xi tsi̱ꞌe̱ xota̱ xi xchájnú.

² Ngata̱ bosíkjojínjnúu̱ kui kjo̱a̱botíxoma xi Néná katsjána tsi̱ꞌe̱ nga jún tsjajnúꞌun, ta̱sá ndaꞌyáꞌénjnúu̱.

³ Jún boá xi je kamáyàjnú nga Néná katsꞌénkjié ngayeje xota̱ xi katsꞌéndikón ne Baa̱l-Peoo̱r.

⁴ Kó ti̱ je kamáyàjnú nga ta̱kuítsí xota̱ xi kamáꞌniátakón Néná xi kisꞌińdo ngase nga̱sondie.

^5-6 »Néná boá xi je katsjákjo̱a̱na nga kokoyájnúꞌun ngayeje kjo̱a̱botíxomaa̱, tsi̱ꞌe̱ nga ko̱nda̱ꞌyáꞌénjnú ki̱a̱ nangi nínga ku̱i̱ndyionjnú. Kó bo̱a̱ tsꞌén kjiꞌanga xota̱ na̱xi̱ńdá xí ngasee̱ ku̱i̱ntꞌiè kuí kjo̱a̱botíxomaa̱, bo̱a̱ ka̱tso̱ nga jún boá ngo xtín xota̱ na̱xi̱ńdá xí je, xi chji̱ni̱e̱, ko̱jo xi tjiín kjo̱a̱kjíntakón, ngatꞌa̱ tjínjnú ngo kjo̱a̱bokoyá xi nda, kó májnú ndaꞌyáꞌénjnúu̱ kui kjo̱a̱bokoyaá.

⁷ Jmíjín ingo na̱xi̱ńdá xi ꞌniú tiña tikoón ngasee̱ Nee̱, xikótsꞌèn tiña tikónná ñá kjiꞌanga chjiáꞌáa̱ nga ko̱síko̱joná.

⁸ Ti̱nde jmíjín ngo na̱xi̱ńdá xi tjiín kjo̱a̱botíxoma xi kixi̱, xikoó xi jún je kiniꞌánkꞌasꞌienjnú.

⁹ Kuíni nga jmíni̱xtjin niꞌánchíyájnú ni xi je ikitjajinjnú, ta̱sá chjiéngá kꞌuiyájnúu̱ ndíjnú ko̱jo ndíndejnú.

Nga ka̱maꞌniátakón Néná

¹⁰ »Kjiꞌanga kixindyionjnú na̱xi̱ Oree̱b, Néná boá xi bo̱a̱ katsóna nga ngindyi̱ko̱n kui kꞌuitikójnúꞌun, ngatꞌa̱ kamámejeén nga ku̱i̱chji̱a̱jojnú ko̱jo nga ko̱kóyájnú nga ngatsjéni̱xtjin ko̱nda̱ꞌyáꞌénjnúu̱, tsi̱ꞌe̱ nga ti̱ bo̱a̱ ti̱ tsꞌén jún ko̱ko̱yájnúu̱ ndíjnú.

¹¹ »Jún ki̱a̱ kamátikójnú tꞌa ngindiee̱ na̱xi̱i̱, kó kamáyàjnú kui ndiꞌí xí jatjoni ko̱jo xi achichí nkꞌa kijínijíngií. Kó kui ṉdi̱i̱ ndiꞌií ngo ṉdi̱ xi je kamá,

¹² kó ndeskande ngi̱jii̱n kui ndiꞌií Néná tsíchji̱a̱jojnú. Kó jún jmí tsi ngo a̱si̱én xí kamáyàjnú, ta̱ nda̱a̱ Néná tsí xi kandaꞌyájnú.

¹³ Kó bo̱a̱ tsꞌén nga Néná akójnú nga tie kjo̱a̱botíxomaa̱ kjo̱a̱ꞌbínda xi katsꞌénjo̱jnú jún, kó jó tie ndi̱jo̱ ítꞌa tsi̱ꞌe̱ nga ko̱nda̱ꞌyáꞌénjnúu̱.

¹⁴ Sꞌe̱ jaskan atíxomana tsi̱ꞌe̱ nga an kokoyájnúꞌun kjo̱a̱botíxoma xi chjiéngá si̱ꞌankjatjosónjnú jún nga ku̱i̱ndyionjnú kui tꞌanangi xi je si̱ꞌankꞌasꞌienjnú.

^15-18 »Ni̱xtjin kjiꞌanga Néná tsíchji̱a̱jojnú ki̱a̱ na̱xi̱ Oree̱b, ki̱a̱ ngi̱jii̱n ndiꞌií, jmí a̱si̱én kamáyàjínjnú. Kuíni nga ngata̱ niꞌándajínjnú a̱si̱én xí ne kꞌuínjnúu̱, tsi tsi̱ꞌe̱ xi xi̱ꞌin ko̱jo tsi tsi̱ꞌe̱ xi ínchjín, ko̱jo tsi tsi̱ꞌe̱ cho̱, ko̱jo tsi tsi̱ꞌe̱ cho̱ xi tjiín tsja̱nga̱, ko̱jo tsi tsi̱ꞌe̱ cho̱ xi ꞌbifé yojoo̱, ko̱jo tsi tsi̱ꞌe̱ tji̱o̱.

¹⁹ Ngata̱ niꞌándikónjínjnú tsꞌueé ko̱jo tsi saá, ko̱jo tsi ńñoo, ko̱jo tsi ndiꞌí xí tjín nkꞌa jàn xí tsꞌentsíjee̱n na̱xi̱ńdaá, ngatꞌa̱ Néná boá xi katsꞌénda kui nii̱.

²⁰ »Kjiꞌanga Néná tsꞌaxiéꞌájnú ki̱a̱ nangi Ejipto̱, bo̱a̱ katsꞌén ngatꞌa̱ xota̱ na̱xi̱ńdá xí tsi̱ꞌe̱ katsꞌénjnú jún.

²¹ Ta̱nga ta̱ngatꞌanii̱ jún nga Néná an katsꞌénxchánjo̱na, kó katsóyàtjónna nga tsja̱ndièjínna nga kjo̱a̱ꞌatio an ndejèꞌ Jorndaa̱n. Kuíni nga an kꞌosꞌi̱e̱njín an kui tꞌanangi nda xi Néná tsja̱ajnú jún.

²² Ta̱sá kꞌi̱e̱ ko̱yà án xtji̱e̱e̱n kui ngándaá ndejeèꞌ. »Jún boá xi ku̱i̱tjásꞌi̱e̱njnú, kó si̱ꞌánjnúu̱ nga ku̱i̱xkánjnú nga ko̱ti̱xomájnú kui tꞌanangii̱.

²³ Ta̱nga chónjnú yojojnú, kó ngata̱ niꞌánchíyájínjnú kui ni xi je índajo̱jnú Néná jún. Ti̱ꞌankjatjosónjnú ni xi atíxoma Néná, kó ngata̱ niꞌándikónjínjnú ngo ni xi ne kꞌuínjnúu̱,

²⁴ ngatꞌa̱ Néná achichí chi̱ni̱, kó tsi ko̱tíjéjnú, ka̱márií nga ndiꞌí sa̱ꞌínkjiénijnú.

²⁵ »Ngije tindyiónjnú kui tꞌanangii̱, kó ngije kꞌuiéjnú ndí ko̱jo ndínde, ngata̱ niꞌándajínjnú ngo ni xi ne kꞌuínjnúu̱, ti̱nde ngata̱ niꞌándikónjínjnú. Tsi bo̱a̱ si̱ꞌánjnú, ngo jé xí ta̱nisién ndikón xí ndyi̱niꞌánjnú, kó kuí nii̱ xi sa̱ꞌín nga sa̱ꞌínxchán Néná.

²⁶ Nkꞌa jàn ko̱jo tꞌanangii̱ boá xi chistiko̱ nga tsi jún xi ko̱nda̱ꞌyáꞌénjínjnú, tsiejín ka̱majnú nga ku̱i̱ndyionjnú ki̱a̱ kui tꞌanangi xi tikón xtji̱e̱e̱n xi ingoboaá ndejèꞌ Jorndaa̱n, kó ta̱sá tsá ko̱yàjnú.

²⁷ »Ta̱ chiboa tsí xota̱ xi tsja̱ndieè Néná nga xín na̱xi̱ńdá kꞌuíndo.

²⁸ Ki̱a̱ boá nínga sa̱ꞌíndikón ni xi ne ka̱tso̱o̱, xi yá, ko̱jo xí ndi̱jo̱, a̱sie̱én xota̱ xi májiín be ko̱jo xi májiín ntꞌié, ko̱jo xi májiín kjinie nichinie, ko̱jo xi májiín kjiendá, ngatꞌa̱ ti̱kuíní xotaa̱ xi katsꞌénda kui nii̱.

²⁹ Ta̱nga tsi ja̱koxi̱ nga kixi̱jnú, kó tsi ngayeje ini̱ma̱jnú nga chji̱a̱ꞌajnúu̱ nga sa̱ꞌínjetakónjnú Néná, ndatsi kui na̱xi̱ńdaá tindyiónjnú, Néná sa̱ꞌínjetakónjnú.

³⁰ Tsi ngi̱jii̱n kjo̱a̱ni̱ma̱jnú ko̱jo nga je nda̱ kjimajnú, kó tsi ko̱nda̱ꞌyáꞌén nginíjnúu̱ Néná,

³¹ Néná ku̱i̱ꞌíjñámasienjínjnú, ti̱nde sa̱ꞌínkjiéjínjnú, ngatꞌa̱ achichí tjoó jún. Néná jmíni̱xtjin xchi̱yaa̱ ni xi índajo̱ xota̱ xi xchájnú, ngatꞌa̱ jè bo̱a̱ katsó nga sa̱ꞌínkjatjosón kui nii̱.

^32-38 »Néná tsꞌaxiéni nangi Ejipto̱ xota̱ xi xchájnú, kó bo̱a̱ tsꞌén akoó nga ꞌniú tjoó ko̱jo akó ngaꞌniú je xi tjiín. Ta̱ngatꞌanii̱ nganda tsa̱jún nga askjantjéjnú nga achichí kjo̱a̱ndikón katsꞌén, kó indyiándikoón xota̱ xi síndo na̱xi̱ńdá xí ngasee̱. »Tsi Néná tsꞌaxiéꞌájnú, kjo̱a̱a̱ nga bo̱a̱ tsꞌén kamámejeén, nga jún xi ka̱majnú na̱xi̱ńdá xí kuí tsi̱ꞌe̱. Jmíjín ingo xota̱ na̱xi̱ńdá xí je tsintꞌieé nda̱a̱ Néná, ti̱nde ngiti̱ síndojín tsi̱ꞌe̱ nga ka̱tso̱yà kui nii̱. Ta̱nga Néná ndeskande nkꞌajmii̱ tsíchji̱a̱jojnú, tsi̱ꞌe̱ nga ngo ndi̱yà xí kixi̱ íjñájnú. Kꞌi̱e̱ kui tꞌanangii̱ ngi̱jii̱n ndiꞌií tsíchji̱a̱jojnú, kó to̱kó kixindyionrajnú nga̱sondie. Kó kjiꞌanga tsangínjnú, Néná iskjíxꞌájnú ndi̱yà, kó katsangiboaꞌá xota̱ na̱xi̱ńdáꞌniú, xi ꞌniú ngase yiꞌi, ko̱jo xi ꞌniú ngase tjiín ngaꞌniú ta̱bo̱a̱jínnii̱ jún, tsi̱ꞌe̱ nga jún tsja̱ajnú kui tꞌanangi xi je mejeén sa̱kójnú. »Tsi jún xi stsitsíjenjnúu̱ kótsꞌèn kjindibáni xotaa̱, xcha̱jnú nga jmíni̱xtjin kamá ngo ni xi xikoó xi kjimajnú ngotꞌe̱. Ta̱nga ngayeje kui nii̱ kjimá, tsi̱ꞌe̱ nga xcha̱jnú nga ja̱koxi̱ boá Néná, kó nga ta̱ ngo tsí má kuí.

³⁹ »Kuíni nga, nga jmíni̱xtjin niꞌánchíyájnú nga Néná ta̱ ngo tsí kuí xi tsi̱ꞌe̱ nkꞌajmii̱ ko̱jo tꞌanangii̱.

⁴⁰ Ngotꞌe̱ tjítsꞌenkꞌasꞌiénjnúꞌun kjo̱a̱kitii̱ Néná. Ndaꞌyáꞌénjnúu̱ tsi̱ꞌe̱ nga tsie ka̱majnú nga ku̱i̱ndyionjnú kui tꞌanangi xi Néná je sa̱ꞌínkꞌasꞌien ndi̱yàjnú».

Na̱xi̱ńdá nínga ku̱i̱ndyionꞌmaá

⁴¹ Ngije katsó kui nii̱, Moisee̱ jaꞌájin ján na̱xi̱ńdáꞌniú xi síndo xtji̱e̱e̱n nínga fotjo tsꞌueé ki̱a̱ ndejèꞌ Jorndaa̱n.

⁴² Kuí bí kui na̱xi̱ńdáꞌniuú nínga ka̱ma ku̱i̱ꞌa nga jmí ni si̱ꞌanjo̱jín xota̱ xi katsꞌénkꞌién kje̱ꞌe xota̱, ta̱nga ngototo tsi jmí tsi xá katsꞌénkꞌiénni, ko̱jo tsi nga jmí tsi kjo̱a̱a̱ nga ngo kjo̱a̱xti kisꞌiee̱ kui, ko̱jo ngo xota̱ xi kondraa̱. Kó bo̱a̱ tsꞌén nga kui xota̱ xi katsꞌénkꞌieén, jmí ni sa̱ꞌínjo̱jín xkjín xí kiniꞌánkꞌieén tsi kjo̱a̱a̱ nga mejeén sa̱ꞌíngojo.

⁴³ Ngo kui na̱xi̱ńdá xí kachjeꞌéjii̱n xi Besee̱r boá, kui xi tikón nga̱són na̱xi̱i̱ nangi kixií, ki̱a̱ boá nínga kamá kisꞌińdo ꞌmá xota̱ tji̱e̱e̱ Rubee̱n, ingo kui na̱xi̱ńdaá xi Ramoo̱t boá, kui xi tikón nangi Ngalaa̱nd, ki̱a̱ boá nínga kamá kisꞌińdo ꞌmá xota̱ tji̱e̱e̱ Ngaa̱nd. Kó xi ma jaán kui na̱xi̱ńdaá, Ngolaa̱n boá, kui xi tikón nangi Basaa̱n, kó ki̱a̱ boá nínga kamá kisꞌińdo ꞌmá masien xota̱ tji̱e̱e̱ Manasee̱.

Nga tie kjo̱a̱botíxomaa̱

^44-47 Kjiꞌanga Moisee̱ ko̱jo xota̱ Israee̱l jatjoni nangi Ejipto̱, jachó ki̱a̱ nangi són xi tikón kje̱n na̱xi̱ Bee̱t-Peoo̱r, xtji̱e̱e̱n nínga fotjo tsꞌueé ki̱a̱ ndejèꞌ Jorndaa̱n. Kui tꞌanangii̱ tsi̱ꞌe̱ xota̱ Amoo̱r mára kamá. Sijoo̱n boá xi kamá nda̱ ree̱ nangi Esboo̱n, kó Oo̱j boá xi kamá nda̱ ree̱ nangi Basaa̱n. Ta̱nga Moisee̱ ko̱jo xota̱ Israee̱l katsꞌeén nga askjanjo̱ nga jó kui já ree̱.

^48-49 Kui tꞌanangii̱ ki̱a̱ ítsꞌi̱yanii̱ na̱xi̱ Sirioo̱n, kui xi ti̱ na̱xi̱ Ermoo̱n kiꞌmií nga. Ki̱a̱ fíjayani kui nangii̱ xtji̱e̱e̱n na̱ngii̱ ngaskande Aroee̱r, tiñaa̱ ndejèꞌ Arnoo̱n, sꞌe̱ ki̱a̱ kijíjaya ngase ngaskande na̱xi̱ Pisgaa̱. Jaꞌa xtji̱e̱e̱n Ndáchíkón Kꞌieèn, sꞌe̱ kijí ngase xtji̱e̱e̱n ngayeje nangi Arabaa̱. Ki̱a̱ boá ki̱a̱ xtji̱e̱e̱n ndejèꞌ Jorndaa̱n, nínga Moisee̱ katsꞌénkꞌasꞌiee̱n xota̱ Israee̱l kjo̱a̱botíxomaa̱ Néná.