Ndeuteronomio̱ 34 - Xo̱jo̱n eén Néná

Nga kꞌien Moisee̱

¹ Ndeskande nangi kixií nangi Moaa̱b kjindibáni Moisee̱ nga kijínijíngí na̱xi̱ Pisgaa̱, sꞌe̱ jachó nínga ꞌniú nkꞌaá na̱xi̱ Neboo̱, kui xi tikón kje̱n na̱xi̱ńdáꞌniú Jerikoo̱. Kó ki̱a̱ boá nínga Néná akoó ngayeje tꞌanangi xi chji̱a̱ni Ngalaa̱nd ko̱jo xi chji̱a̱ni Ndaa̱n.

² Kó ti̱ akoó tꞌanangi xi tsi̱ꞌe̱ xota̱ tji̱e̱e̱ Neftalii̱, ko̱jo xota̱ tji̱e̱e̱ Efraii̱n, ko̱jo xota̱ tji̱e̱e̱ Manasee̱, ko̱jo tꞌanangii̱ xota̱ tji̱e̱e̱ Jundáa̱ ngaskande ndáchíkón Menditerráneoo̱.

³ Ndeskande ki̱a̱a̱ kamábe Moisee̱ nangi kixí xi chji̱a̱ni xtji̱e̱e̱n na̱ngi, ki̱a̱ nangisoón ndejèꞌ Jorndaa̱n, ko̱jo nangi són xi foaꞌatjiyajoo̱n na̱xi̱ńdáꞌniú Jerikoo̱, ngaskande nangi Soaa̱r. Na̱xi̱ńdáꞌniú Jerikoo̱ ti̱ na̱xi̱ńdáꞌniú yáxka̱jèn ꞌmií nga.

⁴ Kui ngi̱ndiee̱ Néná bi̱ katsoó Moisee̱: «Kuí bí kui na̱xi̱ńdaá xi tsjàa̱ xota̱ Israee̱l. Bo̱a̱ kixiáa̱n nga katsóyàtjóo̱n Abraa̱n, ko̱jo Isaa̱, ko̱jo Jakoo̱b, xota̱ xi xcháa̱. Kamámejénna nga xchi̱e̱ ji, ngatꞌa̱ ku̱i̱tjásꞌi̱njín ji ki̱a̱a̱».

^5-6 Moisee̱ ngatsjéni̱xtjin nga Néná katsꞌénxátꞌaa̱. Kó xikó má katsó Néná, Moisee̱ ki̱a̱ kꞌien nangi Moaa̱b, kje̱n na̱xi̱ Bee̱t-Peoo̱r, kó ti̱ ki̱a̱ akjanijín, ndatsi jmíjín xi be nda nda nínga tikón kui ngi̱ndiee̱.

⁷ Úchán ko̱jo kan noó nga kꞌien, kó jmí chiꞌin kisꞌiejiín, kó to̱kó nda kamátsijee̱n ndyi̱ko̱n.

⁸ Xota̱ Israee̱l kantié ni̱xtjin kamaá nga kisꞌińdo ki̱a̱ nangi kixií nangi Moaa̱b, nga kisꞌińdo xa̱ꞌya̱ kjo̱a̱a̱ nga kꞌien Moisee̱. Kuí boá kjo̱a̱xchá xí kisꞌiee̱ xotaa̱ kui ni̱xtjin jàn.

⁹ Moisee̱ ngindiee̱ nga ko̱yà, íjñasoón tsja to̱ko̱ Josuee̱, kó Néná íkitsie maá kjo̱a̱kjínkón Josuee̱. Kuíni nga xota̱ Israee̱l tsintꞌiéꞌeén Josuee̱, kó katsꞌénkjatjosón kjo̱a̱botíxoma xi Néná katsjaá Moisee̱.

¹⁰ Jmí ni̱xtjin kisꞌie ingo nda̱ chji̱ni̱e̱ꞌén xí xikoó Moisee̱, kui nda̱ xi tíkje̱n tíkje̱n tsíchji̱a̱jo Néná.

¹¹ Jmí ni̱xtjin kisꞌie ingo xi kamaá bo̱a̱ má katsꞌén xikoó kui kjo̱a̱ndikón xí katsꞌén Néná ki̱a̱ nangi Ejipto̱, ko̱jo ni xi katsꞌénjo̱ nda̱ ree̱.

¹² Jmí ni̱xtjin kisꞌie ingo xi bo̱a̱ tsꞌén kisꞌiee̱ ngaꞌniú xikoó Moisee̱, ti̱nde jmíjín xi kamaá katsꞌén ni yiꞌi xi katsꞌén ngi̱jii̱n xota̱ Israee̱l.