Ndeuteronomio̱ 31 - Xo̱jo̱n eén Néná

Ngo ngito̱ko̱ tja̱tsi̱e̱ tsi̱ꞌe̱ xota̱ Israee̱l

¹ Moisee̱ ti̱ tsíchji̱a̱jo nginí ingo ndi̱yà xota̱ na̱xi̱ńdaá, kó bi̱ katsoó:

² «Jè úchán ko̱jo kan nó tjínna, kó ngiti̱ ka̱májín nga to̱kó an xi ka̱ma an ngito̱ko̱o̱ xota̱ Israee̱l. Kó ingo ni ngase, Néná tsja̱ndièjínna nga kjo̱a̱ꞌatio an ndejèꞌ Jorndaa̱n.

³ Ta̱nga ti̱kuíní Néná xi kjótsoꞌbátjónjnú, kó sa̱ꞌínkjié ngayeje xota̱ na̱xi̱ńdá xí sa̱kójnú nínga ku̱i̱tjájnú. Kó bo̱a̱ tsꞌén nga tsa̱jún ka̱ma kui tꞌanangii̱. Kó ingo ni ngase, Néná jè atíxoma nga Josuee̱ boá xi ka̱ma ngito̱ko̱ xi tja̱tsi̱e̱e̱.

⁴ »Xota̱ na̱xi̱ńdá xi jún skjánjo̱jnú, Néná sa̱ꞌínkjié, xikótsꞌèn katsꞌénkjié ree̱ nangi Oo̱j ko̱jo Sijoo̱n, ko̱jo ngayeje na̱xi̱ńdaá.

⁵ Ngije kiniꞌánjnúu̱ nga ikixkánjo̱jnú, ngayeje kui ni xi je atixomájnúꞌun nga si̱ꞌánjnú xi si̱ꞌanjo̱jnú kui xotaa̱.

⁶ Chjiéngá ꞌniú ko̱jo chꞌokon ngatamajnú, ngatꞌa̱ Néná boá xi skja̱n ngajojnú, ngata̱ ndakonjínmájnúu̱ kui xota̱ na̱xi̱ńdaá, ngatꞌa̱ Néná jmíni̱xtjin ku̱i̱ꞌíjñámasienjnú».

⁷ Kósꞌe̱ ti̱ kjiꞌa Moisee̱ tsíchji̱a̱a̱ Josuee̱, kó ngindyi̱ko̱n ngayeje xota̱ na̱xi̱ńdaá nga bi̱ katsoó: «Ji Josuee̱, chjiéngá ꞌniú ko̱jo chꞌokon ka̱ma ji, ngatꞌa̱ jí boá xi kꞌuínje̱ ji kui xota̱ na̱xi̱ńdaá, ki̱a̱ tꞌanangi xi Néná jè bo̱a̱ katsoó nga tsja̱á xota̱ xi xchaá. Jí boá xi si̱ꞌin ji nga sa̱ꞌín kui tꞌanangii̱ nga skjántjé.

⁸ Ti̱ kuíní Néná xí ko̱e̱je̱tjoón, kó kuí boá xi ko̱síko̱joo̱ ngayeje ni xi si̱ꞌin ji, jmíni̱xtjin ku̱i̱ꞌíjñámasiee̱n. ¡Ngata̱ ndakinjín má, ꞌna̱xié ji kjo̱a̱tsiendikóo̱n!»

Nga kiniꞌányà kjo̱a̱botíxomaa̱

⁹ Moisee̱ katsꞌénꞌindó ngayeje kui kjo̱a̱bokoyaá, kósꞌe̱ katsꞌénkꞌasꞌiee̱n kui xo̱jo̱n xi kiniꞌánꞌindoó já ngito̱ko̱o̱ xota̱ Israee̱l, ko̱jo já chináꞌmii̱, ngatꞌa̱ kuí boá xi tsaꞌanijín koxa̱a̱ kjo̱a̱ꞌbíndaa̱.

^10-11 Sꞌe̱ jaskan katsjaá kui kjo̱a̱botíxomaa̱: «Xki̱ yito nó, chjiéngá si̱ꞌan sꞌueé nó kjiꞌanga si̱ꞌanjetakoón xota̱ xi tjitjieén. Kjiꞌanga kjo̱chó kui noó, kó nga je síndotikó ngayeje xota̱ Israee̱l ki̱a̱ ndiꞌandikoón Néná tsi̱ꞌe̱ nga sa̱ꞌín sꞌueé ndiꞌańkꞌieén, ki̱a̱ si̱ꞌanya kui kjo̱a̱bokoyaá.

¹² Chjiéngá ko̱e̱je̱ kui sꞌueé ngayeje xotaa̱: xi chjo̱on, xí xi̱ꞌin, ko̱jo jákjíndí ínchjín, ko̱jo jákjíndí xíꞌín, ko̱jo xota̱ xi ta̱ síndo tsá ki̱a̱ kui na̱xi̱ńdaá. Ki̱a̱ boá nínga ku̱i̱ntꞌiè nga si̱ꞌanya kui kjo̱a̱bokoyaá, kó chjiéngá ka̱maa̱ nga sku̱i̱e̱ndikón Néná, ko̱jo nga ku̱i̱ntꞌiéꞌeén kui kjo̱a̱botíxomaa̱.

¹³ Ko̱jo ndí xi tjiín, kui xi kji̱e̱ bejín kui kjo̱a̱botíxomaa̱, ku̱i̱ntꞌie̱é kó ngatamaa̱ nga ku̱i̱ntꞌiéꞌeén Néná. Kuí nii̱ xi sa̱ꞌín tji̱e̱nga ki̱a̱ síndo ki̱a̱ na̱xi̱ńdá xi tikón xi ingoboaá ndejèꞌ Jorndaa̱n, kui xi je sa̱ꞌín nga tsi̱ꞌe̱ ka̱ma nga skjántjé».

Néná katsjaá kjo̱a̱botíxoma Moisee̱ ko̱jo Josuee̱

¹⁴ Ngije kamá kui nii̱, Néná bi̱ katsoó Moisee̱: «Jè má kjachó ni̱xtjin nga ko̱yè jí. Kuíni nga mejénna nga ji, ko̱jo Josuee̱ kongínjnú ki̱a̱ ndiꞌandikoón, tsi̱ꞌe̱ nga an xiyàjnúꞌun ni xi si̱ꞌánjnú». Kó Moisee̱ ko̱jo Josuee̱ kijí ki̱a̱ ndiꞌandikoón,

¹⁵ kó ki̱a̱ má nínga bitjasꞌi̱e̱nnii̱ ndiꞌandikoón jachó Néná ngi̱jii̱n ngo ṉdi̱ xi ja̱kjiꞌi yásé má kjiꞌi.

¹⁶ Kó Néná bi̱ katsoó Moisee̱: «Jè tsá ko̱yà jí. Kó ngije ka̱ma kui nii̱, xota̱ Israee̱l jè ngiti̱ ka̱mamejénjiín ku̱i̱ntꞌiéꞌénna, kó ne xi kuijín xi tsi̱ꞌe̱ kui xota̱ xi síndo kui tꞌanangii̱ xi sa̱ꞌíndikón. Ku̱i̱ꞌíjñámasienna kó sa̱ꞌínkjatjosónjín kjo̱a̱ꞌbínda xi je kiniꞌán ji ko̱jo an.

¹⁷ Kósꞌe̱ an sa̱ꞌínxchánjo̱ an, kó kꞌuíndo masien an, kó ngindiee̱ nga skóo̱n, ta̱sá achichí kjo̱a̱botíjé ko̱jo kjo̱a̱ni̱ma̱ sangiyáa. Kó chjiéngá sa̱ꞌínkie yojoo̱ nga je indomasien an.

¹⁸ Kó ndatsi je be kui nii̱, ta̱sá má sa̱ꞌinkjin ngasee̱ yojona. Bo̱a̱ tsꞌén kotijée̱ kjo̱a̱a̱ ni xi ndajín xi katsꞌén, nga katsꞌéndikón ne xi kuijín.

^19-20 »Ngije kjuínjo̱ an xota̱ Israee̱l ki̱a̱ tꞌanangi xi kixiyatjóo̱n nga tsjàa̱, skji̱ni̱e̱ nichinie ngaskande nga ka̱ma yiꞌi, ngatꞌa̱ achichí nichinie tjín kuí ngi̱ndiee̱. Kósꞌe̱ kjiꞌá boá nga sa̱ꞌínchíyána, kó ne xi kuijín sa̱ꞌíndikón, kó sa̱ꞌínkjatjosónjín kjo̱a̱ꞌbínda xi kiniꞌán ji ko̱jo an. Kuíni nga mejénna nga ji ko̱jo Josuee̱, si̱ꞌanꞌindojnú ngo só xi an xiyàjnúꞌun kó tsó. Mejénna nga ko̱ko̱yájnúu̱ xota̱ na̱xi̱ńdaá tsi̱ꞌe̱ nga si̱é. Kó bo̱a̱ tsꞌén kjiꞌanga si̱é, kjo̱a̱ꞌátsjiee̱n ngayeje ni xi je atixomáa̱, kó ka̱májín bi̱ ka̱tso̱: “Nde ta̱jmìjín xi yàjne̱ kjo̱a̱a̱ kui nii̱”.

²¹ Ngije sa̱ko̱ó ngayeje kui kjo̱a̱botíjé xi sangiyáa, kjiꞌa kjo̱a̱ꞌátsjiee̱n kui soó, kó kjiꞌanga ndií si̱é kui soó, sa̱ꞌínjo̱ꞌo nga bo̱a̱ kjiꞌi ni xi kixian an. Ndatsi kui xotaa̱ kji̱e̱ ꞌbosꞌienjín kui tꞌanangi xi je kixiyatjóo̱n nga tsjàa̱, achichí nda be an kókón kui xotaa̱, kó jè be án mí ni xi sa̱ꞌín».

²² Ti̱ kuii̱ ni̱xtjin Moisee̱ katsꞌénꞌindó kui soó, kósꞌe̱ akóyaá xota̱ Israee̱l.

²³ Néná bi̱ katsoó Josuee̱: «Ji Josue̱, chjiéngá ꞌniú ko̱jo chꞌokon ka̱ma ji. Án boá xi kosiko̱joo ngayeje ni xi si̱ꞌin ji, kó jí boá xi si̱ꞌin ji nga kui xota̱ na̱xi̱ńdaá sa̱ꞌín nga skjántjé kui tꞌanangi xi je kixiyatjóo̱n nga tsjàa̱».

²⁴ Ngije kamaá Moisee̱ nga katsꞌénꞌindó kui xo̱jo̱n nínga kjitꞌa ngayeje kjo̱a̱botíxoma xi Néná katsjaá,

²⁵ bi̱ katsoó já chináꞌmi xi boaꞌanijín koxa̱a̱ kjo̱a̱ꞌbíndaa̱:

²⁶ «Kꞌi̱e̱ tikónjnú kjo̱a̱bokoyaá Néná. Ki̱a̱ tꞌíjñájnú tꞌa koxa̱a̱ kjo̱a̱ꞌbíndaa̱. Kuí bí kui kjo̱a̱bokoyaá xi ko̱kó ni xi kondra̱jnú ka̱ma,

²⁷ ngatꞌa̱ jè be nda ndajnúꞌun. Jé be an nga xota̱ kitikjo̱a̱jnú ko̱jo xota̱ tamájnú. Tsi ngotꞌe̱ nga kꞌi̱e̱ tikónjinjnúꞌun ndyi̱ndaꞌyáꞌénjínjnúu̱ Néná, mí ni xi si̱ꞌan ngasejnú ngije kꞌien an.

²⁸ »Kuíni ngotꞌe̱ maá tꞌítikójnú xota̱ ngito̱ko̱o̱ na̱xi̱ńdaá ko̱jo ngito̱ko̱o̱ xota̱ tji̱e̱e̱, tsi̱ꞌe̱ nga nda má kꞌuijñá tsijen tsijen an kui nii̱: Án boá xi je katsꞌenkꞌasꞌienjnúꞌun kjo̱a̱bokoyaá Néná. Kjo̱a̱a̱ kui nii̱, ndiꞌakꞌajmii̱ ko̱jo tꞌanangii̱ boá xi chistiko̱.

²⁹ Jé be nda nda an, nga ngije kꞌien an, ngiti̱ ko̱nda̱ꞌyáꞌénjínjnúu̱ Néná, kó ngiti̱ kongintjíngíjínjnú kjo̱a̱bokoyá xi je katsjajnúꞌun. Kuíni nga jún achichí kjo̱a̱ni̱ma̱ ku̱i̱tja̱tiójnú, ngatꞌa̱ Néná kiniꞌánxtíjnúu̱».

Soó

³⁰ Ngije kamátikójo̱ Moisee̱ xota̱ Israee̱l, akóyaá kui só xi Néná katsóyaà: