Ndeuteronomio̱ 30 - Xo̱jo̱n eén Néná

Kjo̱a̱niꞌánjetakón ko̱jo kjo̱a̱niꞌánchikonñé

¹ Moisee̱ bi̱ katsó ngasee̱ xota̱ na̱xi̱ńdaá: «Ngotꞌe̱ ꞌne̱ jè yàjnú kui kjo̱a̱niꞌánchikonñé xi sa̱kójnú tsi ko̱nda̱ꞌyáꞌénjnúu̱ Néná, kó ti̱ jè yàjnú ni xi ndajín xi sa̱kójnú tsi ko̱nda̱ꞌyáꞌénjínjnúu̱. Tsi Néná ko̱tíjéjnú, kó tsi kjinnii̱ na̱xi̱ńdájnú nínga sa̱ngíyájnú, ti̱ꞌankjójnú ngayeje ni xi je kixianjnúꞌun.

² Tsi jún ko̱jo ndíjnú si̱ꞌankꞌoyájnú yojojnú, kó tsi ko̱nda̱ꞌyáꞌén nginíjnúu̱ Néná, ngayeje ini̱ma̱jnú, ko̱jo ngayeje kjo̱a̱mindyionjnú, kó tsi si̱ꞌankjatjosónjnú kjo̱a̱kiti xi je katsjajnúꞌun,

^3-5 Néná ni̱ma̱ ka̱maa̱ jún, kó ingo ndi̱yà nginí sa̱ꞌínchikonñéjnú. Sa̱ꞌínkjín nginíjnú ki̱a̱ na̱xi̱ńdá nínga tjón katsangiyajnú. Ndatsi je ꞌniú kjin nínga tindyiónjnú, Néná ko̱ngasejnú, kó kji̱ndi̱bájo̱ nginíjnú ki̱a̱ na̱xi̱ńdá xi katsóyàtjoón nga tsja̱á xota̱ xi xchájnú. Kó ki̱a̱ boá nínga ndatsꞌèn ku̱i̱ndyionjnú, kó kjín ngase ndí kꞌuiéjnú ta̱bo̱a̱jiín xota̱ xi xchájnú.

⁶ Néná boá xi sa̱ꞌín nga xchi̱yàjnú nga ni xi ndajín si̱ꞌánjnú. Kósꞌe̱ jún ko̱jo xota̱ tji̱e̱jnú si̱ꞌantjójnú Néná, kó ko̱nda̱ꞌyáꞌénjnúu̱ ngayeje kjo̱a̱kjínkónjnú, ko̱jo ngayeje kjo̱a̱mindyionjnú, kó jmí tsi kjo̱a̱ꞌniú nga bo̱a̱ si̱ꞌánjnú. Kó bo̱a̱ tsꞌén nga kjín nó ka̱majnú nga ku̱i̱ndyionjnú nga̱sondie.

⁷ »Néná boá xi sa̱ꞌín nga ni xi ndajín ka̱maa̱ kondra̱jnú, kui xi achichí nga chꞌoó jún nga ndyi̱mongatji̱ngijnú.

⁸ Ta̱nga jún, chjiéngá si̱ꞌankꞌoyájnú yojojnú, kó ti̱ꞌankjatjosónjnú kjo̱a̱botíxoma xi ngotꞌe̱ je katsjajnúꞌun.

⁹ Tsi bo̱a̱ si̱ꞌánjnú, Néná achichí tsjá ka̱má nginií nga kꞌuijñájinjnú, kó kuí boá xi sa̱ꞌín nga nda ka̱ma ngayeje ni xi si̱ꞌánjnú. Achichí ndí xi̱ꞌin ko̱jo ndí xí ínchjín kꞌuiéjnú, kó kjín ka̱ma cho̱ xi ꞌbítji̱e̱ xi kꞌuiéjnú, ko̱jo tsie ni ka̱maxchájnú. Néná sa̱ꞌínchikonñé nginíjnú xikó katsꞌénjo̱ xota̱ xi xchájnú ngasꞌe̱.

¹⁰ Ta̱kuítsí ni xi chjiéngá si̱ꞌánjnú, nga si̱ꞌankꞌoyájnú yojojnú kjo̱a̱a̱ jéjnú, ko̱jo nga ko̱nda̱ꞌyáꞌénjnúu̱ Néná, ngayeje ini̱ma̱jnú, ko̱jo ngayeje kjo̱a̱mindyionjnú. Ti̱ꞌankjatjosónjnú ngayeje kjo̱a̱botíxoma xi je katseꞌéjnú xi kjitꞌa kui xo̱jo̱o̱n.

¹¹ »Kui kjo̱a̱botíxomaa̱ niꞌínjín niꞌánkjatjosón, kó ta̱ꞌyaní xi ka̱maa̱ sa̱ꞌínkjatjosón.

^12-13 Niꞌínjín kjiꞌi nga ka̱makjínjnú, ti̱nde chjiénjín nga tjín xí ka̱tso̱yà cha̱n cha̱njnú tsi̱ꞌe̱ nga si̱ꞌankjatjosónjnú.

¹⁴ Ta̱sá nde niꞌínjín nga ngaskande ta̱ꞌyaní xi ka̱makjiín, kó jè tikónjii̱n takónjnú, kó jè tjiꞌá ndso̱ꞌbájnú. Ngayejejnú nga ka̱ma si̱ꞌankjójnú, ko̱jo nga ka̱ma ko̱ndókjo̱a̱jnú, ko̱jo nga ka̱ma si̱ꞌankjatjosónjnú.

¹⁵ »Ngotꞌe̱ bí nga ka̱ma chje̱ꞌéjinjnú mí ni xi mejénjnú. A mejénjnú nga nda ku̱i̱ndyionjnú, axa̱ mejénjnú nga ndajín ku̱i̱ndyionjnú. Mí ni xi mejénjnú, a nga kꞌuiéjnú kjo̱a̱mindyioo̱n axa̱ kjo̱a̱bo̱yaa̱.

¹⁶ Tsi tjójnú Néná, kó tsi si̱ꞌankjatjosónjnú kjo̱a̱botíxomaa̱, Néná sa̱ꞌínchikonñéjnú. Achichí kjín nó ka̱majnú ki̱a̱ na̱xi̱ńdá xi si̱ꞌankꞌasꞌienjnú, kó achichí kjín ndí kꞌuiéjnú.

¹⁷ Ta̱nga tsi ko̱nda̱ꞌyáꞌénjínjnú, kó tsi kje̱ꞌe ne si̱ꞌantsjajnúu̱,

¹⁸ mejénna nga xcha̱jnú nga ja̱koxi̱ boá nga kju̱i̱e̱sónjnú. Ka̱májín ki̱a̱ ku̱i̱ndyionjnú ki̱a̱ na̱xi̱ńdá xí ngotꞌe̱ si̱ꞌankꞌasꞌienjnú, kui xi tikón xi ingoboaá ndejèꞌ Jorndaa̱n.

¹⁹ »Ndiꞌakꞌajmii̱ ko̱jo tꞌanangii̱ xí chistiko̱ nga ngotꞌe̱ tsꞌéntsjándièjnúꞌun nga chje̱ꞌéjinjnú ni xi mejénjnú, a kjo̱a̱mindyioo̱n, axa̱ kjo̱a̱bo̱yaa̱, a kjo̱a̱niꞌánchikonñeé, axa̱ ni xi ndajiín. An bi̱ xiánjnúꞌun nga jún, ko̱jo ndíjnú ta̱sá kjo̱a̱mindyioo̱n xi chje̱ꞌéjinjnú,

²⁰ kó ti̱ꞌantjójnú Néná ko̱jo nga ngatsjéni̱xtjin nga ko̱nda̱ꞌyáꞌénjnúu̱. Ngi̱ya ndsa̱jnú tikón tsi mejénjnú nga kjín nó ka̱majnú nga ku̱i̱ndyionjnú ki̱a̱ tꞌanangi xi Néná katsóyàtjoón nga tsja̱á Abraa̱n, ko̱jo Isaa̱, ko̱jo Jakoo̱b, kui xi xota̱ xi xchájnú».