Ndeuteronomio̱ 3 - Xo̱jo̱n eén Néná

Nga kiniꞌánchaja Oo̱j

^1-7 »Jaskan ngije kamá kui nii̱, tsangín nangi Basaa̱n, ta̱nga kje̱ꞌe ndi̱yà tsangín. Nga jachó nangi Endreii̱, Oo̱j nda̱ ree̱ nangi Basaa̱n, jatjojo̱ jájuún tsi̱ꞌe̱ nga skjánjo̱ná, ta̱nga Néná bo̱a̱ katsóná nga ko̱nda̱ko̱njínñá, ngatꞌa̱ kuí boá xi ko̱síko̱joná nga ñá boá xí si̱ꞌán. »Ikixkánjo̱ Oo̱j, kó Néná katsjandièná nga ñá kiniꞌáa̱n, kó kiniꞌánkjiesón yeje jájuún. Ki̱a̱ nangi Argoo̱b kiniꞌánkjatsón xí ichítié ko̱jo tie na̱xi̱ńdáꞌniú nínga botixómá. Ngayeje kui na̱xi̱ńdáꞌniuú xi tjíchjáꞌyáni xó xí achichí yiꞌi ko̱jo nkꞌa, kó nga̱ntjo̱a̱ ki̱cha̱ xi nda ikꞌíndoo̱. Ti̱ kiniꞌánkjatsón nangi xi jmí tsi bo̱a̱ tsꞌén ꞌniú tjíchjáꞌyaá nga, kó ñá kachjábé cho̱ ko̱jo ni chjí xí kisꞌiee̱.

⁸ »Bo̱a̱ kamá kui ni̱xtjii̱n, kjiꞌanga ñá akatíxomáa̱ nangii̱ nga jó kui já re xi chji̱a̱ni xota̱ Amoo̱r, kui xi atíxoma mára xtji̱e̱e̱n nínga ꞌbosꞌien tsꞌueé ndejèꞌ Jorndaa̱n, ndeskande ndejèꞌ Arnoo̱n ngaskande na̱xi̱ Ermoo̱n.

⁹ Xota̱ Sindoo̱n, sirioo̱n katsoó kui na̱xi̱i̱, ta̱nga xota̱ Amoo̱r, Senii̱r katsoó.

¹⁰ »Ñá akatíxomá ngayeje na̱xi̱ńdáꞌniú xi tsi̱ꞌe̱ nda̱ re Oo̱j, kui xi síndo nga̱són nkꞌaa̱ na̱xi̱i̱, ko̱jo xi síndo ngayeje nangi Ngalaa̱nd, ko̱jo nangi Basaa̱n, ngaskande na̱xi̱ńdáꞌniú Salkaa̱ ko̱jo nangi Endreii̱.

¹¹ Oo̱j ta̱kuítsí bo̱a̱ kui nda̱ ree̱ xota̱ Refaa̱ xi to̱kó tikón ngase, kui nda̱a̱ ngo ṉchan xi ki̱cha̱ kisꞌiesón xi nijón metro̱ nga ndojó, kó jó metro̱ nga tiyá. Kui ṉchaa̱n kamáyà ndeskande na̱xi̱ńdáꞌniú Rabáa̱ nínga síndo xota̱ tji̱e̱e̱ Amoo̱n.

Xota̱ tji̱e̱ xi kisꞌińdo xtji̱e̱e̱n nínga fotjo tsꞌueé ki̱a̱ ndejèꞌ Jorndaa̱n

¹² »Ngayeje kui nangi xi je ñá jè akatíxomá, katsꞌenkꞌasꞌièe̱n xota̱ tji̱e̱e̱ Rubee̱n ko̱jo xi tsi̱ꞌe̱ Ngaa̱nd, kui nangi xi ꞌbítsi̱yanii̱ tiñaa̱ ndejèꞌ Arnoo̱n, ko̱jo ngayeje na̱xi̱ńdáꞌniú xí chji̱a̱ni kui nangii̱. Ngayeje kui ngi̱ndiee̱ ki̱a̱ ꞌbítsi̱yanii̱ nangi Aroee̱r, kó ki̱a̱ fochó ngaskande ngamasiee̱n na̱xi̱ xi chji̱a̱ni nangi Ngalaa̱nd.

¹³ »Kui xi ngi masien xota̱ tji̱e̱e̱ Manasee̱ katsjáa̱ nangi Ngalaa̱nd xi ngasee̱ ko̱jo ngayeje nangi Argoo̱b, ta̱nga kui nangi Basaa̱n kui xi nangii̱ nda̱ re Oo̱j kamá ngasꞌe̱, kui ngi̱ndiee̱ tsi̱ꞌe̱ xota̱ Refaa̱ kiꞌmií.

¹⁴ Jaii̱r, kui nda̱ xi xota̱ tji̱e̱e̱ Manasee̱ kamá, kuí boá xi katsꞌén nga atíxoma nangi Argoo̱b, ngaskande nínga tikón tsindioó nangi Ngesuu̱r ko̱jo Maakaa̱, kó Jaii̱r asíkjoo̱ jaꞌén nangi Basaa̱n, kó Aboo̱t-Jaii̱r ítꞌajaꞌén, kui ngi̱ndiee̱ bo̱a̱ ꞌmí ngaskande ngotꞌe̱.

¹⁵ »Makii̱r kasakoo̱ nangi Ngalaa̱nd.

¹⁶ »Xota̱ tji̱e̱e̱ Rubee̱n ko̱jo tsi̱ꞌe̱ Ngaa̱nd, ki̱a̱ kasakoo̱ nangi xi tikón xtji̱e̱e̱n Ngalaa̱nd ko̱jo ndejèꞌ Arnoo̱n, ngaskande nga fóchó ngamasiee̱n nangi soón ko̱jo xo̱ngàndántꞌié Jaboo̱k. Xota̱ xi tiña kisꞌińdoo̱, xota̱ tji̱e̱e̱ Amoo̱n boá.

¹⁷ Kó ti̱ kui katsjáa̱ nangi Arabaa̱ nga, kui xi tikón xtji̱e̱e̱n nínga fotjo tsꞌueé ki̱a̱ na̱xi̱ Pisgaa̱. Kui ngi̱ndiee̱ tsindió mánii̱ ndejèꞌ Jorndaa̱n, kó ki̱a̱ foaꞌa ndeskande ngi̱ndiò Kineree̱t, ngaskande Ndáchíkón Kꞌieèn.

¹⁸ »Kui ni̱xtjin jàn katsjáa̱ kjo̱a̱ jájuún nga iskjíbé ni xi kjánjo̱. Ngatꞌa̱ chjiéngá kui xi kijítjoón xota̱ tji̱e̱e̱ xi kji̱e̱ jmíjiín nangi xi tsi̱ꞌe̱, ngatꞌa̱ Néná boá xi tsja̱á ngo ngi̱ndie.

¹⁹ Ínchjiín ko̱jo jákjíndií tsíꞌáa̱ tsi̱ꞌe̱ nga ki̱a̱ kꞌuíndora na̱xi̱ńdáꞌniú xí je katseꞌeé, ko̱jo cho̱ xi kisꞌiee̱, ngatꞌa̱ achichí kamá kui cho̱o̱.

²⁰ Nde ngojín jáxíꞌiín xi ko̱e̱je̱ꞌoyá nginí ngaskande nga ngayeje xota̱ tji̱e̱e̱ kꞌuieé ngo nangi xi tsi̱ꞌe̱. Ki̱a̱ ka̱maa̱ nga bo̱a̱ tsꞌén xió kꞌuíndo ki̱a̱ nangi xi Néná sa̱ꞌínkꞌasꞌiee̱n xi ingoboaá Ndejèꞌ Jorndaa̱n.

^21-22 »Josuee̱ bo̱a̱ kixiáa̱n nga stsa̱kjonjín, ngatꞌa̱ kuí boá xi chistiko̱ kamá nga kótsꞌèn Néná katsꞌeén nga jó kui já ree̱. Kó ti̱ bo̱a̱ kixiáa̱n nga Néná boá xi sa̱ꞌín nga kui xi sa̱ꞌiín ngayeje ngi̱ndie nínga botixómá já re nínga kjo̱a̱ꞌa, ngatꞌa̱ ti̱kuíní Néná xi skja̱n ngandaa̱ xota̱ Israee̱l.

Néná katsjandièjiín Moisee̱ nga kꞌo̱sꞌien nangi Kanaa̱n

²³ »Kósꞌe̱ ꞌniú tsíꞌáa̱ Néná nga bi̱ kixiáa̱n:

²⁴ “Jè kamábe an kjo̱a̱jèe̱ ko̱jo ngaꞌniúu̱. Ti̱nde nkꞌa jàn, ti̱nde tꞌanangii̱ jmíjín ingo Ne xi xikoó jí, xi maa̱ tsꞌén kjín ni xi fíndikónná.

²⁵ Te̱ꞌéndièní nga kjo̱a̱ꞌatio an ndejèꞌ Jorndaa̱n. Te̱ꞌéndièní nga skuié an na̱xi̱ xi tsjakoo̱n, ¡te̱ꞌéndièní nga skotsijèe̱n nangi Líbanoo̱!”

^26-27 »Ta̱nga ta̱ngatꞌanii̱ jún nga Néná katsꞌénxchánjo̱na, kó katsjandièjínna nga kjo̱a̱ꞌatio an ndejeèꞌ. Ta̱sá ngiti̱ katsjandièjínna nga kuichjiájo ngase an. Ta̱kuítsí ni xi katsjandièna nga kijínijíngí an ngaskande nínga ꞌniú nkꞌaá na̱xi̱ Pisgaa̱, tsi̱ꞌe̱ nga ki̱a̱ skuie an ngayeje kui nangii̱.

²⁸ Sꞌe̱ jaskan tsíꞌána nga kokoyáa̱ ko̱jo nga tsja ngaꞌniúu̱ Josuee̱, ngatꞌa̱ kuí boá xi ko̱si̱e̱ntjoón xota̱ Israee̱l, tsi̱ꞌe̱ nga sa̱ꞌiín nga skjánjo̱ nga ko̱tíxoma ngayeje kui tꞌanangii̱.

²⁹ »Jaskan ngije kamá kui nii̱, ki̱a̱ kixindyión nangi soón na̱xi̱ Bee̱t-Peoo̱r».