Ndeuteronomio̱ 29 - Xo̱jo̱n eén Néná

Ngo kjo̱a̱ꞌbínda tja̱tsi̱e̱ tsi̱ꞌe̱ Néná ko̱jo xota̱ Israee̱l

^1-3 Moisee̱ katsꞌénkjietꞌani nga katsjaá xota̱ Israee̱l ngayeje kjo̱a̱botíxoma xi Néná índajo̱ kui xotaa̱ ki̱a̱ na̱xi̱ Oree̱b. Kósꞌe̱ Néná atíxomaa̱ tsi̱ꞌe̱ nga ngo kjo̱a̱ꞌbínda tja̱tsi̱e̱ sa̱ꞌínjo̱ kui xotaa̱, ki̱a̱ na̱xi̱ńdaá xota̱ tji̱e̱e̱ Moaa̱b. Moisee̱ ítikó kuí xotaa̱ kósꞌe̱ katsjaá kjo̱a̱botíxomaa̱ kjo̱a̱ꞌbínda tja̱tsi̱e̱e̱. Bi̱ katsoó: «Jún boá xi chistiko̱ kamájnú kjo̱a̱a̱ ngayeje kjo̱a̱ndikón xí katsꞌén Néná nga atíjeé xota̱ Ejiptoo̱. Jún boá xi kamáyàjnú kó katsꞌénjo̱ nda̱ ree̱ nangi Ejiptoo̱, ko̱jo xota̱ xi ngito̱ko̱o̱, ko̱jo ngayeje xota̱ na̱xi̱ńdaá.

⁴ Ngaskande ngotꞌe̱ katsjandièjín Néná nga ka̱makjínjnú míkjo̱a̱a̱ nga ngayeje kui nii̱ katsꞌén.

^5-6 Yichán nó nga Néná kisꞌijñatjónjnú ki̱a̱ nangi kixií, kó jmíni̱xtjin nga kichajájnú nichinie. Ngayeje kui ni̱xtjin xi̱ꞌba̱ kjifejín ndiéjnú, ko̱jo kjimaxchájín ńjñojnú, kó kui nii̱ xi katsꞌén, tsi̱ꞌe̱ nga xcha̱jnú jún nga kuí boá xi Nejnú.

⁷ »Kjiꞌanga ndyi̱ndibá kuí ngi̱ndiee̱, nda̱ ree̱ nangi Esboo̱n, ko̱jo nda̱ ree̱ nangi Basaa̱n ki̱a̱ íchjátjónná ndi̱ya̱à kó askjanjo̱ná. Ta̱nga ñá kiniꞌáa̱n,

⁸ kó kachjeꞌéxíi̱n tꞌanangii̱, tsi̱ꞌe̱ nga xota̱ tji̱e̱e̱ Rubee̱n, ko̱jo Ngaa̱nd, ko̱jo masien xota̱ tji̱e̱e̱ Manasee̱ katseꞌée̱.

⁹ Kuíni nga míꞌájnúꞌun nga ti̱ꞌankjatjosónjnú ngayeje kui kjo̱a̱botíxomaa̱ kui kjo̱a̱ꞌbínda tja̱tsi̱e̱e̱, kó ngayeje ni xi si̱ꞌánjnú, nda ka̱ma.

¹⁰ »Ngayeje xota̱ Israee̱l kꞌi̱e̱ kjimatikó ngotꞌe̱, ngindyi̱ko̱n Néná. Kꞌi̱e̱ síndo xota̱ xi ngito̱ko̱o̱ xota̱ tji̱e̱e̱, xota̱ xi síndotjoón, xota̱xá, jáxíꞌín,

¹¹ ínchjín, ko̱jo jákjíndí. Kꞌi̱e̱ síndo kꞌi̱e̱e̱ nga xota̱ xi xín nangi chji̱a̱ni xi botiejnú chikín, ko̱jo xi ꞌbiñájánjnú ndáfoa.

¹² Kꞌi̱e̱ síndo kꞌi̱e̱e̱ tsi̱ꞌe̱ nga ka̱tso̱yà nga sa̱ꞌínkjatjosón ngo ni. Kuí boá xi bo̱a̱ ka̱tso̱ nga sa̱ꞌínkjatjosón kui kjo̱a̱ꞌbínda xi Néná tjítsꞌénjo̱jnú jún kui ni̱xtjin xi̱ꞌbi̱.

¹³ Néná tsꞌéntsáyàná ngotꞌe̱ nga kui xi ka̱ma Néná, xikó má katsoó xota̱ xi xcháná Abraa̱n, ko̱jo Isaa̱, ko̱jo Jakoo̱b, kó ñá bo̱a̱ ndyi̱ꞌmì, nga ñá boá xi ka̱má xota̱ na̱xi̱ńdaá kui.

^14-15 Ta̱nga kui kjo̱a̱ꞌbíndaa̱ jmí tsi ta̱ tsa̱ñá tsí. Néná tsꞌéntsáyà nga ko̱jo kui xota̱ tji̱e̱ná xi jaskan kꞌuié xi tjítsꞌénjo̱ nga.

Nga niꞌántsjajo̱ ne xi Nénájín

¹⁶ »Ngatjaꞌátsjienjnú ni xi ikitjá nangi Ejipto̱, ko̱jo kótsꞌèn ikitjajìn kjín na̱xi̱ńdá tsi̱ꞌe̱ nga jéꞌe̱ ngaskande kꞌi̱e̱e̱.

¹⁷ Kui xotaa̱ ne xi Nénájín xi tsꞌéntsjaà, kó ñá kamáyà a̱sie̱én kui nee̱ xi yá, xi ndi̱jo̱, xi to̱nsinié ko̱jo xi to̱ntiboa, ¡Achichí chꞌoó Néná kuí a̱sie̱én!

¹⁸ Kuíni nga ꞌniú míꞌájnúꞌun jún xi chjo̱on xí xi̱ꞌinjnú, xi xota̱ ngo ndiꞌa, ko̱jo xi xota̱ tji̱e̱, nga ngojín xi ꞌbíjñámasiénjnú Néná, tsi̱ꞌe̱ nga ne xi Nénájín xi sa̱ꞌíntsjaá. Kui xi bo̱a̱ sa̱ꞌiín, kuí boá xi xikoó xka̱ xi tsꞌenkꞌiénná, kui xi ta̱ kjo̱a̱bo̱ya tsí xi foeꞌejo̱.

¹⁹ »Ki̱a̱jiín ni xi tsꞌénkjó ngo xota̱ xi ntꞌié kjo̱a̱botíxomaa̱ kui kjo̱a̱ꞌbíndaa̱, kó sꞌijii̱n nga jmí ni ka̱májiín tsi ku̱i̱ntꞌiéꞌénjín. Kui xotaa̱, kuí boá xi tjiín jé nga Néná ko̱tíjeé ngayeje xota̱ Israee̱l,

^20-21 ta̱nga Néná sa̱ꞌínjetakónjiín, ta̱sá sa̱ꞌín nga kui kji̱ndi̱bánié ngayeje ni xi ndajín xi tsáyà kui xo̱jo̱o̱n, ko̱jo nga xtjo̱ꞌóxíntꞌaa̱ xota̱ tji̱e̱e̱, ko̱jo nga ko̱yà ngaskande xota̱ tji̱e̱ xi fetꞌani xi jaskan kꞌuieé. ¡Néná achichí ꞌniú ko̱tíjeé!

²² »Xota̱ Israee̱l xi jaskan stse̱n, ko̱jo xota̱ xi xín nangi kjin kji̱ndi̱báni sku̱i̱e̱ kui kjo̱a̱botíjé xí ta̱nisién ndajiín, ko̱jo chiꞌin xi Néná sa̱ngíyaá xota̱ na̱xi̱ńdaá.

²³ Kjiꞌanga skotsíjee̱n tꞌananginá, ta̱ ndso̱ko̱a̱n asufree̱ tsí, ko̱jo na̱xa̱ ko̱jo tꞌanangi kití xi sku̱i̱e̱. Ngiti̱ ka̱májín ni kꞌuítji̱e̱ tꞌananginá, ngatꞌa̱ ngiti̱ jmí ni tsja̱ajín tꞌanangii̱, nde kꞌijñá tsja̱ajín. Xikó maá tsi ndyi̱yà nga katsꞌénxchán Néná nga katsꞌénkjié na̱xi̱ńdáꞌniú Sondoma̱, ko̱jo Ngomorra̱, ko̱jo Andmaa̱, ko̱jo Seboii̱n.

²⁴ »Ngayeje xota̱ nga̱sondiee̱ bi̱ ka̱tso̱ nga ko̱síyá: “Míkjo̱a̱a̱ nga Néná bi̱ tsꞌén atíjeé kui na̱xi̱ńdaá. Mí nii̱ bo̱a̱ xi ta̱nisién ꞌniú katsꞌénxchánní”.

²⁵ Kó tjín xí bi̱ ka̱tso̱: “Nee̱ kui xotaa̱ katsꞌéndé nga kisꞌińdo nangi Ejipto̱, ta̱nga tsintꞌiéꞌénjín ni xi akatíxomaa̱ kjo̱a̱a̱ kui ni xi índajo̱ Néná ko̱jo kui xotaa̱.

²⁶ Ta̱sá katsꞌéntsjaà ne xi nde kui bejín ꞌyání bo̱a̱, kó kui nee̱ jmíni̱xtjin katsꞌén ngo ni tsi̱ꞌe̱ nga ko̱síko̱jo.

²⁷ Kuíni nga Néná katsꞌénxchánjo̱ kui xotaa̱, kó katsangiyaa̱ ngayeje ni xi ndajín xi kjitꞌa kui xo̱jo̱o̱n.

²⁸ Ta̱nisién katsꞌénxchán nga ngaskande tsangatji̱ngii̱ kui na̱xi̱ńdaá, kó ki̱a̱ katsangiya ki̱a̱ na̱xi̱ńdá nínga síndo ngotꞌe̱”.

²⁹ »Tjín ni xi tjiꞌmaá Néná, kó ta̱kuítsí xi be mí nii̱ bo̱a̱, ta̱nga ñá katsjáná ngayeje kui kjo̱a̱botíxomaa̱, tsi̱ꞌe̱ nga ñá ko̱jo xota̱ tji̱e̱ xi jaskan kꞌuiéná sa̱ꞌínkjatjosón ngatsjéni̱xtjin».