Ndeuteronomio̱ 26 - Xo̱jo̱n eén Néná

Ni xi tjón maxchaá

¹ Moisee̱ bi̱ katsó ngasee̱ xota̱ na̱xi̱ńdaá: «Ngije tindyiónjnú ki̱a̱ tꞌanangi xi Néná tsja̱ajnú,

² chjiéngá Néná si̱ꞌankꞌasꞌienjnúu̱ ni xi tjón kamáxchájnú xi ikꞌítji̱e̱jnú. Ngo ni̱se̱nyá ku̱i̱ndyiajnú, kósꞌe̱ ki̱a̱ kongínjo̱jnú ndiꞌandikoón.

³ Kó ki̱a̱ konginkíndyiánjnú ngindyi̱ko̱n chináꞌmii̱, sꞌe̱ bi̱ kꞌuínjnúu̱: “Ngotꞌe̱ ꞌne̱, ngindyi̱ko̱n Néna mejénna nga ngayeje xi sku̱i̱e̱ nga jè tikòn an ki̱a̱ tꞌanangi xi Néná katsóyàtjoón nga tsja̱á xota̱ xi xchájne̱”.

⁴ »Chináꞌmii̱ skjíbé kui ni̱se̱nya̱á kó ki̱a̱ ku̱i̱ꞌíjñá nga̱soón ṉchandikoón Néná.

⁵ Kósꞌe̱ kui xi sa̱ꞌínkꞌasꞌien kui ni̱se̱nya̱á, bi̱ ka̱tso̱: “Xota̱ xi xchána ki̱a̱ tsíchji̱a̱ni ngo xtín xota̱ arameo̱ xi kisꞌiejiín ngo ngi̱ndie nínga kisꞌińdo síkijí. Ki̱a̱ kijíkꞌíndo nangi Ejipto̱, kó ki̱a̱ kamá ngo xtín na̱xi̱ńdá xi kjín kamá ko̱jo xi ꞌniú kamá.

⁶ Ta̱nga xota̱ Ejiptoo̱ ndajín katsꞌénjo̱jne̱, kó katsꞌénjne̱ kjo̱a̱ꞌniú nga moso̱ kamájne̱.

⁷ Kósꞌe̱ kichjiáꞌájne̱ nga ko̱síko̱jojne̱ Nee̱ xota̱ xi xchájne̱, kó kui tsintꞌié nga ꞌniú kandokjo̱a̱jne̱, ngatꞌa̱ kamábe kui kjo̱a̱ni̱ma̱ xi katsꞌénkꞌatiojne̱ kui xotaa̱.

⁸ Kó bo̱a̱ tsꞌén nga Néná katsꞌénkjién ngaꞌniú jèe̱, kó achichí kjo̱a̱ndikón katsꞌén nga indyiándikoón xota̱ Ejiptoo̱, kó tsꞌaxiéjne̱ kui ngi̱ndiee̱.

⁹ Jaskan jeꞌejo̱jne̱ kui na̱xi̱ńdaá, nínga ngatsjéni̱xtjin tsie nichinie tjín.

¹⁰ Kuíni nga ngotꞌe̱ ꞌne̱, tsꞌéntsjàa̱ ndokꞌóchjì kó kꞌi̱e̱ yaꞌàa to xi tjón kamáxchá xí itji̱e̱ an ki̱a̱ tꞌanangi xi kui katsjána”. »Sꞌe̱ jaskan kui xi sa̱ꞌínkꞌasꞌien kui ni̱se̱nya̱á, ki̱a̱ ku̱i̱ꞌíjñá ki̱a̱ nga̱són ṉchaa̱n Néná, kósꞌe̱ ko̱siéntikoó tsi̱ꞌe̱ nga sa̱ꞌíndikón Néná.

¹¹ Jaskan ngije kamá kui nii̱, ngo sꞌué sa̱ꞌín tsi̱ꞌe̱ nga tsja̱á ndokꞌóchjì Néná kjo̱a̱ ni xi Néná katsjaá kuí ko̱jo xota̱ ndiꞌaa̱. Nga ka̱ma kui sꞌueé chjiéngá ka̱tso̱yaa̱ tsi̱ꞌe̱ nga ko̱e̱je̱ chináꞌmii̱, ko̱jo xota̱ xi ta̱ ngotjón síndo ki̱a̱ na̱xi̱ńdaá.

Tie nga úchán

¹² »Xki̱ ján nó kꞌuijñátꞌaxínjnú tie nga úchaán ngayeje ni xi kamáxchájnú, kó kui nii̱ chináꞌmii̱ te̱ꞌéjnúu̱, ko̱jo xota̱ xi ta̱ ngotjón síndo ki̱a̱ na̱xi̱ńdaá, ko̱jo xota̱ xi xꞌi̱a̱n, ko̱jo ínchjín kꞌán xi je kꞌien xi̱ꞌii̱n xi ki̱a̱ síndojinjnú. Kó bo̱a̱ tsꞌén nga ki̱a̱ nangijnú ngojín xi kjindiá kjo̱a̱ꞌa.

^13-14 Ngije kiniꞌánkꞌasꞌienjnú ngayeje kui nii̱, chjiéngá bi̱ kꞌuínjnú ki̱a̱ kje̱n ṉchandikoón: “Ji Ne, jè ijñátꞌaxín an ngo tjín ni xi kamáxchána, kó jè katsꞌenkꞌasꞌièe̱n chináꞌmii̱, ko̱jo xota̱ xi ta̱ ngotjón síndo ki̱a̱ na̱xi̱ńdaá, ko̱jo xota̱ xi xꞌi̱a̱n, ko̱jo ínchjín kꞌán xi je kꞌien xi̱ꞌii̱n. Je katsꞌenkjatjosón an ngayeje kjo̱a̱botíxomàa̱, kó nde ngojín kui nii̱ xi katsꞌenjo̱ an. Jmí ni̱xtjin nga iskjíni̱e̱ an tji̱e̱nga tsjiejín kamá an, ko̱jo tsi kisꞌijña xa̱ꞌya̱ an, ti̱nde katsjajáa̱n a̱si̱énni̱xtjii̱n xota̱ xi je jesoón.

¹⁵ Kó ji ki Ne, jí boá xi katseꞌéjne̱ ngo na̱xi̱ńdá nínga ngatsjéni̱xtjin tsie nichinie tjín. Kó nga je katsꞌenkjatjosón an ngayeje nii̱, ti̱ꞌinchikonñí ji kui tꞌanangii̱, ko̱jo kui xota̱ na̱xi̱ńdaá ndeskande ki̱a̱ na̱ngo̱xi̱ xi tikón ndiꞌakꞌajmii̱”».

Tsi̱ꞌe̱ Néná boá xota̱ na̱xi̱ńdá Israee̱l

¹⁶ Moisee̱ bi̱ katsó ngasee̱ xota̱ na̱xi̱ńdaá: «Néná boá xi tsꞌénbotixómájnú ngotꞌe̱ nga ko̱nda̱ꞌyáꞌénjnúu̱ ngayeje kjo̱a̱botíxomaa̱. Te̱ꞌéjnú ndso̱ꞌbájnú nga ko̱nda̱ꞌyáꞌénjnúu̱ ngayeje ini̱ma̱jnú ko̱jo ngayeje kjo̱a̱mindyionjnú.

¹⁷ Jún boá xi je Ne ndyi̱ꞌmìjnúu̱ Nee̱ xota̱ Israee̱l, kó jé katseꞌéjnú ndso̱ꞌbájnú nga ngatsjéni̱xtjin si̱ꞌankjatjosónjnúu̱ ngayeje nii̱.

¹⁸ »Kó kjo̱a̱a̱ kui, Néná jè katsꞌénkjatjosón ni xi katsóyàtjón nga sa̱ꞌín, kó jè bo̱a̱ katsó nga jún boá xi xota̱ na̱xi̱ńdaá, kó nga chjiéngá ko̱nda̱ꞌyáꞌénjnúu̱ ngayeje nii̱.

¹⁹ Néná boá xi sa̱ꞌín nga jún boá xi ka̱majnú xota̱ na̱xi̱ńdá xi ꞌniú ngase ko̱jo xi xcha̱ndikón ngase xi kꞌuijñá kui tꞌanangii̱, tsi ngatsjéni̱xtjin si̱ꞌankjatjosónjnúu̱ kjo̱a̱botíxomaa̱ ko̱jo nga ta̱kuítsí xi si̱ꞌandikónjnú».