Ndeuteronomio̱ 25 - Xo̱jo̱n eén Néná

¹ »Ngayeje xi kꞌuieé ngo kjo̱a̱xti ngi̱jinjnú, chjiéngá ngindyi̱ko̱n jáxaá kongínjo̱, tsi̱ꞌe̱ nga kui jáxaá xi bo̱a̱ ka̱tso̱ ꞌyání xi tjiín jé, kó ꞌyání xi jmíjéjiín.

² Tsi kui xi konnii̱ chjiéngá ka̱majeé, chjiéngá ki̱a̱ kjojñátsakján ngindyi̱ko̱n nendiꞌamasiee̱n, kósꞌe̱ ki̱a̱ kjoaá xikó kjiꞌi ńꞌniú tsoboaá kjo̱a̱a̱ jé xí katsꞌén.

³ Ngojín xi tsꞌatio yichán ńꞌniú kjoaá kjo̱a̱a̱ ngo jé, ngatꞌa̱ jè ngiti̱ kjo̱a̱niꞌánjéjín xi̱ꞌba̱, jè ni̱ma̱kjo̱a̱ tjíꞌbíjñá ngo xota̱.

⁴ »Ngata̱ ꞌbíchjájínjnúu̱ cho̱yojo xi bokján tꞌanangii̱ nga skji̱ni̱e̱ ni, tji̱e̱nga tjítsꞌéntsjie to ndso̱ko̱a̱n ṉño̱paa̱n».

Kjo̱a̱botíxoma kjo̱a̱a̱ ínchjín kꞌán xi je kꞌien xi̱ꞌii̱n

⁵ Moisee̱ bi̱ katsó ngasee̱ xota̱ na̱xi̱ńdaá: «Tsi jó ntsꞌie xi ta̱ ngo ndiꞌa síndoyá, kó tsi ngo ko̱yà, kó tsi chjo̱ón jmí ndí kisꞌiejiín, kui xota̱chjo̱on ka̱májín kje̱ꞌe xota̱ ku̱i̱xanjo̱ nginí, ngototo ngo xkjín ndie xi̱ꞌii̱n. Chjiéngá kui nda̱ xi ntsꞌi̱e̱ ma ndie xi̱ꞌii̱n xi ku̱i̱xanjo̱. Kui kjo̱a̱kitii̱ chjiéngá sa̱ꞌínkjatjosón ngayeje chja̱.

⁶ »Ndí tjón xi kꞌuieé kui naa̱, ko̱jo ntsꞌi̱e̱ ndie xi̱ꞌii̱n, chjiéngá jaꞌeén kui ndie xi̱ꞌii̱n xi ko̱a̱ꞌa̱, tsi̱ꞌe̱ nga jmíjín xi xchi̱yaa̱ kui nda̱a̱ ki̱a̱ na̱xi̱ńdá Israee̱l.

⁷ »Tsi kui nda̱ chja̱a̱ ka̱mamejénjiín ku̱i̱xanjo̱ kui xota̱chjo̱on kꞌaán, kui naa̱ ka̱má ko̱e̱je̱katíjétaꞌín kui nda̱a̱ ngindyi̱ko̱n xota̱xa̱á,

⁸ kó kui jáxaá chjiéngá ku̱i̱chji̱a̱a̱ kui nda̱a̱ kósꞌe̱ ku̱i̱chji̱a̱jo. »Kó tsi ndatsi bo̱a̱ tsꞌén kui nda̱ chja̱a̱ ka̱mamejénjiín ku̱i̱xanjo̱ kui xota̱chjo̱on kꞌaán,

⁹ ngindyi̱ko̱n jáxaá kui xota̱chjo̱on kjo̱a̱ꞌáxiín ngo ndié xí kjiyaa̱ nda̱ chja̱a̱, sꞌe̱ ko̱títiajón kje̱n nga bi̱ ka̱tso̱: “¡Tsitsíjenjnú! Kuí nii̱ xi tsoboaá nga si̱ꞌanjo̱ ngo xota̱ xi mejénjiín nga tsja̱á xota̱ tji̱e̱ ntsꞌi̱e̱”.

¹⁰ Kósꞌe̱ ti̱ kjiꞌa “xota̱ xi kjiꞌixtí sé” kꞌuiín ki̱a̱ na̱xi̱ńdá Israee̱l xota̱ ndiꞌaa̱ kui nda̱ chja̱a̱.

Kjo̱a̱kiti xi si̱ꞌankjién kjiꞌanga kꞌuié ngo kjo̱a̱xtii̱

¹¹ »Tsi jó já ndyi̱kjàn, kó tsi chjo̱ón ngo kui já xí ndyi̱kja̱àn sa̱ngínjin yojoo̱ kui kjo̱a̱see̱, ta̱ngatꞌanii̱ nga ko̱e̱je̱jindojo̱ xi̱ꞌii̱n, kó tsi kui xota̱chjo̱on skjíbé yojondikoón kui nda̱ xi tsꞌénkjánjo̱ xi̱ꞌii̱n,

¹² chjiéngá ku̱i̱chájnú tsja kui xota̱chjo̱on. Ngata̱ ni̱ma̱jín májnú.

Kjiꞌanga ndajín chꞌíchi̱bo̱a̱ ngo ni

^13-15 »Kjiꞌanga ngo ni ko̱ti̱ñájnú ko̱jo tsi si̱ꞌantsiéjnú, ngata̱ chꞌíṉcha̱jínjnú, ta̱sá ni xi nda ꞌbochi̱bo̱a̱ xi ti̱ꞌankjiénjnú. Kó bo̱a̱ tsꞌén nga kjín nó ka̱majnú nga ku̱i̱ndyionjnú ki̱a̱ na̱xi̱ńdá xi Néná tsja̱ajnú.

¹⁶ Néná chꞌórií xota̱ xi kixi̱jín ko̱jo xi ndyi̱ꞌboṉcha̱ nga ndajín ꞌbochi̱bo̱a̱ nga é ko̱jo nga ndojó ngo ni».

Nga si̱ꞌankꞌien xota̱ Amalee̱k

¹⁷ Moisee̱ bi̱ katsó ngasee̱ xota̱ na̱xi̱ńdaá: «Ngata̱chiíjín niꞌánchíyájnú ni xi katsꞌénjo̱ná xota̱ na̱xi̱ńdá Amalee̱k kjiꞌanga kjindibá ñá nangi Ejipto̱.

¹⁸ Kui xotaa̱ katsakjónjín Néná, ta̱sá kjiꞌanga je ꞌniú jè jenda, askjanjo̱ná, kó katsꞌénkꞌién xota̱ná xí ndyi̱ndibá xtji̱e̱e̱n nga̱xtón, kui xi chi̱ni ngasee̱.

¹⁹ Kuíni nga ngatjaꞌátsjienjnú kui nii̱: Ngije tindyiónjnú na̱xi̱ńdájnú, kó ngije kiniꞌánkjiéjnú kondra̱jnú xi síndo nga ngo foaꞌatjiyajoo̱n, chjiéngá si̱ꞌankjiejnú ngayeje xota̱ tji̱e̱e̱ Amalee̱k».