Ndeuteronomio̱ 24 - Xo̱jo̱n eén Néná

Kjo̱a̱botíxoma kjo̱a̱a̱ xota̱ xi je ixán sꞌe̱ jaskan ꞌbíndo xkjín

¹ Kjo̱a̱a̱ xota̱ xi je ixán sꞌe̱ jaskan ꞌbíndo xkjín, Moisee̱ bi̱ katsoó xota̱ na̱xi̱ńdaá: «Tsi ngo nda̱ ku̱i̱xan, kósꞌe̱ ngi̱chí sájín ngo ni xi ndajínkjiꞌi sku̱i̱e̱ kjo̱a̱a̱ chjo̱on, ka̱má ku̱i̱ꞌíndo xkjín. Tsi̱ꞌe̱ nga ku̱i̱ꞌíndo xkjín, chjiéngá ngo xo̱jo̱n nínga je je kjo̱a̱bixaa̱n sa̱ꞌínkꞌasꞌiee̱n, kósꞌe̱ ngatangatji̱ngii̱ ndiꞌaa̱ ngijee̱.

² »Tsi kui naa̱ kje̱ꞌe xíꞌín ku̱i̱xanjo̱ ngijee̱,

³ kó tsi kui xi̱ꞌin xi sꞌe̱ kasakoo̱ ti̱ ku̱i̱ꞌíjñá nginí, ko̱jo tsi ko̱yà,

⁴ ka̱májín ku̱i̱xanjo̱ nginí xi̱ꞌin xi tjoón. Ngiti̱ ka̱májín ku̱i̱xanjo̱, ngatꞌa̱ kui xota̱chjo̱on kje̱ꞌe xíꞌín je kisꞌiejo̱, kó tsi ku̱i̱xanjo̱ nginí xkjín, achichí sa̱ꞌínxchán Néná. Ka̱májín si̱ꞌandándí tꞌanangi xi Néná je katsjáná».

Kje̱ꞌe ngase kjo̱a̱botíxoma

⁵ Moisee̱ bi̱ katsó ngasee̱ xota̱ na̱xi̱ńdaá: «Tsi ngo nda̱ xi sꞌe̱ ixán má, jmí kjo̱a̱ꞌniújiín nga kjo̱a̱xchán ko̱e̱je̱, ti̱nde jmí kjo̱a̱ꞌniújiín nga kje̱ꞌe xá sa̱ꞌín. Ta̱sá ngayeje kui nó tjón nga ixaán tjiín kjo̱a̱nda nga ka̱ma ki̱a̱ kꞌuijñá ndiꞌaa̱, tsi̱ꞌe̱ nga tsja ka̱maa̱ nga kꞌuijñájo̱ chjo̱ón.

⁶ »Tsi tjín xí ngo to̱n ku̱i̱yajnú, ngata̱ makjina̱ xi ꞌboo̱jín chjábéjnú nga kui ku̱i̱ꞌíjñangijnú kui to̱o̱n. Tsi bo̱a̱ si̱ꞌánjnú, kui xotaa̱ ngiti̱ kꞌuiéjiín ni xi kꞌoní ndso̱ko̱a̱n ṉño̱paa̱n, kó ka̱má kjindiá kjo̱a̱ꞌa.

⁷ »Ta̱ꞌyaní xi ngo xota̱ sa̱ꞌínchejé tsi̱ꞌe̱ nga ko̱tíñá ko̱jo tsi tsi̱ꞌe̱ nga moso̱ sa̱ꞌín, chjiéngá ko̱yà. Ngata̱ boeꞌéndièjínjnú nga kui ni xi ndajiín ka̱ma ki̱a̱ na̱xi̱ńdájnú.

⁸ »Tsi tjín jún xi ngo chiꞌin kꞌuieé tji̱xin yojoo̱, chjiéngá ngatjíkoón chináꞌmii̱. Kui jaá jè be ni xi sa̱ꞌín kjo̱a̱a̱ kui nii̱, kuíni nga jún chjiéngá ki̱a̱ kongintjingíjnú ni xi ko̱tíxomájnú.

⁹ Ngatjaꞌátsjienjnú kótsꞌèn kamáꞌoón ndichjá án na̱ Riyaa̱ kjiꞌanga kjindibá ñá nangi Ejipto̱.

^10-11 »Kjiꞌanga tjín xí si̱ꞌankíyájnúu̱ to̱n, ngata̱ bitjasꞌi̱e̱njínjnú ndiꞌaa̱ nga ti̱ juún chjábéjnú ngo ni xi ku̱i̱ꞌíjñangini kui to̱o̱n. Ki̱a̱ ti̱ndyiàjnú nga̱ntjo̱a̱a̱, kó ki̱a̱ chiyájnúu̱ nga kui xotaa̱ tsja̱ajnú ni xi ku̱i̱ꞌíjñangini kui to̱o̱n.

^12-13 »Tsi ni̱ma̱ nga jmí to̱njiín kui xota̱ xi si̱ꞌankíyájnúu̱ to̱n, kó tsi ta̱kuítsí ńjño xi bótꞌa nga̱xto̱n xi ka̱ma ku̱i̱ꞌíjñangini to̱o̱n, chjábéjnú kui nii̱, ta̱nga nga jmí tsi nga ngo ni̱xtji̱e̱e̱n nga kꞌuijñájnú kui ńjñoo̱. Te̱ꞌé nginíjnúu̱ xi tsi̱ꞌe̱ kui ńjñoo̱ nga ka̱mangixoón, tsi̱ꞌe̱ nga kꞌuieé ni xi ko̱óꞌmáni yojoo̱ nga kjófé. Kó bo̱a̱ tsꞌén nga kui xi tsi̱ꞌe̱ kui ńjñoo̱ tsja ka̱maa̱, kó ku̱i̱ꞌaa̱ Néná nga tsja̱ajnú kjo̱a̱niꞌánchikonñeé. Kó Néná sku̱i̱e̱ nga ndajnú xota̱, kó sa̱ꞌínchikonñéjnú.

^14-15 »Tsi ngo xota̱ xi ni̱ma̱ nga jmí to̱njiín ko̱e̱ꞌéxájnúu̱, ngije kju̱i̱e̱ ni̱xtjii̱n ndakjiꞌi tꞌíchjíjnúu̱. Xota̱ xi ni̱ma̱a̱, xota̱ Israee̱l, ko̱jo xota̱ xi xín nangi chji̱a̱nii̱, tsꞌénxá tsi̱ꞌe̱ nga skji̱ni̱e̱ ko̱jo kꞌuí, kó kuíni nga to̱n chjieén. Tangíntji̱ngíjnú kui kjo̱a̱botíxomaa̱, ngatꞌa̱ tsi bo̱a̱jín si̱ꞌánjnú, kui xotaa̱ ngindyi̱ko̱n Néná ko̱óngítaꞌínjnú, kó Néná ko̱tíjéjnú jún.

¹⁶ »Ngojín xota̱ xi ka̱majeé kjo̱a̱a̱ nga ngo ini̱ma̱ kjifínié nga katsꞌénkꞌién, kó nga kuijín xi bo̱a̱ katsꞌén. Ti̱nde ngojín na̱ꞌmi ko̱jo tsi na̱an xi si̱ꞌankꞌien kjo̱a̱a̱ tsi kui ndií xi xota̱ katsꞌénkꞌién, ti̱nde ngojín ndí xí si̱ꞌankꞌien kjo̱a̱a̱ tsi na̱ꞌmii̱ ko̱jo tsi na̱aa̱n xi xota̱ katsꞌénkꞌién.

¹⁷ »Nda ti̱ꞌanjo̱jnú xota̱ xi ki̱a̱ jachókꞌíndo tsá ki̱a̱ na̱xi̱ńdaá, ko̱jo xota̱ xi xꞌi̱a̱n. »Tsi tjín ni xi si̱ꞌankíyájnúu̱ ngo xota̱chjo̱on kꞌán xi je kꞌien xi̱ꞌii̱n, nga ńjñoo̱jín chjiáꞌajnúu̱ tsi̱ꞌe̱ nga kui nii̱ xi ku̱i̱ꞌíjñangini.

¹⁸ »Ngata̱chiíjín niꞌánchíyájnú nga xota̱ moso̱ kamájnú jún ki̱a̱ nangi Ejipto̱, kó nga Nejnú boá xi tsꞌaxiéꞌájnú. Kuíni nga tsꞌénxiyàjnúꞌun nga tangíntji̱ngíjnú ngayeje kui kjo̱a̱botíxomaa̱.

^19-22 »Tsi kjiꞌanga kachjaꞌáꞌyájnú ni xi ikꞌítji̱e̱jnú kichíyájnú ngo chꞌo̱ kui nii̱, ngata̱ monginꞌóyájínjnú nga kongínchjaꞌájnú. Ki̱a̱ tꞌíndojnú kui nii̱ tsi̱ꞌe̱ xota̱ ni̱ma̱ xi jmí to̱njiín, ko̱jo xota̱ xi ki̱a̱ jachókꞌíndo tsá ki̱a̱ na̱xi̱ńdaá, ko̱jo xota̱ xi xꞌi̱a̱n, ko̱jo ínchjín kꞌán xi je kꞌien xi̱ꞌii̱n. Kó nga xꞌi̱e̱je̱njnú to aseitunaa̱, ko̱jo tostsi̱je̱è, ti̱ bo̱a̱ ti̱ ti̱ꞌánjnú: ngata̱ bichájínjnú ngayejee̱, tꞌíndo chiboajnú tsi̱ꞌe̱ kui xotaa̱. Ngata̱chiíjín niꞌánchíyájnú nga moso̱ kamájnú jún ki̱a̱ nangi Ejipto̱, kuíni nga tsꞌénxiyàjnúꞌun nga tangíntji̱ngíjnú ngayeje kui kjo̱a̱botíxomaa̱. Tsi bo̱a̱ si̱ꞌánjnú Néná sa̱ꞌínchikonñé ngayeje ni xi si̱ꞌánjnú.