Ndeuteronomio̱ 23 - Xo̱jo̱n eén Néná

Xota̱ xi ka̱ma kꞌo̱sꞌien ndiꞌandikoón

¹ Moisee̱ bi̱ katsó ngasee̱ xota̱ na̱xi̱ńdaá: «Ka̱májín kꞌo̱sꞌien ki̱a̱ ndiꞌandikoón Néná xota̱ xi kjítie too̱ ko̱jo tsi xi ikichá yojo ndikoón.

² »Ti̱nde ka̱májín kꞌo̱sꞌien ndií xota̱ Israee̱l xí ínchjín xí xín nangi ixánjo̱. Nde ngojín xota̱ tji̱e̱e̱ xi ka̱ma ko̱e̱je̱.

³ »Ti̱nde ka̱májín kꞌo̱sꞌien ndiꞌandikoón Néná xota̱ tji̱e̱e̱ Amoo̱n, xota̱ tji̱e̱e̱ Moaa̱b, ko̱jo ngayeje xota̱ tji̱e̱ xi jaskan kꞌuieé.

⁴ Nde ngojín nga jó kui xota̱ na̱xi̱ńdaá xi kamámejeén katsjájnú nichinie ko̱jo ndáfoa, kjiꞌanga kjindibánijnú nangi Ejipto̱ kó nga ndyi̱mongínjnú nangi xi katsóyàtjónjnú Néná nga tsja̱ajnú. Kó katsꞌénkjién Balaa̱n, kui xi ndií Beoo̱r, xi chji̱a̱ni na̱xi̱ńdáꞌniú Petoo̱r xi tikón nangi Mesopotamia̱, tsi̱ꞌe̱ nga chꞌo ka̱tso̱ kondra̱ tsa̱jún.

⁵ Ta̱nga Néná achichí tjoó jún, kó katsꞌénsénjiín Balaa̱n. Ta̱sá kjo̱a̱niꞌánchikonñé katsꞌén kui én chꞌo tsó xi tsa̱jún katsaki.

⁶ Kuíni nga ti̱ꞌánjnú ngo kjo̱a̱ꞌniú tsi̱ꞌe̱ nga nga jó kui xota̱ na̱xi̱ńdaá jmíni̱xtjin kꞌuieé kjo̱a̱xió, ko̱jo nga nda ko̱e̱je̱e̱.

^7-8 »Xota̱ tji̱e̱ xi jaskan kꞌuieé xota̱ tji̱e̱e̱ Endoo̱n, ka̱má kꞌo̱sꞌien kui ki̱a̱ ndiꞌandikoón, ngatꞌa̱ xota̱ xingi̱jnú má kui. Kó ti̱ ka̱ma kꞌo̱sꞌien xota̱ tji̱e̱ xi jaskan kꞌuieé xota̱ Ejiptoo̱, ngatꞌa̱ jún ki̱a̱ kixindyionjnú kui na̱xi̱ńdaá».

Kjo̱a̱kiti tsi̱ꞌe̱ nga tsjie ku̱i̱ndyión

⁹ Kjo̱a̱a̱ nga tsjie kꞌuíndo xotaa̱, Moisee̱ bi̱ katsoó xota̱ na̱xi̱ńdaá: «Kjiꞌanga kongínjnú kjo̱a̱xchán, kó tsi ngo ngi̱ndie si̱ꞌankjaꞌyájnú, chónjnúu̱ nga ta̱xkiya si̱ꞌánjínjnú ngo ni xi tsjajín ka̱maa̱ Néná.

¹⁰ Xikoó kui nii̱: Tsi nga jñoó tjín xi ngiti̱ tsjiejín ka̱ma, chjiéngá kjo̱tjoni nínga síndo ndiꞌaa̱ xotaa̱ kó ngiti̱ ka̱májín kꞌo̱sꞌien nga ngo ni̱xtjii̱n.

¹¹ Nga ka̱mangixoón kui nda̱a̱ chjiéngá ko̱ngóyá, kó nga jñoó ka̱ma ko̱e̱je̱ nginí nínga síndo ndiꞌaa̱ xotaa̱.

^12-14 »Néná ki̱a̱ tikónjinjnú jún, tsi̱ꞌe̱ nga skónjnú kó tsja̱ajnú nga jún xi si̱ꞌánjnú nga ku̱i̱xkánjo̱jnú kondra̱jnú. Kuíni nga chjiéngá tsjie ka̱ma ki̱a̱ nínga kꞌuíndo ndiꞌaa̱ xotaa̱, ka̱májín kꞌuié ni xi tsjajín maá. Chjiéngá ndi̱tsen nínga síndo ndiꞌaa̱ kui xotaa̱ ku̱i̱ꞌíjñá ngo ngi̱ndie nínga kjo̱tì, kó ngo ti̱xa̱ ngatsꞌénda nínga ku̱i̱ndyianijín ngayeje kui nii̱. Tsi Néná sa̱ko̱ó ki̱a̱ nínga síndo ndiꞌaa̱ xotaa̱ ngo ni xi tsjajín ka̱maa̱, kuí boá xi ko̱ngaboaꞌájnú.

Kje̱ꞌe ngase kjo̱a̱botíxoma

¹⁵ »Tsi ngo moso̱ xi chji̱a̱ni kje̱ꞌe na̱xi̱ńdá ko̱nga, kó tsi ki̱a̱ kjo̱chó nínga tikón na̱xi̱ńdájnú nga ku̱i̱ꞌa nga ki̱a̱ xchoón, ngata̱ nangiya oyájínjnúu̱ ndi̱a̱a̱ kui mosoo̱.

¹⁶ Ta̱sá nda ti̱ꞌanjo̱jnú, kó te̱ꞌéndièjnúu̱ nga kui kjo̱a̱ꞌájin na̱xi̱ńdaá xota̱ Israee̱l nínga mejeén kꞌuijñá.

¹⁷ »Kjiꞌanga si̱ꞌantsjajnúu̱ Néná, ngata̱ bo̱a̱jín niꞌánjnú xikótsꞌèn xota̱ xi chji̱a̱ni kje̱ꞌe nangi nga tsꞌénmasien yojoo̱ nga tsꞌéntsjaà nee̱.

¹⁸ Néná chꞌórií xota̱ xi bo̱a̱ tsꞌeén, kó jmíni̱xtjin sa̱ꞌínjo̱ꞌo ngo kjo̱a̱tjó xi sa̱ꞌínkꞌasꞌien kui xotaa̱, ndatsi kui kjo̱a̱tjoó, tsi̱ꞌe̱ nga sa̱ꞌínkjatjosón ngo ni xi katsóyàtjón boá.

¹⁹ »Tsi kje̱ꞌe xota̱ Israee̱l xi si̱ꞌankíyájnúu̱ ngo to̱n, ko̱jo tsi nichinie, ko̱jo tsi kje̱ꞌe ni, ngata̱ jmí ndyi̱ko̱n chjeꞌéchjíjínjnúu̱.

²⁰ Ta̱kuítsí xota̱ xi xín nangi chji̱a̱ni xi ka̱ma chje̱ꞌéchjíjnúu̱ ndyi̱ko̱n to̱n. Tsi si̱ꞌankjatjosónjnú kui kjo̱a̱botíxomaa̱, Néná sa̱ꞌínchikonñé ngayeje ni xi si̱ꞌánjnú ki̱a̱ na̱xi̱ńdá nínga ku̱i̱ndyionjnú.

^21-22 »Ti̱ꞌankjatjosónjnúu̱ ni xi kꞌuíyátjónjnúu̱ Néná nga si̱ꞌánjnú. Xi jmí ni ka̱tso̱yàtjónjiín Néná nga sa̱ꞌín, jmí jé tsꞌénjín. Ta̱nga xi ka̱tso̱yàtjoón Néná nga ngo ni sa̱ꞌín, kó tsi sa̱ꞌínkjatjosónjín, tjítsꞌénjé boá. Néná ko̱tíjeé kui xota̱ xi sa̱ꞌínkjatjosónjín ni xi katsóyàtjón nga sa̱ꞌín.

²³ Tsi tjín xí ngayeje kon nga ka̱tso̱yàtjoón Néná nga ngo ni sa̱ꞌín, tjínrií ngo kjo̱a̱ꞌniú nga sa̱ꞌínkjatjosón.

²⁴ »Tsi tjín xí kꞌo̱sꞌien nínga tjitjieé tostsi̱je̱è ngo nda̱, tjínrií kjo̱a̱nda nga ka̱ma skji̱ni̱e̱ ki̱a̱a̱ ngayeje tostsi̱je̱è xi mejeén skji̱ni̱e̱, ta̱nga ka̱májín ngo kui too̱ ko̱a̱ꞌa̱ ndiꞌaa̱.

²⁵ Ti̱ bo̱a̱ ti̱ tsꞌén, tsi ngo nda̱ kꞌo̱sꞌien nínga tjitjieé to ndso̱ko̱a̱n ṉño̱pan, ka̱ma skji̱níyáni tsja ngayeje ńtiín kui too̱ xi mejeén skji̱níyá, ta̱nga ka̱májín tsi ki̱cha̱ sa̱ꞌínkjién nga ko̱tie kui xka̱a̱».