Ndeuteronomio̱ 21 - Xo̱jo̱n eén Néná

Ini̱ma̱ xi yàjín kótsꞌèn kꞌien

¹ Moisee̱ bi̱ katsó ngasee̱ xota̱ na̱xi̱ńdaá: «Ngije ki̱a̱ tindyiónjnú tꞌanangi xi tsja̱ajnú Néná, tsi tjín jún xi sa̱kójnú ngo ini̱ma̱ ki̱a̱ ngi̱jin kꞌijñaá, kó tsi yàjínjnú ꞌyání xi katsꞌénkꞌién, kuí nii̱ xi si̱ꞌánjnú:

^2-3 »Xota̱ ngito̱ko̱o̱ ko̱jo nendiꞌamasiee̱n kui na̱xi̱ńdáꞌniuú skotsíjee̱n ñá na̱xi̱ńdáꞌniú xi tiña ngase maa̱ nínga kasako kui ini̱ma̱a̱, sꞌe̱ kui já ngito̱ko̱ xi chji̱a̱ni kui na̱xi̱ńdáꞌniuú ku̱i̱ꞌa ngo ndí cho̱yojo chjo̱on xi kji̱e̱ niꞌánxájo̱jín nga bokján tꞌanangi.

⁴ Kó ki̱a̱ kongínjo̱ ngo nangi són nínga kji̱e̱ jmíjín xi ꞌbítji̱e̱ ni, kó nínga tikón ngo xo̱ngàndántꞌié xi jmíni̱xtjin xíyà ndáfoaa̱. Ki̱a̱ chjátꞌó kjásén kui ndí cho̱yojo chjo̱on.

⁵ »Kjiꞌanga ka̱ma kui nii̱, chjiéngá ki̱a̱ ko̱e̱je̱ chináꞌmii̱. Néná boá xi jaꞌájin nga kui xi kꞌuíndotjoón nga si̱ꞌantsjaa̱ Néná, ko̱jo nga kuí boá xi sa̱ꞌínchikonñé xota̱ na̱xi̱ńdaá nga sa̱ꞌínkjién jaꞌeén Néná, ko̱jo nga kuí boá xi ka̱tso̱yà nga fetꞌa, mí ni xi si̱ꞌan kjiꞌanga tjín ngo kjo̱a̱se, ko̱jo tsi ngo kjo̱a̱xti.

⁶ Kósꞌe̱ já ngito̱ko̱o̱ na̱xi̱ńdáꞌniuú ko̱niéjón tsja nga̱soón kui ndí cho̱yojo chjo̱on,

^7-9 kó bi̱ ka̱tso̱: “Ji Ne, ngo xota̱ xi jmí jéjiín kꞌien kꞌi̱e̱ nangijne̱, ¡ngata̱ niꞌínjéjínjne̱ kjo̱a̱a̱ nga kꞌien! Yàjínjne̱ ꞌyá xí katsꞌénkꞌién. ¡Ti̱ꞌinjetakínjne̱! ¡Jí boá xi Nee̱ xota̱ Israee̱l! ¡Jí boá xi ikꞌíjñindéjne̱ kjiꞌanga moso̱ kamájne̱ ki̱a̱ nangi Ejipto̱!” »Tsi ko̱nda̱ꞌyáꞌénjnúu̱ Néná kjo̱a̱a̱ ngayeje kui nii̱, Néná jmí jé ku̱i̱ꞌíniéjínjnú.

Ínchjín xí mongínjo̱ ꞌniú kjiꞌanga ma kjo̱a̱xchán

¹⁰ »Kjiꞌanga kongínjnú ngo kjo̱a̱xchán, kó kjiꞌanga Néná tsja̱ndièjnú nga jún xi si̱ꞌánjnú, kongínjo̱ꞌniúra̱jnú xota̱ xi síndo ki̱a̱a̱.

¹¹ Tsi ngi̱jii̱n kui xotaa̱ tikón ngo na̱ xi tsjakjiꞌi, kó tsi tjín xi ka̱mamejeén nga chjo̱ón sa̱ꞌín, chjiéngá kui nii̱ xi sa̱ꞌín:

¹² »Ngatjíjo̱ ndiꞌaa̱, kó kui naa̱ ki̱a̱ ku̱i̱ꞌíjón taka takaa̱ to̱ko̱ ko̱jo ngatatie ningoo̱.

¹³ Sꞌe̱ ngatjaꞌáxín ńjño xi yajá, sꞌe̱ ngo ńjño tja̱tsi̱e̱ ngatajá, kó ki̱a̱ ngatꞌíjñá ki̱a̱a̱ ngijee̱. Ngo sá ndo̱jò ndójo̱ ko̱e̱ꞌeé tsi̱ꞌe̱ nga skja̱ndátjé nga índomasien xi xchaá, ngije jaꞌa kui ni̱xtjii̱n, kui nda̱ Israee̱l jè ka̱ma ku̱i̱xanjo̱ kui naa̱.

¹⁴ »Tsi ngi̱chí sájín kui nda̱ Israee̱l ngiti̱ ka̱mamejénjiín nga chjo̱on ka̱ma, chjiéngá ku̱i̱ꞌíjñandé. Ka̱májín ko̱tíñá, ti̱nde ka̱májín bo̱a̱ sa̱ꞌínjo̱ xikó niꞌánjo̱ ngo na̱ xi moso̱, ngatꞌa̱ chjo̱ón je kamá.

Ndí xí tjoón

^15-17 »Tsi ngo nda̱ xi jó ka̱ma chjo̱ón, kó tsi nga joó nga kꞌuieé ndí, ta̱nga tsi ta̱ ngo tsí xi tjoó, kó tsi tjójiín xi ingoo̱. Kó tsi ndí xi tjoón kui nda̱a̱, na̱ xi tjójiín boá xi kisꞌiee̱, kjiꞌanga sa̱ꞌínda xo̱jo̱n nínga kjitꞌa ni xi sa̱ko̱ó ndií, kui ndií, jó bo̱a̱ kjiꞌii̱ ni xi ku̱i̱ꞌíjñaá ndií xi ngasee̱ xi nga sakoó xi̱ꞌbi̱, ngatꞌa̱ kuí boá xi ndí tjoón. »Ka̱májín jó bo̱a̱ kjiꞌi ni xi sa̱ko̱ó ndií kui xota̱chjo̱on xi tjoó kui nda̱a̱, ngatꞌa̱ kuijín bo̱a̱ xi ndí tjoón. Ndí xí ja̱koxi̱ nga kui xi tjoón, kuí boá xi tjiín kjo̱a̱nda nga jó bo̱a̱ kjiꞌi ni xi sa̱ko̱ó, ngatꞌa̱ kuí boá xi tjón katsen. Tsi kje̱ꞌe tsꞌén si̱ꞌan kui nii̱, ja̱ ndajín si̱ꞌanjo̱ ndí xí ja̱koxi̱ nga kui xi tjoón tsobo̱a̱.

Ndí xí ntꞌiéꞌénjiín

¹⁸ »Tsi ngo jún xi tjínjnú ngo ndí xí kitikjo̱a̱ ko̱jo xi tamá, xi ntꞌiéꞌénjiín na̱ꞌmii̱ ko̱jo na̱aa̱n ndatsi tsꞌénjeé, chjiéngá kui nii̱ xi si̱ꞌan:

¹⁹ »Nga joó, na̱ꞌmii̱ ko̱jo na̱aa̱n ngatjíjo̱ kui ndií ki̱a̱ nínga bitjasꞌi̱e̱nnii̱ na̱xi̱ńdáꞌniú nínga síndo. Ki̱a̱ nínga matikó ngatsjéni̱xtjin ngito̱ko̱o̱ xota̱ na̱xi̱ńdáꞌniuú.

²⁰ Kósꞌe̱ bi̱ ka̱tso̱o̱ xota̱ ngito̱ko̱o̱: “Ndíjne̱ achichí kitikjo̱a̱ ko̱jo tamá. Ntꞌiéꞌénjínje̱, ¡kó ngaskande ta̱ nda̱ xki̱ꞌá, ko̱jo ta̱ nda̱ chꞌi̱ tsí boá!”

²¹ »Ngije bo̱a̱ katsó, ngayeje xota̱ xi síndo kui na̱xi̱ńdáꞌniuú ndi̱jo̱ kꞌo̱ya nga sa̱ꞌínkꞌiénni kui ndí xí kitikjo̱a̱a̱. Bo̱a̱ tsꞌén nga jmí ni xi ndajín kꞌuiéjín ki̱a̱ na̱xi̱ńdá Israee̱l, ngatꞌa̱ ngayeje xotaa̱ stsa̱kjonní nga ni xi ndajín sa̱ꞌín».

Kje̱ꞌe ngase kjo̱a̱botíxoma

²² Moisee̱ bi̱ katsó ngasee̱ xota̱ na̱xi̱ńdaá: «Tsi tjín xí ngo ini̱ma̱ sa̱ꞌínkꞌién, kó tsi nga ko̱ti̱je̱é, si̱ꞌanxíndo kui xi bo̱a̱ katsꞌeén,

²³ ka̱májín ki̱a̱ kjuiénboáꞌáni yaá nga ngo ni̱xtji̱e̱e̱n, chjiéngá ti̱ kuii̱ ni̱xtjin kjónijín. Ngayeje xota̱ xi ngo yá kjuiénboáꞌáni nga si̱ꞌankꞌien, ndajín ngindyi̱ko̱n Néná. Tsi ko̱ꞌne̱je̱ngíjín kui yaá, Néná ni xi ndajín sa̱ꞌínjo̱ ngayeje kui na̱xi̱ńdaá. Kuíni nga niꞌánndándíjínjnú na̱xi̱ńdá xí tsja̱ajnú Néná.