Ndeuteronomio̱ 2 - Xo̱jo̱n eén Néná

Nga kisꞌińdo nangi kixií xota̱ na̱xi̱ńdá Israee̱l

¹ »Jaskan ngije kamá kui nii̱, Néná atíxomana tsi̱ꞌe̱ nga kjuínjo̱jnúꞌun nangi kixií, xtji̱e̱e̱n ndi̱yà xí fíni Ndáchíkón Inií. Kó kjín ni̱xtjin kamáná nga ikitjatjíyajóo̱n na̱xi̱i̱ nangi Seii̱r,

^2-12 ta̱nga Néná katsꞌénkjó nga je tsie tsꞌandíyáná kuí ngi̱ndiee̱, kó atíxománá tsi̱ꞌe̱ nga xtji̱e̱e̱n ta̱ꞌin tsangín. »Ngindiee̱ nga kongín, bo̱a̱ katsóná nga kjiꞌanga ku̱i̱tjá nangi Seii̱r, ka̱májín ku̱i̱xkánjo̱ xota̱ tji̱e̱e̱ Esauu̱, ngatꞌa̱ kuí tsi̱ꞌe̱ kui ngi̱ndiee̱. Ki̱a̱ boá nínga kisꞌińdo xota̱ Oreoo̱, ta̱nga xota̱ tji̱e̱e̱ Esauu̱ katsꞌénkjié kui xotaa̱, kó kui iskjíbé tꞌanangii̱. Kuíni nga Néná bo̱a̱ katsóni nga nde ngo chikjan kui tꞌanangii̱ tsja̱ajínná. Kó ndatsi kui xotaa̱ katsakjónná, Néná bo̱a̱ katsóná nga jmí ni si̱ꞌanjo̱jín ñá, ngatꞌa̱ nga fetꞌanii̱ nii̱ xota̱ tji̱e̱ xingi̱ ñá boá. Ta̱kuítsí nichiniee̱ ko̱jo ndáfoa xi ꞌyoó xi ka̱machjiénná xí sꞌi̱tsiée̱. »Án boá xi katsꞌenkjaꞌátsjienjnúꞌun nga Néná katsꞌénchikonñéjnú ngayeje ni xi kiniꞌánjnú nga yichán kui noó. Nga ja̱koxi̱ Néná boá xi askonjnú nga jmí ni kamájínjnú nga kisꞌiṉtso̱majnú nangi kixií, kó ngayeje nii̱ xi kisꞌiejnú. »Jaskan kjin tsangínñáa̱ ndi̱yà Arabaa̱, kui xi ꞌbítsi̱yani ki̱a̱ na̱xi̱ńdáꞌniú Elaa̱t ko̱jo Esioo̱n-Ngébee̱r, kó ki̱a̱ ikitjá nangi Seii̱r. Kósꞌe̱ ki̱a̱a̱ kachjábé ñá nga tsangín ndi̱ya̱à nangi kixí xi fí xtji̱e̱e̱n nangii̱ xota̱ tji̱e̱e̱ Moaa̱b. Kjiꞌá boá nga Néná atíxománá nga jmí ni si̱ꞌanjo̱jín ñá xota̱ tji̱e̱e̱ Moaa̱b, kui xi xota̱ tji̱e̱e̱ Loo̱t boá. Kó ti̱ bo̱a̱ katsóná Néná nga nde ngo chikjan kui tꞌanangii̱ nangi Aa̱r tsja̱ajínná, ngatꞌa̱ kui tꞌanangii̱ tsi̱ꞌe̱ kui xotaa̱ boá. Ngindiee̱ nga kjo̱chó, kui tꞌanangii̱ tsi̱ꞌe̱ xota̱ emitaa̱ kamá, kui xotaa̱, ngo na̱xi̱ńdá xí achichí ꞌniú kamá, nínga kisꞌie xota̱ xi achichí yiꞌi kamá, xikó maá xota̱ tji̱e̱e̱ Anaa̱k. Mejeén ngayeje xotaa̱, xi xota̱ refaita̱ katsoó kui xota̱ xi̱ꞌba̱, ta̱nga xota̱ tji̱e̱e̱ Moaa̱b, kuí boá xi tjón xota̱ emita̱ katsoó.

¹³ »Néná boá xi atíxománá nga to̱kó kongínra, kó nga ku̱i̱tja̱tió xo̱ngàndántꞌié Seree̱nd.

^14-16 Ndeskande ni̱xtjin nga akjatjó Kandee̱-Barnea̱, ngaskande ni̱xtjin nga ikitjatió kui xo̱ngàndántꞌieé, je kantjiꞌún ján nó jè jaꞌa. Kui ni̱xtjin jàn ja̱bo̱a̱ jè jesón yeje xota̱ Israee̱l xi kjiꞌanga jatjoni kui ngi̱ndie jàn, sꞌe̱ tsí tjiꞌún ján noó. Néná boá xi katsóyàtjón nga sa̱ꞌínkjién ngayeje ngaꞌniuú tsi̱ꞌe̱ nga sa̱ꞌínkjié kui xotaa̱.

^17-18 »Kjiꞌá boá nga Néná atíxoma tsi̱ꞌe̱ nga ku̱i̱tjá tsindioó nangi Moaa̱b, kó nga kongín na̱xi̱ńdáꞌniú xi ꞌmí Aa̱r.

¹⁹ Ta̱nga ngindiee̱ nga kongín atíxománá nga ku̱i̱xkánjo̱jínñá xota̱ tji̱e̱e̱ Amoo̱n, ngatꞌa̱ xota̱ tji̱e̱e̱ Loo̱t boá nga. Kó nga nde ngo chikjan kui tꞌanangii̱ sa̱kójínná, ngatꞌa̱ Néná boá xi je katsjaá kui xotaa̱.

²⁰ »Xota̱ refaitaa̱, kui xi xota̱ samsumita̱ katsoó xota̱ tji̱e̱e̱ Amoo̱n, kuí boá xi ki̱a̱ kisꞌińdo ngasꞌe̱. Kuíni nga kui ngi̱ndiee̱ nangii̱ xota̱ refaita̱ kiꞌmií.

²¹ Xota̱ samsumitaa̱, kuí boá xi ngo na̱xi̱ńdá xi ꞌniú je kamá, kó xota̱ xi kisꞌie ki̱a̱a̱ achichí nkꞌa ko̱jo yiꞌi kamá, xikó maá xota̱ tji̱e̱e̱ Anaa̱k. Néná katsꞌénkjié kui xotaa̱ nga katsꞌénkjién xota̱ tji̱e̱e̱ Amoo̱n, kui xi kisꞌińdo ngatsjéni̱xtjin kui tꞌanangii̱ ngijee̱.

²² Ti̱ bo̱a̱ ti̱ katsꞌén xota̱ tji̱e̱e̱ Esauu̱ ki̱a̱ nangi Seii̱r nga.

²³ Ko̱jo xota̱ Filisteaa̱, kui xi kjindibáni nangi Kretaa̱, katsꞌénkꞌién xota̱ tji̱e̱e̱ Ebee̱t xi kisꞌińdo ndí nangi xi síndo tiña Ngasa̱, kó kuí xotaa̱ xi kisꞌińdo kui na̱xi̱ńdaá ngijee̱.

²⁴ »Sꞌe̱ jaskan Néná atíxománá nga to̱kó kongínra, ikitjatió ndejèꞌ Arnoo̱n, kó ikixkánjo̱ Sijoo̱n, nda̱ ree̱ nangi Esboo̱n. Ngindiee̱ nga bo̱a̱ ka̱ma Néná, bo̱a̱ katsóná nga ñá boá xi ko̱ti̱xomá kui ngi̱ndiee̱, kó nga tsa̱ñá ka̱ma kui tꞌanangii̱ ngijee̱.

²⁵ Ti̱ bo̱a̱ ti̱ katsóná Néná nga ndeskande koó kjiꞌa, ngayeje xota̱ na̱xi̱ńdá xí chji̱a̱ni kui ngi̱ndiee̱ stsa̱kjonná. ¡Ndeta̱ maa̱ ku̱i̱ntꞌiè kjo̱a̱a̱ ñá, achichí nda̱ ka̱maa̱ ko̱jo stsa̱kjonní!

Nga kiniꞌánchaja nda̱ re Sióo̱n

²⁶ »Kjiꞌanga kixindyión na̱xi̱ńdáꞌniú Kandemoo̱t, katsangiyáa̱ ngo én nda̱ Sijoo̱n, nda̱ ree̱ nangi Esboo̱n nínga tsíꞌáa̱

^27-29 nga tsja̱ndièná nga ka̱ma ku̱i̱tjá ki̱a̱ nangi nínga botixómá. Kó nga ta̱ ki̱a̱ tsí kongín ndi̱yà je xi tsi̱ꞌe̱ kui ngi̱ndiee̱, kó nga ku̱i̱tja̱tió ndejèꞌ Jorndaa̱n, ngaskande nga kjóchó nangi xi Néná je bo̱a̱ katsóná nga tsja̱aná. Bo̱a̱ kixiáa̱n nga kꞌuichjíi̱ nichinie ko̱jo ndáfoa xi sꞌi̱o̱, kó ti̱ bo̱a̱ kixiáa̱n nga xota̱ tji̱e̱e̱ Esauu̱ ko̱jo xota̱ tji̱e̱e̱ Moaa̱b, ja̱bo̱a̱ je katsjáná ngi̱ndie nga ka̱ma ku̱i̱tjá na̱xi̱ńdá Aa̱r ko̱jo nangi Seii̱r.

^30-36 »Ta̱nga nda̱ re Sijoo̱n katsjandièjínná nga ki̱a̱ ku̱i̱tjá, ngatꞌa̱ Néná boá xi katsꞌén, nga jmí katsó. Kósꞌe̱ Néná bo̱a̱ katsóna nga kjiꞌá boá nga ñá boá xi ko̱ti̱xomáa̱ Sijoo̱n, kó nga ti̱ kjiꞌa ka̱ma ku̱i̱tjásꞌi̱e̱n nangii̱ ko̱jo nga si̱ꞌáa̱n nga ku̱i̱xkánjo̱. »Nda̱ re Sijoo̱n jatjojo̱ jájuún tsi̱ꞌe̱ nga nangi Jaa̱ skjánjo̱ná, ta̱nga Néná boá xi katsꞌén nga ñá kiniꞌán. Kó kiniꞌáa̱n ngayeje na̱xi̱ńdáꞌniuú, kó kiniꞌánkjatsón ngayejee̱, kiniꞌánkjié ngayeje xotaa̱, ta̱kuítsí cho̱ tji̱e̱é ko̱jo ni chjí xí kisꞌiee̱ xi kachjábé. Nde ngojín kui na̱xi̱ńdáꞌniuú xi kichikjoaá nga ikixkánjo̱, ngayejee̱ nga kiniꞌánkjié, kuí má tjón na̱xi̱ńdáꞌniú Aroee̱r, kui xi tikón nga jó ngoboaá ndejèꞌ Arnoo̱n, kósꞌe̱ na̱xi̱ńdáꞌniú Ngalaa̱nd jetꞌani. Ngaskande kui ni̱xtjii̱n to̱kó ñá boá xi botíxomá ki̱a̱a̱.

³⁷ Ta̱kuítsí nangii̱ xota̱ tji̱e̱e̱ Amoo̱n xi ikixkánjo̱jín ñá, kui xi tikón nangi nínga foaꞌa xo̱ngàndántꞌié Jaboo̱k, kui na̱xi̱ńdá xi tikón ki̱a̱ na̱xi̱i̱, ko̱jo ngayeje kui ngi̱ndie xi Néná katsjáná kjo̱a̱ nga ku̱i̱xkánjo̱jín ñá.