Ndeuteronomio̱ 19 - Xo̱jo̱n eén Néná

Na̱xi̱ńdá nínga ku̱i̱ndyionꞌmaá

¹ Moisee̱ bi̱ katsó ngasee̱ xota̱ na̱xi̱ńdaá: «Néná sa̱ꞌínkjié xota̱ xi síndo ngotꞌe̱, ki̱a̱ tꞌanangi xi tsja̱ajnú. Jún boá xi je tsa̱jún ka̱ma kui na̱xi̱ńdáꞌniuú ko̱jo ndiꞌaa̱ kui xotaa̱.

² Kjiꞌanga ka̱ma kui nii̱, chjiéngá ján kui na̱xi̱ńdáꞌniuú xi kꞌuijñátꞌaxínjnú,

^3-4 kó ti̱ꞌandayajnú ndi̱yà xí fóchóni kui ngi̱ndiee̱. »Sꞌe̱ jaskan ján tjín takjangàjnú kui na̱xi̱ńdaá, ngo xki̱ na̱xi̱ńdáꞌniú. Kó bo̱a̱ tsꞌén nga tsi ngo xota̱ xi jmí tsi xá katsꞌénni nga katsꞌénkꞌién kje̱ꞌe xota̱, ka̱ma ki̱a̱ ko̱e̱je̱kꞌíjñá ta̱jñàní nga ján kui na̱xi̱ńdaá. Ja̱koxi̱ra̱ nga xkjín kuí xi kiniꞌánkꞌieén ko̱ngase kui xi bo̱a̱ katsꞌeén tsi̱ꞌe̱ nga sa̱ꞌíngojo, ta̱nga kui xi bo̱a̱ katsꞌeén chjiéngá ko̱kó nga jmí tsi kondra̱ kamánii̱ kui xi katsꞌénkꞌieén, kó nga ta̱ xá kamájín kui nii̱.

^5-6 »Si̱ꞌankjíi̱n takón tsi jó já xí bokján chikín kijí ngi̱jin kꞌijñá jàn, kó tsi nga ndyi̱bokján chikiín ngo xi jatjotoko jachaa̱, kósꞌe̱ ki̱a̱ kastiee̱ kui nda̱ xi ingoo̱. Tsi ta̱ngatꞌanii̱ kui nii̱ nga kꞌien xi ingoo̱, kui nda̱ xi bo̱a̱ katsꞌeén ka̱má ki̱a̱ kꞌuijñáꞌmá ngo kui na̱xi̱ńdáꞌniuú. Tsi kjin síndo kui na̱xi̱ńdáꞌniuú, xota̱ xkjín kuí nda̱ xi kiniꞌánkꞌieén ka̱má kjo̱chótji̱ngii̱, kó sa̱ꞌínkꞌién kui nda̱a̱, kó nde sa̱ꞌínxki̱jín nga jmí tsi xá katsꞌénni.

⁷ Kuíni nga mejénna nga kꞌuijñátꞌaxínjnú nga ján kui na̱xi̱ńdáꞌniuú.

^8-10 »Tsi jún si̱ꞌansenjnúu̱ ni xi tꞌíxián an, kó tsi tjójnú ko̱jo tsi ko̱nda̱ꞌyáꞌénjnúu̱ Néná, kuí boá xi tsja̱ajnú kui tꞌanangi xi katsóyàtjoón xota̱ xi xchájnú nga tsja̱á. Ngije kachjábéjnú kó ngije ki̱a̱ tindyiónjnú, chjiéngá kꞌuijñátꞌaxínjnú ngi ján na̱xi̱ńdáꞌniú, tsi̱ꞌe̱ nga ki̱a̱ ka̱ma ku̱i̱ndyionꞌmá. Kó bo̱a̱ tsꞌén nga ngojín jún xi sꞌi̱nieé ngo jé kjo̱a̱a̱ ngo xota̱ xi jmí jéjiín.

¹¹ »Ta̱ kꞌuijñáñáa̱ tsi ngo xota̱ xi chꞌoo̱ kje̱ꞌe xota̱, kó tsi ngo ngi̱ndie nínga kjin tsꞌénkoyaa̱ tsi̱ꞌe̱ nga sa̱ꞌínkꞌién nga kjo̱a̱ꞌa ki̱a̱a̱. Tsi kui nda̱ xi katsꞌénkꞌieén ko̱nga kó ki̱a̱ ko̱e̱je̱kꞌíjñá ngo kui na̱xi̱ńdáꞌniuú,

¹² xota̱ ngito̱ko̱o̱ kui na̱xi̱ńdáꞌniuú sa̱ngíyákjaꞌá, tsi̱ꞌe̱ nga xkjín kuí nda̱ xi kiniꞌánkꞌieén si̱ꞌankꞌasꞌiee̱n, kósꞌe̱ ki̱a̱ ka̱majeé nga si̱ꞌankꞌien.

¹³ »Ngata̱ niꞌánjetakónjínjnúu̱ ngo xota̱ xi ini̱ma̱ sa̱ꞌínkꞌién. Ngata̱ boeꞌéndièjínjnú nga ta̱xkiya si̱ꞌankjiesón xota̱ xi jmí jéjiín ki̱a̱ na̱xi̱ńdá Israee̱l. Bo̱a̱ tsꞌén nga nda ko̱e̱je̱jnú ngayeje ni xi si̱ꞌánjnú.

¹⁴ »Ki̱a̱ na̱xi̱ńdáꞌniú xi tsja̱ajnú Néná, chjiéngá xcha̱ndikónjnú tsindioó kꞌijñaá nga ngo nga ngo xotaa̱. Kui tsindioó jè tsienii̱ nga ikꞌíndo.

Kjo̱a̱botíxomaa̱ chistikoo̱

¹⁵ »Tsi̱ꞌe̱ nga kjongítaꞌin ngo xota̱ xi ini̱ma̱ katsꞌénkꞌién, chjiéngá tsi jó ko̱jo tsi ján ka̱ma chistiko̱ xi ko̱óngítaꞌii̱n. Tsi ta̱ ngo tsí ka̱ma chistikoo̱, jmí chjí ka̱májiín kui nii̱.

¹⁶ »Tsi tjín xi akjangitaꞌin nga ngo ini̱ma̱ katsꞌénkꞌién, kó tsi ngo kui chistikoo̱ xi tsꞌénꞌbindísó,

¹⁷ ja̱ kui chistikoo̱ ko̱jo kui xi tjifongítaꞌii̱n chjiéngá ndiꞌandikoón ko̱e̱je̱, kó ki̱a̱ ngatjí ngindyi̱ko̱n já chináꞌmii̱ ko̱jo nendiꞌamasiee̱n.

¹⁸ Kui jaá ko̱ngase ndi̱yà cha̱n cha̱a̱n kui kjo̱a̱a̱, kó tsi sku̱i̱e̱ nga kui chistikoo̱ tsꞌénꞌbindísó,

^19-21 kjiꞌá boá nga tsja̱akjo̱a̱, kó nga bo̱a̱ tsꞌén ka̱majeé kui chistikoo̱ xikoó kui kjo̱a̱botíjé xi tsꞌénmíꞌá tsi̱ꞌe̱ kui nda̱ xi tsꞌénbongítaꞌii̱n. Bi̱ tsꞌén chje̱ꞌéchjíjnú: tsi ngo ndyi̱ko̱n tsꞌaxié, ti̱ chjiéngá ngo ko̱ꞌna̱xié tsi̱ꞌe̱ nga, tsi ngo ṉꞌni̱u̱ iskjítꞌó, ti̱ chjiéngá ngo chjátꞌó tsi̱ꞌe̱ nga, tsi ngo tsja iskjítꞌó, ti̱ ngo chjátꞌó tsi̱ꞌe̱ nga, tsi ngo se iskjítꞌó, ti̱ ngo chjátꞌó tsi̱ꞌe̱ nga, tsi ngo ini̱ma̱ katsꞌénkꞌién, ja̱ ti̱ si̱ꞌankꞌién xi bo̱a̱ katsꞌeén nga. Ngata̱ niꞌánjetakónjínjnúu̱ ngo xota̱ xi ngo ni xi ndajín sa̱ꞌín. Tsi si̱ꞌankjatjosónjnú kui kjo̱a̱botíxomaa̱, ngojín xota̱ xi ni xi ndajín sa̱ꞌín, ngatꞌa̱ ngayeje xotaa̱ stsa̱kjonní nga ta̱xkiya ku̱i̱ꞌíndiso nga ko̱óngítaꞌin ngo xota̱».