Ndeuteronomio̱ 18 - Xo̱jo̱n eén Néná

Kjo̱a̱nda xi tjiín chináꞌmii̱

^1-2 Moisee̱ bi̱ katsó ngasee̱ xota̱ na̱xi̱ńdaá: «Ngayeje xota̱ Israee̱l kꞌuieé tꞌanangi xi kui tsi̱ꞌe̱ soboá ka̱ma, ta̱nga bo̱a̱jín ka̱ma kjo̱a̱a̱ chináꞌmii̱, kui xi chji̱a̱ni xota̱ tji̱e̱e̱ Lebii̱. Néná boá xi je bo̱a̱ katsó nga kui xi skoón kui xotaa̱, ko̱jo nga kuí boá xi tsja̱á ngayeje ni xi chjieén. Ngayeje kjo̱a̱tjó xi xota̱ Israee̱l kjo̱chójoo̱ Néná, ki̱a̱ skjíbéní ni xi skji̱ni̱e̱ xota̱ tji̱e̱e̱ Lebii̱.

³ »Chináꞌmii̱ ka̱ma skji̱ni̱e̱ yojoo̱ cho̱yojo toro̱, ko̱jo cho̱tsa̱nga̱ xi si̱ꞌankꞌasꞌiee̱n Néná, ta̱nga ta̱kuítsí yojoyìtsꞌe̱n, ko̱jo yojo tꞌanijon, ko̱jo ngo ndiè nga̱tsꞌo̱a̱ xi ka̱ma skji̱ni̱e̱.

⁴ Kó ti̱ ka̱ma skjíbé to ndso̱ko̱a̱n ṉño̱pan xi tjón kamáxchaá, ko̱jo binoo̱, ko̱jo istii̱, kó ka̱ma sa̱ꞌínkjién tsa̱nga̱a̱ cho̱tsa̱nga̱ xi tjón ikichaá nga.

⁵ Néná boá xi jaꞌájin xota̱ tji̱e̱e̱ Lebii̱, ko̱jo ngayeje xota̱ tji̱e̱e̱, tsi̱ꞌe̱ nga kui xi sa̱ꞌín ngayeje ni xi niꞌán nganiꞌántsjaá Néná.

⁶ »Tsi ngo chináꞌmii̱ xi ka̱mamejeén ko̱e̱je̱ ndiꞌandikoón Néná, kó tsi ku̱i̱ꞌíjñámasien na̱xi̱ńdáꞌniuú, ngata̱ ꞌbíchjájínjnúu̱.

⁷ Ta̱sá tasíko̱jojnú tsi̱ꞌe̱ nga kjo̱chó ko̱jo nga sa̱ꞌínkjatjosón xaá, xikoó já xkjín xí ngasee̱ xi je ki̱a̱ ndyi̱tsꞌènxá ki̱a̱ ndiꞌandikoón.

⁸ Kui nda̱ chináꞌmii̱ jè tjiín kjo̱a̱nda nga ti̱ bo̱a̱ ti̱ kjiꞌi nichinie sa̱ko̱ó xikoó chináꞌmi xi ngasee̱, kó ti̱ ka̱ma ko̱tíñá ni xi tjiín, kó ka̱ma nda tsꞌén sa̱ꞌínkjién to̱o̱n ni xi atíñá».

Ni xi ka̱májín si̱ꞌan kjo̱a̱a̱ kjo̱a̱xcha̱á

^9-14 Moisee̱ bi̱ katsó ngasee̱ xota̱ na̱xi̱ńdaá: «Kjiꞌanga ku̱i̱tjásꞌi̱e̱njnú kui tꞌanangi xi Néná tsja̱ajnú, ki̱a̱ sa̱kójnú kje̱ꞌe xota̱ xi síndo ki̱a̱a̱, xi achichí nga chꞌokon kjo̱a̱xchá xí tjiín, kó kui nii̱ tsjajín maá Néná. Kui nii̱ xi tsꞌén kuí xotaa̱: tsꞌenkꞌásꞌién ndií tsi̱ꞌe̱ nga kꞌuití ngandaa̱ ne xi tsꞌéndíkón, tsꞌén kjo̱a̱tjiꞌe, tsꞌén kjo̱a̱ton, kó tsꞌénkjó nga be ni xi ka̱ma. Kó kotꞌasón nga tsꞌénkjién a̱si̱énni̱xtjii̱n xota̱ xi je jesón nga míꞌaá ngo kjo̱a̱botíxoma. Ta̱nga jún chjiéngá ko̱nda̱ꞌyáꞌénjnúu̱ ngayeje ni xi ka̱tso̱jnú Néná, kó chjiéngá xchónjnúu̱ yojojnú nga ki̱a̱jín kongintjingíjnú kui ni xi ndajín xi ndyi̱tsꞌèn kuí xotaa̱, ngatꞌa̱ Néná chꞌórií kui xotaa̱, kuíni nga mejeén kꞌo̱xiéni kui tꞌanangii̱.

Ingo xota̱ chji̱ni̱e̱ꞌe̱én

^15-17 »Kjo̱chó ni̱xtjin nga Néná kjo̱a̱ꞌájin ngo nda̱ ngi̱jii̱n jún xi ka̱ma chji̱ni̱e̱ꞌe̱én xikoó an. Kjiꞌanga kixindyión ki̱a̱ na̱xi̱ Oree̱b, jún bo̱a̱ kiꞌmíjnúꞌun nga kamámejénjínjnú ko̱nda̱ꞌyájnúu̱ nda̱a̱ Néná, ti̱nde kamámejénjínjnú nga xcha̱jnú kui ndiꞌí nínga tsíchji̱a̱ Néná, ngatꞌa̱ kamámejénjínjnú akayajnú. Ja̱ ndakjiꞌi, ja̱ Néná tsja̱ajnú ngo nda̱ chji̱ni̱e̱ꞌén xi je kichjiáꞌájnúu̱, kó ngayeje ni xi ka̱tso̱jnú chjiéngá ko̱nda̱ꞌyáꞌénjnúu̱.

¹⁸ »Néná boá xi kjo̱a̱ꞌájin kui nda̱ chji̱ni̱e̱ꞌe̱én ngi̱jii̱n xota̱ na̱xi̱ńdaá. Kó ngo xota̱ xi tsa̱ñá ka̱ma, kó ti̱ bo̱a̱ ti̱ sa̱ꞌín xikótsꞌen an ngotꞌe̱, ka̱tso̱yàjnú ngayeje én xí Néná mejeén ka̱tso̱jnú.

¹⁹ Néná ko̱tíjeé kui xota̱ xi ku̱i̱ntꞌiéꞌénjiín kui kjo̱a̱botíxoma xi tsja̱á kui nda̱ chji̱ni̱e̱ꞌe̱én.

²⁰ »Tsi ngo xota̱ kjo̱tjokjá xi bo̱a̱ ka̱tso̱ nga ngo eén Néná tsꞌényaꞌa, kó tsi nga ja̱koxi̱ Nénájín xi katsangiya, chjiéngá si̱ꞌankꞌiénjnú. Ti̱ bo̱a̱ ti̱ ti̱ꞌanjo̱jnú ta̱ꞌya xota̱ chji̱ni̱e̱ꞌénní xi kji̱ndi̱bá nga eén kje̱ꞌe ne ndyi̱yaꞌa nga.

²¹ »Kó ngotꞌe̱ ꞌne̱, tsi jún bosíyájnú kótsꞌèn xcha̱ tsi ngo xota̱ yaꞌa ko̱jo tsi yaꞌajín ngo én xí Néná katsjaá. Kui kjo̱a̱botíxomaa̱ tangíntji̱ngíjnú:

²² Tsi kui nda̱ chji̱ni̱e̱ꞌe̱én ngo ni ka̱tso̱yà, kó tsi kjo̱tjosónjín ni xi katsó, kuí boá kui nii̱ xi ngo chi̱bo̱a̱ ka̱ma nga Nénájín xi katsangiya. Kui nda̱ chji̱ni̱e̱ꞌe̱én ta̱ nda̱ nkꞌakon boá, kó ni tsi̱ꞌe̱ boá xi chji̱a̱, kó jún ngata̱ ndakonjínmájnú».