Ndeuteronomio̱ 17 - Xo̱jo̱n eén Néná

¹ »Tsi ngo cho̱yojo toro̱ ko̱jo tsi ngo cho̱tsa̱nga̱ si̱ꞌankꞌasꞌienjnúu̱ Néná, nda má tsitsíjenjnúu̱ nga nda kón kui cho̱o̱, ngatꞌa̱ tsjajín maá cho̱ xi ndajín kón.

^2-3 »Néná tsja̱ajnú na̱xi̱ńdáꞌniú nínga ka̱ma ki̱a̱ ku̱i̱ndyionjnú. Kó kꞌuiérá xota̱ xi ku̱i̱ꞌítsꞌi̱yanii̱ nga sa̱ꞌíndikón kje̱ꞌe ne. Tsi sa̱ꞌíndikón tsꞌueé, ko̱jo tsi saá, ko̱jo tsi ńñoo, kui xi bo̱a̱ ndyi̱tsꞌe̱én ndyi̱ntꞌièꞌénjiín Néná, kó ndyi̱tsꞌènkjié kui kjo̱a̱ꞌbínda xi katsꞌénjo̱jnú Néná.

⁴ Kjiꞌanga xcha̱jnú nga tjín xota̱ xi ndyi̱tsꞌèn kuí nii̱, tjón mára nda ti̱ndyi̱séndi̱yàjnú tsi ja̱koxi̱ kui nii̱. Kó tsi ja̱koxi̱ nga kui jé xí ta̱nisién chꞌokjiꞌii̱ tjítsꞌén,

⁵ tangínjo̱jnú kui xotaa̱ ngindyi̱ko̱n xota̱xá xí tikón ngi̱ndie nínga botíjeé ki̱a̱ na̱xi̱ńdáꞌniuú, kó kuí boá kui jáxaá, xi bo̱a̱ ka̱tso̱ nga ndi̱jo̱ si̱ꞌankꞌienni.

⁶ »Ta̱nga jmí tsi ta̱ ngo tsí chistiko̱ xi ka̱mani tsi̱ꞌe̱ nga kꞌuiyá tsi ngo xota̱ si̱ꞌankꞌien. Ta̱ kjiꞌá tsí nga ka̱ma si̱ꞌankꞌien ngo xota̱ tsi jó, ko̱jo tsi ján má chistiko̱ xi kamábe kui ni xi kamaá.

⁷ Tsi tjiín jé kui xotaa̱, kui xi tjón kꞌo̱ya ndi̱jo̱o̱ kuí boá xi chistikoo̱, sꞌe̱ jaskan xota̱ na̱xi̱ńdá xí ngasee̱. Kó bo̱a̱ tsꞌén nga kꞌuiéjín ni xi ndajín ngi̱jinjnú.

⁸ »Tsi ni xi niꞌin ngase, xikoó kjiꞌanga ngo xota̱ sa̱ꞌínkꞌién kje̱ꞌe xota̱, ko̱jo tsi kjiꞌanga ngo nínga ikixkán kisꞌie xota̱ xi kamáꞌoón, chjiéngá ndiꞌandikoón ko̱e̱je̱.

⁹ Ki̱a̱ ku̱i̱chji̱a̱jo chináꞌmii̱ ko̱jo tsi kui xi tikón ne ndiꞌa masien nga kamá kui nii̱, kó ka̱tso̱yaa̱ ngayeje ni xi kamaá. Kó kuí jaá xi ka̱tso̱yà mí ni xi si̱ꞌanjo̱ kui xi tjiín jeé.

^10-11 Kó jún, chjiéngá bo̱a̱ má tsꞌén kongintjingíjnú kjo̱a̱botíxoma xi tsja̱ajnú kui jaá, tsi̱ꞌe̱ nga ka̱majeé kui xi bo̱a̱ katsꞌeén.

¹² »Chjiéngá si̱ꞌankꞌien tsi tjín jún xi ta̱ngatꞌanii̱ kjo̱a̱nkꞌatakoón nga sa̱ꞌínjo̱ꞌojín ni xi ka̱tso̱ nendiꞌamasiee̱n, ko̱jo tsi chináꞌmi xi mosoo̱ Néná. »Tsi si̱ꞌankjatjosónjnú kui kjo̱a̱botíxomaa̱, jmí ni xi ndajín kꞌuiéjín ki̱a̱ na̱xi̱ńdá Israee̱l,

¹³ ngatꞌa̱ xota̱ na̱xi̱ńdaá stsa̱kjonní, kó ka̱makjiín nga ka̱májín nga nkꞌakon ka̱ma».

Kjo̱a̱botíxoma xi chji̱a̱ kjo̱a̱a̱ já ree̱

¹⁴ Moisee̱ bi̱ katsó ngasee̱ xota̱ na̱xi̱ńdaá: «Kjiꞌanga je kiniꞌánjnú nga ikixkántjéjnú kui na̱xi̱ńdá xí Néná tsja̱ajnú, kó nga je ki̱a̱ tindyiónjnú kui nangii̱, ka̱mara̱ ka̱mamejénjnú nga kꞌuiéjnú ngo nda̱ re xi ko̱tíxomájnú, xikoó xi tjiín kje̱ꞌe nangi.

¹⁵ Tsi bo̱a̱ ka̱ma, ka̱má kꞌuiéjnú ngo re, ta̱nga chjiéngá ngo nda̱ xi chji̱a̱ni Israee̱l xi ka̱ma, kui xi kjo̱a̱ꞌájin Néná. Ka̱májín ngo xota̱ xi xín nangi chji̱a̱ni xi ka̱ma ree̱ na̱xi̱ńdá Israee̱l.

¹⁶ »Kui nda̱ re xi je kachjaꞌájii̱n, ka̱májín kjín ndi̱je̱ kꞌo̱tsie, ti̱nde ka̱májín ki̱a̱ ko̱e̱je̱kjaꞌá nangi Ejipto̱, ngatꞌa̱ Néná jè íchjáná nga ki̱a̱ kongín ngíñá kui na̱xi̱ńdaá.

¹⁷ Ti̱nde ka̱májín kjín chjo̱on kꞌuieé, ngatꞌa̱ kui ínchjiín ka̱márií sa̱ꞌín nga ngiti̱ ku̱i̱ntꞌiéꞌénjiín Néná. Nga fetꞌani, kui nda̱ ree̱ ka̱májín tsie ni to̱nsinié ko̱jo ni to̱ntiboa kꞌuieé.

^18-20 »Kjiꞌanga kui nda̱ re xi je kachjeꞌéjinjnú je ko̱tíxoma, chjiéngá bo̱a̱ ka̱tso̱ nga chja̱ꞌátꞌaa̱ ngo kui xo̱jo̱n nínga kjitꞌa ngayeje kjo̱a̱botíxomaa̱ Néná. Kó kui xo̱jo̱o̱n ree̱ boá xi skoón, kó chjiéngá ndyiojón ndyiojón sa̱ꞌínyà. Kó bo̱a̱ tsꞌén nga kui nda̱ ree̱ jmíni̱xtjin nga nkꞌa ngase ka̱maa̱ yojoo̱ xikoó xota̱ Israee̱l xi ngasee̱, ta̱sá ka̱maa̱ nga ku̱i̱ntꞌiéꞌeén Néná, ko̱jo nga sku̱i̱e̱ndikón ngayeje kjo̱a̱botíxomaa̱. Tsi kui nda̱ ree̱ xi ko̱e̱je̱tji̱ngi kui kjo̱a̱botíxomaa̱, kui ko̱jo xota̱ tji̱e̱e̱, ngatsjéni̱xtjin nga kui ko̱tíxoma na̱xi̱ńdá Israee̱l. Kui xo̱jo̱n xi kuí má bo̱a̱, nínga kjitꞌa kjo̱a̱kitii̱ já chináꞌmii̱ boá xi skoón».