Ndeuteronomio̱ 16 - Xo̱jo̱n eén Néná

Sꞌué paskuaa̱

¹ Moisee̱ bi̱ katsó ngasee̱ xota̱ na̱xi̱ńdaá: «Sá Abii̱b boá nga si̱ꞌánjnú sꞌué paskuaa̱ nganda tsi̱ꞌe̱ Néná. Ngatjaꞌátsjienjnú nga ngo má ni̱xtji̱e̱e̱n sá Abii̱b nga Néná katsꞌéndéjnú ki̱a̱ nangi Ejipto̱.

^2-7 »Ni̱xtjin tjoón sꞌué paskuaa̱, nga jñoó, chjiéngá kongínjnú ki̱a̱ ndiꞌandikoón, kó ngo cho̱yojo, ko̱jo ngo cho̱tsa̱nga̱ ti̱ꞌankꞌasꞌiénjnúu̱ Néná. Ngata̱ ki̱a̱jín na̱xi̱ńdáꞌniú xi tsja̱ajnú Néná niꞌánkꞌasꞌiénjnú kui cho̱o̱, chjiéngá ta̱ ki̱a̱ tsí ndiꞌandikoón ti̱ꞌankꞌasꞌiénjnú, kó nga kjimajñoó boá nga ti̱ꞌánjnú kui nii̱, ngatꞌa̱ bo̱a̱ chon nga jatjojnú nangi Ejipto̱. Ka̱má xi̱ni̱e̱jnú yojoo̱ kui cho̱o̱, ta̱nga ta̱ pan xi jmí nisanjiín tsí xi ka̱ma xi̱ni̱e̱tꞌajo̱jnú, kó ka̱májín chií si̱ꞌankꞌangíjnú tsi̱ꞌe̱ kamángindyiojón. Chjiéngá xi̱ni̱e̱ yejejnú. »Ngo xomana̱ ndo̱jò ndójo̱ nga ka̱ma kui sꞌueé. Ngayeje kui ni̱xtjii̱n ta̱ pan xi jmí nisanjiín tsí xi ka̱ma xi̱ni̱e̱jnú, xikoó xi kichiniejnú kui ni̱xtji̱e̱e̱n, kjiꞌanga xi tsá xi boaꞌa jatjojnú ki̱a̱ nangi Ejipto̱. Kui paa̱n, kuí boá xi “paa̱n kjo̱a̱ni̱ma̱” kꞌuin. Ngatsjéni̱xtjin nga xi̱ni̱e̱jnú, chjiéngá kjo̱a̱ꞌátsjienjnú kui kjo̱a̱ni̱ma̱ xi ikitjajinjnú ki̱a̱ nangi Ejipto̱, ko̱jo kótsꞌèn jatjojnú kui ngi̱ndiee̱. Ngayeje kui xomana̱ nga ka̱ma kui sꞌueé, nde ka̱májín chií nisan chjiéngá kꞌuié ngayeje kui na̱xi̱ńdaá. »Nga kamángindyiojón, ngije kiniꞌánchjánjnú ko̱jo ngije kichiniejnú kui cho̱ xi kiniꞌánkꞌasꞌienjnúu̱ Néná, ka̱ma kongín nginíjnú ndiꞌajnú.

⁸ Kó xi ngi jun ni̱xtjin xi ꞌbongii̱ kui xomanaa̱ pan xi jmí nisanjiín xí ka̱ma xi̱ni̱e̱jnú. Ni̱xtjin xi ma yitoo̱ ngojín xi sa̱ꞌínxá, chjiéngá si̱ꞌantsjajnúu̱ Néná nga si̱ꞌánjnú ngo ni xi ndikón nganda tsi̱ꞌe̱ Néná.

Sꞌueé cha̱a̱n

^9-11 »Yito xomana̱ jaskan ngije ítsꞌi̱yanii̱ nga kamá cha̱a̱n ni xi kamáxchaá, chjiéngá si̱ꞌánjnú sꞌueé ni xi kamáxchaá nganda tsi̱ꞌe̱ Néná. Kui sꞌueé ki̱a̱ ti̱ꞌánjnú ki̱a̱ ndiꞌandikoón. »Nga kjima kui sꞌueé ti̱ꞌankꞌasꞌiénjnúu̱ Néná ngo kjo̱a̱tjó xi ngayeje ini̱ma̱jnú kji̱ndi̱bánii̱, ta̱ xikó kjíꞌí ni xi je katsjájnú Néná: Tsi Néná katsjájnú tsie ni xi kamáxchá, ja̱ ti̱ bo̱a̱ ti̱ tsꞌén tsie ni ko̱e̱ꞌéjnúu̱ jún nga. Nga kongínjnú kui sꞌueé tangínjo̱ yejejnú xota̱ ndiꞌajnú ko̱jo ngayeje moso̱jnú. Ti̱ tꞌíyájnúu̱ xota̱ xi xꞌi̱a̱n, ko̱jo ínchjín kꞌán xi je kꞌien xi̱ꞌii̱n, ko̱jo xota̱ tji̱e̱e̱ Lebii̱, ko̱jo xota̱ xi ta̱ jachókꞌíndo tsá kui na̱xi̱ńdáꞌniuú nga.

¹² »Ti̱ꞌankjatjosónjnú kui kjo̱a̱kitii̱, kó nga jmíni̱xtjin niꞌánchíyájnú nga moso̱ kamájnú ki̱a̱ nangi Ejipto̱.

Sꞌueé ndiꞌa nkꞌieén

^13-15 »Ngije kamájnú nga kachjaꞌáꞌyájnú ngayeje ni xi kamáxchájnú ko̱jo nga je kiniꞌántsꞌingíjnú ndaá tostsi̱je̱è, chjiéngá si̱ꞌánjnú sꞌueé ndiꞌa nkꞌieén nganda tsi̱ꞌe̱ Néná. Kui sꞌueé chjiéngá yito ni̱xtjin kꞌo̱ndíyaá, kó chjiéngá ta̱soboá kjo̱a̱tsja xí kꞌuiéjnú. Chjiéngá ki̱a̱ ndiꞌandikoón si̱ꞌánjnú kui sꞌueé, kó ki̱a̱ kꞌuíndo xota̱ ndiꞌajnú, ko̱jo moso̱jnú, ko̱jo xota̱ xi xꞌi̱a̱n, ko̱jo ínchjín kꞌán xi je kꞌien xi̱ꞌii̱n. Tꞌíyájnúu̱ xota̱ tji̱e̱e̱ Lebii̱, ko̱jo xota̱ xi ta̱ jachókꞌíndo tsá kuí na̱xi̱ńdáꞌniuú nga. Kó bo̱a̱ tsꞌén nga Néná sa̱ꞌínchikonñéjnú nga tsja̱ajnú tsie ni xi maxchá, kó ngayeje xá xí si̱ꞌánjnú nda ka̱ma.

Nga ján sꞌueé

^16-17 »Ján má sꞌué xí má xki̱ nó, xi chjiéngá nde ngojín xota̱ xi je tsꞌatio tiejó noó xi xcha̱ja, kuí bí kui sꞌueé xi xian an: Sꞌué paskuaa̱, sꞌueé cha̱a̱n ni xi kamáxchaá, ko̱jo sꞌueé ndiꞌa nkꞌieén. Nga ján kui sꞌueé, chjiéngá ki̱a̱ ka̱ma ki̱a̱ ndiꞌandikoón, kó chjiéngá ngayeje xotaa̱ nga ko̱a̱ꞌa ngo kjo̱a̱tjó tsi̱ꞌe̱ Néná. Ta̱ xikótsꞌèn tjítsꞌénchíkonñé Néná, bo̱a̱ kjiꞌi kjo̱a̱tjó xi sa̱ꞌínkꞌasꞌiee̱n.

Xota̱ xi nendiꞌamasiee̱n

^18-19 »Néná tsja̱á na̱xi̱ńdáꞌniú nga ngo nga ngo tji̱e̱e̱ xotaa̱, kó nga ngo nga ngo kui na̱xi̱ńdáꞌniuú ko̱e̱ꞌéxaá ne ndiꞌa masien ko̱jo xota̱xá, kui xi chjiéngá ndse̱je̱n sa̱ꞌínseén ngayeje xotaa̱. Kuí boá xi ko̱tíxoma, kó kuí boá xi skotsíjee̱n tsi nda ko̱jo tsi ndajín ndyi̱tsꞌèn xota̱ na̱xi̱ńdaá nga kixi̱ sa̱ꞌín xaá, ka̱májín skjíbéngí to̱n tsi̱ꞌe̱ nga ngo ni sa̱ꞌín ngandaa̱ ngo xota̱. Kjiꞌanga tjín xí skjíbéngí ngo to̱n, kuí nii̱ xi tsꞌén nga kui xota̱ xi kjínkón ko̱jo xi kixi̱i̱, xota̱ xi kixi̱jín má ngijee̱.

²⁰ »Ngatsjéni̱xtjin nga kixi̱ ti̱ꞌanjo̱jnú ngayeje xotaa̱, kó bo̱a̱ tsꞌén nga tsjatsꞌèn ku̱i̱ndyionjnú, kó chjábéjnú na̱xi̱ńdá xí Néná tsja̱ajnú».

Kjo̱a̱kitii̱ xikótsꞌèn si̱ꞌantsjaa̱ Néná

^21-22 Moisee̱ bi̱ katsó ngasee̱ xota̱ na̱xi̱ńdaá: «Kjiꞌanga si̱ꞌandajnú ngo ṉchan nínga si̱ꞌantsjajnúu̱ Néná, ngata̱ ki̱a̱jín nijan ꞌbíndojnú a̱sie̱én na̱ ne Astarteé, ko̱jo tsi kje̱ꞌe ngase ne xi kuijín. ¡Kuí nii̱ xi achichí chꞌoo̱ Néná!