Ndeuteronomio̱ 15 - Xo̱jo̱n eén Néná

Nó ndeé

^1-5 Moisee̱ bi̱ katsó ngasee̱ xota̱ na̱xi̱ńdaá: «Xki̱ yito nó, chjiéngá si̱ꞌanjetakónjnúu̱ xota̱ xi tjitjieén tsa̱jún. Tsi ngo ni kiniꞌánkíyájnúu̱ ngo xota̱ Israee̱l, ka̱májín chje̱ꞌéchjíjnúu̱ nga ku̱i̱ꞌíchjíjnú kui ni xi tjitjieén. Néná boá xi je atíxoma nga kui noó, chjiéngá si̱ꞌanjetakoón ngayeje xi tjitjieén tsa̱ñá. Tsi si̱ꞌankjatjosónjnú kui kjo̱a̱botíxomaa̱ Néná, sa̱ꞌínchikonñé tꞌanangi xi je katsjájnú, kó jmíni̱xtjin kꞌuié xota̱ ni̱ma̱ ki̱a̱ Israee̱l. Ka̱má chje̱ꞌéchjíjnúu̱ xota̱ xi xín nangi xi síndo ki̱a̱ na̱xi̱ńdáꞌniuú, ta̱nga ka̱májín chje̱ꞌéchjíjnúu̱ xota̱ Israee̱l xi ntsꞌiejnú. »Kjiꞌa ngije ki̱a̱ tindyiónjnú na̱xi̱ńdá xi Néná tsja̱ajnú,

⁶ achichí tsie ni xi tsja̱ajnú Néná, nga ngaskande kꞌo̱ngijnú ni, tsi̱ꞌe̱ nga ka̱ma si̱ꞌankíyájnúu̱ kje̱ꞌe na̱xi̱ńdá. Jún jmíni̱xtjin nga ni chji̱yajnú, ta̱sá, jún boá xi ko̱ti̱xomájnúu̱ na̱xi̱ńdá xí ngasee̱. ¡Néná boá xi je katsóyàtjón kui nii̱!

^7-9 »Tsi tjín xota̱ Israee̱l xi ni̱ma̱ nga jmí to̱njiín ki̱a̱ na̱xi̱ńdá nínga tindyiónjnú, nda ti̱ꞌanjo̱jnú, ngata̱ ꞌbejínjnú kjo̱a̱ꞌontakón, ta̱sá, jún te̱ꞌéjnúu̱ ko̱jo ti̱ꞌankíyájnúu̱ ngayeje ni xi ka̱machjieén. Ngata̱ ꞌbíxi̱a̱njínjnúu̱ ngo ni. Ngata̱ niꞌánkjójínjnú nga je tsá kjo̱chó nó ndeé, sꞌe̱ bo̱a̱ kꞌuínjnú nga ka̱májín si̱ꞌankíyájínjúu̱ to̱n. Ngatꞌa̱ tsi kui xotaa̱ ko̱óngítaꞌínjnú ngindyi̱ko̱n Néná, jún xí chjiéngá si̱ꞌanjéjnú kjo̱a̱a̱ kui jeé.

¹⁰ Ta̱sá ngatsjéni̱xtjin tasíko̱jojnú xota̱ xi ni̱ma̱ xi jmíjiín to̱n, kó tsja ngatamajnú nga si̱ꞌánjnú kui nii̱. Tsi bo̱a̱ si̱ꞌánjnú, nda ku̱i̱ndyionjnú, kó Néná sa̱ꞌínchikonñéjnú kjo̱a̱a̱ ngayeje ni xi si̱ꞌánjnú.

¹¹ Kui nga̱sondiee̱ ngatsjéni̱xtjin kꞌuié xota̱ ni̱ma̱ xi jmí to̱njiín. Kuíni nga tsꞌénbotixomájnúꞌun nga ko̱e̱ꞌéjnúu̱ ni xi chjieén xota̱ xi ni̱ma̱, ko̱jo xota̱ xi ngo ni chjieén xi chji̱a̱ni kui na̱xi̱ńdaá.

Kjo̱a̱kiti kjo̱a̱a̱ xota̱ xi mosoo̱

^12-14 »Tsi ngo xota̱ Israee̱l, tsi chjo̱on tsí xi̱ꞌin, xi ti̱ kuii̱ ko̱tíñá yojoo̱ xikoó ngo moso̱, ka̱májín si̱ꞌaa̱n kjo̱a̱ꞌniú tsi̱ꞌe̱ nga tsꞌatio jun nó sa̱ꞌínxá. Nga kjo̱chó xi ma yito noó, chjiéngá kꞌuijñándé. Kó tsi tjín xota̱ xi tsꞌatsie ngo moso̱, chjiéngá tsja̱á chiboaá kjo̱a̱niꞌánchikonñé xi Néná katsjaá. Tsi̱ꞌe̱ nga jmí tsi sa̱ꞌínkjítiya nga ko̱e̱je̱, chjiéngá tsja̱á chiboa cho̱yojo, ko̱jo to ndso̱ko̱a̱n ṉño̱pan, ko̱jo bino̱ xi tjiín.

¹⁵ Ngata̱chiíjín niꞌánchíyájnú nga xota̱ moso̱ kamájnú ki̱a̱ nangi Ejipto̱, kó nga Néná boá xi katsꞌéndéjnú. Kuíni nga kui kjo̱a̱botíxomaa̱ tsꞌéntsjájnúꞌun.

^16-17 »Tsi kui moso̱ xi chjo̱on ko̱jo tsi xi̱ꞌii̱n xi nda ka̱mataꞌin, kó tsi ta̱ngatꞌanii̱ nga tjoó ndi̱a̱a̱ ko̱jo xota̱ ndiꞌaa̱, ka̱mamejénjiín kꞌuijñá ndé, ndi̱a̱a̱ kui mosoo̱ ngo ti̱xa̱ ku̱i̱ꞌíjñaá tji̱bo̱a̱nijon, kó kui nii̱ xi ko̱kó nga kui mosoo̱ tsi chjo̱on ko̱jo tsi xi̱ꞌin jè kui ndi̱a̱a̱ chji̱a̱ni ngatsjéni̱xtjin.

¹⁸ »Ngata̱ niꞌánxchánjínjnú kjiꞌanga je kꞌuijñándéjnú moso̱jnú. Jé jun nó katsꞌénxájo̱jnú, kó jún ngayeje kui ni̱xtjii̱n, ta̱ masien tsí to̱n xi tsꞌén ngo moso̱ xi nda xi ikꞌíchjíjnúu̱, Ti̱ꞌankjatjosónjnú kui nii̱, kó Néná sa̱ꞌínchikonñé ngayeje ni xi si̱ꞌánjnú.

Bi̱ tsꞌén si̱ꞌankꞌasꞌien cho̱ xi tjón stse̱én

¹⁹ »Kjiꞌanga kꞌuieé ndí cho̱yojojnú ko̱jo tsi cho̱tsa̱nga̱jnú, chjiéngá Néná kꞌuijñátꞌaxínjnúu̱ ngayeje cho̱ xi xi̱ꞌin xi tjón stse̱én. Ka̱májín si̱ꞌanxájo̱jnú ndí tjoón cho̱yojojnú, ti̱nde ka̱májín chja̱ꞌáxiín tsa̱nga̱a̱ ndí tjoón cho̱tsa̱nga̱jnú, ngatꞌa̱ kui cho̱o̱ tsi̱ꞌe̱ Néná boá.

²⁰ »Xki̱ nó chjiéngá chjábéjnú kui cho̱o̱, kó ki̱a̱ xi̱ni̱e̱jnú nga ka̱ma ngo ni xi ndikón, nínga tikón ndiꞌandikoón, jún ko̱jo xota̱ ndiꞌajnú.

²¹ Ngata̱ niꞌánkꞌasꞌiénjínjnúu̱ Néná ngo cho̱ xi ndajínkjiꞌi, tsi xi fí katsꞌo, ko̱jo tsi xi ti̱ka̱.

²² Cho̱ xi bo̱a̱ koo̱n, ka̱májín kongínjo̱jnú ndiꞌandikoón, chjiéngá ki̱a̱ xi̱ni̱e̱jnú na̱xi̱ńdáꞌniújnú. Kó ndatsi jmí tsi je tindyiondajnú nga tsjiejnú, ngayejejnú nga ka̱ma xi̱ni̱e̱jnú kui cho̱o̱. Chjiéngá bo̱a̱ si̱ꞌánjnúu̱ xikó niꞌánjnúu̱ nga chiniejnú ngo ndi̱kꞌijñá chjo̱on ko̱jo tsi ngo ndi̱kꞌijñá xíꞌín.

²³ Ta̱kuítsí jiín kui cho̱o̱ xi ka̱májín xi̱ni̱e̱jnú, chjiéngá ko̱e̱ꞌéndièjnúu̱ nga xtjón mára ki̱a̱ nga̱són tꞌanangii̱.»