Ndeuteronomio̱ 14 - Xo̱jo̱n eén Néná

¹ »Kjiꞌanga ku̱i̱ndyion xa̱ꞌya̱jnú kjo̱a̱a̱ nga ngo xota̱ kꞌien, ngata̱ niꞌánꞌónjínjnúu̱ yojojnú, ti̱nde ngata̱ ꞌbíjón taka takajínjnúu̱ tokojnú. Ndií Néná boá jún,

² jún boá kui xota̱ na̱xi̱ńdá xi Néná jè jaꞌájin, ngi̱jii̱n ngayeje xota̱ na̱xi̱ńdá xí tjín tꞌanangii̱, kó kuí boá xi ndokjo̱a̱nijnú».

Cho̱ xi ma chiniee̱

^3-4 Moisee̱ bi̱ katsó ngasee̱ xota̱ na̱xi̱ńdaá: «Ka̱májín xi̱ni̱e̱jnú cho̱ xi Néná je íchjaá nga ka̱májín xi̱ni̱e̱. Kuí cho̱o̱ xi ka̱ma xi̱ni̱e̱jnú: cho̱yojo toro̱, ndií cho̱tsa̱nga̱, ndií tindso̱,

⁵ ndi̱kꞌijñá xíꞌín, ndi̱kꞌijñá chjo̱on, tindso̱ kꞌijñá, ko̱jo cho̱ antilope̱.

⁶ »Ka̱ma xi̱ni̱e̱jnú ngayeje cho̱ xi kjinieya kixꞌi kixꞌi ni xi kjinie, ko̱jo xi tji̱ ningoo̱.

⁷ Ta̱nga ka̱májín xi̱ni̱e̱jnú yojoo̱ cho̱toꞌoyitsꞌe̱n, ko̱jo chińtsi̱é, ko̱jo chińtsi̱é tie nijon, ngatꞌa̱ kui cho̱o̱ tji̱jín ningoo̱, kó Néná xi je bo̱a̱ tsꞌén íjñá nga tsjiejín ka̱ma kui cho̱o̱ ngindyi̱ko̱n kui.

⁸ Ti̱nde ka̱májín xi̱ni̱e̱jnú yojoo̱ chi̱nga̱a̱, ngatꞌa̱ ndatsi tji̱ ningoo̱, kjinieya kixꞌi kixꞌijín ni xi kjinie. ¡Ngata̱chiíjín niꞌánjo̱jnú ngo chi̱nga̱ xi je kꞌien!

^9-10 »Ka̱má xi̱ni̱e̱jnú ngayeje tji̱o̱ xi tjiín tji̱bo̱a̱tsjie, ko̱jo tjia, ta̱nga Néná jè íchjaá nga ka̱májín xi̱ni̱e̱ ta̱ꞌya cho̱ní xi tjín ngi̱jin ndáfoaa̱ xi jmíjiín tjia ko̱jo tji̱bo̱a̱tsjie, ngatꞌa̱ jmí tsi tsjie kui cho̱o̱ ngindyi̱ko̱n Néná.

¹¹ »Ka̱má xi̱ni̱e̱jnú ngayeje to̱ko̱ya cho̱ xi tjiín tsja̱nga̱ xi tsjie.

^12-18 Cho̱ xi Néná je íchjaá nga ka̱májín xi̱ni̱e̱, kuí bí xi̱ꞌbi̱: Ja̱a̱, cho̱ bokján ńdaa̱, ja̱ ndáchíkoón, cho̱ milanoo̱, cho̱ abestruu̱, jnoó, ni̱sie ngabiotaa̱, jnó ndi̱ja̱a̱, cho̱ ibii̱s, cho̱ sisnee̱, cho̱ pelíkanoo̱, cho̱ kjinie yojo siee̱n, cho̱ singeñaa̱, sko̱a̱a̱ cho̱ abubiyaa̱, ningoó, ngayeje to̱ko̱ya cho̱ alkoo̱n, ngayeje to̱ko̱ya ni̱sie kuerboo̱, ngayeje to̱ko̱ya ja̱ kjinie xo̱nda̱a̱.

¹⁹ »Ka̱májín xi̱ni̱e̱jnú cho̱ xi ꞌniú xi̱xi̱i̱ xi tjiín nga̱, ngatꞌa̱ tsjiejín kui cho̱o̱ ngindyi̱ko̱n Néná.

²⁰ Ta̱nga, ka̱má xi̱ni̱e̱jnú ngayeje to̱ko̱ya chjondi ko̱jo cho̱ xi kjínkꞌá tꞌanangii̱, ngatꞌa̱ tsjie kuí cho̱o̱ ngindyi̱ko̱n Néná.

²¹ »Tsi ngo cho̱ ko̱yà soboá, ngata̱ chiniejínjnú yojoo̱, ngatꞌa̱ jún boá xi ngo xota̱ na̱xi̱ńdá xí jè tsi̱ꞌe̱ Néná, ngatꞌa̱ bo̱a̱ tsꞌén je atíxoma kui. Ta̱nga ka̱má ko̱e̱ꞌéjnúu̱ kui yojoo̱ xota̱ xi xín nangi xi síndo ngi̱jinjnú, ko̱jo tsi ko̱ti̱ñájnúu̱ ngo xota̱ xi xín nangi chji̱a̱ni xi jachó ngotjón ki̱a̱ nangi nínga tindyiónjnú. »Ti̱nde ka̱májín nga ki̱a̱ ngi̱jin ntsjeén na̱aa̱n ndí tindso̱ chichií si̱ꞌanchjánjinjnú.

Tie nga úchaán ni xi niꞌánkꞌasꞌien

^22-23 »Xki̱ nó xki̱ nó chjiéngá Néná si̱ꞌankꞌasꞌienjnúu̱ tie nga úchaán ngayeje ni xi ka̱maxchájnú, ko̱jo ni xi si̱ꞌánjnú. ¡Ngatsjéni̱xtjin ti̱ꞌankjatjosónjnú kui nii̱! Chjiéngá ko̱e̱ꞌéjnú tie nga úchaán xojmá xí ka̱maxchájnú, ko̱jo tie nga úchaán bino̱ xi si̱ꞌandajnú, ko̱jo tie nga úchaán isti̱ xi si̱ꞌandajnú. Kó ti̱ chjiéngá si̱ꞌankꞌasꞌienjnúu̱ Néná ndí xí tjón kꞌuieé cho̱yojojnú ko̱jo cho̱tsa̱nga̱jnú. »Sꞌe̱ ngo ni̱xtjin xá kꞌuijñáni nga xi̱ni̱e̱jnú kui nii̱. Kjiꞌanga si̱ꞌánjnú kui nii̱, ngayejejnú chjiéngá xcha̱ndikónjnú ko̱jo si̱ꞌantjójnú Néná ngatsjéni̱xtjin. Kui ni xi si̱ꞌánjnú chjiéngá ki̱a̱ si̱ꞌánjnú ki̱a̱ nínga Néná kjo̱a̱ꞌájin tsi̱ꞌe̱ nga ki̱a̱ kꞌuijñá ndiꞌandikoón.

²⁴ »Ta̱nga tsi kjin ka̱majnú nínga kꞌuijñá ndiꞌandikoón, kó tsi ka̱májín kongínjo̱jnú tie nga úchaán ngayeje ni xi Néná jè katsjájnú,

²⁵ kuí nii̱ xi si̱ꞌánjnú: Tatíñájnú kui nii̱, kó to̱o̱n ki̱a̱ tangínjo̱jnú ndiꞌandikoón.

²⁶ Kjiꞌanga jún ko̱jo xtín xota̱ ndiꞌajnú kjóchójnú ki̱a̱a̱, kui to̱o̱n tsꞌi̱tsienijnú ngayeje nichinie xi ka̱machjiénjnú xikoó: cho̱yojo, ko̱jo cho̱tsa̱nga̱, ko̱jo bino̱, ko̱jo ndáfoa sa, ko̱jo ngayeje kje̱ꞌe ngase ni. Kósꞌe̱ kjiꞌá boá nga si̱ꞌánjnúu̱ ngo sꞌué xí ta̱nisién ꞌniú Néná.

Tie nga úchaán ni xi ndikoón

^27-29 »Ngata̱ chíyájínjnú nga ko̱e̱ꞌéjnúu̱ chiboa ni xi tjínjnú xota̱ tji̱e̱e̱ Lebii̱ xi síndo na̱xi̱ńdá nínga tindyiónjnú, ngatꞌa̱ kui xotaa̱ jmí tꞌanangi nínga ku̱i̱ꞌítji̱e̱ ni katseꞌéjiín, kó katseꞌéjnú jún. »Xki̱ ján nó, kꞌuijñátꞌaxínjnú tie nga úchaán ngayeje ni xi kamáxchájnú kui noó, kó ki̱a̱ chja̱ꞌátjójnú ki̱a̱ na̱xi̱ńdáꞌniuú. Kó bo̱a̱ tsꞌén nga xota̱ tji̱e̱e̱ Lebii̱ kꞌuieé nichinie xi chjieén. Kó jmí tsi ta̱kuítsí xi ka̱ma ki̱a̱ skjíbé ni xi skji̱ni̱e̱, ti̱ ka̱ma ki̱a̱ skjíbé xota̱ xi xꞌi̱a̱a̱n, ko̱jo ínchjín kꞌán xi je kꞌien xi̱ꞌii̱n, ko̱jo xota̱ xi xín nangi chji̱a̱ni xi ki̱a̱ jachókꞌíndo kui na̱xi̱ńdaá nga. Tsi si̱ꞌankjatjosónjnú kui kjo̱a̱botíxomaa̱, Néná sa̱ꞌínchikonñéjnú, kó ngayeje ni xi si̱ꞌánjnú, nda ka̱ma».