Ndeuteronomio̱ 12 - Xo̱jo̱n eén Néná

Kjo̱a̱kiti xi katseꞌeé xota̱ na̱xi̱ńdaá

¹ Sꞌe̱ jaskan Moisee̱ bi̱ katsoó xota̱ na̱xi̱ńdaá: «Ngije ki̱a̱ tindyiónjnú kui tꞌanangi xi Néná katsóyàtjónjnú nga tsja̱ajnú, chjiéngá ngatsjéni̱xtjin si̱ꞌankjatjosónjnú kui kjo̱a̱botíxoma xi̱ꞌbi̱:

^2-3 »Ti̱ꞌankjatsónjnú ngayeje ngi̱ndie nínga tsꞌéntsjaà nee̱ kui xota̱ na̱xi̱ńdá xí jún si̱ꞌánjnúu̱ nga ku̱i̱xkánjo̱jnú. Ta̱jñàní síndo kui ngi̱ndiee̱, kó chjiéngá si̱ꞌankjatsón. Síndo ki̱a̱ na̱xi̱i̱, ko̱jo nínga soón, ko̱jo ngi̱ndie yaá. Ti̱ꞌanxi̱jnú ndi̱jo̱o̱ ko̱jo kui a̱si̱én xí ne ndyi̱tsoó, kó tꞌítíjnú kui yá xí tsꞌéndíkón. ¡Nga ingojín kui nii̱ xi kꞌuíndo ngase tsi̱ꞌe̱ nga sa̱ꞌínkjaꞌátsjien!

⁴ Kjiꞌanga si̱ꞌantsjajnúu̱ Néná ngata̱ ki̱a̱jín chjaꞌángíjnúu̱ kjo̱a̱xchá xí tjiín kui xota̱ na̱xi̱ńdaá.

^5-6 »Néná kjo̱a̱ꞌájin ngo ngi̱ndie nínga kꞌuijñá nga kꞌuijñájinjnú kuí, kó ki̱a̱ boá nínga kongínjnú tsi̱ꞌe̱ nga si̱ꞌantsjajnúu̱, nga xꞌi̱a̱jnú kjo̱a̱tjó xi kꞌuitíjnú nganda tsi̱ꞌe̱. Kó ti̱ ki̱a̱a̱ chjiéngá kongínjo̱jnú tie nga úchaán ngayeje ni xi si̱ꞌánjnú, ko̱jo chji̱e̱ xi ngayeje ini̱ma̱jnú nga si̱ꞌankꞌasꞌienjnú, ko̱jo ndí xí tjoón cho̱yojojnú, ko̱jo cho̱tsa̱nga̱jnú, ko̱jo kje̱ꞌe ngase kjo̱a̱tjó xi kiꞌmíyatjónjnú nga ko̱e̱ꞌéjnúu̱.

^7-12 »Ngo sꞌué ti̱ꞌánjnú kui ngi̱ndiee̱, kó tsjatsꞌèn ku̱i̱ndyionjnú jún, ko̱jo xota̱ ndiꞌajnú, ko̱jo moso̱jnú, ko̱jo xota̱ tji̱e̱e̱ Lebii̱ xi ki̱a̱ síndojinjnú. Ngatjaꞌátsjienjnú nga chjiéngá ko̱e̱ꞌéchiboajnúu̱ kui xotaa̱ ni xi an tsjajnúꞌun, ngatꞌa̱ kui xotaa̱ nde ngo chikjan tꞌanangi sa̱kójiín xi kui tsi̱ꞌe̱ ka̱ma. »Ngije ki̱a̱ tindyiónjnú kui tꞌanangii̱, ngiti̱ ka̱májín ta̱xkiya si̱ꞌánjnú ni xi mejénjnú, xikó ndyi̱niꞌánjnú ngaskande ngotꞌe̱. Ngatꞌa̱ ki̱a̱ ngi̱ndie nínga tindyiónjnú ngotꞌe̱, jmí tsi kui xi ngi̱ndie nínga xió kjiꞌi xi tsja̱ajnú Néná, tsi̱ꞌe̱ nga kjóchójnú kui ngi̱ndiee̱, chjiéngá ku̱i̱tja̱tiójnú ndejèꞌ Jorndaa̱n. Ta̱ niꞌin kjóchójnú kui ngi̱ndiee̱, kó ngije kiniꞌánjnúu̱ ngayeje kondra̱jnú, kꞌuiéjnú kjo̱a̱xió, kó ndatsꞌèn ku̱i̱ndyionjnú.

^13-18 »Chónjnú nga ta̱xkiya mongínjo̱jínjnú kjo̱a̱tjójnú ta̱jñà ngi̱ndiení, chjiéngá ta̱ ki̱a̱ tsí kongínjo̱jnú ngi̱ndie xi Néná kjo̱a̱ꞌájin ngi̱jii̱n xota̱ tji̱e̱e̱. Ki̱a̱ boá nínga si̱ꞌánjnú ni xi je atixomájnúꞌun nga si̱ꞌánjnú, kó ki̱a̱ ko̱e̱ꞌéjnúu̱ ndokꞌóchjì Néná, ngatꞌa̱ achichí tsie ni tjié xi katsjájnú nga kachjaꞌátikójnú. Nga ka̱ma kui sꞌueé ka̱ma xi̱ni̱e̱jnú ngayeje ni xi kichꞌiájnú. Ngayeje xota̱ na̱xi̱ńdaá ka̱ma sa̱ꞌín kui nii̱, tsi ma ko̱jo tsi májín fochó ngindyi̱ko̱n Néná. Ta̱kuítsí ni xi ka̱májín sa̱ꞌín, nga ka̱májín skji̱ni̱e̱ yojo xi to̱kó tjiín jín, chjiéngá nga tsjandiè máraa̱ nga kjo̱tjo jiín kui yojoo̱ ki̱a̱ nga̱són tꞌanangii̱. »Tji̱e̱nga ki̱a̱ tindyiónjnú na̱xi̱ńdáꞌniújnú, ka̱májín xi̱ni̱e̱jnú ni xi chji̱a̱ni kjo̱a̱tjó xi ko̱e̱ꞌéjnú, ngaskande nga kjóchójnú ngi̱ndie nínga Néná kjo̱a̱ꞌájin nga si̱ꞌandaa̱ ndiꞌandikoón. Ngata̱ niꞌánchíyájínjnú nga ko̱e̱ꞌéjnúu̱ chiboa ni xi sa̱kójnú xota̱ tji̱e̱e̱ Lebii̱ kui xi síndo ki̱a̱ na̱xi̱ńdájnú.

¹⁹ Ngata̱ ꞌbíjñámasiénjínjnú xota̱ tji̱e̱e̱ Lebii̱ tji̱e̱nga nga ki̱a̱ ku̱i̱ndyionjnú kui tꞌanangii̱.

²⁰ Ta̱nga ngije Néná katsꞌénkjatjosón ni xi katsóyàtjón nga sa̱ꞌín, kó ngije katsꞌéntsié tꞌanangi xi tsa̱jún, kó tsi mejénjnú xi̱ni̱e̱jnú yojo, ka̱má xi̱ni̱e̱jnú tsi bo̱a̱ tsꞌén mejénjnú.

^21-22 Tsi kjin mánii̱ ndiꞌandikoón nínga tindyiónjnú, kó tsi ka̱májín kongínjnú, ka̱má si̱ꞌankꞌiénjnú cho̱yojojnú ko̱jo cho̱tsa̱nga̱jnú ki̱a̱ na̱xi̱ńdá nínga tindyiónjnú, kó ka̱ma xi̱ni̱e̱jnú yojoo̱ kui cho̱o̱. Nga si̱ꞌánjnú kui nii̱, chjiénjín nga tjín ni xi si̱ꞌánjnú nga si̱ꞌantsjiejnú yojojnú, xikó niꞌánjnú kjiꞌanga chiniejnú yojoo̱ ngo ndi̱kꞌijñá chjo̱on ko̱jo tsi ndi̱kꞌijñá xíꞌín.

^23-25 Ta̱nga ngata̱ chiniejínjnú yojo xi to̱kó tjiín jín, chjiéngá te̱ꞌéndiè márajnúu̱ nga kjo̱tjo jiín kui yojoo̱ ki̱a̱ nga̱són tꞌanangii̱, xikoó tsi ndáfoa. Tsi ko̱nda̱ꞌyáꞌénjnúu̱ Néná, nda̱ ku̱i̱ndyionjnú jún ko̱jo xota̱ tji̱e̱jnú.

^26-27 Ti̱ bo̱a̱ ti̱ ti̱ꞌánjnúu̱ jiín cho̱ xi kjo̱a̱tjó si̱ꞌánjnú nga si̱ꞌankꞌasꞌienjnú nganda tsi̱ꞌe̱ Néná: Tjón mára chjatjónjnú kui jiín ki̱a̱ nga̱són ṉchaa̱n, sꞌe̱ jaskan ka̱ma xi̱ni̱e̱jnú yojoo̱.

²⁸ »Nda má tasiénijónjnú ngayeje ni xi je kixianjnúꞌun. Tsi mejénjnú nga nda ku̱i̱ndyionjnú jún ko̱jo xota̱ tji̱e̱jnú, ndaꞌyáꞌénjnúu̱ Néná, kó ti̱ꞌánjnú ngayeje ni nda xi je atíxomájnú kuí».

Ni xi ka̱maa̱ xota̱ xi sa̱ꞌíntꞌaa̱kjo̱a̱ xkjín

²⁹ Moisee̱ bi̱ katsó ngasee̱ xota̱ na̱xi̱ńdaá: «Néná boá xi sa̱ꞌínkjié ngayeje na̱xi̱ńdá xi jún si̱ꞌánjnúu̱ nga ku̱i̱xkánjo̱jnú, kó jún boá xi ku̱i̱ndyionjnú tꞌanangii̱ kui xotaa̱.

³⁰ Kjiꞌanga ka̱ma kui nii̱, chónjnú yojojnú nga bo̱a̱jín si̱ꞌánjnú xikó katsꞌén kui xota̱ na̱xi̱ńdaá, ti̱nde nga kuijín ne xi katsꞌéntsjaà kui xi si̱ꞌandikónjnú jún nga.

³¹ Ngata̱chiíjín niꞌánjnú kui nii̱, ngatꞌa̱ Néná achichí chꞌo maá xikótsꞌèn tsꞌéntsjaà nee̱ kui xota̱ na̱xi̱ńdaá. ¡Ngaskande ti̱ kui ndií ꞌbítí ki̱a̱ ṉchandikoón!

³² Kuíni nga ti̱ꞌankjatjosónjnú kui kjo̱a̱botíxomaa̱, kó nga chjeꞌéxínjínjnúu̱ ngo ni, ti̱nde nga fosónjínjnúu̱ ngo ni.