Ndeuteronomio̱ 11 - Xo̱jo̱n eén Néná

Ngaꞌniuú Néná

¹ Kó Moisee̱ bi̱ katsó ngasee̱ xota̱ na̱xi̱ńdaá: «Takójnú nga tjójnú Nejnú kó ti̱ꞌankjatjosónjnú kjo̱a̱botíxomaa̱.

^2-4 Ngatamajnú ngotꞌe̱ kui ni xi Néná jè akóyájnú nga katsꞌénchji̱ni̱e̱jnú, kui ni xi kji̱e̱ bokoyájiín ndíjnú. Ngatjaꞌátsjienjnú nga Néná akójnú ngaꞌniuú, ko̱jo achichí yiꞌi kjo̱a̱ndikón xí katsꞌén ki̱a̱ nangi Ejipto̱, kjiꞌanga achichí kjo̱a̱botíjé xí katsangiyaa̱ nda̱ ree̱ ko̱jo xota̱ na̱xi̱ńdaá. Xota̱ Ejiptoo̱ tsangatji̱ngíjnú jún ki̱a̱ ngi̱jin Ndáchíkoón Inií, ta̱nga Néná katsꞌénkjindibánieé ndáfoaa̱, kó jesón ngayejee̱: ¡ki̱a̱ katsꞌénkjiesón ngándá ngi̱jin ndáchíkoón ngayeje ndi̱je̱e̱, ko̱jo karro̱ kjo̱a̱xchán xí tjimájo̱!

⁵ »Ngatjaꞌátsjienjnú kókjiꞌi asíko̱jojnú kjiꞌanga ikitjajnú nangi kixií, ngaskande nga jéꞌe̱jnú kꞌi̱e̱e̱.

⁶ ¡Ngatjaꞌátsjienjnú ni xi katsꞌénjo̱ Néná Ndataa̱n ko̱jo Abiraa̱n, kjiꞌanga kui jaá kamámejénjiín nga Néná an íjñána ngito̱ko̱o̱ xota̱ Israee̱l! Ndií Eliaa̱b ko̱jo xota̱ tji̱e̱e̱ Rubee̱n kamá kui jaá, ta̱nga ta̱ngatꞌanii̱ kjo̱a̱kitikjo̱a̱a̱ nga Néná boá xi katsꞌén nga tꞌanangii̱ katjéjén, ¡kó bo̱a̱ katsꞌén tꞌanangii̱, katjéjén kui, ko̱jo xota̱ ndiꞌaa̱, ko̱jo ngayeje ni xi kisꞌiee̱! Kjo̱a̱a̱ kui nii̱, jún boá xi chistiko̱ kamájnú,

⁷ kó ndyikón májnú xi kamábe kui nii̱, jún jè kamáyàjnú ngaꞌniú jee̱ Néná.

Kjo̱a̱niꞌánchikonñé xi katsóyàtjón Néná nga tsja̱á

⁸ »Ndaꞌyáꞌénjnú ngayeje kjo̱a̱botíxoma xi ngotꞌe̱ tsꞌéntsjájnúꞌun. Kó bo̱a̱ tsꞌén nga kꞌuiéjnú ngaꞌniú nga si̱ꞌánjnúu̱ tꞌanangii̱ nga ku̱i̱xkánjo̱jnú xota̱ xi síndo ngi̱ndie nínga ku̱i̱tjásꞌi̱e̱njnú.

⁹ Tsi bo̱a̱ si̱ꞌánjnú, kjín nó ka̱majnú nga ku̱i̱ndyionjnú kui tꞌanangi xi Néná je katsóyàtjónjnú nga tsja̱ajnú. ¡Achichí nda kui tꞌanangii̱ nga ngatsjéni̱xtjin tjín nichinie!

¹⁰ Nga kixindyionjnú nangi Ejipto̱ achichí ꞌniú kiniꞌánxájnú tsi̱ꞌe̱ nga ikꞌítji̱e̱jnú ko̱jo nga akasíndájnúu̱ tꞌanangii̱.

¹¹ Ta̱nga ki̱a̱ ngi̱ndie nínga ku̱i̱ndyionjnú, stseé boá xi bosíndaá na̱xi̱i̱, ko̱jo nangi nínga soón.

¹² ¡Ti̱ kuíní Néná xí koo̱n kui ngi̱ndiee̱ ngatsjéni̱xtjin!

¹³ »Kuíni nga, tsi si̱ꞌankjatjosónjnú kjo̱a̱botíxoma xi ngotꞌe̱ tsꞌéntsjájnúꞌun, kó tsi si̱ꞌantjójnú, ko̱jo tsi si̱ꞌantsjajnúu̱ Néná, ngayeje ini̱ma̱jnú ko̱jo ngayeje kjo̱a̱mindyionjnú,

^14-15 Néná boá xi sa̱ngíyájnú stsé xí boaꞌa cha̱ntjo̱o̱ ko̱jo cho̱ndoboaá. Kó bo̱a̱ tsꞌén nga jún má xi xꞌi̱e̱je̱njnú to ndso̱ko̱a̱n ṉño̱pan xi tsa̱jún, kó jmíni̱xtjin xcha̱jàjnú binoo̱, ko̱jo istii̱, tsie nichinie kꞌuiéjnú, kó cho̱tjiéjnú jmíni̱xtjin xcha̱jaa̱ ndi̱xcho̱ xi skji̱ni̱e̱.

¹⁶ »Ta̱nga ngata̱ boeꞌéndièjínjnú nga xꞌi̱ṉcha̱jojnú. Ngatꞌa̱ tsi kje̱ꞌe ne si̱ꞌantsjajnúu̱, kó tsi si̱ꞌanchꞌójnú Néná,

¹⁷ sa̱ꞌínxchán kuí, kó ngiti̱ sa̱ngíyájín stseé. Kósꞌe̱ ngiti̱ jmí ni tjié ka̱maxchájínjnú, kó tsá ko̱yà bojójnú ki̱a̱ tꞌanangi nda nínga tsja̱ajnú Néná.

^18-20 »Nda má tjajintakónjnú kui kjo̱a̱bokoyaá, kó ti̱ꞌankjójnú, ti̱ꞌanꞌindójnú nga ngaskande ka̱ma kjótꞌajnú tjiajnú, ko̱jo tsi ka̱ma kjótꞌajnú xtjienjnú, tsi̱ꞌe̱ nga ngatsjéni̱xtjin kjo̱a̱ꞌátsjienjnú. Tjatꞌajnú ki̱a̱ nga̱ntjo̱a̱a̱ ndiꞌajnú, ko̱jo nínga bitjasꞌi̱e̱nnii̱ na̱xi̱ńdáꞌniú nínga tindyiónjnú nga. Ngatsjéni̱xtjin takoyajnúu̱ ndíjnú ta̱jñà ngi̱ndiení,

²¹ kó bo̱a̱ tsꞌén nga jún ko̱jo ndíjnú, kjín nó ka̱majnú nga ku̱i̱ndyionjnú kui tꞌanangi xi katsóyàtjónjnú Néná nga tsja̱ajnú. ¡Ki̱a̱ ku̱i̱ndyionjnú tji̱e̱nga kꞌuijñá nkꞌajmii̱!

²² »Tsi si̱ꞌankjatjosónjnú ngatsjéni̱xtjin kui kjo̱a̱botíxoma xi tsꞌéntsjájnúꞌun ngotꞌe̱, kó tsi tjó ka̱majnú Néná, kó tsi ka̱maꞌniátakónjnú,

^23-24 Néná ko̱ngatji̱ngii̱ kui ngi̱ndiee̱ kui xota̱ na̱xi̱ńdá xi síndo ki̱a̱a̱ ngotꞌe̱. Kó jún boá xi si̱ꞌánjnúu̱ nga ku̱i̱xkánjo̱jnú na̱xi̱ńdá xí ꞌniú ko̱jo xi yiꞌii̱. Xi síndo xtji̱e̱e̱n ta̱ꞌin, xtji̱e̱e̱n na̱ngi, xtji̱e̱e̱n nínga fotjo tsꞌueé, ko̱jo xtji̱e̱e̱n nínga ꞌbosꞌien tsꞌueé, kó ngojín xota̱ xi ka̱maa̱ kjo̱a̱ꞌáxínjnú kui tꞌanangi xi jún je kiniꞌánjnú.

²⁵ Jmí ni̱xtjin nga tjín xí sa̱ꞌínjnú nga skjánjo̱jnú, ngatꞌa̱ Nejnú boá xi sa̱ꞌín nga ngayeje xota̱ na̱xi̱ńdaá kjo̱tsiè ndikón má ngindyikónjnú. Néná boá xi je katsóyàtjón nga bo̱a̱ ka̱ma.

²⁶ »Ngotꞌe̱ má ka̱ma chje̱ꞌéjinjnú tsi mejénjnú nga nda̱ ko̱e̱je̱jnú, ko̱jo tsi mejénjnú nga ndajín ko̱e̱je̱jnú.

²⁷ Tsi si̱ꞌankjatjosónjnú kui kjo̱a̱botíxoma xi ngotꞌe̱ tsꞌéntsjájnú Nejnú, nda tsꞌén ku̱i̱ndyionjnú,

²⁸ ta̱nga tsi si̱ꞌankjatjosónjínjnú, kó tsi ta̱ngatꞌanii̱ nga kje̱ꞌe ne si̱ꞌantsjajnúu̱, kó tsi kꞌuijñámasienjnú ngayeje ni xi je akoyájnúꞌun, ndajín tsꞌén ku̱i̱ndyionjnú.

²⁹ »Kjiꞌanga Néná je katsjandièjnú nga si̱ꞌánjnú kui tꞌanangii̱ nga ikixkántjéjnú, chjiéngá kongínjnú na̱xi̱ Jerisii̱n tsi̱ꞌe̱ nga ki̱a̱ ko̱ndókjo̱a̱jnú ngayeje kjo̱a̱niꞌánchikonñé xi sa̱kójnú, tsi ko̱nda̱ꞌyáꞌénjnú. Sꞌe̱ jaskan kongínjnú na̱xi̱ Ebaa̱l, kó ki̱a̱ ko̱ndókjo̱a̱jnú ni xi ndajín xi ka̱majnú tsi ko̱nda̱ꞌyáꞌénjínjnú.

³⁰ Nga jó kui na̱xi̱i̱ ki̱a̱ síndo xtji̱e̱e̱n nínga ꞌbosꞌien tsꞌueé ki̱a̱ ndejèꞌ Jorndaa̱n, kje̱n Ngilngaa̱l ko̱jo nínga síndo yámoree̱, ki̱a̱ nangi són nínga síndo xota̱ tji̱e̱e̱ Kanaa̱n.

³¹ »Jún jè ma niꞌánjnú kui tꞌanangi xi tikón xi ingoboaá ndejèꞌ Jorndaa̱n, ngatꞌa̱ Néná jè tsja̱ajnú. Ngije ki̱a̱ tindyiónjnú,

³² chjiéngá si̱ꞌankjatjosónjnú ngayeje kjo̱a̱kiti xi ngotꞌe̱ tsꞌéntsjájnúꞌun».