Ndeuteronomio̱ 10 - Xo̱jo̱n eén Néná

Néná katsjá nginí ndi̱jo̱ tie nínga kjitꞌa kjo̱a̱ꞌbíndaa̱

¹ Kó Moisee̱ bi̱ katsó ngasee̱ xota̱ na̱xi̱ńdaá: «Kósꞌe̱ Néná bi̱ katsóna: “Tꞌíjñinde ji jó tie ndi̱jo̱, xikó má kón kui xi tjón katsjaa, kó ti̱ꞌinde ji ngo koxa̱ xi yá. Jaskan ngije kamá kui nii̱, tꞌennijíngí ji na̱xi̱i̱ tsi̱ꞌe̱ nga kuichjiájoo.

² An sa̱ꞌinꞌindó nginí an kjo̱a̱botíxomana kui tie ndi̱jo̱o̱, xikó má kón katsꞌen an kui xi akakjen ji. Ngije katsꞌenda an kui ndi̱jo̱o̱, ki̱a̱ ku̱i̱ndyie ji ngi̱yaa̱ kui koxa̱a̱”.

³ »Kó an katsꞌenda an ngo koxa̱ xi yáꞌakasia̱, sꞌe̱ íjñanda an nga jó tie ndi̱jo̱o̱, sꞌe̱ kijíjo̱ an ki̱a̱ na̱xi̱i̱.

⁴ Kó Néná ki̱a̱ katsꞌénꞌindó nginí nga tie kjo̱a̱botíxomaa̱, sꞌe̱ katsꞌénkꞌasꞌienna kui tie ndi̱jo̱o̱, xikó má katsꞌén nga tjón tjón, kjiꞌanga kamátikójo̱ Néná nga tsíchji̱a̱jonijnú ngi̱jin ndiꞌií.

⁵ Kó an jatjajenni an kui na̱xi̱i̱, sꞌe̱ indo an nga jó kui tie ndi̱jo̱o̱ ngi̱yaa̱ kui koxa̱a̱, ngatꞌa̱ bo̱a̱ tsꞌén atíxomana Néná. Kó kui tie ndi̱jo̱o̱ to̱kó ki̱a̱ síndo ngi̱yaa̱ kui koxa̱a̱.

Bi̱ tsꞌén kꞌien Aaroo̱n

⁶ »Jaskan ngije kamá kui nii̱ jatjoni ji̱n Beeroo̱t-Benee̱-Jaakaa̱n xtji̱e̱e̱n nangi Moseraa̱. Ki̱a̱ boá nínga kꞌien Aaroo̱n, kó ki̱a̱ akjanijín, kó Eleasaa̱ kisꞌijña ngi̱ndie chináꞌmii̱ Aaro̱n na̱ꞌmii̱.

⁷ Jaskan akjatjojne̱ nangi Moseraa̱ sꞌe̱ tsangínjne̱ xtji̱e̱e̱n Ngundgonda̱, sꞌe̱ jaskan tsangínjne̱ Jotbataa̱, nangi nínga achichí xo̱ngàndántꞌié tjín.

⁸ »Ki̱a̱ boá nínga Néná jaꞌájin xota̱ tji̱e̱e̱ Lebii̱, tsi̱ꞌe̱ nga kui xi ko̱a̱ꞌa̱nijín koxa̱a̱ kjo̱a̱ꞌbíndaa̱ kjiꞌanga tjín nínga kjo̱jo, kui kjo̱a̱ꞌbínda xi katsꞌénjo̱jnú Néná. Kó kui xota̱ tji̱e̱e̱ xi kamá chináꞌmi nga kui xi kꞌuíndotjón nga si̱ꞌantsjaa̱ Néná ko̱jo nga kui xi sa̱ꞌínchikonñé xota̱ na̱xi̱ńdaá nga sa̱ꞌínkjién jaꞌeén Néná. Ngaskande ngotꞌe̱ kuí xaá xi tsꞌén,

⁹ kuíni nga xota̱ tji̱e̱e̱ Lebii̱ jmí tꞌanangi katseꞌéjiín xi tsi̱ꞌe̱ kui soboá, xikótsꞌèn katseꞌéjnú jún, ngatꞌa̱ Néná boá ni xi tsoboaá kui.

Néná katsꞌénjetakoón xota̱ na̱xi̱ńdá Israee̱l

¹⁰ »Yichán ni̱xtjin, yichán ni̱xtji̱e̱n kisꞌijña an ki̱a̱ na̱xi̱ Oree̱b, xikó katsꞌen an nga tjón tjón. Ki̱a̱ tsíchji̱a̱a̱ Néná tsi̱ꞌe̱ nga katsꞌénkjiéjínjnú, kó kuí tsintꞌiéna, ngatꞌa̱ katsꞌénkjiéjínjnú.

¹¹ Ta̱sá tsíꞌána nga kotíjña̱nda an tsi̱ꞌe̱ nga an kjuíntjónjnúꞌun nga ku̱i̱xkántjé kuí tꞌanangi xi katsóyàtjoón nga tsja̱á xota̱ xi xchájnú.

Ni xi Néná tsíꞌaá xota̱ Israee̱l

¹² »Mí ni xi mejeén Néná nga si̱ꞌánjnú jún. Ta̱ ngototo nga xcha̱ndikónjnú ko̱jo nga ko̱nda̱ꞌyáꞌénjnúu̱, ko̱jo nga si̱ꞌantjójnú, ko̱jo nga si̱ꞌantsjajnúu̱ ngayeje ini̱ma̱jnú.

¹³ Néná mejeén nga jún si̱ꞌankjatjosónjnú ngayeje kjo̱a̱botíxomaa̱, tsi̱ꞌe̱ nga nda ku̱i̱ndyionjnú.

¹⁴ »Néná boá xi tsi̱ꞌe̱ ngayeje nkꞌa jàn, ko̱jo tꞌanangii̱, ko̱jo ngayeje ni xi tjiín kui nii̱.

¹⁵ Kamárií tsi kui xi jaꞌájin ta̱jñà xota̱ na̱xi̱ńdání xi tjín nga̱sondiee̱, ta̱nga xota̱ xi xchájnú jaꞌájin ngatꞌa̱ tjó kamaá, kó ko̱jo jún jaꞌájinjnú nga, tsi̱ꞌe̱ nga jún xi ka̱majnú xota̱ na̱xi̱ńdaá kui ngotꞌe̱.

¹⁶ Ta̱nga ngata̱ kitikjo̱a̱jín niꞌánjnú yojojnú, ti̱nde ngata̱ niꞌánchíyájínjnú ni xi índajo̱jnú Néná.

¹⁷ Kuí boá xi ngo Néná xí botixómaá ngayeje ne xi ngasee̱, ngayeje já re, ko̱jo ngayeje na̱xi̱ńdá. Ngaꞌniú xí tjiín kuí boá xi tsꞌénkjátsiéní ngayeje nga̱sondiee̱. Kjiꞌanga ngo ni xi mejeén sa̱ꞌín, kixi̱ tsꞌén kuí nii̱, kó jmíjín xi ka̱maa̱ ngo ni tsja̱á tsi̱ꞌe̱ nga sa̱ꞌínkjatjosónjín ngo ni.

¹⁸ »Néná kixi̱ tsꞌénjo̱ xota̱ xi je kamáxꞌi̱a̱n, ko̱jo ínchjín kꞌán xi je kꞌien xi̱ꞌii̱n, kó bokó nga tjoó nga tsjaá ńjño xi boajá ko̱jo nga tsjaá nichinie xota̱ xi xín nangi chji̱a̱ni xi ki̱a̱ síndojinjnú.

¹⁹ Kuíni nga tjó ti̱ꞌánjnú xota̱ xi xín nangi chji̱a̱ni xi ki̱a̱ síndojinjnú, ngatꞌa̱ jún ti̱ xota̱ xi xín nangi kamájnú ki̱a̱ nangi Ejipto̱ nga.

²⁰ »Ndaꞌyáꞌénjnúu̱ Néná, kó ta̱kuítsí xi ti̱ꞌantsjàjnúu̱. Ngata̱ niꞌantsjájínjnúu̱ kje̱ꞌe ne. Tsi ngo ni kꞌuíndajnú xi si̱ꞌankjatjosónjnú, ta̱ jaꞌeén Néná tsí xi ti̱ꞌankjiénjnú.

²¹ Jún jè kamáyàjnú kjo̱a̱ndikón xí katsꞌén Néná nganda tsa̱jún, kuíni nga ngatsjéni̱xtjin kui ti̱ꞌantsjàjnúu̱.

²² Ngata̱ chíyájínjnú nga xota̱ xi xchájnú ta̱ ichítié ko̱jo kan tsí kamá nga jachó nangi Ejipto̱. Ngotꞌe̱ ꞌne̱ Néná boá xi katsꞌén nga ngo xtín xota̱ na̱xi̱ńdá xí achichí kjín je kamájnú, xi ngaskande nde jmíjín xi ka̱maxki̱i̱».