Ndeuteronomio̱ 1 - Xo̱jo̱n eén Néná

Ni xi tsíchji̱a̱ Moisee̱

^1-5 Moisee̱ tsíchji̱a̱jo ngayeje xota̱ Israee̱l kjiꞌanga kisꞌińdo nangi kixií, ki̱a̱ Kandee̱-Barnea̱, nangii̱ xota̱ tji̱e̱e̱ Moaa̱b xi kisꞌijña ki̱a̱ nangi Arabaa̱, kje̱n nangi Suu̱f. Tiñaa̱ kui ngi̱ndiee̱ kisꞌińdo nangi Paraa̱n, ko̱jo nangi Tofee̱l, ko̱jo nangi Labaa̱n, ko̱jo nangi Aseroo̱t, ko̱jo nangi Ndisaa̱b. Tsi̱ꞌe̱ nga jáchó Kandee̱-Barnea̱ chjiéngá tiengo ni̱xtjin tsangín ndsa̱ko ndeskande na̱xi̱ Oree̱b, nga tsangín xtji̱e̱e̱n ndi̱yà xi fí na̱xi̱ Seii̱r. Moisee̱ tsíchji̱a̱jo kui xotaa̱ yichán nó ngije jatjoni nangi Ejipto̱. Ni̱xtjin tjoón sá xí ꞌmí Sebaa̱t kui noó, kjiꞌanga Moisee̱ katsóyaà xota̱ Israee̱l ngayeje kjo̱a̱kiti xi Néná katsóyaà, tsi̱ꞌe̱ nga sa̱ꞌínkꞌasꞌiee̱n kui xotaa̱. Kó nga ndyi̱fí kui ndi̱ya̱à, Moisee̱ achichí kamá re xi katsꞌeén nga askjanjo̱. Ki̱a̱ nangi Esboo̱n katsꞌeén Sijoo̱n, nda̱ re xi xota̱ Amoo̱r chji̱a̱ni, kó ki̱a̱ na̱xi̱ńdáꞌniú Astaroo̱t, kui xi tikón nangi Endreii̱ katsꞌeén Oo̱j, nda̱ ree̱ nangi Basaa̱n. Kuí bí kui eén xi katsjaá Moisee̱ xota̱ Israee̱l kjiꞌanga tjíndo ki̱a̱ xtji̱e̱e̱n nínga tjo tsꞌueé ndejèꞌ Jorndaa̱n:

⁶ «Kjiꞌanga tindyión ki̱a̱ na̱xi̱ Oree̱b, Néná katsjáná kuí eén: “Achichí tsie je kamájnú ki̱a̱ kui na̱xi̱i̱,

⁷ kuíni nga chja̱ꞌátikójnú ndiꞌajnú, kó tangínjnú xtji̱e̱e̱n na̱xi̱i̱ ki̱a̱ nínga tjíndo xota̱ Amoo̱r, ko̱jo tangínjnú ngayeje nangi xi síndo nga ngo foaꞌatjiyajoo̱n kui ngi̱ndiee̱. Tangínjnú nangi Arabaa̱, ki̱a̱ nínga na̱xi̱i̱, ko̱jo nínga soón, ko̱jo nangi kixí xi tikón xtji̱e̱e̱n na̱ngi, ko̱jo tꞌa ndáchíkoón, ko̱jo nangii̱ xota̱ tji̱e̱e̱ Kaa̱n, ko̱jo nangi Líbano̱, ngaskande nga kjóchójnú ki̱a̱ ndejèꞌ Éufratee̱.

⁸ Tangínjnú kó ti̱ꞌantsa̱júnjnú kui ngi̱ndiee̱ nga ku̱i̱xkánjnú, ngatꞌa̱ án boá xi tsjajnúꞌun kixiáa̱n Abraa̱n, ko̱jo Isaa̱, ko̱jo Jakoo̱b. Kó ti̱ bo̱a̱ kixiáa̱n nga ko̱jo jún tsjajnúꞌun, ngatꞌa̱ jún boá xi xota̱ tji̱e̱e̱ kui xotaa̱”». Moisee̱ bi̱ katsó ngasee̱ kui xotaa̱:

Ngito̱ko̱o̱ xota̱ Israee̱l

^9-12 «Kui ni̱xtjin jàn, Néná jè achichí xota̱ tji̱e̱ je katsjájnú, kó ngo na̱xi̱ńdá xí achichí ꞌniú je, je kamájnú. Kó ti̱ ánní bo̱a̱ xi tsíꞌáa̱ Néná tsi̱ꞌe̱ nga sa̱ꞌínchikonñéjnú, ko̱jo nga ngo mi̱ ndi̱yà ngase nga kjín ngase sa̱ꞌínjnú, xikó kjiꞌi je májnú. Kósꞌe̱ kjiꞌá boá nga kamákjínna nga ka̱májínna nga an so̱bo̱a̱ sa̱ꞌindajin an ngayeje kjo̱a̱xtijnú.

¹³ Kuíni nga atixomájnúꞌun tsi̱ꞌe̱ nga ngi̱jii̱n ngayeje xota̱ tji̱e̱e̱ chja̱ꞌájinjnú jáxíꞌín xi chji̱ni̱e̱ ko̱jo xi kjínkón, ko̱jo xi je be ni xi sa̱ꞌín, tsi̱ꞌe̱ nga kui xi ka̱ma ngito̱ko̱o̱ xota̱ na̱xi̱ńdaá, kó bo̱a̱ tsꞌén nga ka̱maa̱ ko̱síko̱jona.

¹⁴ »Kó jún nda kasasiennijnú kui nii̱.

¹⁵ Kuíni nga jaꞌajin an jáxíꞌín xi ꞌniú chji̱ni̱e̱ ngase, ko̱jo xi je ꞌniú be ni xi sa̱ꞌín, kó kuí boá xi indo an nga kui xi ka̱ma ngito̱ko̱jnú. Tjín xí kisꞌiee̱ xá nga sa̱ꞌínseén ngo mi̱ xota̱, kje̱ꞌe xí úchán xota̱ katsꞌénseén, kje̱ꞌe xí ichítié xota̱ katsꞌénseén, kje̱ꞌe xí tie xota̱ katsꞌénseén. Tjín xí indo an nga kui xi ka̱ma ngito̱ko̱o̱ ngo ndo̱jò xtín xota̱ tji̱e̱.

^16-18 »Kó kuí má chi̱bo̱a̱a̱ nga bo̱a̱ kixianjnúꞌun jún ngayeje ni xi chjiéngá si̱ꞌánjnú. Kó bo̱a̱ kixiáa̱n já nendiꞌamasiee̱n nga ta̱són nga kixi̱ sa̱ꞌínjo̱ ngayeje xotaa̱, jmí ndasénjín tsi xota̱ ni̱ma̱ ko̱jo tsi xota̱ cho̱n, tsi xota̱ Israee̱l, ko̱jo tsi xín nangi chji̱a̱ni, kó nga ngojín ni ko̱jo tsi xota̱ xi stsa̱kjo̱ón, ngatꞌa̱ Néná boá xi ko̱síko̱jo nga nijan ka̱ma ni xi sa̱ꞌín. Kó ti̱ bo̱a̱ kixiáa̱n nga kjiꞌanga sa̱ko̱ó ngo kjo̱a̱xti xi ta̱nisién niꞌín, an nga tsangiyana, tsi̱ꞌe̱ nga an sa̱ꞌindajin an.

Nga tiejó xota̱ xi kijíkatsijenꞌmaá

¹⁹ »Jaskan ngije kamá kui nii̱, Néná atíxománá nga kjo̱tjo ñá kꞌi̱e̱ na̱xi̱ Oree̱b, kósꞌe̱ kongín na̱xi̱ nínga síndo xota̱ Amoo̱r. Achichí kandakón, kó ikitjá ngamasiee̱n nangi kixií, ngaskande nga jáchó Kandee̱-Barnea̱.

^20-21 Ki̱a̱ boá nínga bo̱a̱ kixianjnúꞌun nga Néná je katsjáná nangi nínga na̱xi̱i̱ xota̱ Amoo̱r, kó ti̱ katsꞌenꞌniútakónjnúꞌun, tsi̱ꞌe̱ nga si̱ꞌánjnú kui tꞌanangii̱ nga ku̱i̱xkántjéjnú, xikó má katsó Néná nga atíxoma.

²² Ta̱nga jún kichjiáꞌájnúꞌun nga tjón mára sangiya an xota̱ xi ko̱e̱je̱katsinjenꞌmá, tsi̱ꞌe̱ nga sku̱i̱e̱ kóchon kui tꞌanangii̱, ko̱jo nga xcha̱ ñá ndi̱yà xi nda ngase xi ka̱ma kongín, ko̱jo nga xcha̱ ñá na̱xi̱ńdáꞌniú nínga ku̱i̱tjásꞌi̱e̱n.

²³ »Nda kasasienna kui nii̱, kó jaꞌajin an tiejó já xí ko̱e̱je̱katsinjenꞌmá, ngo nga xki̱ xota̱ tji̱e̱.

²⁴ Kó kui jaá kijíkatsijen nínga na̱xi̱i̱, kó jachó nínga soón nangi Eskoo̱l.

²⁵ Ki̱a̱ tsꞌenje̱n chiboa to xi maxchá kuí ngi̱ndiee̱, kó katsóyàná nga kui tꞌanangi xi tsja̱aná Néná ꞌniú nda ngase.

²⁶ »Ta̱nga jún, kandaꞌyáꞌénjínjnúu̱ ni xi atíxoma Néná, kó kamámejénjínjnú tsangínjnú.

²⁷ Ta̱sá tsangínꞌóya nginíjnú ndiꞌajnú, kó kandokjo̱a̱taꞌinjnú Néná. Kiniꞌánkjójnú nga Néná tjójiín jún, kó nga kuíni nga tsꞌaxiénijnú nangi Ejipto̱ tsi̱ꞌe̱ nga xota̱ Amoo̱r sa̱ꞌínkjiéjnú.

²⁸ Kjiꞌanga kamáyàjnú nga kui ngi̱ndiee̱ kisꞌińdo xota̱ xi achichí ꞌniú ko̱jo xi ꞌniú nkꞌa ngase, ko̱jo nga na̱xi̱ńdáꞌniuú a xi̱xi̱ yiꞌi xó tjíchjáꞌyáni, achichí kandakonnijnú. Kó ngase má kiniꞌánkjiéjnú kjo̱a̱ yojojnú nga kiꞌmíyàjnú nga ki̱a̱ tjíndo xota̱ tji̱e̱e̱ nda̱ xi je ko̱jo xi ꞌniú nkꞌa xi kiꞌmí Anaa̱k.

²⁹ »Foaꞌátsjienna nga bi̱ kixianjnúꞌun: “¡Xió ti̱ndyiónjnú! ¡Ngata̱ ndakonjínmájnú!

³⁰ Néná boá xi tsjiéntjónná, kó kuí boá xi skja̱n ngajoná, xikótsꞌèn askjan ngajoná ki̱a̱ nangi Ejiptoo̱, kósꞌe̱ kui kitsjientjónná nga tsangín ndi̱yà xí fíni nangi kixí.

³¹ Kuí boá xi jeꞌejo̱ná ngaskande kꞌi̱e̱e̱, xikó maá tsi yinkꞌáná, kó ngaskande ngotꞌe̱ ꞌne̱ jmí ni kjimajínná. Kuí boá xi na̱ꞌminá ngotꞌe̱”.

³² »Ta̱nga ndatsi bo̱a̱ kjiꞌi ni xi je kamaá, mejénjínjnú kjimaꞌniátakónjnú kuí,

³³ ndatsi kui je tsie ꞌne̱ jaꞌájin ngo ngi̱ndie xi jún tsja̱ajnú. Tsi̱ꞌe̱ nga ki̱a̱ kjo̱jojnú, kó kuí boá xi kitsjientjónjnú, nga jñoó ngo ndiꞌí katsꞌéntsijennijnú, kó nga ni̱xtjii̱n ngo ṉdi̱ íjñá xi askonnijnú tsi̱ꞌe̱ nga jmí ni kamájínjnú.

Néná atíjeé xota̱ Israee̱l

^34-35 »Kjiꞌanga Néná tsintꞌié nga kandokjo̱a̱taꞌinjnú, achichí katsꞌénxchán, ngatꞌa̱ xota̱ xi ndajín boá jún. Kuíni nga katsóyàtjón nga bo̱a̱ katsó, nga júnjín xi tsjatsꞌèn ku̱i̱ndyionjnú, ki̱a̱ tꞌanangi xi katsóyàtjón nga tsja̱á xota̱ xi xchájnú.

³⁶ Kó nga ta̱kuítsí Kalee̱b xi tsintꞌiéꞌeén, Néná bo̱a̱ katsoó nga ta̱kuítsí bo̱a̱ xi tsjatsꞌèn kꞌuijñá kui tꞌanangii̱. Kuíni nga ko̱jo xota̱ tji̱e̱e̱ sa̱ko̱ó ngayeje tꞌanangi xi tsja̱jon.

³⁷ »Ta̱ngatꞌanii̱ jún nga Néná ko̱jo an katsꞌénxchánjo̱na, kó bi̱ katsóna: “Ti̱nde ji ku̱i̱tjásꞌi̱njín ji kui tꞌanangii̱ nga.

³⁸ Josuee̱ boá xi kjótsoꞌbátjoón xota̱ na̱xi̱ńdaá, kó kuí boá xi sa̱ꞌínkꞌasꞌiee̱n kui tꞌanangii̱ xota̱ Israee̱l. Kuí boá xi bosikójoo̱ ji, kuíni nga ti̱ꞌinꞌnítakín ji”.

³⁹ »Néná ti̱ bi̱ ti̱ katsóna nga: “Xota̱ Israee̱l katsꞌénkjó nga kondraa̱ kjo̱a̱ꞌáxiín ndií ko̱jo ínchjiín. Ta̱nga ndií boá xi kꞌo̱sꞌien kui tꞌanangii̱, kó kuí tsi̱ꞌe̱ ka̱ma, ndatsi sꞌe̱ ꞌniú xi̱xi̱ ngotꞌe̱. Kui nii̱ xi tꞌíyée̱ xota̱ Israee̱l,

⁴⁰ kó bo̱a̱ tꞌíi̱n nga ngatjíꞌoyá nginí nangi kixií, xtji̱e̱e̱n ndi̱yà xí fíni Ndáchíkón Inií”.

⁴¹ »Ngayeje kui nii̱ xi kixianjnúꞌun, kó jún kiniꞌánkiejnú yojojnú nga kiniꞌánjéjnú kondraa̱ Néná. Kósꞌe̱ tsangínjnú nga ikixkántjéjnú tꞌanangii̱ xikó má katsójnú Néná nga atíxomájnú. Kachjábéjnú ni xi niꞌánkjiénjnú nga bixkánjnú, kó kiniꞌánkjójnú nga nde niꞌínjín ka̱majnú nga kongínnijínngíjnú na̱xi̱i̱,

⁴² ta̱nga Néná bo̱a̱ katsóna nga xiyàjnúꞌun nga si̱ꞌanchajajnú, kó kuí boá xi katsjandièjín nga jún xi si̱ꞌánjnú kui kjo̱a̱xcha̱án.

^43-44 »Ta̱nga jún achichí chꞌokon kamájnú yojojnú, kó kiniꞌánsénjínjnúu̱ ni xi atíxoma Néná nga si̱ꞌan. Tsangínijíngíjnú na̱xi̱i̱ nga tsangínkixkánjo̱jnú xota̱ Amoo̱r, ta̱nga kui xotaa̱ askjanjo̱jnú, kó katsꞌénjnú. ¡Xikó maá xo̱ꞌbo̱e̱ nga tsangatji̱ngíjnú ngayeje nangi Seii̱r, ngaskande nangi Jormaa̱!

⁴⁵ Sꞌe̱ jaskan ngije kjindibá nginíjnú, kichaꞌájnú, kó kandokjo̱a̱jnúu̱ Néná, ta̱nga kui ngiti̱ katsꞌénsénjínjnuú,

⁴⁶ kó kuíni nga jún ki̱a̱ kixindyionjnú kjín ngase ni̱xtjin ki̱a̱ nangi Kandee̱.