Na̱ Ruu̱t 4 - Xo̱jo̱n eén Néná

Nga ixán na̱ Ruu̱t ko̱jo Boo̱

¹ Kósꞌe̱ Boo̱ kijí ki̱a̱ nga̱ntjo̱a̱ nínga bitjasꞌi̱e̱nnii̱ na̱xi̱ńdaá, ki̱a̱ nínga matikó xotaa̱ nga tsꞌendájin kjo̱a̱xti xi ꞌniú ndikoón. Jaskan ngije jaꞌa chiboa ni̱xtjin, ki̱a̱ jaꞌa xi ingo xota̱ xi xkjín kamá ndie Elimelee̱k. Kó Boo̱ bi̱ katsó nga askjandáyaá: —¡Ji nda̱, ja̱bíꞌi̱n, kꞌi̱e̱ tindyin ngotjón ji, ngatꞌa̱ tjín ngo ni xi xchi̱boáni̱jmì!

² Kósꞌe̱ Boo̱ tji̱e̱nmá tsíchji̱a̱a̱ tie xota̱ xi ꞌniú yandikón ki̱a̱ ndí na̱xi̱ńdáꞌniú Belee̱n, kó katsóyaà tsi̱ꞌe̱ nga ki̱a̱ kꞌuíndojii̱n kui xotaa̱. Kó ngije kisꞌińdo,

³ Boo̱ bi̱ katsoó kui xota̱ xi ingo xi xkjín kamá ndie Elimelee̱k: —Na̱ Noemii̱ sꞌe̱ jeꞌe má nga kjindibáni nangii̱ xota̱ Moaa̱b, kó mején xoò ko̱tíñá tꞌanangi xi tsi̱ꞌe̱ ndie xi̱ꞌii̱n kamá, ndie Elimelee̱k kui xi xingi̱ ñá má.

⁴ Kó an boá xi kamámejénna nga xchi̱e̱ ji kui nii̱, ko̱jo mejénna nga ji si̱ꞌi̱ntsie ji, ngatꞌa̱ jí boá xi tjón tikoón kui kjo̱a̱ndaa̱. Kó míꞌaá ngindyi̱ko̱n kui xota̱ xi chistikoo̱, nga kꞌuiyéní tsi si̱ꞌi̱ntsie ji ko̱jo tsi jmí, ngatꞌa̱ ta̱ jó tsí má ñá xi xota̱ xi xkjín kamá kui ndiee̱, xi tjínna kjo̱a̱nda nga ka̱ma si̱ꞌantsié. Kósꞌe̱ tji̱e̱nmá bi̱ katsó kui xota̱ xi ingoo̱: —Jo̱o̱n ndakjiꞌi, ka̱ma kꞌotsie an.

⁵ Kósꞌe̱ Boo̱, bi̱ katsó ngasee̱: —Tsi si̱ꞌi̱ntsie ji kui tꞌanangii̱, ti̱ chjiéngá ku̱i̱xenje̱ ji na̱ Ruu̱t nga, kui xota̱chjo̱on kꞌán xi je kꞌien xi̱ꞌii̱n xi nijan kjindibájo̱ na̱ Noemii̱ ndeskande nangii̱ xota̱ Moaa̱b. Kó bo̱a̱ tsꞌén kjiꞌanga stse̱én ndí xí tjoón, xcha̱jàjín jaꞌeén ndie xi̱ꞌii̱n na̱ Ruu̱t, kó nga kui tꞌanangii̱ tsi̱ꞌe̱ kui ndií ka̱ma ngijee̱.

⁶ Kó bi̱ katsó xi ingo xota̱ xi xkjín kamá ndie Elimelee̱k: —¡Ann a bo̱a̱, ja̱ ta̱sara̱ kꞌotsiejín an tsobo̱a̱! Ngatꞌa̱ tsi kꞌotsie an xcha̱ja án ngayeje kui to̱o̱n, kó tsi kꞌuié ngasejne̱ kje̱ꞌe ndí, ndí xí tsa̱ꞌa̱n maá ta̱ chiboa tsí ni xi sa̱ko̱ó, ta̱sara̱ nda ngase nga ji si̱ꞌi̱ntsiée̱.

^7-8 Kó kui xotaa̱, ngo kjo̱a̱xchá xí kisꞌijña kui ni̱xtjin jàn ki̱a̱ na̱xi̱ńdá Israee̱l kijítji̱ngi, kósꞌe̱ kui xota̱ xi ingoo̱ tsꞌaxié ngo tji̱xíndié xí kjiyaa̱, sꞌe̱ katsjaá Boo̱ nga bi̱ katsoó: —Chjábé jí tji̱xíndiéna, ngatꞌa̱ kuí bí kui nii̱ xi ko̱kó nga ta̱ jí tsí xi ka̱ma si̱ꞌi̱ntsie ji kui tꞌanangii̱.

⁹ Kósꞌe̱ Boo̱ bi̱ katsoó xota̱ xi kamátikó kuí ngi̱ndiee̱: —Jún boá xi chistiko̱jnú nga kui ni̱xtjii̱n kꞌotsiée na̱ Noemii̱ ngayeje tꞌanangi xi tsi̱ꞌe̱ ndie Elimelee̱k kamá, ko̱jo ngayeje ni xi kisꞌiee̱ ndií.

¹⁰ Ko̱jo xiyàjnúꞌun nga an ku̱i̱xanjo̱ an na̱ Ruu̱t, kui xota̱chjo̱on xí íjñakꞌán ndie Majloo̱n. Kó bo̱a̱ tsꞌén ngije stse̱én ndí xí tjoón, kuí boá xi tsi̱ꞌe̱ ka̱ma kui tꞌanangii̱, kó xcha̱jàjín jaꞌeén xota̱ tji̱e̱e̱ kui ndiee̱, kó kui xotaa̱ kꞌi̱e̱ kꞌuíndora kꞌi̱e̱ ndí na̱xi̱ńdáꞌniú Belee̱n. Kó bi̱ katsó kui xota̱ xi síndo ki̱a̱a̱:

¹¹ —Jo̱o̱n, chistiko̱ ji̱n kjo̱a̱a̱ kui nii̱. Mejénjne̱ nga Néná tsja̱ndiè nga na̱ Ruu̱t ka̱ma xikoó na̱ Rakee̱l, ko̱jo xikoó na̱ Liyaa̱, kui ínchjín xí achichí kjín ndí kisꞌiee̱, kui xi ki̱a̱ kjindibánii̱ xota̱ tji̱e̱ná ñá xí xota̱ Israee̱l.

¹² Kó nga ngije ku̱i̱xenje̱ ji kui na̱ kjindií, Néná nga tsjandièjnú nga kjín ka̱ma ndíjnú xikoó xota̱ tji̱e̱e̱ Faree̱, ndií Jundáa̱ ko̱jo na̱ Tamaa̱r. Kó nga ji xi ꞌniú ka̱macho̱n ngase ji, ngayeje nangi Efrata̱, ko̱jo nga ꞌniú ngatamayandikoón ki̱a̱ ndí na̱xi̱ńdáꞌniú Belee̱n.

Ni̱xtjin nga katsen Obee̱nd

¹³ Ngije jaꞌa chiboa ni̱xtjin Boo̱ ixánjo̱ na̱ Ruu̱t, kó Néná katsjaá ngi̱ndie nga tsaꞌa ndí.

¹⁴ Ngije katsen kui ndií, ínchjín xi chji̱a̱ni ndí na̱xi̱ńdáꞌniú Belee̱n, bi̱ katsoó na̱ Noemii̱: «Ngatamachikonñé Néná, kui Néná xi katsjaá ngo ndínde kui xi skoón ji, Néná ngatsjaá kui ndií nga ꞌniú xcha̱ndikón ngayeje nangi Israee̱l.

¹⁵ Kuí boá xi sa̱ꞌíntsjaá, kó skoón ngije ka̱maxchá ji, ngatꞌa̱ ndií kja̱ndàa̱ boá. Na̱ Ruu̱t ꞌniú chjí ngasenii̱ ta̱bo̱a̱jiín yito ndí xíꞌín, ngatꞌa̱ achichí tjoó ji, kó ta̱nisién ndaxota̱ tjítsꞌenjoo̱».

¹⁶ Kósꞌe̱ na̱ Noemii̱ iskjíbé kui ndií, kó janíkjá, kó ndeskande koó kjiꞌa kui askoo̱n.

¹⁷ Ínchjín xi síndotꞌa ndiꞌaa̱ tsangasee̱ ngo jaꞌén, kó, Obee̱nd, ítꞌajaꞌén. Kó ngayeje xota̱ amingoo̱ bi̱ katsó: «¡Na̱ Noemii̱ je tjiín ngo ndií!»

Obee̱nd boá xi kamá na̱ꞌmindyiboaa̱ Ndabii̱

¹⁸ Ngije kamáxchá Obee̱nd kuí boá xi kamá na̱ꞌmii̱ Jesee̱, ko̱jo kuí boá xi kamá na̱ꞌmindyiboaa̱ Ndabii̱. Kuí bí xi̱ꞌbi̱ xi xota̱ tji̱e̱e̱ Faree̱: Faree̱ kuí boá xi kamá na̱ꞌmii̱ Esroo̱n,

¹⁹ Esroo̱n na̱ꞌmii̱ Raa̱n, Raa̱n na̱ꞌmii̱ Aminandaa̱b,

²⁰ Aminandaa̱b na̱ꞌmii̱ Naasoo̱n, kó Naasoo̱n na̱ꞌmii̱ Salmoo̱n,

²¹ Salmoo̱n na̱ꞌmii̱ Boo̱, kó Boo̱ na̱ꞌmii̱ Obee̱nd,

²² Obee̱nd na̱ꞌmii̱ Jesee̱, kó Jesee̱ na̱ꞌmii̱ Ndabii̱.