Na̱ Ruu̱t 3 - Xo̱jo̱n eén Néná

Bi̱ tsꞌén tsangase nginí xi̱ꞌin kja̱ndaa̱ na̱ Noemii̱

¹ Ngo ndi̱yà na̱ Noemii̱ tsíchji̱a̱jo kja̱ndaa̱ nga bi̱ katsoó: —Ji chjo̱on, tjínna ngo kjo̱a̱ꞌniú án tsi̱ꞌe̱ nga kongasee kje̱ꞌe xíꞌín. Mejénna nga kꞌuieé ngo ndiꞌa xi tse̱ so̱bo̱e̱, ko̱jo nga tsjatsꞌèn ku̱i̱ndyin ji.

² A foaꞌátsjiee̱n ni xi kixiaan kjo̱a̱a̱ Boo̱, kui xota̱ xi tsi̱ꞌe̱ tꞌanangi nínga tiniꞌínxé jí. Xkjín ndie xi̱ꞌinna boá kui xotaa̱. Nda má ndaꞌyé ji ni xi xiaán: Kui ni̱xtji̱e̱e̱n ki̱a̱ kꞌuijñá kui ngi̱ndiee̱ nga sa̱ꞌíntsjie xtjieé sebandaa̱.

³ Ti̱ndáyé ji, tindyiée̱ ndásíje̱n yojòo̱, kó chi̱e̱je ji xtjí xi ndakjiꞌi ngasèe̱. Kó tꞌen ji ki̱a̱ ngi̱ndie nínga tjitsꞌénxá Boo̱, ta̱nga ngata̱ bokejíi̱n yojòo̱, ngaskande ngije kamaá nga iskjinie ko̱jo nga katsꞌe ṉño̱ ko̱jo ndá.

⁴ Tsitsíjin ndé ndée̱ nínga kjojñá. Kó ngije kjiꞌifé, tꞌen tsjajnitꞌée̱. Bo̱a̱ tsꞌén nga ka̱makjiín kui, nga ji mejeén nga kui xi skoón, kó ti̱kuíní bo̱a̱ xi ka̱tso̱yaa̱ ni xi si̱ꞌin ji ngijee̱.

⁵ Kó na̱ Ruu̱t bi̱ katsoó ṉchiꞌyaá: —Ndakjiꞌi, ja̱bo̱a̱ sa̱ꞌin an ngayeje ni xi je kasení.

⁶ Kósꞌe̱ na̱ Ruu̱t kijí kui ngi̱ndie jàn, kó bo̱a̱ má katsꞌén xikó katsoó ṉchiꞌyaá.

⁷ Ngije kamaá Boo̱ nga iskjinie ṉño̱ ko̱jo nga katsꞌe ndá, ki̱a̱ kijíkjajña nínga síndotikó sebandaa̱, kó achichí tsjákjiꞌii̱. Ngije kisꞌifé Boo̱, na̱ Ruu̱t inda inda ko̱jo si̱e̱n si̱e̱n kijíkóntiñaa̱, kósꞌe̱ ki̱a̱ kisꞌietꞌaa̱.

⁸ Nga kamá masien ni̱xtji̱e̱n, ta̱niján má jaꞌaá Boo̱, kó nga katsꞌéntíyá kamákjiín nga tjín xi kjiꞌijñatꞌaa̱.

⁹ Kósꞌe̱ Boo̱, bi̱ katsoó na̱ xi kjiꞌijñatꞌaa̱: —ꞌYá jií bo̱a̱. Kó na̱ Ruu̱t bi̱ katsó: —Na̱ mosoo̱ boá an. Xota̱ xkjín ndie xi̱ꞌinna ko̱jo ṉchiꞌyána má ji, kó an ko̱jo ṉchiꞌyána chjiénjne̱ nga ji xi xchínjne̱. Mejénna kuíꞌaá nga ku̱i̱xenje̱ní.

¹⁰ Kó bi̱ katsó Boo̱: —¡Néná ngatsꞌénchíkonñeé! Ngatꞌa̱ je be an nga ta̱nisién ꞌnítakín ji ṉchiꞌyáa̱ ko̱jo xota̱ xingi̱ ji, kó nga jmí tsi ta̱ yojòo̱ xí nda̱ kjimaa̱. An tichjiéꞌéní nga mejeén nga an xi ka̱ma an xi̱ꞌíi̱n, ta̱nga kamá tsi ngo nda̱ xi kjindí ngase xi ku̱i̱xenje̱ ji.

¹¹ Ngata̱ ndakinjín ma ji na̱ Ruu̱t, ngatꞌa̱ ngayeje xota̱ na̱xi̱ńdáꞌniú Belee̱n be nga nda ji xota̱, kuíni nga sa̱ꞌinkjatjosón án ni xi tichjiéꞌéní.

¹² »Kjénní nga an xingi̱ jún má an, kó nga tjínna ngo kjo̱a̱ꞌniú nga an skonjnúꞌun, ta̱nga tikón ingo xota̱ xi ꞌniú tiña ngase májnú nga xingi̱jnú, ta̱bo̱a̱jiín an.

¹³ Ta̱sá xió ti̱ꞌinkjaꞌyé ji ngotꞌe̱, kó ndyiojón xcha̱ tsí kui xotaa̱ ka̱mamejeén skoón ji, tsi sa̱ꞌín jo̱ꞌo, jmí kjo̱a̱xtijínna, ta̱nga tsi jmí ka̱tso̱, ngiboanéná nga an skoon ji. Tꞌenni̱ꞌinkjaꞌyé ꞌne̱, kó nda tsjáfé, ndyiojón chiboá.

¹⁴ Kó na̱ Ruu̱t ki̱a̱ kisꞌietꞌaa̱ Boo̱, kósꞌe̱ kisꞌifé. Nga kamángindyiojón ti̱ jñóyà ngase nga jastjíe̱n na̱ Ruu̱t, bo̱a̱ katsꞌén ngatꞌa̱ Boo̱ kamámejénjiín nga tjín xí sku̱i̱e̱ nga ngo na̱ jachókjajñá nínga tikón ngi̱ndie nínga tsꞌénxá. Ta̱nga ngindiee̱ nga ko̱e̱je̱ ndí na̱xi̱ńdáꞌniú Belee̱n,

¹⁵ Boo̱ tsíꞌaá na̱ Ruu̱t nga ku̱i̱e̱jéntie ńjño xi kjitꞌa nga̱xto̱n, kósꞌe̱ ki̱a̱ indyiá tsꞌatiora̱ yichán kilo̱ sebanda̱. Sꞌe̱ ngije asíko̱jo nga ísoón tjiaa̱, na̱ Ruu̱t kijí nginí ndí na̱xi̱ńdáꞌniú Belee̱n.

¹⁶ Nga jachó nginí na̱ Ruu̱t nínga tikón ndiꞌaa̱ ṉchiꞌyaá, na̱ Noemii̱ bi̱ katsoó: —Mí xí kjima chjo̱on, a nda kamá nínga kꞌin ji. Kó na̱ Ruu̱t katsóyaà ṉchiꞌyaá ngayeje ni xi katsꞌén Boo̱ nganda tsi̱ꞌe̱,

¹⁷ kó bi̱ katsó ngase na̱ Ruu̱t: —Boo̱ boá xi katsjána ngayeje kui sebandaa̱, kó bi̱ katsóna: “Sa̱ꞌinkjítiyajaán nga kꞌuin nginí ji ndiꞌaa̱ ṉchiꞌyáa̱”.

¹⁸ Kósꞌe̱ na̱ Noemii̱ bi̱ katsoó na̱ Ruu̱t: —Ngotꞌe̱ ꞌne̱ ta̱ chjién tsí nga xchiyá sakon sakoón chjo̱on. Beriíko̱n an nga sa̱ꞌínkjaꞌyájín Boo̱ ngaskande nga ka̱mandajin kui nii̱.