Na̱ Ruu̱t 2 - Xo̱jo̱n eén Néná

Bi̱ tsꞌén katsꞌénxá na̱ Ruu̱t ngi̱jin tꞌanangii̱ Boo̱

^1-2 Ngije jaꞌa ni̱xtjin, na̱ Ruu̱t bi̱ katsoó na̱ Noemii̱: —Te̱ꞌéndièní nga kjuínkjáꞌaꞌyá an ńtiín sebanda̱. Beriíko̱n an nga xota̱ xi botie ńtiín tsja̱ndièna nga kjoaꞌaꞌyá an ńtín xí ku̱i̱xo̱ngi nínga ndyi̱tsꞌènxá. Kó na̱ Noemii̱ bi̱ katsoó: —Tꞌen ji chjo̱ón.

³ Kósꞌe̱ na̱ Ruu̱t kijí nínga tjitjíe̱ sebandaa̱, kó ítsꞌi̱yanii̱ nga jaꞌátikó ńtín xí ixóngií xota̱ xi ndyi̱tsꞌènxaá. Kó nde bejín na̱ Ruu̱t nga kui kꞌijñá nínga tjitsꞌénxaá tsi̱ꞌe̱ Boo̱ boá, kui xota̱ xi xkjín kamá Elimelee̱k, ndie xi̱ꞌii̱n na̱ Noemii̱. Boo̱ achichí cho̱n kamá kó ꞌniú kamáyàndikón ki̱a̱ ndí na̱xi̱ńdáꞌniú Belee̱n.

⁴ Kó Boo̱ jatjoni na̱xi̱ńdáꞌniú Belee̱n, sꞌe̱ jachókatsijen ki̱a̱ nínga tjíniꞌánxaá. Kó bi̱ tsꞌén katsꞌéntinde xota̱ xi ndyi̱tsꞌènxaá: —¡Tindejnú, Néná nga kónjnú ngayejejnú! Kó kui xotaa̱ bi̱ katsó: —¡Néná ngatsꞌénchíkonñéra ngasee̱ ji!

⁵ Kósꞌe̱ Boo̱ bi̱ katsoó moso̱ xi tikóntjoón xaá: —ꞌYá naa̱ bo̱a̱ xi̱ꞌba̱.

⁶ Kó bi̱ katsó kui mosoo̱: —Na̱ xi chji̱a̱ni nangii̱ xota̱ Moaa̱b boá, kui xi nijan jeꞌejo̱ na̱ Noemii̱.

⁷ Achichí ꞌniú tsíꞌána nga tsjandièe̱ nga kjo̱a̱ꞌáꞌyá ńtín xí bixóngií xota̱ xi ndyi̱tsꞌènxaá. Ndeskande koó ngoye ta̱jñó jeꞌe, achichí ꞌniú tjitsꞌénxá, kó sꞌe̱ tsí chií tjítsꞌénkjaꞌyá ngotjón ki̱a̱ nínga tji̱nkꞌi̱e̱én.

⁸ Kósꞌe̱ Boo̱ tsíchjiáa na̱ Ruu̱t, kó bi̱ katsoó: —Ji tsa̱kjìn, nda nda má ndaꞌyé ji ni xi xiaán: ngata̱ xínjín ngi̱ndie ꞌmi chjeꞌéꞌyé ji ńtín, ta̱sá kꞌi̱e̱ ti̱ndyinra ji,

⁹ kó ki̱a̱ nijan ti̱ꞌinxéje̱ ji ínchjín moso̱na. Nda má tsitsíjìi̱n nínga ndyi̱tsꞌènxá, kó ki̱a̱ ti̱ńtje̱tji̱ngìi̱. Jè bo̱a̱ kixiáa̱n moso̱na nga sa̱ꞌínxtíjiín. Kó nga ka̱ma xíndaá, ki̱a̱ tꞌi̱ ji ndáfoa nínga síndo ti̱jì ndáfoa xi je íkitsie moso̱na.

¹⁰ Kósꞌe̱ na̱ Ruu̱t, ni̱ma̱kjo̱a̱ íjñá yojoo̱, kó asiéntikoó ngaskande nga kisitꞌaa̱ xtjien tꞌanangii̱, kó bi̱ katsó nga asíyaá Boo̱: —Ánní nga bo̱a̱ má ta̱ nda niꞌínje̱ní. Ánní nga nda̱ maa̱ an, nga ye ji nga jmí tsi kui nangii̱ chjiá an.

¹¹ Kó Boo̱ bi̱ katsoó: —Jè kiꞌmíyàna ngayeje ni xi kiniꞌín ji nganda tsi̱ꞌe̱ ṉchiꞌyáa̱, ngije ja̱bo̱a̱ je kꞌien xi̱ꞌíi̱n. Kó ti̱ jè be an nga ikꞌíndemasin ji xi xota̱ ndiꞌàa̱, ko̱jo nangi nínga katsen ji, tsi̱ꞌe̱ nga kꞌi̱e̱ kjindibékindyin ji ngi̱jii̱n xota̱ xi nde yejín ji ꞌyání bo̱a̱.

¹² ¡Néná nga tꞌíchjií ngayeje ni nda xi kiniꞌín ji! ¡ꞌNiú nda ngatsꞌénjoo̱ kui Néná xí tsi̱ꞌe̱ na̱xi̱ńdá Israee̱l, kui xi timindyisé ji nga skoón!

¹³ Kósꞌe̱ na̱ Ruu̱t bi̱ katsoó Boo̱: —¡Ndokꞌóchji̱ì ji xingá! Achichí nda niꞌínje̱ní, kó tsjá maa̱ ini̱ma̱na, ndatsi jmí tsi na̱ moso̱ tse̱ ma an.

¹⁴ Nga jachó chi̱bo̱a̱a̱ nga chinie ṉño̱o̱, Boo̱ tsíchji̱a̱a̱ na̱ Ruu̱t, kó bi̱ katsoó: —Ja̱bíꞌi̱n, tjín pan, ko̱jo ndáxti̱ ko̱jo to xi kamátsjó kꞌi̱e̱e̱, ka̱má xi̱ni̱ ji. Kó na̱ Ruu̱t ki̱a̱ kisꞌijña nga iskjinie nichinie, nínga síndo ngayeje xota̱ xi tsꞌénxaá. Kó iskjinie kó katsꞌe ngaskande nga kitsiee̱ cha̱n cha̱a̱n, kó ngaskande tsꞌangii̱ nichinie xi yaꞌaa̱ ṉchiꞌyaá.

¹⁵ Ngije kijíkjaꞌaꞌyá nginí ńtín na̱ Ruu̱t, Boo̱ bi̱ katsoó xota̱ xi ndyi̱tsꞌènxaá: —Te̱ꞌéndièjnúu̱ na̱ Ruu̱t nga ko̱jo nínga síndo chꞌo̱ ńtín xi tjíꞌniuú sebandaa̱ ngatjaꞌáꞌyá nga.

¹⁶ Kó tatítsojo chiboajnú ńtín xí je ndyi̱ꞌbíꞌniújnú, ki̱a̱ ka̱maa̱ nga kjo̱a̱ꞌáꞌyá. Kó ngata̱ niꞌánxtíjínjnúu̱.

¹⁷ Kó bo̱a̱ tsꞌén na̱ Ruu̱t jaꞌátikó ńtín, ngaskande nga kamájñoó. Nga iñá kui ńtiín sebanda̱ xi jaꞌátikoó, kamábe nga tsꞌatiora̱ kan kilo̱ kamá kui too̱.

¹⁸ Iskjíbé kuí sebanda̱ xi jaꞌátikó kuí ni̱xtjii̱n, kó nga kijí nginí ndí na̱xi̱ńdáꞌniú Belee̱n akoó ṉchiꞌyaá ngayeje kui to xi jaꞌátikoó. Kó ti̱ katsjaá na̱ Noemii̱ nichinie xi tsꞌangii̱. Kósꞌe̱ na̱ Noemii̱ bi̱ katsó nga asíyaá:

¹⁹ —Ñá kiniꞌínxé jí ngotꞌe̱. Kótsꞌèn kamánii̱ nga bo̱a̱ kjiꞌi sebanda̱ katjaꞌátikoó. ¡Néná ꞌniú ngatsꞌénchíkonñé kui xi bo̱a̱ má ta̱ nda asíko̱joo̱! Kó na̱ Ruu̱t katsóyaà ṉchiꞌyaá nga ki̱a̱ katsꞌénxá nínga tikón tꞌanangii̱ ngo xota̱ xi ꞌmí Boo̱.

²⁰ Kó na̱ Noemii̱ bi̱ katsoó na̱ Ruu̱t: —¡Néná ngatsꞌénchíkonñé kui xotaa̱! ¡Achichí ndaxota̱ tsꞌénjo̱ná ñá, ko̱jo xota̱ná xi je jesoón! Kui xota̱ xi se ji, xota̱ xkjín ndie xi̱ꞌinna boá, kó tsó kjo̱a̱kiti xi tjínná, nga tjín xoò ngo kjo̱a̱ꞌniú nga skónná.

²¹ Kó na̱ Ruu̱t, bi̱ katsó ngase: —Kui xotaa̱ jè bo̱a̱ katsóna, nga ka̱ma xò ki̱a̱ nijan sa̱ꞌinxájo̱ an ínchjín mosoo̱, ngaskande nga kju̱i̱e̱ cha̱a̱n sebandaa̱.

²² Kósꞌe̱ na̱ Noemii̱, bi̱ katsoó na̱ Ruu̱t: —¡Achichí ndakjiꞌi kui nii̱ chjo̱ón! Ja̱ ki̱a̱ ti̱ꞌinxé ji tꞌanangii̱ Boo̱, kó ngata̱ kjinjín niꞌíi̱n yojoo̱ mosoo̱ kui, tsi̱ꞌe̱ nga sa̱ꞌínxtíjiín xota̱ xi xín ndyi̱tsꞌènxá.

²³ Kó na̱ Ruu̱t ki̱a̱ nijan jaꞌátikórá ńtiín sebanda̱ ko̱jo ínchjín mosoo̱ Boo̱, ngaskande nga je cha̱a̱n sebandaa̱, ko̱jo to ndso̱ko̱a̱n ṉño̱paa̱n, kó bo̱a̱ tsꞌén ki̱a̱ kisꞌijñajo̱ra ṉchiꞌyaá.