Na̱ Ruu̱t 1 - Xo̱jo̱n eén Néná

Bi̱ kamá nga kijí Elimelee̱k ko̱jo xota̱ ndiꞌaa̱ nangii̱ xota̱ Moaa̱b

^1-2 Kjiꞌanga kji̱e̱ jmíjín re xi atíxoma ki̱a̱ na̱xi̱ńdá Israee̱l, kisꞌie xota̱ xí ꞌboxiéꞌá xotaa̱. Kó kui ni̱xtjin jàn, jmí ni kamáxchájiín tꞌanangii̱, kó jmí nichinie kisꞌiejiín xotaa̱. Bo̱a̱ tsꞌén kjindibáni nga Elimelee̱k ko̱jo na̱ Noemi̱ chjo̱ón, ko̱jo Majloo̱n, ko̱jo Kelioo̱n nga jó ndí xíꞌiín, xi chji̱a̱ni Belee̱n, ndí na̱xi̱ńdá xi botixómaá nangi Jundáa̱, ki̱a̱ kijíkꞌíndo ngo ngi̱ndie xi ꞌmí Moaa̱b, ngatꞌa̱ kisꞌie nichinie kui ngi̱ndiee̱.

³ Kó ngije jaꞌa chiboa ni̱xtjin nga jachó nangii̱ xota̱ Moaa̱b kꞌien Elimelee̱k, xi̱ꞌii̱n na̱ Noemii̱, kó kui xota̱chjo̱on ko̱jo ndií kisꞌińdo soboá.

^4-5 Ngije jaꞌa ni̱xtjin Majloo̱n, ko̱jo Kelioo̱n nga jó ndií kui xota̱chjo̱on kisꞌiee̱ chjo̱on ki̱a̱ na̱xi̱ńdá Moaa̱b. Ngo kja̱ndaa̱ xi na̱ Orfa̱ kiꞌmí, ko̱jo ngo xi na̱ Ruu̱t kiꞌmí, ta̱nga ngije jaꞌa mején mara̱ ngi tie nó ngase, jesón Majloo̱n ko̱jo Kelioo̱n. Kó kisꞌijña soboá na̱ Noemii̱, ngiti̱ jmí xi̱ꞌin ko̱jo ngiti̱ jmí ndí kisꞌiejiín.

Bi̱ tsꞌén kijí na̱ Noemii̱ ko̱jo na̱ Ruu̱t ndí na̱xi̱ńdáꞌniú Belee̱n

⁶ Ngo ni̱xtjin na̱ Noemii̱ tsintꞌié nga Néná katsꞌénchikonñé na̱xi̱ńdá Israee̱l nga tsie ni kamáxchá ki̱a̱a̱.

⁷ Kósꞌe̱ índa yojoo̱ kui ko̱jo ínchjín kja̱ndaa̱ tsi̱ꞌe̱ nga kjo̱tjoni kui ngi̱ndiee̱, kó ki̱a̱ ko̱e̱je̱ nangi Jundáa̱.

⁸ Nde kji̱e̱ kjinjín ndyi̱fochó kjiꞌanga na̱ Noemii̱, bi̱ katsoó ínchjín kja̱ndaa̱: —Ta̱sá tangín nginíjnú ndiꞌajnú. Kó Néná nda ngatsꞌénjo̱jnú, xikó kiniꞌánjo̱jnúꞌun an ko̱jo ndína xi je jesoón.

⁹ Míꞌáa̱ Néná nga ngatsjandiè nginíjnú nga ka̱ma ku̱i̱xan nginíjnú, kó nga kꞌuié nginíjnú ingo ndiꞌa nínga ku̱i̱ndyionjo̱jnú xi̱ꞌin xi sa̱kójnú. Sꞌe̱ na̱ Noemii̱ katsꞌénkixotꞌa nga katsjaá ngo ndsó tꞌanijon, ta̱nga na̱ Orfaa̱ ko̱jo na̱ Ruu̱t ítsꞌi̱yanii̱ nga askjandá,

¹⁰ Kó bi̱ katsó: —¡Mejénjínjne̱ nga kꞌuíndo masien xingi̱! ¡Ngo kjo̱a̱nda, te̱ꞌéndièjne̱ nga ki̱a̱ ku̱i̱ndyionjo̱jne̱ ji nínga tjíndo xota̱ tse̱!

^11-13 Ta̱nga na̱ Noemii̱ bi̱ katsoó kui ínchjiín: —¡Tangínrajnú nínga ndyi̱mongínjnú, ndí ínchjín! Mí tsjá nga an kongintjingíjnúꞌun. Jè ngiti̱ jmíjín ngasena ndí xíꞌín xi ka̱ma ku̱i̱xanjo̱jnú, kó an jè ꞌniú xchá an tsi̱ꞌe̱ nga kꞌuié nginína xi̱ꞌin. Kó ndatsi ngotꞌe̱ má ku̱i̱xan an, kó ndatsi tsá kꞌuiéna ndí. A xchiyàjnúu̱ ngaskande nga ka̱maxchá nginí kui ndií. ¡Jmí, ndí ínchjiín, ka̱májín kui nii̱! Achichí tsie ngase kjo̱a̱ni̱ma̱ tsꞌénfoaꞌatio an, ta̱bo̱a̱jiín jún, ngatꞌa̱ Néná kondra̱ tikónnii̱ an ngotꞌe̱.

¹⁴ Nga tsintꞌié kuí nii̱ kui ínchjiín, ti̱ achichí askjandá ndasen nginí. Ti̱chaa̱n na̱ Orfaa̱ katsꞌénkixotꞌa ṉchiꞌyaá, sꞌe̱ kijí, ta̱nga na̱ Ruu̱t ki̱a̱ kisꞌijñajo̱ na̱ Noemii̱.

¹⁵ Kósꞌe̱ na̱ Noemii̱ bi̱ katsoó na̱ Ruu̱t: —¡Jéꞌe̱n, na̱ Orfa̱ kui xi kja̱ndako̱jóo̱ ma, jè kijíꞌoyá nginí nangii̱, kó ki̱a̱ kijítji̱ngi nginií ne xi tsꞌéndíkón! ¡Tꞌenje̱ ji nga!

¹⁶ Ta̱nga na̱ Ruu̱t bi̱ katsó: «Ngata̱ chjiéꞌéjínní nga kꞌuijñámasiee̱n, ti̱nde ngata̱ ꞌniújín chjiéꞌéní nga sa̱ꞌinkjiin yojona. Ta̱ nínga kꞌuin ji, ki̱a̱ kjuín an nga, kó ta̱ nínga ku̱i̱ndyin ji, ti̱ ki̱a̱ kotíjña̱ an nga. »Nangìi̱, nangina ka̱ma, kó Nèe̱, Ne tsa̱ꞌa̱n ka̱ma nga.

¹⁷ Nínga ko̱yè jí, ti̱ ki̱a̱ ko̱yà an nga, kó ti̱ ki̱a̱ kjónijínna nga. »Néná ngatsꞌénjéna tsi kꞌuijñámasiee̱n, jmíjín ngo ni xi kꞌo̱xiékjoná xingi̱, ¡jmíjín ngo ni, ti̱nde kjo̱a̱bo̱yaa̱ kamájín kꞌo̱xiékjoná!»

¹⁸ Sꞌe̱ na̱ Noemii̱ ngiti̱ jmí ni katsójín ngasee̱ na̱ Ruu̱t nga kamábe nga je katsjaákon nga nijan ko̱e̱je̱jo.

¹⁹ Kó bo̱a̱ tsꞌén kijíyise ngaskande nga jachó na̱xi̱ńdáꞌniú Belee̱n. Ngije tsꞌasꞌien kui ndí na̱xi̱ńdaá, ngayeje xotaa̱ kijíndikoón nga kamábe, kó simónié simóꞌón kamá. Ínchjín xí kamábee̱ bi̱ katsoó xkjín: «¡A kuijín kui xota̱chjo̱on xi ꞌmí na̱ Noemii̱, xi na̱ ixii̱ ꞌmií nga!»

²⁰ Kó na̱ Noemii̱ bi̱ katsó: «Ngo kjo̱a̱nda kuíꞌájnúꞌun, ngata̱ na̱ ixijín ꞌmíjnúꞌun, ta̱sá na̱ xi sa tꞌínjnúꞌun, ngatꞌa̱ Néná xí tjiín ngaꞌniuú, jè katsꞌén sa kjo̱a̱mindyionna.

²¹ Nga jatjo an na̱xi̱ńdáꞌniú Belee̱n, ngayeje nii̱ xi kisꞌiena, ta̱nga ngotꞌe̱ ꞌne̱, nga kjoéꞌe̱ꞌoya nginí an, ta̱ kjiꞌitiya tsi ndsa̱ an nga katsangiyana Néná. Ánní nga na̱ ixi ꞌmíjnúꞌun, xi Néná xí tjiín ngaꞌniuú kondra̱na tikón, kó achichí kjo̱a̱ni̱ma̱ tjítsꞌénkꞌátiona.»

²² Kó bo̱a̱ tsꞌén na̱ Noemii̱ jeꞌeꞌoyá nginí nga kjindibáni nangii̱ xota̱ Moaa̱b, nga tsoꞌbájo̱ na̱ Ruu̱t kui xi kja̱ndaa̱. Nga jachó na̱xi̱ńdáꞌniú Belee̱n jè má tsꞌén ꞌbítsꞌi̱yanii̱ nga bichá sebandaa̱.