Na̱ Estee̱r (Ebreo̱) 7 - Xo̱jo̱n eén Néná

Na̱ re Estee̱r katsꞌén nginí ingo sꞌué

¹ Re Asueroo̱ ko̱jo Amaa̱n kijí kui sꞌué xí katsꞌén na̱ re Estee̱r.

² Kó kui sꞌué xi ma joó, tji̱e̱nga ndyi̱ꞌbi bino̱, ti̱ bi̱ ti̱ katsó nginí ree̱ nga asíyaá na̱ re Estee̱r: —Mí xí chji̱e̱ꞌe ji na̱ re Estee̱r. Ngatꞌa̱ ko̱e̱ꞌeéri. Mí xí mejeén nga tsjaa, ngatꞌa̱ ngaskande ndatsi masien nangi nínga tsꞌénbotixoma an tsjaa tsi kui nii̱ xi chji̱e̱ꞌéní.

³ Kósꞌe̱ na̱ re Estee̱r, bi̱ katsó: —Ji re, tsi ja̱koxi̱ nga nda tsꞌákaa̱ an, ko̱jo tsi nda sasieén ni xi xiaán, ngo kjo̱a̱nda míꞌaá, ngata̱ niꞌínkꞌínjínní án ko̱jo xota̱ na̱xi̱ńdána nga.

⁴ Ngatꞌa̱ an ko̱jo xota̱ na̱xi̱ńdána akatíñájne̱ tsi̱ꞌe̱ nga si̱ꞌankꞌienjne̱, ko̱jo nga si̱ꞌankjiekjinjne̱. Tsi xikoó moso̱ nga akatíñájne̱, nde jmí ni xiánjín an, ta̱nga kui ni si̱ꞌanjo̱jne̱, ndajín sa̱ꞌiín jí re.

⁵ Kó re Asueroo̱, bi̱ katsó nga asíyaá na̱ re Estee̱r: —ꞌYá xi kamákón, kó ñá tikón kui nda̱ xi bo̱a̱ tsꞌén katsꞌénkjó, nga bo̱a̱ kjiꞌi ni xi ndajín xi mejeén sa̱ꞌiín.

⁶ Kó na̱ re Estee̱r, bi̱ katsó: —¡Kui kondra̱ xi ndajiín kꞌi̱e̱ tikón kꞌi̱e̱e̱, kó Amaa̱n boá! Kó nga tsintꞌié kuí nii̱ Amaa̱n, achichí katsakjónní ngindyi̱ko̱n ree̱ ko̱jo na̱ ree̱.

⁷ Kósꞌe̱ ree̱ achichí katsꞌénxchán, kó jastjíe̱n nínga kjima kui sꞌueé, sꞌe̱ kijí ndi̱tsee̱n ndo̱bo̱a̱xa̱á, ta̱nga Amaa̱n ki̱a̱ kisꞌijña nínga tikón na̱ re Estee̱r, kó ꞌniú tsíꞌaá na̱ ree̱ tsi̱ꞌe̱ nga jmí ni si̱ꞌanjo̱jín, ngatꞌa̱ kamákjiín nga ndajín ka̱mataꞌin.

Bi̱ tsꞌén kiniꞌánkꞌién Amaa̱n

⁸ Kó ngije ree̱ jatjoni ndi̱tsee̱n ndo̱bo̱a̱xa̱á, sꞌe̱ tsꞌasꞌien nginí ngi̱ya nínga kjima kui sꞌueé, Amaa̱n ki̱a̱ tsꞌénkasón ṉchan nínga tikón na̱ re Estee̱r, kósꞌe̱ ree̱, bi̱ katsó nga ꞌniú tsíchji̱a̱: —¡A mejénrií chꞌo si̱ꞌinje̱ kjo̱a̱ꞌniú jí na̱ ree̱ kꞌi̱e̱ ngi̱ya ndiꞌana, ko̱jo ngindyikón án! Ngije bo̱a̱ katsó ree̱, xota̱jun xi tsꞌénxátꞌaa̱, yíꞌmá kje̱n Amaa̱n.

⁹ Kó bi̱ katsó Arbonaa̱, ngo kui xota̱ eunukoo̱ ree̱: —Ndiꞌaa̱ Amaa̱n tikón ngo yá xí kan jó metro̱ nga nkꞌa, xi kui katsjákjo̱a̱ nga ka̱manda tsi̱ꞌe̱ nga ki̱a̱ ku̱i̱jénboaꞌa Marndokeoo̱, kui xota̱ xi katsóyà tsi̱ꞌe̱ jatjoꞌa yojoo̱ ree̱. Kósꞌe̱ ree̱, bi̱ katsó. —¡Ki̱a̱ tjienboaꞌajnú!

¹⁰ Kó Amaa̱n ki̱a̱ ikjienboaꞌa yá xí katsjákjo̱a̱ nga kamánda tsi̱ꞌe̱ nga kjuiénboáꞌá Marndokeoo̱ katsaki, kósꞌe̱ bo̱a̱ tsꞌén nga jaꞌajenda kjo̱a̱niꞌánxchaán ree̱.