Na̱ Estee̱r (Ebreo̱) 2 - Xo̱jo̱n eén Néná

Asueroo̱ tsangase ngo na̱ xi ka̱ma na̱ re

¹ Jaskan ngije kamá kui nii̱, kjiꞌanga re Asueroo̱ je jaꞌajenda, jaꞌátsjiee̱n na̱ Bastii̱ ko̱jo ni xi katsꞌén, ko̱jo ni xi je atíxoma nga si̱ꞌan kjo̱a̱a̱ kui.

² Kósꞌe̱ xota̱ moso̱ xi bosikójo ree̱, bi̱ katsó: —Chjiéngá ku̱i̱ndyi̱sée̱ ree̱, ínchjín xo̱ngò xí tsjakon xi kji̱e̱ jmí xi̱ꞌin ꞌbéjiín.

³ Kó ngatsjáxaá ree̱ xota̱ xi kꞌuíndotjoón ngayeje nangi xi tjín na̱xi̱ńdá nínga tsꞌénbotixómá, tsi̱ꞌe̱ nga kui xi kjo̱a̱ꞌájin ínchjín xo̱ngò xí tsjakon, kó ko̱e̱je̱jo ki̱a̱ na̱xi̱ńdáꞌniú Susa̱, nínga tikón ndo̱bo̱a̱xa̱á, ki̱a̱ ndiꞌaa̱ ínchjiín, kó ki̱a̱ nga koo̱n Engaii̱ xota̱ eunukoo̱ ree̱, xota̱ xi koo̱n ínchjiín, tsi̱ꞌe̱ nga tsja̱á ngayeje ni xi chjieén,

⁴ kó kui tsa̱kjìn xo̱ngò xí ree̱ ka̱mamejeén kꞌuijñájo̱, kui ngatꞌíjñá ngajoo̱ na̱ Bastii̱. Kó tsjá kamaá ree̱ kui ni xi akatíxomaa̱, kó bo̱a̱ katsꞌén xikó kiꞌmií.

Nga jachó na̱ Estee̱r nínga botixómá ree̱

⁵ Ki̱a̱ na̱xi̱ńdáꞌniú Susa̱ kisꞌijña ngo xota̱ jundío̱ xi ꞌmí Marndokeo̱ xi xota̱ tji̱e̱e̱ Benjaa̱ chji̱a̱ni, ndií Jaii̱r, ndíndee̱ Simei̱, ko̱jo ndínde xi ma joó Sii̱.

⁶ Marndokeoo̱ boá ngo xota̱ xi tsangínjo̱ꞌniú ndeskande na̱xi̱ńdáꞌniú Jerusale̱n ko̱jo ree̱ nangi Jundáa̱ kui xi ꞌmí Jekoníaa̱, ko̱jo kje̱ꞌe ngase xota̱, kó kui re xi chji̱a̱ni Babilonia̱ xi ꞌmí Nabukondonosoo̱r boá xi kijíjo̱ kui xotaa̱.

⁷ Marndokeoo̱ katsꞌénxchá na̱ Adasaa̱, kui xi na̱ Estee̱r ꞌmí, tsa̱kji̱ín tsinii̱, na̱ xi kisꞌijñaxꞌi̱a̱n, kó achichí tsjá kisꞌie yojoo̱ ko̱jo tsja kisꞌie kje̱n kui naa̱. Kjiꞌanga jesón xi xchaá, Marndokeoo̱ askoo̱n kui tsa̱kji̱ín xikoó tsi ndií.

⁸ Kó kjiꞌanga je kiꞌmíyà kui kjo̱a̱botíxoma ko̱jo kjo̱a̱kiti xi katsjá ree̱, achichí má ínchjín xo̱ngò xi kamátikó ki̱a̱ ndiꞌa nínga botixómá ree̱, ki̱a̱ na̱xi̱ńdáꞌniú Susa̱, kó Engaii̱ xota̱ xi koo̱n ínchjiín, tsangínjoo̱ ngayejee̱, ko̱jo na̱ Estee̱r nga, ki̱a̱ ndiꞌaa̱ ree̱.

⁹ Engaii̱ nda tsꞌákaa̱ na̱ Estee̱r, kó nda katsꞌénjo̱, sꞌe̱ tji̱e̱nmá atíxoma tsi̱ꞌe̱ nga ko̱e̱ꞌeé ńjño xi ko̱a̱ja̱, ko̱jo ni sije̱n xi sa̱ngínjón yojoo̱, ko̱jo nichinie xi ꞌniú nda. Kó yito ínchjín xo̱ngò xi tsꞌénxá ndiꞌaa̱ ree̱ índo xi skoón na̱ Estee̱r, kó ki̱a̱ kijíjo̱ nínga síndo ínchjín xo̱ngo̱ò, ki̱a̱ ngi̱yaꞌma xi ꞌniú ndakjiꞌi ngase ki̱a̱ ngi̱yaa̱ kui ndiꞌaa̱.

¹⁰ Ta̱nga na̱ Estee̱r katsóyàjín nangi nínga kjindibáni, ko̱jo ñá xota̱ tji̱e̱ chji̱a̱ni, ngatꞌa̱ Marndokeoo̱ ꞌniú tsíꞌaá nga jmíjín xi ka̱tso̱yaa̱.

¹¹ Ndyiojón ndyiojón bo̱a̱ fí bo̱a̱ ndibá katsꞌén Marndokeoo̱ ndi̱tsee̱n ndiꞌa nínga síndo ínchjiín, tsi̱ꞌe̱ nga sku̱i̱e̱ tsi nda tikón na̱ Estee̱r, ko̱jo tsi nda kjimataꞌin.

¹² Kui ínchjín xo̱ngo̱ò fochó ni̱xtjin nga tsoboaá nga fíkoón ree̱, ta̱nga tjón mára ngo nó tikoón kjo̱a̱kitii̱ nga choo̱n nga fonda yojoo̱, jun sá nga tjón nisije̱n xi ꞌmí oleo̱ ko̱jo mirra̱ mindyiaa̱ yojoo̱, kósꞌe̱ xi ngi jun saá nga ndásíje̱n ko̱jo isti̱sije̱n xi nda nangijon yojoo̱.

¹³ Kósꞌe̱ kjiꞌá boá nga kui ínchjiín fíkoón ree̱, kó ngayeje ni xi míꞌá tsi̱ꞌe̱ nga bónda yojoo̱, boeꞌeé, kó tsꞌénkjién kuí nii̱, ndeskande nga fotjoni ki̱a̱ ndiꞌaa̱ ínchjiín, ngaskande nga fochó ndiꞌaa̱ ree̱.

¹⁴ Ńgó ńgó kuí ínchjiín fí nga kamángixoón ndiꞌa nínga tsꞌénbotixómá ree̱, kó nga mangindyiojón fí nginí ndiꞌa xi ma joó kui ínchjiín, ki̱a̱ nínga konda Saasgaa̱, xota̱ eunukoo̱ ree̱, kó ngiti̱ fíkónjín ngasee̱ ree̱, ngototo tsi kui xi ku̱i̱chji̱a̱ nginií.

Nga katjoꞌójin na̱ Estee̱r nga na̱ re kamá

¹⁵ Na̱ Estee̱r, ndií Abiayii̱l boá, tsinii̱ Marndokeoo̱, kui xi katsꞌénxchá xikoó tsi ndií, kjiꞌanga katsoboaá kui naa̱ nga ko̱e̱je̱koo̱n ree̱, nde ngo ni tsíꞌájín, ta̱ bo̱a̱ tsí katsꞌén xikó katsoó Engaii̱, kui xota̱ eunukoo̱ ree̱ ko̱jo xi koo̱n ínchjiín. Na̱ Estee̱r nda kasasiee̱n ngayeje xota̱ xi kamábe.

¹⁶ Kó tsangínjo̱ na̱ Estee̱r ngindyi̱ko̱n re Asueroo̱ ki̱a̱ ndo̱bo̱a̱xa̱á, kuí má sá xi ma tiee̱ kui xi ꞌmí Tebee̱t, nó xí ma yitoni nga tsꞌénbotixómá re Asueroo̱.

¹⁷ Kó re Asueroo̱ achichí tjó katsꞌén, kó nda kasasiee̱n na̱ Estee̱r ta̱bo̱a̱jiín ngayeje ínchjín xo̱ngò xí ngase xi je jachókoón ree̱, kó íjñaá ngo korona̱ to̱ko̱, kó katsꞌén na̱ re, ngajoo̱ na̱ Bastii̱.

¹⁸ Jaskan kui ree̱ katsꞌeén ngo sꞌué ngayeje xota̱ xi tjiín xá ko̱jo xota̱ xi mosoo̱, kui sꞌueé kjo̱a̱a̱ na̱ Estee̱r boá. Kó katsꞌénkjaꞌajee̱n to̱n xi ꞌbíchjítjé ni xota̱ xi síndo nangii̱, kó katsꞌénkjaꞌasoón ni xotaa̱, xikó tsꞌén ngo re xi nda ini̱ma̱a̱.

Marndokeoo̱ kintꞌiéꞌmá nga si̱ꞌankꞌien ree̱

¹⁹ Kó kjiꞌanga kamátikó nginí ínchjiín xi ma joó ndi̱yà, Marndokeoo̱ ki̱a̱ tikónxtió nga̱ntjo̱a̱a̱ ndiꞌa nínga tsꞌénbotixómá ree̱,

²⁰ kó na̱ Estee̱r kji̱e̱ tsáyàjín ñá na̱xi̱ńdá chji̱a̱ni xikó katsoó Marndokeoo̱ nga atíxomaa̱, ngatꞌa̱ kui naa̱ tsintꞌiéꞌeén ndeskande koó nga chichí xikótsꞌèn akóyaá.

²¹ Kui ni̱xtjin jàn tji̱e̱nga Marndokeoo̱ ki̱a̱ tikóntꞌa nga̱ntjo̱a̱a̱ ndo̱bo̱a̱xa̱á ree̱, kó jó xota̱ eunukoo̱ ree̱ kui xi ꞌmí Bijtaa̱n ko̱jo Teree̱, achichí ndyi̱tsꞌènxchán, kó índa nga sa̱ꞌínkꞌién ree̱.

²² Nga tsintꞌié kuí nii̱ Marndokeoo̱ kijítsáyaá na̱ re Estee̱r, kó kui naa̱ katsóyaà ree̱ ni xi katsoó Marndokeoo̱.

²³ Kó ngije ikindyiséndi̱ya̱à kui nii̱, kamáyà nga ja̱koxi̱ boá, kuíni nga ngajó kui xota̱ eunukoo̱ ree̱ ngo yá ikjienboaꞌatꞌa. Kó kui nii̱ ki̱a̱ kisitꞌa xo̱jo̱n nínga fotꞌa ngayeje ni xi ma nga botixómá ngo re.