Matioo̱ 9 - Xo̱jo̱n eén Néná

Bi̱ tsꞌén katsꞌéndaya Kjisoo̱ ngo nda̱ xi májín fí

¹ Kó Kjisoo̱ kijíyà ngo tjotso je, sꞌe̱ kijí xi ingoboá jàn, kó jachó nginí na̱xi̱ńdáꞌniuú.

² Kó ki̱a̱ jachóchinií ngo nda̱ xi ni̱ma̱ xi májín fí, xi je ta̱ ngo ṉchan kjiꞌijñasón. Kó nga kamábe Kjisoo̱ nga sꞌijii̱n Néná kuí jaá, bi̱ katsoó nda̱ xi ni̱ma̱a̱: –Te̱ꞌéngaꞌníi̱ yojòo̱, jée̱ jè kiniꞌánjetakoón.

³ Kó tjín káꞌá kui já chji̱ni̱e̱kjo̱a̱kitii̱ xi bi̱ tsꞌén yíjin kon: «Kui nda̱a̱, chꞌo tjítsoó Néná.»

⁴ Kó Kjisoo̱ kamákjiín ni xi tjítsꞌénkjiín kon, sꞌe̱ bi̱ katsoó: –Ánní nga ni xi ndajín ndyi̱fojintakónjnú.

⁵ Ngatꞌa̱, mí ni xi niꞌínjín kjiꞌi nga kꞌuin, a nga bi̱ kꞌuin: «Jée̱ jè kiniꞌánjetakoón», axa̱ nga bi̱ kꞌuin: «Ti̱sítji̱n, kó tꞌen ji».

⁶ Ta̱nga tsi̱ꞌe̱ nga xcha̱jnú nga ndií nda̱ xi̱ꞌii̱n tjiín ngaꞌniú kuí nga̱sondiee̱ tsi̱ꞌe̱ nga ka̱maa̱ sa̱ꞌínjetakón jé. Sꞌe̱ bi̱ katsoó kui nda̱ xi ni̱ma̱a̱: –Ti̱sítji̱n, chjábé ṉcháa̱n, kó tꞌen ndiꞌàa̱.

⁷ Kó kui nda̱ xi ni̱ma̱a̱ jastjíe̱n, kó kijí ndiꞌaa̱.

⁸ Kó nga kamábe kui nii̱ xotaa̱, achichí kijíndikoón kó katsjaá kjo̱a̱je Néná, ngatꞌa̱ kuí boá Néná xí katsjaá xotaa̱ kui ngaꞌniú xi̱ꞌba̱.

Kjisoo̱ bi̱ tsꞌén tsíchji̱a̱a̱ Matioo̱

⁹ Kó nga jaꞌa Kjisoo̱ kui ngi̱ndiee̱, kamábe ngo nda̱ xi ꞌmí Matio̱ xi tikóntꞌa yámíxa̱ nínga machjítjé nii̱, kó bi̱ katsoó: –Ndibétji̱ngíní. Kó Matioo̱ tji̱e̱nmá jastjíe̱n, kó kijítji̱ngii̱ Kjisoo̱.

¹⁰ Kó tji̱e̱nga Kjisoo̱ tikóntꞌa yámíxa̱ ki̱a̱ ndiꞌaa̱ Matioo̱, achichí má já xí foaꞌáꞌyá to̱n xi machjítjé ni, ko̱jo xota̱ jé jachó kui ngi̱ndiee̱, kó ki̱a̱ kisꞌińdotꞌa yámíxa̱, ko̱jo Kjisoo̱, ko̱jo xota̱ tsi̱ꞌe̱.

¹¹ Kó nga kamábe kui nii̱ já fariseoo̱, bi̱ katsoó xota̱ tsi̱ꞌe̱ Kjisoo̱: –Ánní nga Mostro̱jnú ṉño̱ tsꞌénkjiniejo̱ já xí foaꞌáꞌyá to̱n xi machjítjé ni ko̱jo xota̱ jé.

¹² Nga tsintꞌié kuí nii̱ Kjisoo̱, bi̱ katsó: –Xota̱ xi oo̱n xí chjieén chji̱ni̱e̱ndiki, jmí tsi xota̱ xi ndaa̱.

¹³ Ta̱nga tangínjnú, kó ngatamajnú ni xi mejeén tsó kui eén: «Kjo̱a̱ni̱ma̱takón xí mejénna, jmí tsi kjo̱a̱tjó xi si̱ꞌankꞌasꞌienna.» Kó án jmí xota̱ xi kixi̱ jéꞌe̱chjiajáa̱n, xota̱ jé xí jéꞌe̱chjiáa̱, tsi̱ꞌe̱ nga sa̱ꞌínkꞌoyà yojoo̱.

Bi̱ tsꞌén akasíyaá Kjisoo̱ kjo̱a̱a̱ kjindiaá

¹⁴ Kósꞌe̱ jachókoón Kjisoo̱ xota̱ tsi̱ꞌe̱ Jua̱ xi botíndaá, kó bi̱ katsoó: –Míkjo̱a̱a̱ nga ji̱n ko̱jo já fariseoo̱ kjín ndi̱yà niꞌánkjaꞌajne̱ kjindiá yojojne̱, kó xota̱ tse̱ tsꞌenkjaꞌájín kjindiá yojoo̱.

¹⁵ Kó Kjisoo̱, bi̱ katsoó: –A ka̱márií xa̱ꞌya̱ kjo̱a̱ꞌa xota̱ xi tjimá ngo ndiꞌibixan tji̱e̱nga nda̱ xi ku̱i̱xaa̱n ki̱a̱ tikónjo̱. Ta̱nga nga kjo̱chó ni̱xtjin nga xchje̱ꞌéxiín nda̱ xi ku̱i̱xaa̱n, kjiꞌá boá nga ka̱ma kꞌuíndo kjindiá.

¹⁶ Ngojín xota̱ xi ńjño tja̱tsi̱e̱ ko̱óyaá nga ku̱i̱ꞌíxtió ńjñoo̱ ngo xtjí xchá, ngatꞌa̱ tsi bo̱a̱ sa̱ꞌín, ńjño tja̱tsi̱e̱e̱ skjíndiyá ńjño xchaá, kó tsie ngase xtjóndiyá xtjií.

¹⁷ Ti̱nde mindyiajín bino̱ tja̱tsi̱e̱ ngo ti̱jìtjíxin xchá, ngatꞌa̱ xtjóndiyá ti̱jìtjíxin xchaá, kó xtjón binoo̱, kó jmí chjí ka̱májín ti̱jìtjíxiín, ta̱nga tsi bino̱ tja̱tsi̱e̱e̱, ti̱jìtjíxin xi tja̱tsi̱e̱ ku̱i̱ndyia nga jó kui nii̱ nga jmí ni ka̱májiín.

Bi̱ tsꞌén katsꞌéndaya Kjisoo̱ ngo tsa̱kjìn ko̱jo ngo xota̱chjo̱on

¹⁸ Tji̱e̱nga tsꞌénchji̱a̱ Kjisoo̱, ngo nda̱ ngito̱ko̱ jachókoón, kó asiéntꞌaa̱tikoó, sꞌe̱ bi̱ katsoó: –Ndí tsa̱kjìnchína ngotꞌe̱ ma kꞌien. Ja̱bíchíi̱n, kó tꞌíjñisée̱n ndse̱ tsi̱ꞌe̱ nga kꞌuijñá nginí ndína.

¹⁹ Kó Jastjíe̱n Kjisoo̱, sꞌe̱ kijítji̱ngii̱ kui nda̱a̱ ko̱jo xota̱ tsi̱ꞌe̱.

²⁰ Kó tji̱e̱nga ndyi̱fí, ngo xota̱chjo̱on xí tiejó nónií nga tjiín chi̱xójín kijíkóntiñaa̱ xtji̱e̱e̱n nga̱xto̱n Kjisoo̱, kó katsꞌénjo̱ nga̱ndee̱ ńjñoo̱,

²¹ ngatꞌa̱ bi̱ tsꞌén katsꞌénkjó: «Tsi ndeta̱ ńjñoo̱ xí sa̱ꞌinjo̱ an, kó kjo̱tjoꞌa an.»

²² Ta̱nga Kjisoo̱ katsꞌénkꞌafóyá, askoꞌá kui xota̱chjo̱on, sꞌe̱ bi̱ katsoó: –Te̱ꞌéngaꞌníi̱ yojòo̱ chjo̱on, kjo̱a̱sꞌijìi̱n xí je tsꞌaxiéꞌaá. Kó kui xota̱chjo̱on, ti̱ kjiꞌa kamándaya.

²³ Kó nga jachó Kjisoo̱ ki̱a̱ ndiꞌaa̱ nda̱ ngito̱ko̱o̱ kamábe nga je síndo já xí ndyi̱tsꞌènkjánié yána̱xo̱o̱, kó nga xota̱ kjiín je kjima xa̱n xa̱n nga ndyi̱kjandà,

²⁴ sꞌe̱ bi̱ katsó Kjisoo̱: –Tji̱taxi̱e̱jnú, ngatꞌa̱ tsa̱kjìnchií kji̱e̱ ꞌméjín, ta̱ kjiꞌifé tsí. Kó ngayeje xotaa̱ tsajnókie Kjisoo̱.

²⁵ Ta̱nga ngije katsꞌénkjataxie xota̱ kjiín, tsꞌasꞌien Kjisoo̱ ngi̱yaa̱, kó iskjíbé tsja tsa̱kjìnchií, kó tsa̱kjìnchií jastjíe̱n.

²⁶ Kó ngayeje ngi̱ndie nga kandaꞌyá kui ni xi kamaá.

Bi̱ tsꞌén katsꞌéndaya Kjisoo̱ jó já xí ti̱ka̱

²⁷ Kó nga jatjo Kjisoo̱ ki̱a̱a̱, jó já xí ti̱ka̱ kijítji̱ngii̱, kó bi̱ katsoó nga askjandáyaá: ¡Kjisoo̱, ji xi xota̱ tji̱e̱e̱ Ndabii̱ ji, ngatamani̱ma̱a̱ ji̱n!

²⁸ Kó ngije jachó kui ndiꞌaa̱, jachókón tiñaa̱ nga jó kui já xí ti̱ka̱a̱, sꞌe̱ Kjisoo̱, bi̱ katsó nga asíyaá: –A kisꞌijinjnú nga ka̱mana sa̱ꞌin an kui nii̱. –Jo̱o̱n, Ndi̱a̱. Katsó kui jaá.

²⁹ Kósꞌe̱ Kjisoo̱ katsꞌénjo̱ ndyi̱ko̱n kui jaá, kó bi̱ katsoó: –Ngatama xikótsꞌèn kisꞌijinjnú.

³⁰ Kó kamátsijee̱n nga jó kui jaá, sꞌe̱ Kjisoo̱ ꞌniú íjñaá tsi̱ꞌe̱ nga jmíjín xi ka̱tso̱yaa̱.

³¹ Ta̱nga kui jaá ngije jatjo ki̱a̱a̱, katsóyà kjo̱a̱a̱ Kjisoo̱ ngayeje ngi̱ndie.

Bi̱ tsꞌén katsꞌéndaya Kjisoo̱ ngo nda̱ xi májín chji̱a̱

³² Kó tji̱e̱nga ndyi̱fotjo kui jaá, ngo nda̱ xi ni̱ma̱ xi májín chji̱a̱ xi tjíjii̱n ngo a̱si̱énni̱xtjii̱n xindajín jachóchinií.

³³ Kó Kjisoo̱ ngije tsꞌaxié kui a̱si̱énni̱xtjii̱n xindajiín, nda̱ xi májín chji̱a̱a̱, tsíchji̱a̱, kó ngayeje xotaa̱ kijíndikoón kui nii̱, kó bi̱ katsoó xkjín: Kji̱e̱ ngo ndi̱yà yàjne̱ kui nii̱ kꞌi̱e̱ Israee̱l.

³⁴ Ta̱nga já fariseoo̱, bi̱ katsó: Ngaꞌniuú nda̱ ngito̱ko̱o̱ xindajín xí tsꞌénkjién Kjisoo̱ nga ꞌboxié a̱si̱énni̱xtjii̱n xindajín.

Kjisoo̱ bi̱ tsꞌén kamáni̱ma̱a̱ xotaa̱

³⁵ Kó Kjisoo̱ kijí ngayeje na̱xi̱ńdáꞌniú ko̱jo ndí nangi, kó akóyá ngi̱ya ndiꞌa nínga ndokjo̱a̱ eén Néná, kó íni̱jmì éntjatsi̱e̱ xi chji̱a̱ kjo̱a̱a̱ kjo̱a̱botíxomaa̱ Néná, kó katsꞌéndaya ngayeje chiꞌii̱n ko̱jo xi so xi ndakjaa̱n xota̱ na̱xi̱ńdaá.

³⁶ Kó nga kamábe Kjisoo̱ xota̱ kjiín, ni̱ma̱ kamaá ngatꞌa̱ nde bejín kui xotaa̱ mí ni xi sa̱ꞌín, kó nde bejín kótsꞌèn kjo̱tjoꞌaa̱ yojoo̱, kisꞌiṉtso̱ma xikó maá cho̱tsa̱nga̱ xi jmí ndi̱a̱jiín.

³⁷ Kósꞌe̱ bi̱ katsoó xota̱ tsi̱ꞌe̱: –Nga ja̱koxi̱ achichí kamá ni xi kamáxchaá, ta̱nga chiboa tsí má xota̱ xi ndyi̱tsꞌènxaá.

³⁸ Kuíni nga ꞌniú chji̱a̱ꞌajnúu̱ Ndi̱a̱ xi tsi̱ꞌe̱ ni xi kamáxchaá tsi̱ꞌe̱ nga sa̱ngíyá ngase xota̱ xi sa̱ꞌínxá ngi̱jin jno̱o̱.