Matioo̱ 8 - Xo̱jo̱n eén Néná

Bi̱ tsꞌén katsꞌéndaya Kjisoo̱ ngo nda̱ xi tjiín chiꞌin xi tsꞌénkjátsón tji̱xin yojoná

¹ Kó ngije jatjajen Kjisoo̱ nínga tikón tji̱ngi̱i̱, achichí má xota̱ xi kijítji̱ngii̱.

² Kó ki̱a̱ jachókoón ngo nda̱ xi tjiín chiꞌin xi tsꞌénkjátsón tji̱xin yojoná xi asiéntꞌaa̱tikoó, kó bi̱ katsoó: –Ndi̱a̱, tsi ji xi mejeén ka̱ma ti̱ꞌintsjiejínní nga xtjo̱ꞌóxín chiꞌinna.

³ Sꞌe̱ Kjisoo̱ yejénnié tsja kó katsꞌénjo̱, nga bi̱ katsoó: –Mejénna, ngatamatsjiejón ji. Kó ti̱ kjiꞌa katjoꞌóxín chiꞌin xi koo̱n kui nda̱a̱.

⁴ Kó Kjisoo̱, bi̱ katsoó: –Jéꞌe̱n, ngata̱ ꞌyàjín xi ꞌmíyée̱ kui nii̱, ta̱sá tꞌenchíi̱n chináꞌmii̱, kó te̱ꞌé ji ngo chji̱e̱ xikó kjiꞌi xi si̱ꞌankꞌasꞌien xi katsó Moisee̱ nga atíxoma, tsi̱ꞌe̱ nga sku̱i̱e̱ kui jaá nga je kamándaya ji.

Bi̱ tsꞌén katsꞌéndaya Kjisoo̱ mosoo̱ nda̱ ngito̱ko̱o̱ jájuún

⁵ Kó ngije tsꞌasꞌien Kjisoo̱ na̱xi̱ńdáꞌniú Kapernau̱n, jachókoón ngo nda̱ ngito̱ko̱o̱ jájuún,

⁶ kó bi̱ katsó nga ꞌniú tsíꞌaá: –Ndi̱a̱, moso̱na ndajín tjiín, májín fí, kó achichí tsie kjo̱a̱ni̱ma̱ tsꞌénfoaꞌatio.

⁷ Kó Kjisoo̱, bi̱ katsoó: –Ka̱ma kjuín án, kó sa̱ꞌindaya an.

⁸ Sꞌe̱ bi̱ katsó nda̱ ngito̱ko̱o̱ jájuún: –Ndi̱a̱, nde tsoboájínna nga ku̱i̱tjásꞌi̱n ji ndiꞌana, ta̱nga ta̱ bo̱a̱ tsi tꞌín ji nga ngatamandaya, kó ka̱mandaya moso̱na.

⁹ Ngatꞌa̱ ti̱ bo̱a̱ ti̱ tsꞌén án, ti̱ tjínna ngo ngito̱ko̱ xi botixómána, kó ti̱ tjínna jájún xi botixomáa̱, kó tsi bi̱ xiáa̱n xi̱ꞌbi̱: Tꞌen ji, kó ko̱e̱je̱, kó tsi kje̱ꞌe xí ja̱bíꞌi̱n xiáa̱n, kó kji̱ndi̱bá, kó kjiꞌanga moso̱na tsangiya an nga sa̱ꞌín ngo ni, tsꞌénkjátjosónna.

¹⁰ Nga tsintꞌié kuí nii̱ Kjisoo̱, achichí kijíndikoón, kó bi̱ katsoó xota̱ xi yajátji̱ngii̱: –Ja̱koxi̱ ni xi xiánjnúꞌun nga kji̱e̱ ngo nda̱ sakóna kꞌi̱e̱ Israee̱l xi bi̱ tsꞌén ꞌniú sꞌijii̱n.

¹¹ Kó xiyàjnúꞌun nga achichí má xota̱ xi kji̱ndi̱báni nínga fotjo ko̱jo nínga ꞌbosꞌien tsꞌueé, xi kꞌuíndotꞌajo̱ yámíxa̱ Abraa̱n, ko̱jo Isaa̱, ko̱jo Jako̱b ki̱a̱ nínga botíxomaa̱ Néná,

¹² ta̱nga xi ndií kui ngi̱ndie nínga botíxomaa̱, ndi̱tsén jàn nínga jñoó ko̱ꞌna̱xié, kó ki̱a̱ boá nínga skja̱ndá, ko̱jo nínga skji̱ni̱e̱ya má ṉꞌni̱u̱ kui xotaa̱.

¹³ Kó Kjisoo̱, bi̱ katsoó nda̱ ngito̱ko̱o̱ jájuún: –Tꞌen ndiꞌaa̱, kó ngatama ngayeje nii̱ xikótsꞌèn kisꞌijii̱n. Kó ti̱ kjiꞌa kamándaya mosoo̱.

Bi̱ tsꞌén katsꞌéndaya Kjisoo̱ ṉchiꞌyaá Peé ko̱jo kjín xota̱ xi oo̱n

¹⁴ Kó Kjisoo̱ jachó ndiꞌaa̱ Peé, kó kamábe nga ṉchiꞌyaá kjiꞌijña kó achichí ṉtꞌe̱ ndyi̱a̱a̱,

¹⁵ kó Kjisoo̱ katsꞌénjo̱ tsja, kó kichajá ṉtꞌe̱e̱, kó kui xota̱chjo̱on jastjíe̱n, kó katsꞌénseén kui jaá.

Kjisoo̱ bi̱ tsꞌén katsꞌéndaya xota̱ xi oo̱n

¹⁶ Kó ngije kjimaꞌñaa̱ achichí má xota̱ xi tjíjii̱n a̱si̱énni̱xtjii̱n xindajín xi jachóchinií Kjisoo̱, kó ta̱ ngo tsí én tsíchji̱a̱, kó katsꞌénkjataxie kui xindajiín, kó ti̱ katsꞌéndaya ngayeje xota̱ xi oo̱n.

¹⁷ Kui nii̱ kamá tsi̱ꞌe̱ nga jatjosón ni xi katsó nda̱ chji̱ni̱e̱ꞌe̱én Néná xi ꞌmí Isayaa̱, nga bi̱ katsó: «Kuí xí iskjíbé chiꞌinná, kó kijíjo̱ ngayeje xi so xi ndakjanná.»

Bi̱ tsꞌén tsíchji̱a̱jo Kjisoo̱ xota̱ xi kamámejeén kijítji̱ngii̱

¹⁸ Kó nga kamábe Kjisoo̱ nga achichí má xota̱ xi jaꞌatjiyajoo̱n, katsjaákjo̱a̱ xotaa̱ tsi̱ꞌe̱ nga ko̱e̱je̱ ngándá xí ingoboá jàn.

¹⁹ Sꞌe̱ ki̱a̱ jachókoón ngo nda̱ chji̱ni̱e̱kjo̱a̱kiti, xi bi̱ katsoó: –Mostro̱, mejénna kjuíntjíngií ta̱ nínga kꞌuin.

²⁰ Sꞌe̱ Kjisoo̱, bi̱ katsoó: –Xańñaá ti̱xa̱ tjiín nínga ꞌbíndoyá, kó ni̱siee̱ ndo̱bo̱a̱ tjiín nínga ꞌbíndo, ta̱nga ndií nda̱ xi̱ꞌii̱n jmíjiín ngo ngi̱ndie nínga sa̱ꞌínkjaꞌyá.

²¹ Kó ingo nda̱ xi xota̱ tsi̱ꞌe̱ Kjisoo̱, bi̱ katsoó: –Ndi̱a̱, te̱ꞌéndièmáraní nga tjón kjuínkánijín an na̱ꞌmina.

²² Ta̱nga Kjisoo̱, bi̱ katsoó: –Ndibétji̱ngíní, kó te̱ꞌéndièe̱ nga xota̱ xi xikoó tsi je jesoón nga kui ko̱ónijín xota̱a̱ xi je jesoón.

Bi̱ tsꞌén katsꞌénkꞌíxió Kjisoo̱ tjo̱o̱ ko̱jo ndáchíkoón

²³ Kó ngije tsꞌasꞌien Kjisoo̱ ngo tjotso je, xota̱ tsi̱ꞌe̱ kijítji̱ngii̱.

²⁴ Kó tji̱e̱nga kjiꞌifé Kjisoo̱, ítsꞌi̱yanii̱ nga kjindibá ngo tjo̱ꞌniú xí ngaskande tsꞌenkꞌásꞌién má ndáfoa ngi̱ya tjotso jee̱.

²⁵ Kó xota̱ tsi̱ꞌe̱ kijítsꞌenkjáꞌaá, kó bi̱ katsoó: ¡Ndi̱a̱, ꞌna̱xiéꞌéjne̱, ngatꞌa̱ jè kjiꞌme ngándájne̱!

²⁶ Sꞌe̱ Kjisoo̱, bi̱ katsoó: –Ánní nga ndyi̱ndakónjnú jún xota̱ xi sꞌijinjiín. Kósꞌe̱ Kjisoo̱ jastjíe̱n, kó katsꞌénxchánjo̱ tjo̱o̱ ko̱jo ndáchíkoón, sꞌe̱ kisꞌie xió xió nga̱són ndáfoaa̱.

²⁷ Kó kui jaá achichí kijíndikoón, kó bi̱ katsoó xkjín: –ꞌYá nda̱a̱ bo̱a̱ xi̱ꞌbi̱, nga ngaskande tjo̱o̱ ko̱jo ndáchíkoón ntꞌiéꞌeén.

Bi̱ tsꞌén katsꞌéndaya Kjisoo̱ jó já xí tjíjii̱n a̱si̱énni̱xtjii̱n xindajín

²⁸ Kó nga jachó Kjisoo̱ ngándá xí ingoboaá, ki̱a̱ nínga síndo xota̱ xi chji̱a̱ni nangi Ngandara̱, jachókoón jó já xí jatjoni nga̱tsjo̱ó jàn xi tjíjii̱n a̱si̱énni̱xtjii̱n xindajín, achichí tamá kamá kui jaá, kó nde ngojín xi kamá jaꞌa kui ndi̱ya̱à.

²⁹ Kó bi̱ katsó nga askjandáyà kui jaá: –Mí ni xi tjiín kjo̱a̱a̱ ji̱n, Kjiso̱, ndií Néná. A jè kjo̱a̱ni̱ma̱ kjoéꞌe̱ niꞌínkjeꞌejne̱ ngindiee̱ nga kjo̱chó ni̱xtjii̱n.

³⁰ Kó ti̱ ki̱a̱a̱, ngi̱chí kjinnii̱ nínga síndo kui jaá achichí má chi̱nga̱ tjimá xi ndyi̱kjién.

³¹ Kó kui xindajiín, ꞌniú tsíꞌaá Kjisoo̱, nga bi̱ katsoó: –Tsi ko̱ꞌna̱xiéjne̱, ki̱a̱ nangíyéjne̱ ngi̱jii̱n kui chi̱nga̱a̱.

³² Kó Kjisoo̱, bi̱ katsoó: –Tangínjnú. Kó kui a̱si̱énni̱xtjii̱n jatjojii̱n kui jaá, kó chi̱nga̱a̱ kijíkꞌíndojii̱n, kó ta̱xkiya tsanga tsobé ngo nínga nkꞌa, kó ki̱a̱ ixó ngi̱jii̱n ndáchíkoón nínga jesón ngándá ngayejee̱.

³³ Kó kui já xí ndyi̱koo̱n kui chi̱nga̱a̱ tsanga má kijí na̱xi̱ńdá jàn, kó katsóyà ngayeje ni xi kamaá, ko̱jo ni xi kamaá já xí kisꞌińdojii̱n a̱si̱énni̱xtjii̱n xindajiín.

³⁴ Kó ngayeje xota̱ na̱xi̱ńdaá kijíkoón Kjisoo̱, kó nga kamábe, ꞌniú tsíꞌáa̱ tsi̱ꞌe̱ nga kjo̱tjoni kui ngi̱ndiee̱.