Matioo̱ 7 - Xo̱jo̱n eén Néná

Bi̱ tsꞌén akóyá Kjisoo̱ kjo̱a̱a̱ nga ndikón nga fongitaꞌin jé ngo xota̱

¹ Ngata̱ fongitaꞌínjínjnú jé ngo xota̱, tsi̱ꞌe̱ nga Néná ko̱óngitaꞌínjínjnú ngo jé.

² Ngatꞌa̱ xikótsꞌèn ndyi̱nfongitaꞌínjnú jé ngo xota̱, ti̱ bo̱a̱ ti̱ tsꞌén kjongítaꞌínjnú jún ngo jé, kó ti̱ kuii̱ yáchi̱bo̱a̱ xi si̱ꞌankjiénjnú jún nga xꞌi̱chi̱bo̱a̱jnú, ti̱ kuii̱ xi si̱ꞌankjién nga xꞌi̱chi̱bo̱a̱jojnú jún.

³ Kó ánní nga xtjié xi kjingi ndyi̱ko̱n ntsꞌie ji titsitsijìi̱n, kó yejín ji yáxtió xi kjingi ndyikin ji.

⁴ Axa̱ kótsꞌèn bi̱ sée̱ ntsꞌie ji: «Te̱ꞌéndièní nga kꞌoxié an xtjié xí kjingi ndyikin ji, nga ta̱kó kjingi yáxtioó tse̱».

⁵ ¡Jókje̱n! Tjón mára ꞌna̱xié ji yáxtió xi kjingi ndyikin ji, sꞌe̱ nda ka̱matsijeen, tsi̱ꞌe̱ nga xchi̱e̱ ji xtjié xí kjingi ndyi̱ko̱n ntsꞌie.

⁶ Ngata̱ boeꞌéjínjnúu̱ ni xi tsjie ńñaá, ti̱nde ngata̱ ki̱a̱jín fojmijnúu̱ to ixkìꞌ xi chjí kje̱n chi̱nga̱a̱, ngatꞌa̱ tsi tsja̱nié ka̱ma xi̱ kui nii̱, kó ngaskande jún skji̱ni̱e̱jnú kui cho̱o̱.

Bi̱ tsꞌén akóyá Kjisoo̱ kjo̱a̱a̱ nga ka̱ma chji̱a̱ꞌajnúu̱ Néná ni xi nda

⁷ Chji̱a̱ꞌajnú, kó ko̱e̱ꞌéjnú, ti̱ndyi̱séjnú, kó sa̱kójnú, ndókjo̱a̱jnú tꞌa ngo nga̱ntjo̱a̱, kó xchjáxꞌájnú.

⁸ Ngatꞌa̱ ngayeje xota̱ xi ku̱i̱ꞌa, ko̱e̱ꞌeé, kó xi ko̱ngase, sa̱ko̱ó, kó xi ku̱i̱chji̱a̱ tꞌa ngo nga̱ntjo̱a̱, xchjáxꞌaá.

⁹ ꞌYá xota̱ xi síndojinjnú xi tsi ngo ndií ku̱i̱ꞌaa̱ ngo pan, kó ngo ndi̱jo̱ tsja̱á.

¹⁰ Ko̱jo tsi ngo tji̱o̱ ku̱i̱ꞌa kó, a ngo ye̱ tsja̱á.

¹¹ Ngatꞌa̱ ndatsi jún ndajínjnú xota̱, kó májnú boeꞌéjnúu̱ ngo ni xi nda ndíjnú, akja̱ꞌmíra̱ nga tsja̱ajiín ngo ni xi nda Na̱ꞌmijnú xi tikón ndiꞌakꞌajmi jàn tsi tjín xí ku̱i̱ꞌaa̱.

¹² Kó kuíni nga, ni xi mejénjnú nga si̱ꞌanjo̱jnú jún, bo̱a̱ ti̱ꞌanjo̱jnú xota̱ xi kje̱ꞌe, ngatꞌa̱ bo̱a̱ kjiꞌi kjo̱a̱kitii̱ ko̱jo xo̱jo̱n xi katsꞌénꞌindó já chji̱ni̱e̱ꞌe̱én Néná.

Bi̱ tsꞌén akóyá Kjisoo̱ kjo̱a̱a̱ nga̱ntjo̱a̱ xkjoó

¹³ Ki̱a̱ ti̱tjásꞌi̱e̱njnú nga̱ntjo̱a̱ xkjoó, ngatꞌa̱ achichí tiyá ko̱jo je nga̱ntjo̱a̱ ko̱jo ndi̱yà xí fíjo̱ná nga tsꞌénchájáná, kó achichí má xota̱ xi ki̱a̱ ꞌbosꞌien,

¹⁴ ta̱nga achichí xkjó ko̱jo chichí ndi̱ya̱à kjo̱a̱mindyioo̱n, kó chiboa tsí má xota̱ xi sakoó.

Bi̱ tsꞌén akóyá Kjisoo̱ kjo̱a̱a̱ yaá ko̱jo to xi ko̱a̱ja̱a̱

¹⁵ Chónjnú já chji̱ni̱e̱ꞌén ndiso xi kjo̱chókónjnú, xi bo̱a̱ má kón xikoó ngo cho̱tsa̱nga̱, ta̱nga nga ja̱koxi̱ cho̱lobo̱ boá.

¹⁶ Ta̱ngatꞌanii̱ too̱ yaá nga xcha̱ tsi nda ko̱jo tsi ndajín. A ka̱ma ko̱ꞌna̱je̱e̱n tostsi̱jè ngo yándáꞌyá, axa̱ a ka̱ma ko̱ꞌna̱je̱e̱n toꞌingo̱ yándáꞌyaá.

¹⁷ Bo̱a̱ tsꞌén nga ngayeje yá xí nda, to xi nda xí tsjá, ta̱nga yá xí ndajín, to xi ndajín xí tsjá.

¹⁸ Ka̱májín ngo yá xí nda, xi tsja̱a to xi ndajín, ti̱nde ka̱májín ngo yá xí ndajín xi to xi nda tsja̱a.

¹⁹ Ngayeje yá xí jmí to xi nda tsjájín, bichá sꞌe̱ ꞌbítí.

²⁰ Kuíni nga too̱ yaá xi ko̱kó, a nda axa̱ ndajín.

Bi̱ tsꞌén akóyá Kjisoo̱ kjo̱a̱a̱ nga ngayejejín xi kꞌo̱sꞌien nínga botixómá Néná

²¹ Jmí tsi ngayeje xota̱ xi «Ndi̱a̱, Ndi̱a̱», ka̱tso̱na xi kꞌo̱sꞌien nínga botixómá Néná, ta̱kuítsí xi kꞌo̱sꞌien xi sa̱ꞌínkjatjosón ngayeje ni xi mejeén Na̱ꞌmina xi tikón ndiꞌakꞌajmi jàn.

²² Achichí má xi bi̱ ka̱tso̱na kui ni̱xtjin jàn: «Ndi̱a̱, Ndi̱a̱, a yejín nga chji̱ni̱e̱ꞌén tse̱ kamájne̱ nga kiꞌmíyàjne̱ ni xi mejeén, ko̱jo nga jaꞌén tse̱ kiniꞌánkjiénjne̱ nga kaꞌnaxiéjne̱ xindajín, ko̱jo nga jaꞌén tse̱ kiniꞌánkjiénjne̱ nga tsie kjo̱a̱ndikón kiniꞌánjne̱.»

²³ Kósꞌe̱ bi̱ xián cha̱n cha̱a̱n: «Jmí ni̱xtjin kamábejnúꞌun, tji̱taxínjnú jún xota̱ xi tsꞌén ni xi ndajín.»

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ jó já xí katsꞌénda ndiꞌaa̱

²⁴ Kó kuíni nga, ta̱ ꞌyání xota̱ xi ntꞌié kuí eén kó tsꞌénkjátjosón, bo̱a̱ fóyanii̱ xikó maá ngo nda̱ xi xi̱ꞌinkjo̱a̱, xi katsꞌénda ndiꞌaa̱ nga̱soón ngo ndi̱jo̱je.

²⁵ Kó nga kjindibá stseé, kamáje ndáfoaa̱ ndejeèꞌ, kó jaꞌa tjo̱ꞌniuú, kó yeꞌétꞌa xchaán kui ndiꞌaa̱, ta̱nga tsꞌákajín, ngatꞌa̱ nga̱soón ngo ndi̱jo̱ kamánda.

²⁶ Ta̱nga ta̱ ꞌyání xota̱ xi ntꞌié kuí eén kó tsꞌénkjátjosónjín, bo̱a̱ fóyanii̱ xikó maá ngo nda̱ chi̱ni xi katsꞌénda ndiꞌaa̱ ngo ngi̱ndie nínga tjín tsomí.

²⁷ Kó nga kjindibá stseé, kamáje ndáfoaa̱ ndejeèꞌ, kó jaꞌa tjo̱ꞌniuú, kó yeꞌétꞌa xchaán kui ndiꞌaa̱, kó tsꞌáka, kó tsie ni xi kichajaá.

²⁸ Kó ngije kamaá Kjisoo̱ nga katsóyà kui eén, xotaa̱ índikón xikótsꞌèn akóyá,

²⁹ ngatꞌa̱ akóyá xikó maá xi tjiín xá, jmí tsi xikoó já chji̱ni̱e̱kjo̱a̱kitii̱.