Matioo̱ 5 - Xo̱jo̱n eén Néná

Bi̱ tsꞌén akóyá Kjisoo̱ ngo nga̱són tji̱ngi̱

¹ Nga kamábe Kjisoo̱ nga achichí má xotaa̱, ngo tji̱ngi̱ kijínijíngí nínga kisꞌijñando, kó xota̱ tsi̱ꞌe̱ kijíkóntiñaa̱,

² kó bi̱ katsó nga akóyaá.

Bi̱ tsꞌén akóyá Kjisoo̱ ꞌyá xota̱ xi tsja tjiín ngindyi̱ko̱n Néná

³ –Achichíra̱tsjaa̱ xota̱ xi ni̱ma̱ síndo ini̱ma̱a̱, ngatꞌa̱ kuí xí tsi̱ꞌe̱ ka̱ma nínga botixómá Néná.

⁴ Achichíra̱tsjaa̱ xota̱ xi ndyi̱kjandà, ngatꞌa̱ kuí xí sa̱ko̱ó kjo̱a̱niꞌándajon.

⁵ Achichíra̱tsjaa̱ xota̱ xi ntꞌiéꞌén, ngatꞌa̱ kuí xí sa̱ko̱ó tꞌanangi xi katsó Néná nga tsja̱aná.

⁶ Achichíra̱tsjaa̱ xota̱ xi bojó, ko̱jo xi xíndaá nga kixi̱ si̱ꞌansee̱n, ngatꞌa̱ kuí xí stsi̱e̱é.

⁷ Achichíra̱tsjaa̱ xota̱ xi ni̱ma̱ maa̱, ngatꞌa̱ kuí xí kjo̱chóꞌá kjo̱a̱ni̱ma̱takoón Néná.

⁸ Achichíra̱tsjaa̱ xota̱ xi tsjie ini̱ma̱a̱, ngatꞌa̱ kuí xí sku̱i̱e̱ Néná.

⁹ Achichíra̱tsjaa̱ xota̱ xi ndyi̱mongase kjo̱a̱xioó nga̱sondiee̱, ngatꞌa̱ kuí xí ndií Néná kꞌuiín.

¹⁰ Achichíra̱tsjaa̱ xota̱ xi tjimíyotji̱ngii̱ ta̱ngatꞌanii̱ nga ni xi kixi̱ ndyi̱tsꞌèn, ngatꞌa̱ kuí xí tsi̱ꞌe̱ nínga botíxomaa̱ Néná.

¹¹ Achichíra̱ tsjajnú jún kjiꞌanga xotaa̱ chꞌo ka̱tso̱jnú, ko̱jo nga sa̱ꞌín ꞌbokiejnú, ko̱jo nga ta̱ngatꞌanii̱ an ko̱ngatji̱ngijnú nga sa̱ꞌínkjién ngayeje to̱ko̱ya ni xi ndajín nga ku̱i̱ꞌíndiso.

¹² Tsja ngatamajnú ko̱jo tsjangatꞌiéjnú, ngatꞌa̱ ta̱nisién je ni xi sa̱kójnú ndiꞌakꞌajmi jàn, ngatꞌa̱ ti̱ bo̱a̱ ti̱ tsꞌén ikiyotji̱ngii̱ já chji̱ni̱e̱ꞌe̱én Néná xi tjón kisꞌińdo ngindiee̱ nga ku̱i̱ndyionjnú jún.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ na̱xa̱a̱ ko̱jo ndiꞌií

¹³ Jún boá xi xikoó na̱xa̱a̱ tꞌanangii̱. Ta̱nga tsi ngiti̱ ndiajín ka̱ma na̱xa̱a̱, kótsꞌèn ka̱mandia nginí. Jè ngiti̱ jmí ni chjíjiín, ta̱ tsi̱ꞌe̱ nga ku̱i̱chíjmi tsí ndi̱tsén jàn, tsi̱ꞌe̱ nga tsja̱nié xotaa̱.

¹⁴ Jún xí xikoó ndiꞌií nga̱sondiee̱. Ngo na̱xi̱ńdá xí tikón nga̱soón ngo tji̱ngi̱, ka̱májín kꞌuijñáꞌmá.

¹⁵ Ti̱nde ka̱májín kꞌuití ngo ndiꞌíxò, tsi̱ꞌe̱ nga ngindiee̱ ngo kojo̱ kꞌuiyá, a mí tsí ta̱sá nínga ꞌbítíyá ndiꞌí xí tsꞌentsíjee̱n ꞌbíjñá, tsi̱ꞌe̱ nga sa̱ꞌíntsijee̱n ngayeje xota̱ xi tjín kuí ngi̱ya ndiꞌaa̱.

¹⁶ Bo̱a̱ tsꞌén ngatí ndiꞌíjnú ngindyi̱ko̱n xotaa̱, tsi̱ꞌe̱ nga sku̱i̱e̱ ni nda xi ndyi̱niꞌánjnú, kó ngayejejnú te̱ꞌéjnúu̱ kjo̱a̱je Na̱ꞌmijnú xi tikón ndiꞌakꞌajmi jàn.

Bi̱ tsꞌén akóyá Kjisoo̱ kjo̱a̱a̱ kjo̱a̱kitii̱

¹⁷ Ngata̱ niꞌánkjójínjnú nga an kjoéꞌe̱ tsꞌenkjié an kjo̱a̱kitii̱, ko̱jo ni xi katsꞌénꞌindó já chji̱ni̱e̱ꞌe̱én Néná, ta̱sá kjoéꞌe̱ an tsi̱ꞌe̱ nga kjo̱tjosón kui nii̱.

¹⁸ Ngatꞌa̱ ja̱koxi̱ ni xi xiánjnúꞌun nga tji̱e̱nga tikón ndiꞌakꞌajmii̱ ko̱jo tꞌanangii̱, nde ngojín nii̱ kjo̱a̱kitii̱ xi xtjo̱ꞌóxiín ngaskande nga je jatjosón ngayejee̱.

¹⁹ Kuíni nga ta̱ꞌya xota̱ní xi sa̱ꞌínkjatjosónjín ngo kui kjo̱a̱botíxomaa̱, ndatsi ngo xi ta̱nisién ꞌniú chichií, kó tsi ko̱kóyaá xotaa̱ tsi̱ꞌe̱ nga sa̱ꞌínkjatjosónjín, kuí boá xi chichí si̱ꞌan nínga botíxomaa̱ Néná. Ta̱nga ta̱ꞌya xota̱ní xi sa̱ꞌínkjatjosón, ko̱jo xi ko̱kóyaá kje̱ꞌe xota̱ nga sa̱ꞌínkjatjosón kui kjo̱a̱botíxomaa̱, achichí je si̱ꞌan ki̱a̱ nínga botixómá Néná.

²⁰ Ngatꞌa̱ xiyàjnúꞌun nga tsi ku̱i̱tjátjónjínjnúu̱ já chji̱ni̱e̱kjo̱a̱kitii̱ ko̱jo xota̱ fariseoo̱ nga ni xi kixi̱ si̱ꞌánjnú ngindyi̱ko̱n Néná, jmíni̱xtjin ku̱i̱tjásꞌi̱e̱njnú nínga botixómá Néná.

Bi̱ tsꞌén akóyá Kjisoo̱ kjo̱a̱a̱ nga niꞌánxchán

²¹ Jún jè kandaꞌyájnú ni xi kiꞌmií xota̱ xi xchájnú, nga bi̱ kiꞌmií: «Ngata̱ xota̱jín niꞌínkꞌín ji, ngatꞌa̱ xi sa̱ꞌínkꞌién ngo xota̱, ka̱majérií.»

²² Ta̱nga an tꞌíxián an, nga ta̱ ꞌyání xi sa̱ꞌínxchánjo̱ ntsꞌi̱e̱, ka̱majeé, kó ta̱ ꞌyání xi kitikjo̱a̱ ka̱tso̱o̱ ntsꞌi̱e̱, jáxaá sa̱ꞌínjeé, kó ta̱ ꞌyání xi tsobé ka̱tso̱o̱ ntsꞌi̱e̱, kuí boá xi je mején ko̱e̱je̱ ngi̱jin ndiꞌií ndo̱bo̱a̱ṉkꞌi̱e̱e̱n.

²³ Kó kuíni nga, tsi ngo chji̱e̱ kichꞌié ji xi kꞌuíchiní nínga tikón ṉchandikoón Néná, kó tsi kjiꞌa kjo̱a̱ꞌátsjiee̱n nga chꞌo kichꞌié ji ntsꞌie,

²⁴ tꞌa nínga tikón ṉchandikoón Néná tꞌíjñí ngotjón ji kui chji̱e̱e̱, kó tjón mára tꞌenkjandée̱ ntsꞌie, sꞌe̱ ndibé nginí, kósꞌe̱ ti̱ꞌinkꞌasꞌíi̱n Néná kuí chji̱e̱e̱ ngijee̱.

²⁵ Tsá tꞌíndeje̱ kondràa̱, tji̱e̱nga ndyi̱mongínjnú ngi̱ya ndi̱ya̱à, ta̱bo̱a̱jiín tsi ngindyi̱ko̱n nendiꞌamasiee̱n sa̱ꞌínkꞌasꞌiee̱n ji, sꞌe̱ nendiꞌamasiee̱n sa̱ꞌínkꞌasꞌiee̱n ji nda̱ xi konda ndo̱bo̱a̱ya̱à, kó ngi̱ya ndo̱bo̱a̱yà ko̱na̱ngísꞌieén.

²⁶ Ja̱koxi̱ ni xi xiáa̱n nga kjo̱tjejín ji, ngaskande nga ikꞌíchjí jí ngayeje to̱n xi tjitjiée̱n.

Bi̱ tsꞌén akóyá Kjisoo̱ kjo̱a̱a̱ nga májín niꞌántꞌaa̱ kjo̱a̱ xingi̱

²⁷ Jún jè kandaꞌyájnú ni xi je kiꞌmí: «Ka̱májín si̱ꞌintꞌée̱ kjo̱a̱ chjóo̱n ko̱jo tsi xi̱ꞌíi̱n.»

²⁸ Ta̱nga xiyàjnúꞌun nga tsi ngo nda̱ xi skotsíjee̱n ngo chjo̱on tsi̱ꞌe̱ nga sa̱ꞌínmején, nga bo̱a̱ sa̱ꞌín, jè katsꞌéntꞌaa̱ kjo̱a̱ chjo̱ón ngi̱jin ini̱ma̱a̱.

²⁹ Kó kuíni nga, tsi ndyikin xi fojnií ko̱ngijeé, ꞌna̱xié ji, kó kjin ti̱chíjmi, ta̱sá ndatsi chií yojòo̱ xcha̱ja, ta̱bo̱a̱jiín tsi ngayeje yojòo̱, ko̱e̱je̱ ngi̱jin ndiꞌií ndo̱bo̱a̱ṉkꞌi̱e̱e̱n.

³⁰ Kó tsi ndse̱ kixi̱ ko̱ngijeé, ti̱chétꞌe kó kjin ti̱chíjmi, ta̱sá ndatsi chií yojòo̱ xcha̱ja, ta̱bo̱a̱jiín tsi ngayeje yojòo̱ ko̱e̱je̱ ngi̱jin ndiꞌií ndo̱bo̱a̱ṉkꞌi̱e̱e̱n.

Bi̱ tsꞌén akóyá Kjisoo̱ kjo̱a̱a̱ xota̱ xi ꞌbíndo xkjín

³¹ Ti̱ je bi̱ tsꞌén kiꞌmíyà nga: «Ta̱ ꞌyání xi sa̱ꞌínchꞌó chjo̱ón, ka̱ma tsja̱á ngo xo̱jo̱n nínga je índo xkjín.»

³² Ta̱nga an xiyàjnúꞌun nga ngo nda̱, ta̱ kjiꞌa tsí nga ka̱ma ku̱i̱ꞌíjñá chjo̱ón tsi kjo̱a̱a̱ kjo̱a̱tondo̱. Tsi ta̱xkiya ku̱i̱ꞌíjñá kjo̱a̱a̱ kje̱ꞌe ni ngase, tsꞌéntsjándièrií nga sku̱i̱e̱ndikónjín kjo̱a̱bixaa̱n. Kó tsi kui naa̱ ku̱i̱xan nginí, kui ko̱jo kui xi̱ꞌii̱n ndyi̱bendikónjín kjo̱a̱bixaa̱n.

Bi̱ tsꞌén akóyá Kjisoo̱ kjo̱a̱a̱ nga ngiboanéná ꞌmí

³³ Ti̱ bo̱a̱ ti̱ tsꞌén je kandaꞌyájnú nga bi̱ kiꞌmií xota̱ xi xchájnú: «Ngata̱ ngiboanénájín ꞌmíjnú kjo̱a̱a̱ ngo ni xi ndiso, ta̱sá ti̱ꞌankjatjosónjnúu̱ Néná kjo̱a̱a̱ ni xi kꞌuínjnú.»

³⁴ Ta̱nga an, bi̱ xiánjnúꞌun: Kjiꞌanga ngo ni si̱ꞌánjnú, ngata̱ ngiboanénájín ꞌmíjnú nga jaꞌeén ndiꞌakꞌajmii̱ si̱ꞌankjiénjnú, ngatꞌa̱ kuí boá xi nínga botíxomaa̱ Néná,

³⁵ ti̱nde ngata̱ jaꞌeén tꞌanangii̱jín niꞌánkjiénjnú, ngatꞌa̱ kuí boá xi ngi̱ndie nínga sikónsón Néná, ti̱nde ngata̱ jaꞌeén na̱xi̱ńdáꞌniú Jerusale̱njín niꞌánkjiénjnú, ngatꞌa̱ kuí boá xi na̱xi̱ńdaá nda̱ Re xi ꞌniú jee̱.

³⁶ Ti̱nde ngata̱ takojínjnú niꞌánkjiénjnú nga ngiboanéná kꞌuínjnú, ngatꞌa̱ nde ka̱májínjnú si̱ꞌánjmájnú ko̱jo tsi si̱ꞌantiboájnú ngo tsja̱tokójnú.

³⁷ Ta̱sá kjiꞌanga ko̱ndókjo̱a̱jnú «jo̱o̱n» tꞌínjnú tsi ngo ni xi bo̱a̱ kjiꞌi, kó «jmí» tꞌínjnú tsi ngo ni xi bo̱a̱jín kjiꞌi, ngatꞌa̱ ngayeje én xí sꞌi̱són ngasee̱, tsi̱ꞌe̱ xindajín boá.

Bi̱ tsꞌén akóyá Kjisoo̱ kjo̱a̱a̱ nga niꞌánngojo

³⁸ Jún jè kandaꞌyájnú, nga bi̱ kiꞌmí: «Tsi tjín xí kꞌo̱xié ngo ndyikin, ti̱ ꞌna̱xié ji ngo ndyi̱ko̱n xi bo̱a̱ katsꞌénjoo̱ nga, kó tsi tjín xí kꞌo̱je̱n ngo ńꞌni, ti̱ chꞌi̱ji̱n ji ngo tsi̱ꞌe̱ xi bo̱a̱ katsꞌénjoo̱ nga.»

³⁹ Ta̱nga an, bi̱ xiánjnúꞌun: Ngata̱ jmí ni niꞌínje̱jín ji kui xota̱ xi ndajiín, ta̱sá ta̱ ꞌyání xi ko̱tꞌa tꞌanijin xi fojnií, ti̱ te̱ꞌée̱ nga ko̱tꞌa tꞌanijin xi skoón nga.

⁴⁰ Tsi tjín xí ko̱tíjétáꞌiín tsi̱ꞌe̱ nga kjo̱a̱ꞌáxiín chi̱ngàa̱, ta̱sá te̱ꞌée̱ ko̱jo ńjño xi kjitꞌa nga̱xten nga.

⁴¹ Ta̱ ꞌyání xi sa̱ꞌiín kjo̱a̱ꞌniú tsi̱ꞌe̱ nga xꞌi̱e̱ ji ngo chꞌià ngaskande ngo kilometro̱, tꞌen ji, kó chꞌi̱e̱ ji kui chꞌiaà ngaskande jó kilometro̱.

⁴² Tsi tjín xí ji ku̱i̱ꞌaa̱ ngo ni, te̱ꞌée̱, kó ti̱ꞌinsée̱n tsi tjín xí ji ku̱i̱yaa̱ ngo ni.

Bi̱ tsꞌén akóyá Kjisoo̱ nga chjiéngá si̱ꞌantjó xingi̱

⁴³ Jún jè kandaꞌyájnú ni xi je kiꞌmí: «Tjó ti̱ꞌin ji xotaa̱, kó chꞌo chꞌi̱e̱ xota̱ xi kondràa̱.»

⁴⁴ Ta̱nga an, bi̱ tꞌíxiánjnúꞌun: Tjó ti̱ꞌánjnú xota̱ xi kondra̱jnú, ti̱ꞌanchikonñéjnú xota̱ xi chꞌo tjítsójnú, nda ti̱ꞌanjo̱jnú xota̱ xi chꞌoo̱ jún, ndókjo̱a̱tjéjnú xota̱ xi chꞌo tjítsꞌénjnú, ko̱jo xi ndyi̱mongatji̱ngijnú,

⁴⁵ tsi̱ꞌe̱ nga ndií Na̱ꞌminá xí tikón ndiꞌakꞌajmi jàn ka̱majnú, ngatꞌa̱ kuí xí tsꞌentjoó tsꞌueé xota̱ xi nda ko̱jo xi ndajín, kó kuí xí tsꞌénkáꞌaá stseé xota̱ xi kixi̱ ko̱jo xi kixi̱jín.

⁴⁶ Ngatꞌa̱ tsi ta̱kuítsí xota̱ xi tjoó jún xi si̱ꞌantjójnú, mí ni xi nda xi sa̱kójnú. A mí tsí ngaskande xota̱ xi foaꞌáꞌyá to̱n xi machjítjé nii̱ xi tsꞌén kuí nii̱ nga.

⁴⁷ Kó tsi ta̱ ntsꞌié tsí xi si̱ꞌintinde ji, mí ta̱ ni xi tiniꞌín ngase ji. A mí tsí ngaskande xota̱ xi jundío̱jiín xi tsꞌén kuí nii̱ nga.

⁴⁸ Chjiéngá kixi̱ ngatamajnú xikó má tsꞌén kixi̱ Na̱ꞌmijnú xi tikón ndiꞌakꞌajmi jàn.