Matioo̱ 4 - Xo̱jo̱n eén Néná

Bi̱ tsꞌén kachjatꞌayákón Kjisoo̱

¹ Kósꞌe̱ A̱si̱énni̱xtjii̱n Néná kijíjo̱ Kjisoo̱ nangi kixií, tsi̱ꞌe̱ nga xindajín ndiabloo̱ skótꞌayákón.

² Kó ngije yichán ni̱xtjin ko̱jo yichán ni̱xtji̱e̱n nga kisꞌijña kjindiá, kamábojoó.

³ Kó xi kjitꞌayákónná jachókoón Kjisoo̱ tsi̱ꞌe̱ nga skótꞌayákón, kó bi̱ katsoó: –Tsi ja̱koxi̱ nga ndií Néná jí, bo̱a̱ tꞌín ji nga pan ngatama kui ndi̱jo̱o̱.

⁴ Ta̱nga Kjisoo̱, bi̱ katsoó: –Jè kjitꞌa xo̱jo̱n eén Néná nínga bi̱ tsoó: «Jmí tsi ta̱ pan tsí xi kꞌuijñáni ngo xota̱, chjiénrií ngayeje én xí fotjonii̱ tsꞌoa Néná.»

⁵ Kósꞌe̱ xindajín ndiabloo̱ kijíjo̱ Kjisoo̱ na̱xi̱ńdáꞌniú tsjie Jerusale̱n, kó ki̱a̱ asién són nkꞌaa̱ na̱ngo̱xi̱i̱,

⁶ kó bi̱ katsoó: –Tsi ja̱koxi̱ nga ndií Néná jí, tjajmingí ji yojòo̱, ngatꞌa̱ jè kjitꞌa xo̱jo̱n eén Néná nínga bi̱ tsoó: Néná sa̱ngíyá ndítsjiee̱ tiña nínga tindyin ji, kó tsja ko̱óꞌniúnií, tsi̱ꞌe̱ nga ngojín ndi̱jo̱ stingí ndsa̱ki.

⁷ Sꞌe̱ Kjisoo̱, bi̱ katsoó: –Ti̱ bi̱ ti̱ tsꞌén kjitꞌa xo̱jo̱n eén Néná, nínga bi̱ tsoó: «Ka̱májín chjátꞌeyékín ji Ndi̱a̱a̱, kui xi Nèe̱.»

⁸ Sꞌe̱ ti̱ kijíjo̱ nginí xindajín ndiabloo̱ ngo tji̱ngi̱ xi ꞌniú nkꞌa, kó akoó ngayeje ngi̱ndie nínga botíxoma xi tjín nga̱sondiee̱, ko̱jo kjo̱a̱je xi tjiín nga ngo nga ngo,

⁹ kó bi̱ katsoó: –Ngayeje kui nii̱ xi tsjaa ji, tsi ko̱si̱ntꞌénítikóo̱ nga si̱ꞌindikínní.

¹⁰ Kósꞌe̱ Kjisoo̱, bi̱ katsoó: –Chjéndi̱yáa̱, xindajín Satana̱, ngatꞌa̱ jè kjitꞌa xo̱jo̱n eén Néná nínga bi̱ tsoó: «Ndi̱a̱ xi Ne tse̱ xí ti̱ꞌindikín jí, kó ta̱kuítsí xi si̱ꞌinxétꞌée̱.»

¹¹ Kósꞌe̱ kui xindajín ndiabloo̱ xín kijí, kó katsꞌénkjii̱n yojoo̱ Kjisoo̱, kó ndítsjiee̱ Néná jachókoón Kjisoo̱ xi katsꞌénseén.

Bi̱ tsꞌén ítsꞌi̱yanii̱ Kjisoo̱ nga katsꞌén xaá

¹² Kó nga tsintꞌié Kjisoo̱ nga Juaa̱ ndo̱bo̱a̱yà tjiꞌyá, kijíꞌoyá nginí nangi Ngalilea̱.

¹³ Kó íjñámasien na̱xi̱ńdáꞌniú Nasaree̱t, kó na̱xi̱ńdáꞌniú Kapernau̱n kijíkꞌíjñá, kui ngi̱ndiee̱ tiña ndáchíkón xi tikón nangi Sabulo̱n ko̱jo Neftali̱ tikón,

¹⁴ tsi̱ꞌe̱ nga jatjosón ngayeje ni xi katsó nda̱ chji̱ni̱e̱ꞌe̱én Néná xi ꞌmí Isayaa̱, nga bi̱ katsó:

¹⁵ Nangi Sabulo̱n, ko̱jo nangi Neftali̱, ndi̱yà xi fíni ndáchíkoón, ngándaá ndejèꞌ Jorndaa̱n, nangi Ngalilea̱ nínga tjín xota̱ xi jundío̱jín.

¹⁶ Xota̱ xi kisꞌińdo jñoó, je kamábe ngo ndiꞌí xí je, ngo ndiꞌí je katsꞌéntsijee̱n ngayeje xota̱ xi kisꞌińdojñójo̱ kjo̱a̱bo̱yaa̱.

¹⁷ Ngaskande koó kjiꞌa ítsꞌi̱yanii̱ Kjisoo̱ nga íni̱jmì eén Néná, kó bi̱ katsó: –Ti̱ꞌankꞌoyàjnú yojojnú, ngatꞌa̱ Néná jè tsá ko̱tíxoma.

Kjisoo̱ bi̱ tsꞌén tsíchji̱a̱a̱ nijón já xí tsoboá tji̱o̱

¹⁸ Kó nga tsoꞌbá Kjisoo̱ tꞌa ngi̱ndiò xí tikón nangi Ngalilea̱, kamábe jó já xí ntsꞌi̱e̱ ma xkjín, nda̱ xi ꞌmí Ximoo̱, kui xi ti̱ Pé kiꞌmií nga, ko̱jo ntsꞌi̱e̱ kui nda̱a̱, kui xi ꞌmí Jandree̱ nga nda̱ꞌya ndyi̱mejèn ngi̱jin ndáchíkoón, ngatꞌa̱ xá tji̱o̱ katsꞌén kui jaá.

¹⁹ Kó Kjisoo̱, bi̱ katsoó: –Ndibátjingijnúꞌun, kó án xí sa̱ꞌinjnúꞌun nga ta̱sá xota̱ xi kꞌuitíkójnú xikoó tsi tji̱o̱ xi ko̱ndo̱bo̱a̱jnú.

²⁰ Sꞌe̱ kui jaá ti̱ kjiꞌa índomasien nda̱ꞌya̱a̱, kó kijítji̱ngii̱ Kjisoo̱.

²¹ Kó kijí boaꞌá ngi̱chí Kjisoo̱, sꞌe̱ kamábe nginí ngi jó já xí ntsꞌi̱e̱ máa xkjín, nda̱ xi ꞌmí Sandiyaá ko̱jo ntsꞌi̱e̱ kui nda̱a̱ xi ꞌmí Juaa̱, ndií nda̱ xi ꞌmí Sebedeoo̱, nga jó kui jaá, ko̱jo na̱ꞌmii̱ ngo ngi̱ya tjotso je síndo nínga ndyi̱kjóyajin nda̱ꞌya̱a̱. Ndibátjingijnúꞌun katsó Kjisoo̱.

²² Kó kui jaá índomasien tjotso jee̱ ko̱jo na̱ꞌmii̱, sꞌe̱ kijítji̱ngii̱ Kjisoo̱.

Kjisoo̱ bi̱ tsꞌén akóyá ko̱jo katsꞌéndaya kjín xota̱

²³ Kó Kjisoo̱ kijí ngayeje na̱xi̱ńdá xí chji̱a̱ni nangi Ngalilea̱, nga akóyá éntjatsi̱e̱e̱ Néná ki̱a̱ ndiꞌa nínga ndokjo̱a̱ eén Néná, kó íni̱jmì kjo̱a̱a̱ nínga botixómá Néná, ko̱jo katsꞌéndaya ngayeje xota̱ xi tjiín ngo chiꞌin, ko̱jo xi oo̱n.

²⁴ Kó ta̱jñàní nga kandaꞌyá ni xi katsꞌén Kjisoo̱, ngayeje ngi̱ndie xi chji̱a̱ni nangi Siria̱, kó tsangínjoo̱ ngayeje xota̱ xi tjiín ngo chiꞌin, ko̱jo ngayeje xi oo̱n, ko̱jo xi tjíjii̱n a̱siénni̱xtjin xi ndajín, ko̱jo xi tjiín kjo̱a̱ndasen, ko̱jo xi tjiín chiꞌin ꞌmeya, ko̱jo xi májín fí, kó Kjisoo̱ katsꞌéndaya kui xotaa̱.

²⁵ Kó achichí má xota̱ xi kijítji̱ngii̱ xi chji̱a̱ni nangi Ngalilea̱, ko̱jo Ndekápoli̱, ko̱jo na̱xi̱ńdáꞌniú Jerusale̱n, ko̱jo nangi Jundea̱, ko̱jo ngayeje ngi̱ndie xi síndotꞌa ndejèꞌ Jorndaa̱n.