Matioo̱ 27 - Xo̱jo̱n eén Néná

Bi̱ tsꞌén tsangínjo̱ Kjisoo̱ ngindyi̱ko̱n xtitjón Pilatoo̱

¹ Nga kisisie̱èn, ngayeje já ngito̱ko̱o̱ chináꞌmii̱ ko̱jo já xchá ngito̱ko̱o̱ na̱xi̱ńdaá, kamátikó xtín tsi̱ꞌe̱ nga índa nga sa̱ꞌínkꞌién Kjisoo̱,

² kó ítaꞌniú nga kijíjo̱, sꞌe̱ kiniꞌánkꞌasꞌiee̱n nda̱ xtitjón Ponsio Pilatoo̱.

Bi̱ tsꞌén katsꞌénxíndo yojoo̱ Jundaa̱

³ Kósꞌe̱ Jundaa̱, nda̱ xi katsꞌénkꞌasꞌien Kjisoo̱, nga kamábe nga je si̱ꞌankꞌien Kjisoo̱, katsꞌénkꞌoyá yojoo̱ nga katsjáꞌóyá nginií nga kantié to̱ntiboaa̱ já ngito̱ko̱o̱ chináꞌmii̱, ko̱jo já xchá ngito̱ko̱o̱ na̱xi̱ńdaá,

⁴ kó bi̱ katsó: –Katsꞌenjé án nga katsꞌenkꞌasꞌienjnúꞌun nga kiniꞌánkꞌién ngo nda̱ xi jmí jéjiín. Sꞌe̱ kui jaá bi̱ katsó: –Kó ji̱n mí ndasenjne̱ kui nii̱. ¡Ni tse̱ boá xi̱ꞌba̱!

⁵ Kó Jundaa̱ atítsojo to̱ntiboaa̱ ki̱a̱ na̱ngo̱xi̱i̱, jataxie, sꞌe̱ kijí, kó katsꞌénxíndo yojoo̱.

⁶ Ta̱nga já ngito̱ko̱o̱ chináꞌmii̱ jaꞌáꞌyá kui to̱o̱n, sꞌe̱ bi̱ katsó: –Kjo̱a̱kitii̱ tsjandièjín nga kui to̱o̱n ki̱a̱ ku̱i̱ndyia koxa̱ to̱nchji̱e̱e̱ na̱ngo̱xi̱i̱, ngatꞌa̱ chjií nga kiniꞌánkꞌién ngo nda̱ boá.

⁷ Kó ngije asíyaá xkjín mí ni xi sa̱ꞌín, ngo tꞌanangi tsꞌatsie xi ꞌmí: Ngi̱ndiee̱ nda̱ xi tsꞌénda ti̱ji̱í, tsi̱ꞌe̱ nga ki̱a̱ ko̱ónijín xota̱ xi xín nangi chji̱a̱ni.

⁸ Kó kuíni nga, ngaskande ngotꞌe̱, Ngi̱ndiee̱ jín, ꞌmí kui ngi̱ndiee̱.

⁹ Kósꞌe̱ bo̱a̱ tsꞌén jatjosón ni xi katsó nda̱ chji̱ni̱e̱ꞌe̱én Néná xi ꞌmí Jeremiyaa̱, kjiꞌanga bi̱ katsó: «Kó iskjíbé nga kantié to̱ntiboaa̱, chjí xí íjñaá xota̱ Israee̱l nga bo̱a̱ tjín chjií kui nda̱a̱,

¹⁰ kó katseꞌeé tsi̱ꞌe̱ nga tsꞌatsie ngi̱ndiee̱ nda̱ xi tsꞌénda ti̱ji̱í, xikó katsó Ndi̱a̱a̱.»

Pilatoo̱ bi̱ tsꞌén katsꞌénkijentsꞌoa Kjisoo̱

¹¹ Kó Kjisoo̱ jachó kje̱n nda̱ xtitjón xi ꞌmí Pilatoo̱, kó kui nda̱a̱, bi̱ katsó nga asíyaá Kjisoo̱: –A jí xí nda̱ Ree̱ xota̱ jundíoo̱ ji. Sꞌe̱ Kjisoo̱, bi̱ katsó: –Ja̱ bo̱a̱ kjiꞌi ni xi tꞌísé ji.

¹² Kó kjiꞌanga já ngito̱ko̱o̱ chináꞌmii̱, ko̱jo já xchá ngito̱ko̱o̱ na̱xi̱ńdaá yíngítaꞌin Kjisoo̱, jmí ni katsójín.

¹³ Kósꞌe̱ bi̱ katsó nginí Pilatoo̱ nga asíyaá: –A ndaꞌyéjín ngayeje ni xi tjíꞌmí kondra̱ tse̱.

¹⁴ Ta̱nga Kjisoo̱ nde ngo én tsíchji̱a̱jín, kó ngaskande achichí kijíndikoón nda̱ xtitjoón kui nii̱.

Bi̱ tsꞌén katseꞌéjeé nga si̱ꞌankꞌien Kjisoo̱

¹⁵ Kó xki̱ nga ma sꞌué paskuaa̱, nda̱ xtitjoón kamángaá nga ꞌbijñándé ngo nda̱ xi tjiꞌyá ndo̱bo̱a̱yà, ta̱ xi míꞌá xota̱ na̱xi̱ńdaá.

¹⁶ Kó kui ni̱xtjin jàn ndo̱bo̱a̱yà kisꞌijña ngo nda̱ xi ta̱ ꞌyání xi kamábe, xi ꞌmí Barraba̱.

¹⁷ Kó nga kamátikó xota̱ na̱xi̱ńdaá, bi̱ katsó Pilatoo̱: –ꞌYání xi mejénjnú nga kꞌuijñándé án: A Barrabaa̱, axa̱ Kjisoo̱ kui xi Kristoo̱ ꞌmií.

¹⁸ Ngatꞌa̱ ja̱bo̱a̱ ja̱ bo̱a̱ jè be Pilatoo̱ nga ta̱ kjo̱a̱a̱ kjo̱a̱ꞌontakón boá nga kiniꞌánkꞌasꞌien Kjisoo̱.

¹⁹ Kó tji̱e̱nga tikón Pilatoo̱ ngi̱ndie nínga niꞌánjeé, chjo̱ón katsangiyaa̱ ngo én xi bi̱ tsó: «Ngata̱ jijín chingajin nii̱ kui xota̱ kixi̱i̱, ngatꞌa̱ achichí kjo̱a̱ni̱ma̱ jaꞌatio an ngi̱jin ńjñána ngoye ta̱ngatꞌanii̱ kui.»

²⁰ Ta̱nga já ngito̱ko̱o̱ chináꞌmii̱, ko̱jo já xchá ngito̱ko̱o̱ na̱xi̱ńdaá, katsꞌeén kjo̱a̱ꞌniú xota̱ na̱xi̱ńdaá tsi̱ꞌe̱ nga, nga ta̱sá Barrabaa̱ xi kꞌuijñándé, kó nga ta̱sá Kjisoo̱ xi si̱ꞌankꞌien ka̱tso̱.

²¹ Kó nda̱ xtitjoón, bi̱ katsó nga asíyaá xota̱ na̱xi̱ńdaá: –ꞌYání nga jó kui jaá xi mejénjnú nga kꞌuijñándé. Kó bi̱ katsó xota̱ na̱xi̱ńdaá: ¡Barrabaa̱!

²² Sꞌe̱ Pilatoo̱, bi̱ katsó nginí: –Kó mí ni xi sa̱ꞌinjo̱ an Kjisoo̱, kui xi Kristoo̱ ꞌmií. Kó ngayeje xota̱ na̱xi̱ńdaá, bi̱ katsó: ¡Tjatꞌe ji kro!

²³ Ta̱nga bi̱ katsó nda̱ xtitjoón: –Ja̱ mí ni xi ndajín xi katsꞌén. Ta̱nga ta̱sá má ꞌniú ngase askjandáyà xotaa̱ nga bi̱ katsó: ¡Tjatꞌe ji kro!

²⁴ Kó nga kamábe Pilatoo̱ nga ngiti̱ jmí ni kamájín katsꞌén, nga ta̱sá kamákján ngasee̱ xota̱ na̱xi̱ńdaá, iskjíbé chií ndáfoa sꞌe̱ aniéjón tsja ngindyi̱ko̱n xotaa̱, kó bi̱ katsó: –Jmí jéjínna kjo̱a̱a̱ nga ko̱yà kuí nda̱ kixi̱i̱, ni tsa̱jún boá kui nii̱.

²⁵ Kó bi̱ katsoó xota̱ na̱xi̱ńdaá: ¡Ji̱n ko̱jo ndíjne̱ ngatamajéjne̱ kjo̱a̱a̱ nga ko̱yà kuí nda̱a̱!

²⁶ Kósꞌe̱ Pilatoo̱ íjñandé Barrabaa̱, kó katsjákjo̱a̱ tsi̱ꞌe̱ nga kjoaá Kjisoo̱, sꞌe̱ katsꞌénkꞌasꞌien tsi̱ꞌe̱ nga kjótꞌa kro.

²⁷ Kósꞌe̱ jájuún nda̱ xtitjoón, kijíjo̱ Kjisoo̱ ndi̱tsen ndiꞌa nínga niꞌánjeé xotaa̱, kó ki̱a̱ kamátikó jájún xi ngasee̱.

²⁸ Kó ki̱a̱ kachjeꞌéxiín ńjñoo̱ Kjisoo̱, sꞌe̱ katsꞌénkajá ngo ńjño xi koán,

²⁹ kó ngo korona̱ ndaꞌyá íꞌá to̱ko̱, sꞌe̱ ngo yáxá íyá tsja fojní, sꞌe̱ kui jaá tsajnókie nga asiéntꞌaa̱tikoó, nga bi̱ katsoó: ¡Tinde nda̱ Ree̱ xota̱ jundío̱!

³⁰ Kó atítiajón, iskjíbé yáxaá, sꞌe̱ tsꞌanié to̱ko̱ Kjisoo̱.

³¹ Sꞌe̱ ngije tsajnókie, jaꞌáxiín ńjño xi kjitꞌa nga̱xto̱n, sꞌe̱ katsꞌénkajá nginí ńjñoo̱, sꞌe̱ kijíjo̱ tsi̱ꞌe̱ nga ko̱ótꞌa kro.

Bi̱ tsꞌén akjatꞌa kro Kjisoo̱

³² Kó nga jatjo ki̱a̱a̱, kamábe ngo nda̱ xi chji̱a̱ni na̱xi̱ńdáꞌniú Sirene̱ xi ꞌmí Ximo̱, kui nda̱a̱ kiniꞌaán kjo̱a̱ꞌniú tsi̱ꞌe̱ nga asíko̱jo nga yaꞌajo̱ kroo̱ Kjisoo̱.

³³ Kó nga jachó ngo ngi̱ndie xi ꞌmí Ngólngota̱, ngi̱ndiee̱ ńdato̱ko̱ ini̱ma̱, tsó kui eén,

³⁴ ki̱a̱ katseꞌeé bino̱ xi kiniꞌánkꞌájinni ni sa, ta̱nga ngije askotꞌa Kjisoo̱, kamámejénjiín katsꞌe.

³⁵ Ngije akjatꞌa kro, jájuún katsatonjo̱ kjo̱a̱chꞌáṉcha̱ ńjñoo̱ Kjisoo̱, sꞌe̱ iskjíbé ńjño xi katsꞌén nga ngo nga ngo. Bo̱a̱ tsꞌén jatjosón ni xi katsó nda̱ chji̱ni̱e̱ꞌe̱én Néná, nga bi̱ katsó: «Katsꞌénkjaꞌasoón xkjín ńjñona, kó katsatonjo̱ kjo̱a̱chꞌáṉcha̱ ńjñona.»

³⁶ Kó ki̱a̱ kisꞌińdo, nga askondá Kjisoo̱.

³⁷ Kó ngo yátie yítꞌa nkꞌaa̱ to̱ko̱ kroo̱, xi bi̱ tsó: «KUÍ XI̱ꞌBI̱ XI KJISOO̱, NDA̱ REE̱ XOTA̱ JUNDÍOO̱.»

³⁸ Kósꞌe̱ nijan akjatꞌajo̱ kro Kjisoo̱ jó jáchéjé, ngo nga fojnií, ko̱jo ngo nga skoón.

³⁹ Kó xota̱ xi jaꞌa ki̱a̱a̱ achichí chꞌo katsoó Kjisoo̱, kó katsꞌénkatjí má to̱ko̱,

⁴⁰ nga bi̱ katsoó: ¡Ji xi niꞌínkixóndé jí ngo na̱ngo̱xi̱, sꞌe̱ xi ma ján ni̱xtjin niꞌínde nginí, ꞌna̱xiéꞌé so̱bo̱e̱ ji yojòo̱, tsi ndií Néná jí, kó ti̱tjaje̱n ji kroo̱!

⁴¹ Ti̱ bo̱a̱ ti̱ tsꞌén tsajnókie já ngito̱ko̱o̱ chináꞌmii̱, ko̱jo já chji̱ni̱e̱kjo̱a̱kitii̱, ko̱jo já fariseoo̱, ko̱jo já xchá ngito̱ko̱o̱ na̱xi̱ńdaá, nga bi̱ katsó:

⁴² –Tsꞌaxiéꞌá kje̱ꞌe xota̱, ta̱nga májiín ꞌboxiéꞌá soboá yojoo̱, tsi kjeén nga kui xi nda̱ Ree̱ Israee̱l, ngatjatjajen kroo̱ ngotꞌe̱ má, ki̱a̱ ka̱maa̱ nga sꞌi̱jinjne̱ kui.

⁴³ Kamáꞌniátakón Néná, ja̱ Néná ngatꞌaxiéꞌá ngotꞌe̱ ꞌne̱ tsobo̱a̱ tsi tjoó, ngatꞌa̱ bi̱ katsó: Án xí ndií Néná.

⁴⁴ Kó ti̱ bo̱a̱ ti̱ tsꞌén chꞌo katsó jáchéjé xí nijan kisitꞌajo̱ kro Kjisoo̱.

⁴⁵ Kó ndeskande nga ndisꞌueé, kó ngaskande nga kamá chi̱bo̱a̱ ján nga kamángixón, ngayeje nga̱sondiee̱ kisꞌiejñó.

⁴⁶ Kó ngije ma kamá chi̱bo̱a̱ ján nga kamángixón Kjisoo̱ ꞌniú askjandáyà, nga bi̱ katsó: –Elí, Elí, lama sabaktani.

⁴⁷ Kó tjín káꞌá xota̱ xi síndo ki̱a̱a̱, nga tsintꞌié ni xi katsó Kjisoo̱, bi̱ katsó: –Nda̱ chji̱ni̱e̱ꞌe̱én Néná xi ꞌmí Eliyaa̱ tsꞌénchji̱a̱a̱.

⁴⁸ Kó ti̱ kjiꞌa tsanga má ngo nda̱ xi kijíkjaꞌá ngo nixó xí katsꞌénkꞌandyi̱ni bino̱ san, sꞌe̱ ngo yáxá ítokó, sꞌe̱ katsjaá Kjisoo̱ tsi̱ꞌe̱ nga kꞌuí.

⁴⁹ Ta̱nga xota̱ xi ngasee̱, bi̱ katsoó: –Xióchònjnú, akjénráa̱ nga Eliyaa̱ kjo̱e̱ꞌékꞌaxiéꞌá.

⁵⁰ Kó Kjisoo̱, ti̱ askjandáyà nginí, sꞌe̱ kꞌien ngijee̱.

⁵¹ Kó ńjñotjibé xi tjíchjáni ngi̱ya nínga ꞌniú ndikoón na̱ngo̱xi̱i̱ jó tjín kamá nga katjondiyá, ndeskande nkꞌa jàn, ngaskande ngindie jàn, sꞌe̱ kjindibá ngo kjo̱a̱ndi̱ko̱n kuí tꞌanangii̱, kó ndi̱jo̱o̱ tsakjanga,

⁵² sꞌe̱ katjoxꞌá ngayeje nga̱tsjo̱ó, kó ngaskande achichí má yojo kꞌiee̱n xota̱ tsjiee̱ Néná xí ja̱bo̱a̱ je jesón xi jaꞌáꞌyá nginií,

⁵³ kó ngije jataxie nga̱tsjo̱ó, ngije jaꞌáꞌyaá Kjisoo̱, kui xotaa̱ tsꞌasꞌien na̱xi̱ńdáꞌniú tsjiee̱, kó achichí má xota̱ xi kamábe.

⁵⁴ Kó ngito̱ko̱o̱ jájuún ko̱jo jájún xi ndyi̱konda Kjisoo̱ nga kamábe kjo̱a̱ndi̱ko̱ón, ko̱jo ngayeje ni xi kamaá, achichí katsakjónní, kó bi̱ katsó: –¡Ja̱koxi̱ nga kui nda̱a̱ xi ndií Néná!

⁵⁵ Kó kjín má ínchjín xí ta̱ kjin askotsijennii̱ ni xi kamaá, xi tsajátji̱ngii̱ Kjisoo̱ ndeskande Ngalilea̱ nga katsꞌénseén,

⁵⁶ ngi̱jii̱n kui ínchjiín kisꞌińdo na̱ Riya̱ Lenaa̱, ko̱jo na̱ Riyaa̱ na̱aa̱n Sandiyaá ko̱jo Kosiee̱, ko̱jo na̱aa̱n ndií Sebedeoo̱.

Bi̱ tsꞌén akjanijín Kjisoo̱

⁵⁷ Kó nga kamángixoón, jachó ngo nda̱ cho̱n xi chji̱a̱ni na̱xi̱ńdáꞌniú Arimatea̱ xi ꞌmí Kosie̱, xi ti̱ xota̱ tsi̱ꞌe̱ Kjisoo̱ kamá nga,

⁵⁸ kó kui nda̱a̱ kijíkoón Pilatoo̱, kó tsíꞌaá yojo kꞌiee̱n Kjisoo̱, sꞌe̱ Pilatoo̱ katsjákjo̱a̱ tsi̱ꞌe̱ nga kui nda̱a̱ si̱ꞌankꞌasꞌiee̱n yojoo̱ Kjisoo̱.

⁵⁹ Kó Kosiee̱ iskjíbé yojo kꞌiee̱n Kjisoo̱, kó ngo ńjñotjibé tsjie ítsakjájón,

⁶⁰ sꞌe̱ íjñá yojo kꞌiee̱n Kjisoo̱ ngo ngi̱ya nga̱tsjo̱ó tja̱tsi̱e̱, xi kamánda tꞌa ngo ndi̱jo̱je, sꞌe̱ katsꞌéngátíkjayá ngo ndi̱jo̱je xi íchjáni nga̱ntjo̱a̱a̱ kui nga̱tsjo̱ó, sꞌe̱ kijí kui nda̱a̱.

⁶¹ Kó ki̱a̱ kje̱n nga̱tsjo̱ó síndo na̱ Riya̱ Lenaa̱, ko̱jo na̱ Riyaa̱ xi ingoo̱.

Bi̱ tsꞌén kichindá nga̱tsjo̱ó Kjisoo̱

⁶² Kó nga kamángindyiojón, ngije jaꞌa ngo ni̱xtjin nga ikꞌíjñanda sꞌué paskuaa̱, kamátikó ngayeje já ngito̱ko̱o̱ chináꞌmii̱ ko̱jo já fariseoo̱ kje̱n Pilatoo̱,

⁶³ kó bi̱ katsó: –Ndi̱a̱, je jaꞌátsjienjne̱ nga kui nda̱ ndisoo̱, bi̱ katsó nga kisꞌijña: Ngije kjo̱a̱ꞌa ján ni̱xtjin kjo̱a̱ꞌáꞌyána.

⁶⁴ Nangíyé ji nga xchindà nga̱tsjo̱ó ngaskande xi ma jaán ni̱xtjin, ngatꞌa̱ tsájmi̱ tsi ta̱ xota̱ tsi̱ꞌe̱ kjo̱e̱ꞌe nga jñoó, sꞌe̱ kjo̱jo yojoo̱, kó bi̱ ka̱tso̱o̱ xota̱ na̱xi̱ńdaá: «Jè jaꞌáꞌyaá ngi̱jii̱n xota̱ xi je jesón», kó kui kjo̱a̱ndisoo̱ je ngase, ka̱ma ta̱bo̱a̱jiín xi tjoón.

⁶⁵ Kó Pilatoo̱ bi̱ katsó: –Tangínjo̱jnú jájún, kó nda nga konda nga̱tsjo̱ó.

⁶⁶ Sꞌe̱ kijí kui jaá, kó askondá nga̱tsjo̱ó, kó ngo ndi̱jo̱je íjñachjaá nga̱ntjo̱a̱ nga̱tsjo̱ó, sꞌe̱ ki̱a̱ kisꞌińdondá jájuún.