Matioo̱ 26 - Xo̱jo̱n eén Néná

Bi̱ tsꞌén índa jáxaá tsi̱ꞌe̱ nga stso̱ba̱ Kjisoo̱

¹ Kó ngije kamá nga tsíchji̱a̱ Kjisoo̱ ngayeje kui eén, bi̱ katsoó xota̱ tsi̱ꞌe̱:

² –Ja̱ jè yàjnú nga ngi jó ni̱xtjin chaja nga ka̱ma sꞌué paskuaa̱, kó ndií nda̱ xi̱ꞌii̱n si̱ꞌankꞌasꞌien tsi̱ꞌe̱ nga kjótꞌa kro.

³ Kósꞌe̱ já ngito̱ko̱o̱ chináꞌmii̱, ko̱jo já chji̱ni̱e̱kjo̱a̱kitii̱, ko̱jo já xchá ngito̱ko̱o̱ na̱xi̱ńdaá kamátikó ndi̱tsen ndiꞌaa̱ chináꞌmi xi ꞌniú nkꞌa xaá xi ꞌmí Kaifaa̱,

⁴ kó índa tsi̱ꞌe̱ nga ku̱i̱ꞌíndiso nga stso̱ba̱ Kjisoo̱ ko̱jo tsi̱ꞌe̱ nga sa̱ꞌínkꞌién,

⁵ ta̱nga bi̱ katsoó xkjín: –Jmí tsi ngi̱jii̱n sꞌueé nga bo̱a̱ si̱ꞌán, tsi̱ꞌe̱ nga ka̱makjánjiín xota̱ na̱xi̱ńdaá.

Bi̱ tsꞌén akatiéjón ndásíje̱n to̱ko̱ Kjisoo̱

⁶ Kó nga tikón Kjisoo̱ ki̱a̱ na̱xi̱ńdáꞌniú Betania̱, ki̱a̱ ndiꞌaa̱ Ximoo̱ nda̱ xi tjiín chiꞌin xi tsꞌénkjátsón tji̱xin yojoná,

⁷ jachókón tiñaa̱ ngo xota̱chjo̱on xí yaꞌa ngo ndí ramita̱ ndásíje̱n xi achichí chjí, kó indyiaá to̱ko̱ Kjisoo̱ nga tikóntꞌa yámíxa̱a̱.

⁸ Ta̱nga nga kamábe kui nii̱ xota̱ tsi̱ꞌe̱ Kjisoo̱, katsꞌénxchán nga bi̱ katsó: –Ánní nga ta̱ tjíniꞌánkjatsón kón kui ndásíjee̱n.

⁹ Ngatꞌa̱ kamá tsí ta̱sá kastiñá, kó kamá tsí kui to̱o̱n, xota̱ ni̱ma̱ xi jmí to̱njiín katseꞌeé.

¹⁰ Kó Kjisoo̱ kamákjiín kui nii̱, sꞌe̱ bi̱ katsó: –Ánní nga jún ndyi̱niꞌánxtijnúu̱ kui xota̱chjo̱on. Ngatꞌa̱ ndakjíꞌí ni xi tjítsꞌénjo̱na,

¹¹ ngatꞌa̱ jún, ngatsjéni̱xtjin kꞌuíndojinjnú xota̱ ni̱ma̱a̱, ta̱nga an jmí tsi ngatsjéni̱xtjin kotíjña̱jinjnúꞌun.

¹² Ngatꞌa̱ nga ndásíje̱n katsanginjonna, jè íjñanda yojona tsi̱ꞌe̱ nga kjo̱nijín an.

¹³ Ja̱koxi̱ ni xi xiánjnúꞌun nga ta̱jñà ngi̱ndienií nga̱sondiee̱ nínga kꞌuiníjmì éntjatsi̱e̱e̱ Néná, ti̱ bo̱a̱ ti̱ tsꞌén ko̱ndókjo̱a̱ ni xi katsꞌén kui xota̱chjo̱on, kó bo̱a̱ tsꞌén si̱ꞌankjaꞌátsjien kui.

Bi̱ tsꞌén índa Jundaa̱ nga katsꞌénkꞌasꞌien Kjisoo̱

¹⁴ Kósꞌe̱ ngo nda̱ xi chji̱a̱ni nga tiejó xota̱a̱ Kjisoo̱ xi ꞌmí Junda̱ Iskariotee̱, kijíkoón já ngito̱ko̱o̱ chináꞌmii̱,

¹⁵ kó bi̱ katsoó: –Mí xí ko̱e̱ꞌéjnúꞌun, kó án sa̱ꞌinkꞌasꞌienjnúꞌun Kjisoo̱. Kó kui jaá kantié to̱ntiboa índa nga tsja̱á.

¹⁶ Kó ndeskande koó kjiꞌa tsangasendie Jundaa̱ kótsꞌèn nga sa̱ꞌínkꞌasꞌien Kjisoo̱.

Kjisoo̱ bi̱ tsꞌén iskjiniejo̱ ngase ṉño̱ xota̱a̱

¹⁷ Ni̱xtjin tjoón nga chinie pan xi jmí nisan mindyiajiín, jachókoón xota̱ tsi̱ꞌe̱ Kjisoo̱, kó bi̱ katsó kui jaá: –Ñání nga mejeén nga kꞌuijñándajne̱ ni xi xi̱ni̱ ji nga ka̱ma sꞌué paskuaa̱.

¹⁸ Kó Kjisoo̱, bi̱ katsó: –Tangínjnú na̱xi̱ńdáꞌniuú, ti̱ndyi̱séjnú ngo nda̱ xi yàjnú, kó bi̱ tꞌínjnúu̱: «Bi̱ tsó nda̱ Mostroo̱: Jè xò kamátiña ni̱xtjii̱n, kó ndiꞌa tse̱ xò sa̱ꞌín sꞌué paskuaa̱, ko̱jo xota̱ tsi̱ꞌe̱.»

¹⁹ Kó xota̱ tsi̱ꞌe̱ katsꞌén ngayeje ni xi katsoó Kjisoo̱, kó íjñanda nichinie tsi̱ꞌe̱ sꞌué paskuaa̱.

²⁰ Kó nga kamángixoón, Kjisoo̱ ko̱jo nga tiejó xota̱a̱ kisꞌińdotꞌa yámíxa̱.

²¹ Kó nga ndyi̱kjinie ṉño̱, bi̱ katsó Kjisoo̱: –Ja̱koxi̱ ni xi xiánjnúꞌun, nga ngo jún xi sa̱ꞌínkꞌasꞌienna.

²² Kósꞌe̱ achichí ndasen kamaá kui jaá, kó ńgó ńgó ítsꞌi̱yanii̱ nga bi̱ katsó: –Ndi̱a̱, a án boá tsobo̱a̱.

²³ Kósꞌe̱ Kjisoo̱, bi̱ katsó: –Xi sa̱ꞌínkꞌasꞌienna, kuí boá xi sa̱ngíndá paa̱n ngi̱ya ti̱bo̱a̱na.

²⁴ Ja̱koxi̱ nga ndií nda̱ xi̱ꞌii̱n chjiéngá bo̱a̱ ka̱maa̱ xikótsꞌèn kjitꞌa xo̱jo̱n eén Néná, ta̱nga ¡ni̱ma̱ xò kuí nda̱ xi ta̱ngatꞌanii̱ kui nga si̱ꞌankꞌasꞌien! Ta̱sara̱ ndatsi ta̱ bo̱a̱a̱ katsenjín.

²⁵ Kósꞌe̱ bi̱ katsó Jundaa̱, nda̱ xi katsꞌénkꞌasꞌien Kjisoo̱: –A án boá Mostro̱. Sꞌe̱ Kjisoo̱, bi̱ katsó: –Ti̱ jíní xi bo̱a̱ kase ji.

²⁶ Kó tji̱e̱nga ndyi̱kjinie nichiniee̱, Kjisoo̱ iskjíbé ngo pan, katsꞌénchikonñé, akjángá, sꞌe̱ katsjaá xota̱ tsi̱ꞌe̱, kó bi̱ katsoó: –Chjábéjnú kó chi̱ni̱e̱jnú, kuí xi̱ꞌbi̱ xi yojona.

²⁷ Kó ngije iskjíbé chi̱tse̱én, ko̱jo ngije katsjaá ndokꞌóchjì Néná, katsjaá kui jaá, nga bi̱ katsoó: –Tꞌi̱o̱jnú ngayeje jún,

²⁸ ngatꞌa̱ kuí xi̱ꞌbi̱ xi jínna, nínga tjíꞌbínda ngo kjo̱a̱tja̱tsi̱e̱ tsi̱ꞌe̱ Néná ko̱jo jún. Jín xí xtjoón ta̱ngatꞌanií kjo̱a̱ndaa̱ kjín xota̱, tsi̱ꞌe̱ nga si̱ꞌanjetakoón jeé.

²⁹ Kó xiyàjnúꞌun nga ngotꞌe̱ ngiti̱ kꞌuijín an ndaá tostsi̱je̱è, ngaskande nga kꞌuíjo̱jnúꞌun xi tja̱tsi̱e̱e̱, nga ku̱i̱ndyión ngi̱ndie nínga botixómá Na̱ꞌmina.

Bi̱ tsꞌén katsóyàtjón Kjisoo̱ nga Peé sa̱ꞌínkiejín yojoo̱

³⁰ Kó ngije kisie só xi ndaa̱ Néná, kijí nínga tikón tji̱ngi̱ nínga tjín yáꞌoliboo̱.

³¹ Kósꞌe̱ Kjisoo̱, bi̱ katsoó xota̱a̱: –Ngayejejnú nga kui ni̱xtji̱e̱e̱n ngiti̱ sꞌi̱jinjínjnú an, ngatꞌa̱ jè kjitꞌa xo̱jo̱n eén Néná, nínga bi̱ tsoó: «Sa̱ꞌinꞌóo̱n nda̱ xi koo̱n cho̱tsa̱nga̱a̱, kó cho̱tsa̱nga̱a̱ stso̱joboa.»

³² Ta̱nga ngije kjo̱a̱ꞌáꞌyána, ki̱a̱ kjuíntjónjnúꞌun nangi Ngalilea̱.

³³ Kó Peé, bi̱ katsoó Kjisoo̱: –Ndatsi ngayeje xi ngiti̱ sꞌi̱jinjiín ji, ta̱nga an jmíni̱xtjin bo̱a̱ sa̱ꞌin an.

³⁴ Sꞌe̱ Kjisoo̱, bi̱ katsó: –Ja̱koxi̱ ni xi xian an nga kui ni̱xtji̱e̱e̱n ji, ngindiee̱ nga skja̱ndáyà xo̱nda̱xi̱ꞌii̱n, ján ndi̱yà je kiniꞌínkiejín yojòo̱ nga yení.

³⁵ Kó bi̱ katsó Peé: –Ndatsi ko̱yàjòo̱ ji, ta̱nga jmíni̱xtjin nga sa̱ꞌinkiejín an yojona nga bee ji. Kó ngayeje xota̱ tsi̱ꞌe̱ xi ngasee̱ ti̱ bo̱a̱ ti̱ katsó nga.

Kjisoo̱ bi̱ tsꞌén tsíchji̱a̱a̱ Néná

³⁶ Kósꞌe̱ jachójo̱ Kjisoo̱ xota̱ tsi̱ꞌe̱ ngo ngi̱ndie xi ꞌmí Jetsemani̱, kó bi̱ katsoó: –Kꞌi̱e̱ ti̱ndyionrajnú kꞌi̱e̱e̱, tji̱e̱nga nga ki̱a̱a̱ kjuín án nga kuichjiáa̱ Na̱ꞌmina.

³⁷ Kó kijíjo̱ Peé ko̱jo nga jó ndií Sebedeoo̱, kó ítsꞌi̱yanii̱ nga ꞌniú ndasen ko̱jo ꞌniú nda̱ kamaá.

³⁸ Kósꞌe̱ Kjisoo̱, bi̱ katsoó: –Achichí ndasen tikón ini̱ma̱na ngaskande nga ko̱yà an, ti̱ndyionrajnú kꞌi̱e̱e̱, kó nijan ku̱i̱ndyionda.

³⁹ Kó Kjisoo̱ ngi̱chí kijíboaꞌá, asiéntikoó kó yejénxtien kje̱n ngaskande nga kisitꞌaa̱ tꞌanangii̱, sꞌe̱ tsíchji̱a̱a̱ Néná, nga bi̱ katsó: –Na̱ꞌmi, tsi ka̱ma, chje̱ꞌéxín boeꞌéní kuí kjo̱a̱ni̱ma̱a̱, ta̱nga jmí tsi ni xi xian an ni xi ngatama, ta̱sá ngatama ni xi mejeén ji.

⁴⁰ Kó jachó Kjisoo̱ nínga síndo xota̱ tsi̱ꞌe̱, kó kamábe nga kjiyojofé, sꞌe̱ bi̱ katsoó Peé: –A kamájín chií nijan ikindyia ndyikón tsi ta̱ ngo ora̱.

⁴¹ Ngata̱ tsjayojoféjínjnú, ta̱sá Néná ndókjo̱a̱jnúu̱, tsi̱ꞌe̱ nga chjátꞌayákónjínjnú, ja̱koxi̱ nga a̱si̱énni̱xtjinjnú ꞌniú tikón, ta̱nga inda tikón yojojnú.

⁴² Kó ti̱ kijí nginí Kjisoo̱ ingo ndi̱yà, ti̱ tsíchji̱a̱ nginií Néná, nga bi̱ katsó: –Na̱ꞌmi, tsi kjo̱a̱ꞌniútjínnií nga kjo̱a̱ꞌa an kui kjo̱a̱ni̱ma̱a̱, kjo̱a̱jiín, ngatama ni xi mejeén ji nga ka̱ma.

⁴³ Kó nga jachó nginí Kjisoo̱ nínga síndo kui jaá, ti̱ kamábe nginí nga kjiyojofé, ngatꞌa̱ ngaskande tjísichjá má ndyi̱ko̱n nga ńjñaá.

⁴⁴ Kó ti̱ índo soboá nginí, sꞌe̱ Kjisoo̱ ti̱ kijíchji̱a̱ nginií Néná xi ma ján ndi̱yà, kó ti̱ katsó nginí ni xi ja̱bo̱a̱ je katsó.

⁴⁵ Kósꞌe̱ jachókoón xota̱ tsi̱ꞌe̱, kó bi̱ katsoó: –Tsjayojoféjnú ꞌne̱, kó ti̱ꞌankjaꞌyájnú, jè jachó chi̱bo̱a̱ nga ndií nda̱ xi̱ꞌii̱n si̱ꞌankꞌasꞌien ngi̱ya tsja xota̱ jé.

⁴⁶ Ti̱sítji̱e̱njnú, tjián ꞌne̱, tsitsíjenjnúu̱ nga je tsꞌéndibá tiña xi sa̱ꞌínkꞌasꞌienna.

Bi̱ tsꞌén kandobá Kjisoo̱

⁴⁷ Kó ti̱ tsꞌénchji̱a̱ ngase Kjisoo̱ nga jachókoón nda̱ xi ꞌmí Jundaa̱, ngo nda̱ xi chji̱a̱ni nga tiejó xota̱ tsi̱ꞌe̱, kó kjín xota̱ tji̱e̱njo xi ndyi̱yaꞌa ki̱cha̱ ko̱jo yá, kó kui xotaa̱, já ngito̱ko̱o̱ chináꞌmii̱, ko̱jo já chji̱ni̱e̱kjo̱a̱kitii̱, ko̱jo já xchá ngito̱ko̱o̱ na̱xi̱ńdaá xí katsangiya.

⁴⁸ Kó kui nda̱ xi katsꞌénkꞌasꞌien Kjisoo̱ ngo chi̱bo̱a̱ katsjaá kui xotaa̱ nga bi̱ katsoó: –Kui xi ngo ndsó tsjàa̱ tꞌanijon, kuí boá xi Kjisoo̱, kó ndo̱bo̱a̱jnú.

⁴⁹ Kó Jundaa̱ tji̱e̱nmá jachókón tiñaa̱ Kjisoo̱, kó bi̱ katsoó: –¡Tinde Mostro̱! Kó ngo ndsó katsjaá tꞌanijon.

⁵⁰ Ta̱nga Kjisoo̱, bi̱ katsoó: –Nda̱ amingo̱, ti̱ꞌin ji ni xi si̱ꞌin ji. Kó kui jaá jachókón tiñaa̱ Kjisoo̱, sꞌe̱ katsoboá.

⁵¹ Ta̱nga ngo nda̱ xi nijan tikónjo̱ Kjisoo̱ ki̱a̱a̱, tsꞌaxié ki̱cha̱ndojoó, kó katsꞌénꞌoón nga tsatiee̱ tji̱bo̱a̱nijon ngo nda̱ mosoo̱ chináꞌmi xi ꞌniú nkꞌa xaá.

⁵² Kósꞌe̱ Kjisoo̱, bi̱ katsó: –Chje̱ꞌétjé ki̱cha̱ndojóo̱, ngatꞌa̱ xi ki̱cha̱ tsꞌenkꞌién, ti̱ ki̱cha̱ niꞌánkꞌiénni nga.

⁵³ A niꞌínkjéjín ji nga ka̱ma kuichjiáa̱ Na̱ꞌmina ngotꞌe̱ tsi̱ꞌe̱ nga sa̱ngíyána tiejó xtín ndítsjiee̱ xi jun tsi̱ꞌe̱ nga kꞌo̱xiéꞌána.

⁵⁴ Ta̱nga tsi bo̱a̱ sa̱ꞌin an, ja̱ kótsꞌèn kjo̱tjosón ni xi kjitꞌa xo̱jo̱n eén Néná, nga bo̱a̱ tsó nga chjiéngá bo̱a̱ tsꞌén ka̱ma kui nii̱.

⁵⁵ Ti̱ kuii̱ chi̱bo̱a̱, bi̱ katsoó Kjisoo̱ ngayeje xotaa̱: –A chejé án nga ki̱cha̱ndojó ko̱jo nga yá kichꞌiájnú nga jéꞌe̱ndoboájnúꞌun. Ndyiojón ndyiojón akoyá an ndi̱tsen na̱ngo̱xi̱i̱, kó kandobájínjnúꞌun.

⁵⁶ Ta̱nga ngayeje kui nii̱ kjimá tsi̱ꞌe̱ nga kjo̱tjosón ni xi kjitꞌa xo̱jo̱n eén Néná xí katsꞌénda já chji̱ni̱e̱ꞌe̱én Néná. Kósꞌe̱ ngayeje xota̱ tsi̱ꞌe̱ Kjisoo̱ íjñámasien, sꞌe̱ tsanga.

Bi̱ tsꞌén tsangínjo̱ Kjisoo̱ ngindyi̱ko̱n jáxaá

⁵⁷ Já xí katsoboá Kjisoo̱ kijíjo̱ nínga tikón ngito̱ko̱o̱ chináꞌmi xi ꞌniú nkꞌa xaá xi ꞌmí Kaifaa̱, nínga je síndotikó já chji̱ni̱e̱kjo̱a̱kitii̱, ko̱jo já xchá ngito̱ko̱o̱ na̱xi̱ńdaá.

⁵⁸ Kó Peé ńkjin ńkjin kijítji̱ngii̱ ngaskande nga jachó ndi̱tsen ndiꞌaa̱ chináꞌmi xi ꞌniú nkꞌa xaá, sꞌe̱ tsꞌasꞌien, kó ki̱a̱ kisꞌijñajii̱n jájún xi kondaa̱, tsi̱ꞌe̱ nga sku̱i̱e̱ ni xi ka̱ma nga kju̱i̱e̱tꞌaa̱.

⁵⁹ Kó já ngito̱ko̱o̱ chináꞌmii̱ ko̱jo ngayeje jáxá ngito̱ko̱o̱ ndyi̱mongase ngo éndísó kondraa̱ Kjisoo̱ ta̱ tsi̱ꞌe̱ nga si̱ꞌankꞌién,

⁶⁰ ta̱nga jmí ni kasakojiín, ndatsi achichí kamá chistiko̱ ndiso xi jachó. Ti̱chaa̱n nga jetꞌa jachó jó chistiko̱ ndiso,

⁶¹ xi bi̱ katsó: –Kuí nda̱a̱ xi bi̱ katsó: «Ka̱mana sa̱ꞌinkixóndó án na̱ngo̱xi̱i̱ Néná, kó ján tsí ni̱xtjin sa̱ꞌinda ngiñá an kje̱ꞌe.»

⁶² Kó nda̱ ngito̱ko̱o̱ chináꞌmi xi ꞌniú nkꞌa xaá jastjíe̱n, nga bi̱ katsoó Kjisoo̱: –A jmí ni séjín ji. Mí ni xi ndyi̱chji̱a̱ kui jaá kondra̱ tse̱.

⁶³ Ta̱nga Kjisoo̱ jmí ni katsójín. Kósꞌe̱ chináꞌmi xi ꞌniú nkꞌa xaá, bi̱ katsoó: –Ngiboanéná xi tikoón, nga tꞌíyéjne̱ tsi ji xi Kristoo̱, ndií Néná.

⁶⁴ Sꞌe̱ Kjisoo̱, bi̱ katsó: –Jí xí jè bo̱a̱ kase, kó xiyàjnúꞌun nga ndeskande ngotꞌe̱ ku̱i̱ꞌítsꞌi̱yani nga xcha̱jnú nga ndií nda̱ xi̱ꞌii̱n kꞌuijñá nínga kixi̱i̱ ngaꞌniuú Néná, ko̱jo nga kjo̱e̱ꞌéjinni ngi̱jin ṉdi̱ nga kji̱ndi̱báni ndiꞌakꞌajmi jàn.

⁶⁵ Kósꞌe̱ chináꞌmi xi ꞌniú nkꞌa xaá, katsꞌénxchán, kó iskjíndiyájón má ńjño xi yajá kuí, sꞌe̱ bi̱ katsó: ¡Chꞌo katsoó Néná! Kó si̱ꞌan ngase chistiko̱. Jún má xi kandaꞌyájnú én chꞌo tsó xi tsíchji̱a̱,

⁶⁶ kótsꞌèn sasiénjnú kui nii̱ jún. Sꞌe̱ bi̱ katsó kui jaá: –Tjínrií jé, kó chjiéngá si̱ꞌankꞌien.

⁶⁷ Kósꞌe̱ akatítiajón kje̱n Kjisoo̱, kje̱ꞌe xí yeꞌeé tji̱ngo̱, kó kje̱ꞌe xí tsatꞌa tꞌanijon,

⁶⁸ nga bi̱ katsoó: –Kristo̱, tꞌíyetjén ji xikoó ngo nda̱ chji̱ni̱e̱ꞌe̱én Néná, ꞌyání xi yeꞌeé tji̱ngo̱.

Bi̱ katsó Peé nga katsꞌénkiejín yojoo̱ nga be Kjisoo̱

⁶⁹ Kó Peé ki̱a̱ xió tikón xtji̱e̱e̱n ndi̱tsee̱n, kó jachókón tiñaa̱ ngo na̱ chji̱ni̱e̱ꞌbo, xi bi̱ katsoó: Ko̱jo jí boá xi tińtje̱je ji Kjisoo̱, kui xota̱ xi chji̱a̱ni nangi Ngalileaa̱.

⁷⁰ Ta̱nga Peé katsꞌénkiejín yojoo̱ ngindyi̱ko̱n xotaa̱, nga bi̱ katsoó: –Bejín an ni xi se ji.

⁷¹ Kó kijí xtji̱e̱e̱n nga̱ntjo̱a̱a̱ nínga kamábe nginí ingo na̱ chji̱ni̱e̱ꞌbo, kó kui naa̱, bi̱ katsoó xota̱ xi síndo ki̱a̱a̱: –Ko̱jo kuí xotaa̱ xi kistsoꞌbájo̱ Kjiso̱ xi chji̱a̱ni Nasaree̱t nga.

⁷² Ta̱nga Peé, ti̱ katsꞌénkiejín nginí yojoo̱, nga bi̱ katsó: –Ngiboanéná nga bejín an kui nda̱a̱.

⁷³ Ngi̱chí sájín, tjín já xí síndo ki̱a̱a̱ xi jachókón tiñaa̱ Peé, kó bi̱ katsoó: –Ja̱koxi̱ nga ki̱a̱ kisꞌiṉtje̱tji̱ngìi̱ Kjisoo̱, ngatꞌa̱ xikótsꞌèn chji̱a̱ já xí chji̱a̱ni Ngalilea̱, bo̱a̱ tsꞌén ndokjo̱e̱ ji.

⁷⁴ Kósꞌe̱ Peé ítsꞌi̱yanii̱ nga chꞌo tsꞌén tsíchji̱a̱, ko̱jo nga ngiboanéná katsó, nga bi̱ katsó: ¡Bejín an kui nda̱a̱! Kó ti̱ kjiꞌa askjandáyà xo̱nda̱xi̱ꞌii̱n.

⁷⁵ Kósꞌe̱ Peé jaꞌátsjiee̱n ni xi katsó Kjisoo̱, nga bi̱ katsoó: «Ngindiee̱ nga skja̱ndáyà xo̱nda̱xi̱ꞌii̱n, ján ndi̱yà je kiniꞌínkiejín yojòo̱ nga yení.» Sꞌe̱ jataxie ndi̱tsén jàn, kó achichí on askjandá Peé.